1. Kai salah sada cara si erban Jop meteh sipat-sipat Jahwe terbagesen?

 BAS segedang geluh Jop, pasti rusur ia ercakap-cakap ras kalak si deban. Tapi, si luar biasana eme percakapenna ras Dibata Jahwe. Paksa si e, ipetetap Jahwe ateNa ukur Jop maka Ia seh kel pentarNa janah ngasup mereken keperlun umatNa. Emaka, suruh Jahwe perdiateken Jop piga-piga ciptanNa si luar biasa. Contohna, ingetken Jahwe Jop maka banci berekenNa keperlun binatang-binatang. Emaka, pasti ngasup Ia mereken keperlun Jop. (Jop 38:39-41; 39:1, 5, 13-16) Alu ngukuri contoh-contoh arah ciptan, dat Jop pelajaren si luar biasa kerna sipat-sipat Dibata.

2. Engkai maka banci saja mesera siakap mperdiateken ciptan Jahwe?

² Kita pe banci mpelajari terbuen kerna Dibata adi siperdiateken ciptanNa. Tapi banci saja labo lalap nukah ngelakoken si e. Adi kita tading bas kota, banci saja jarang siidah pemandangen alam si mejile. Amin pe i deher rumahta lit pemandangen alam si mejile, banci saja la siakap kita sempat mperdiatekenca. Emaka, mari sibahas kai gunana adi siban waktu ras siusahaken mperdiateken ciptan Jahwe. Sibahas ka kari uga Jahwe ras Jesus nggunaken ciptan bas ngajar, ras kai si banci silakoken guna mpelajari terbuen arah ciptan.

3. Kai buktina maka ate Jahwe meriah min ukur Adam perban kai si enggo ciptakenNa?

³ Ate Jahwe meriah min akap manusia si pertama perban kai si enggo ciptakenNa. Sanga ciptaken Dibata Adam, ibereNa man bana pardis jadi inganna tading janah suruhNa ia si ngurus ras mpebelang pardis e. (Kej. 2: 8, 9, 15) Cuba bayangken uga riahna akap Adam sanga idahna benih-benih turah ras bunga-bunga pe mekar. Mbelin kel hak istimewa Adam guna ngurus Taman Eden. (Kej. 2:19, 20) Situhuna, banci nge iban Jahwe gelar binatang-binatang e, tapi suruhNa Adam si ngelakokenca. Sope iban Adam gelar binatang-binatang e, pasti perdiatekenna lebe bentuk binatang e bage pe tabiatna. Pasti meriah kel akap Adam ngelakoken si e. Tugas e nampati Adam meteh maka Jahwe seh kel pentarna janah ciptanNa seh kel jilena.

4. (a) Kai salah sada alasen engkai maka perlu siperdiateken ciptan? (b) Ciptan si apai nge si meriahna kapndu ngenenca?

⁴ Salah sada alasenta engkai maka arus siperdiateken ciptan eme perban bage me sura-sura Jahwe. IahkenNa kita, nina, “Tataplah ku langit janah nenlah.” Kenca si e, isungkunNa, “Ise si nciptaken kerina e?” Pasti enggo siteh jawapenna. (Jes. 40:26) Luar biasa kel kerina si iciptaken Jahwe la soal si lit i langit, i doni, ras i laut. Mbue si banci sipelajari arah ciptan e nari. (Ms. 104:24, 25) Cuba ukuri cara Dibata nciptaken kita. IbanNa gelah banci meriah ukurta perban pemandangen alam si mejile. IbereNa kita kengasupen guna ngenen, megi, njemak, nggejapken, ras nganggeh. Si e kerina banci erban kita ermeriah ukur sanga mperdiateken erbage-bage ciptan Dibata.

5. Menurut Roma 1:20, kai gunana adi siperdiateken ciptan Jahwe?

⁵ Bas Pustaka, lit alasen penting si deban engkai maka perlu siperdiateken ciptan. Ciptan ngajarken man banta kerna sipat-sipat Jahwe. (Baca Roma 1:20.) Contohna, cuba perdiateken erbage-bage ciptan Jahwe si luar biasa si lit i sekelilingta. Si e ngajari kita maka Dibata e seh kel pentarna. Selain si e, cuba ukuri erbage-bage pangan si banci sipan. Si e ncidahken alu jelas uga kelengna ate Jahwe man jelma. Sanga sipelajari sipat-sipat Jahwe arah ciptanNa, banci reh bagesna sitandai Ia janah teriahken kita rembak ras Ia. Gundari, mari sibahas piga-piga cara Jahwe nggunaken ciptan bas mereken pelajaren si penting man banta.

6. Kai si banci sipelajari arah perik-perik si pindah?

⁶ Enggo itetapken Jahwe waktuna. Tiap tahun, antara akhir bulan Februari ras  pertengahen bulan Mei, banci idah kalak Israel burung bangau pindah ku daerah utara. Nina Dibata man kalak Israel, “Burung bangau saja pe tehna ndigan waktuna pindah.” (Jer. 8:7) Enggo itetapken Jahwe waktu man burung bangau e guna pindah. Bage ka pe, enggo itetapkenNa waktu guna wari penghakimenNa. Sanga siperdiateken burung bangau si pindah e, iingetken kita gelah tek maka lit “waktu si enggo itetapken” Jahwe guna engkernepken doni si jahat enda.​—Hab. 2:3.

7. Kai si banci sipelajari arah perkabang perik? (Jesaya 40:31)

⁷ Ibere Jahwe gegeh man umatNa. Arah Jesaya, erjanji Jahwe maka umatNa si lemah ntah pe kitik ukur, pasti ipegegehiNa gelah banci ‘kabang meganjang bagi kuliki.’ (Baca Jesaya 40:31.) Pasti rusur idah kalak Israel kuliki kabang i langit janah sekali-sekali ngenca kepakkenna kabengna. Banci ilakoken kuliki bage perban manpaatkenna arus udara si erban ia kabang reh ganjangna. Si e ngingetken kita maka banci bereken Jahwe kita gegeh bagi si iberekenNa man perik e. Sanga siidah perik si luar biasa e kabang reh ganjangna i langit amin pe sekali-sekali ngenca kepakkenna kabengna, si e ngingetken kita maka banci bereken Jahwe kita gegeh guna ngadapi masalahta.

8. Kai si pelajari Jop arah ciptan Dibata, ras kai pelajarenna man banta?

⁸ Jahwe e terteki. Isampati Jahwe Jop gelah reh tekna ia man baNa. (Jop 32:2; 40:6-8) Bas percakapen Jahwe ras Jop, melala ituriken Dibata kerna ciptan, termasuk bintang-bintang, embun, ras kilap. Ikataken Jahwe ka kerna binatang-binatang termasuk lembu jantan liar ras kuda. (Jop 38:32-35; 39:9, 19, 20) Kerina e mbuktiken maka luar biasa kel kuasa Jahwe, kepentarenNa, ras kekelengenNa. Kenca megi si e kerina, reh tekna Jop man Jahwe. (Jop 42:1-6) Bage ka pe, adi siperdiateken ciptan, iingetken kita maka Jahwe ndauh pentaren ras ndauh belinen kuasaNa asangken kita. Selain si e, banci idungiNa kerina masalahta janah nggit Ia nampati kita. Adi lalap siinget kerna si e, banci kita reh tekna man baNa.

9-10. Kai si banci sipelajari kerna Jahwe arah matawari ras udan?

⁹ Mbue kel si iteh Jesus kerna alam enda. Sanga ciptaken Bapakna alam semesta enda, ikut Jesus nampati selaku “sierdahinNa si ahli.” (Kua. 8:30) Sanga Jesus i doni, igunakenna ciptan bas ngajari murid-muridna kerna Bapakna. Mari sibahas kai si ajarkenna.

¹⁰ Keleng ate Jahwe kerina jelma. Bas Khotbah Jesus i Gunung, icakapkenna kerna matawari ras udan, si labo penting akap enterem kalak ngukurisa. Duana ciptan enda penting kel man kegeluhenta. Situhuna, banci nge la ibere Jahwe udan ras matawari man kalak si la nembah Ia. Tapi, perban keleng ateNa kerina jelma, la banNa bage. (Mat. 5:43-45) Igunaken Jesus pelajaren enda ngajari murid-muridna maka ate Jahwe sikelengi min kerina jelma. Emaka, sanga siidah matawari terbenam ntah pe sanga nusur udan, banci siidah kekelengen Jahwe si la erpilihen. Si e ngiahken kita ngusih kekelengen Jahwe alu erberita man kerina jelma.

11. Kai gunana adi siperdiateken perik-perik i langit?

 ¹¹ Lalap isikapken Jahwe keperlunta. Bas khotbah si seri, ikataken Jesus ka, “Perdiateken min perik-perik i langit. La ia nuan benih ntah pe rani ntah pe nimpan bas lumbung, tapi ibere Bapak kena si i surga nge ia man.” Banci saja, kalak si megiken Jesus paksa si e, idahna perik-perik si kabang sanga sungkunna kalak e, “La kin ergan kena asangken perik-perik e?” (Mat. 6:26) Enda tuhu-tuhu cara si perkeleng guna mpetetap ukurta maka pasti iperdiateken Jahwe keperlunta secara jasmani. (Mat. 6:31, 32) Pelajaren arah ciptan terus mpegegehi umat Jahwe si setia seh ngasa gundari. Sekalak perintis si nguda denga si tading i Spanyol sempat kitik ukurna perban lenga datna ingan tading si cocok. Tapi kenca idahna perik-perik si man biji-bijin ras buah-buahen, reh tenangna ia. Bagenda nina, “Perik-perik e ngingetken aku maka adi perik-perik e saja pe perdiateken Jahwe, pasti perdiatekenNa ka nge aku.” La ndekah kenca si e, datna me ingan tading si cocok.

12. Kai si banci sipelajari kerna Jahwe arah perik cipcip? (Matius 10:29-31)

¹² Ergai Jahwe kita sekalak-sekalak. Sope iutus Jesus rasul-rasulna guna erberita, sampatina kalak e gelah la mbiar ngadapi tentangen. (Baca Matius 10:29-31.) Icakapkenna kerna sada perik si enggo biasa idah kalak Israel eme perik cipcip. Bas jaman Jesus, perik cipcip murah kel ergana. Tapi nina Jesus man murid-muridna, “Labo sada pe perik e ndabuh ku taneh la teh Bapak kena.” Kenca si e, nina ka, “Ergan nge kena asangken melala perik cipcip.” Ipetetap Jesus ukur murid-muridna maka iergai Jahwe kalak e sekalak-sekalak. Emaka, la perlu kalak e mbiar ngadapi penganiayan. Pasti inget murid-murid kata-kata Jesus e sanga idahna perik cipcip paksa kalak e erberita i kota ras i kuta-kuta. Sanga idahndu perik si kitik, ingetlah maka iergai Jahwe nge kam, perban kam pe ‘ergan asangken melala perik cipcip.’ Alu penampat Jahwe, la perlu kam mbiar ngadapi tentangen.​—Ms. 118:6.

13. Kai si banci sipelajari kerna Jahwe arah ciptan?

¹³ Banci sidat mbue pelajaren si deban kerna Jahwe arah ciptan. Uga carana? Si pertama, perlu siban waktu guna mperdiateken ciptan. Kenca si e, perlu siukuri kai si banci sipelajari kerna Jahwe arah ciptan e. Memang labo lalap nukah ngelakoken si e. Sekalak turang seninata arah Kamerun si gelarna Géraldine, ngataken, “Aku ipebelin i kota. Emaka arus  aku erjuang mperdiateken kai si lit bas alam.” Sekalak pertua si gelarna Alfonso, ngataken, “Perlu kuban waktu sisada guna mperdiateken ciptan Jahwe ras ngukuri kai si banci kupelajari kerna Ia arah ciptan e.”

14. Kai si pelajari Daud sanga ukurina ciptan Dibata?

¹⁴ Rusur ukuri Daud kerna ciptan Dibata. Bagenda nina man Jahwe, “Sanga kutatap langit si banNdu alu tanNdu, janah kutatap bulan ras bintang si enggo banNdu, kai kin manusia e maka ingetNdu ia?” (Ms. 8:3, 4) Payo, sanga tatap Daud ku langit paksa berngi, labo saja meriah ukurna ngenen bintang-bintang, tapi ukurina ka kai si pelajarina kerna Jahwe arah bintang-bintang e. Dungna tehna uga hebatna Jahwe e. Selain si e, ukuri Daud ka uga ia reh belinna bas rahim mamakna. Sanga ukurina kerna uga luar biasana ia iban, reh belinna me pengerganna man kepentaren Jahwe si luar biasa.​—Ms. 139:14-17.

15. Ciptan si apai saja si nampati kam mpelajari sipat-sipat Jahwe? (Masmur 148:7-10)

¹⁵ Bali bagi Daud, banci kita erlajar arah ciptan si lit i deherta. Mbue si banci nampati kita erlajar terbuen kerna sipat-sipat Jahwe. Contohna, ukurilah kerna kuasa Jahwe sanga gejapkenndu las matawari. (Jer. 31:35) Ukurilah kerna kepentaren Jahwe sanga idahndu perik-perik erban asarna. Cuba ka ukuri kerna selera humor Jahwe sanga idahndu anak biang tangkapna atena ikurna. Ngata bujurlah kita man kekelengen Jahwe sanga siidah sekalak pernanden main-main ras bayina. Payo, melala kel kesempatenta guna erlajar kerna Jahwe perban kerina si iciptakenNa muji Ia, la soal ciptanNa e galang ntah pe kitik, si lit i deherta ntah pe si ndauh arah kita.​—Baca Masmur 148:7-10.

16. Kai arusna tekadta?

¹⁶ Dibatata pentar kel, perkeleng, erkuasa, janah kerina si ciptakenNa seh kel jilena. Sipat-sipat e ras sipatNa si debanna banci siperdiateken arah ciptan si lit i sekelilingta. Emaka, sibanlah waktuta guna mperdiateken ciptan Jahwe ras ngukuri kai si banci sipelajari kerna Ia arah ciptan e. Alu bage, reh rembakna me kita ras Penciptata. (Jak. 4:8) Bas artikel seterusna, sipelajari kari uga orang tua banci nggunaken ciptan nampati anakna gelah rembak ras Jahwe.