Engkai maka dilaki si ituriken bas Rut 4:1, 6 ngataken maka rugi ia ntah pe ceda warisenna adi empoina Rut?

Bas jaman Pustaka, adi mate sekalak dilaki janah la lit anakna, kai nge si terjadi man taneh warisenna? Payo nge gelar keluargana bene seh rasa lalap? Jawapenna lit bas Undang-Undang Musa.

Adi lit sekalak dilaki si mate ntah pe si dungna mesera geluhna janah terpaksa dayakenna taneh warisenna, kai nge pagi si terjadi man taneh warisenna e? Seninana ntah pe keluargana si ndeherna banci nebusi ntah nukur mulihi taneh e. Alu bage, taneh e tetap jadi jang keluargana.​—Im. 25:23-28; Bil. 27:8-11.

Gelah gelar keluarga dilaki e tetap lit, arus empoi senina dilaki e diberu arah dilaki si enggo mate ndai. Alu bage, banci ilahirken diberu e anak si nerusken gelar keluarga dilaki ndai janah anak e si jadi ahli waris tanehna. Perban lit pengaturen si perkeleng e, keperlun diberu ndai banci tercukupi. Enda me pengaturen si ikutken Rut.​—Ul. 25:5-7; Mat. 22:23-28.

Cuba perdiateken kai si terjadi man Naomi. Erjabu ia ras sekalak dilaki si gelarna Elimelek. Bas pudi wari, mate dilakina bage pe dua anakna dilaki. Emaka lanai lit si banci mereken keperlunna. (Rut 1:1-5) Kenca mulih Naomi ku Juda, isuruhna permenna Rut guna mindo man Boas gelah tukurna mulihi taneh kalak e. Boas e keluarga Elimelek. (Rut 2:1, 19, 20; 3:1-4) Tapi teh Boas maka lit sekalak dilaki si deheren hubungen keluargana ras Elimelek. Emaka, belinen hak dilaki e guna nukur taneh e mulihi.​—Rut 3:9, 12, 13.

Tangtangna, nggit dilaki e nampati Naomi. (Rut 4:1-4) Memang tehna maka arus ipedaratna sen guna nukur mulihi taneh Elimelek, tapi tehna ka maka Naomi lanai banci ngelahirken anak si jadi ahli waris taneh e. Emaka, taneh Elimelek banci pagi jadi jangna. E me sebapna banci saja dilaki e erpengakap maka alu nampati Naomi, runtung pagi ia.

Tapi berubah pikiren dilaki e kenca tehna maka si arus empoina eme Rut. Nina, “Aku la banci nukursa, rugi kari aku.” (Rut 4:5, 6) Engkai maka berubah pikiren ia?

Adi dilaki e ntah pe kalak si deban ngempoi Rut jenari lit anak Rut dilaki, anak e me si jadi ahli waris taneh Elimelek. Jadi engkai maka si e banci erban dilaki e rugi? La lit ijelasken Pustaka kerna si e, tapi banci saja lit piga-piga alasenna.

• Si pertama, arus ipedaratna sen guna nukur taneh Elimelek, tapi taneh e labo pagi jadi jangna. Taneh e jadi jang anak Rut pagi.

• Si peduaken, ia pagi si ertanggung jawap guna mereken keperlun Naomi ras Rut.

• Si peteluken, adi enggo lit anak dilaki e jenari lit ka anakna si deban ras Rut, warisen dilaki e pe arus ibereken man anak-anak e.

• Si peempatken, adi la lit anak dilaki e, anak si ilahirken Rut me si jadi ahli waris taneh Elimelek bage pe taneh dilaki e. Emaka, sanga mate dilaki e, tanehna jadi jang anak si nerusken gelar Elimelek, labo gelar dilaki e. E me sebapna la ia nggit nampati Naomi perban mbiar ia bene kari taneh warisenna. Pangen akapna Boas si nebusisa. Kenca dilaki e, Boas me si lit tanggung jawapna guna ngempoi Rut. Nggit Boas ngelakoken si e gelah warisen e ‘tetap atas nama dilaki si enggo mate ndai.’​—Rut 4:10.

Pentingen akap dilaki e gelarna ras taneh warisenna. Amin pe usahakenna kel mpertahanken gelarna, kepeken gundari labo teh kalak ise gelarna. La ka datna hak istimewa si ialoken Boas bas pudi wari, jadi salah sada nini bulang Mesias, Jesus Kristus. Dungna, rugi dilaki e perban ia egois ras la nggit nampati kalak si merluken penampat!​—Mat. 1:5; Luk. 3:23, 32.