Artikel Pelajaren 19
Kekelengen ras Keadilen Jahwe guna Ngelindungi UmatNa arah Kejahaten
“Kam kap Dibata si rate ciga kempak perbahanen si la payo; la kap ipediatNdu perbahanen si jahat i adep-adepenNdu.”—MSM. 5:5.
LAGU 142 Ula Lupaken Arapenta
SI IBAHAS *
1-3. (a) Menurut Masmur 5:5-7, uga perasan Jahwe nandangi kejahaten? (b) Engkai maka pelecehen anak ngelanggar “undang-undang Kristus”?
SEGAT ate Dibata Jahwe kerina perbahanen si jahat. (Baca Masmur 5:5-7.) Janah, pasti segat kel ateNa nandangi pelecehen seksual man anak-anak, eme perbahanen si jahat ras erban ciga ate! Perban kita Saksi Jahwe, siusih Ia janah segat ateta pelecehen anak. La sipediat lit pelecehen anak bas runggun Kristen.—Rom. 12:9; Heb. 12:15, 16.
2 Pelecehen anak tuhu-tuhu ngelanggar “undang-undang Kristus”! (Gal. 6:2) Engkai maka bage? Bagi si nggo sipelajari bas artikel sebelumna, dasar undang-undang Kristus eme kekelengen ras keadilen. Kerina e iajarken Jesus arah ranan bage pe perbahanenna. Kalak Kristen situhu-tuhu, patuh man undang-undang e, emaka keleng ate kalak e man anak-anak janah iusahakenna gelah aman iakap anak-anak e. Tapi pelecehen anak eme sada perbahanen si egois ras la adil. E erbanca la aman iakap anak-anak janah la lit kapna si ngkelengi ia.
3 Sayangna, pelecehen seksual man anak-anak eme masalah serius si lit i sebelang doni, janah kalak Kristen situhu-tuhu pe banci terpengaruh. Engkai? Perban “kalak jahat ras penipu” reh buena, janah banci saja lit si erusaha masuk ku runggun. (2 Tim. 3:13) Selain si e, lit piga-piga kalak bas runggun si ngikutken napsu seksna si la wajar janah ilakokenna pelecehen seksual man anak-anak. Mari sibahas ngkai maka pelecehen anak termasuk dosa si seh kel belinna. Sibahas ka kari kai si ilakoken pertua adi lit kalak bas runggun si ngelakoken dosa si mbelin, termasuk pelecehen anak, janah kai si banci ilakoken orang tua guna ngelindungi anak-anakna. *
DOSA SI SEH KEL BELINNA
4-5. Engkai maka kalak si ngelakoken pelecehen anak erdosa man anak e?
4 Pelecehen anak ndekah kel pengaruhna. E erban korbanna rate mesui bage pe kalak si ngkelengi anak e, eme keluargana ras turang senina bas runggun. Pelecehen anak eme dosa si seh kel belinna.
5 Dosa man korban. * Perbahanen e la adil janah erban anak e rate mesui. Bagi si ibahas kari bas artikel berikutna, si ngelakoken pelecehen e nggo ncedai anak e alu erbage cara. Enggo ibanna anak e lanai tek man ia janah lanai aman iakap anak e. Anak-anak arus silindungi arah perbahanen jahat si bage, janah si nggo jadi korban arus isampati ras iapuli.—1 Tes. 5:14.
6-7. Engkai maka pelecehen anak dosa man runggun ras pemerentah?
6 Dosa man runggun. Kalak bas runggun si ngelakoken pelecehen anak nggo ncedai runggun. (Mat. 5:16; 1 Pet. 2:12) Jutan turang seninata erjuang kel mpebadia gelar Jahwe. Emaka adi ipediat runggun lit kalak si ngelakoken pelecehen anak, enda tuhu-tuhu la adil! (Jud. 3) Adi lit kalak bas runggun si ngelakoken perbahanen jahat si ncedai runggun janah la ia ertobat, ia la banci tetap bas runggun.
7 Dosa man pemerentah. Kalak Kristen “arus patuh man pemerentah si erkuasa.” (Rom. 13:1) Bukti kita patuh eme adi siergai janah sipatuhi undang-undang pemerentah. Adi lit kalak bas runggun si ngelanggar undang-undang, misalna ilecehkenna anak-anak, e ertina ia nggo erdosa man pemerentah. (Bandingken ras Perbahanen Rasul-Rasul 25:8.) La lit hak pertua ngukum kalak si ersalah ndai erpalasken undang-undang pemerentah. Aminna pe bage, labo ilindungina kalak si ngelakoken pelecehen anak gelah ula iukum pemerentah. (Rom. 13:4) Pasti iperani kalak si ersalah e kai si isuanna.—Gal. 6:7.
8. Uga nge perasan Jahwe adi erdosa kita man kalak si deban?
8 Si parahna, dosa man Dibata. (Msm. 51:6) Adi ersalah kita man kalak si deban, e ertina nggo erdosa kita man Jahwe. Perdiatekenlah sada contoh arah Undang-Undang si ibereken Dibata man bangsa Israel. Ikataken undang-undang e maka kalak si nangko ntah nipu kalak si deban nggo “erdosa man [Jahwe].” (Im. 6:2-4) Emaka, adi lit kalak bas runggun si ngelakoken pelecehen anak, ia nggo erdosa ntah pe la setia man Dibata perban nggo itipuna anak e janah ibanna lanai aman iakap anak e. Kalak si ngelakoken pelecehen e nggo erban ceda kel gelar Jahwe. E me sebapna, pelecehen seksual man anak-anak eme dosa si ciga kel ate Dibata janah kalak si ngelakokenca arus iukum.
9. Keterangen kai arah Pustaka si nggo ertahun-tahun ibereken organisasi Jahwe, janah ngkai?
9 Ertahun-tahun dekahna, nggo ibereken organisasi Jahwe melala keterangen arah Pustaka kerna pelecehen anak. Misalna, bas Sora Ermomo ras Sadarlah! (mbarenda igelari Sedarlah!), lit artikel si mbahas kai si ilakoken kalak si ilecehken gelah lanai getem pusuhna, uga kalak si deban banci nampati ras ngapulisa, janah uga cara orang tua ngelindungi anak-anakna. Organisasi Jahwe nggo mereken petunjuk si jelas arah Pustaka man pertua kerna kai si arus ilakokenna adi lit si ngelakoken pelecehen anak. Alu ratur, ipereksa organisasi petunjuk-petunjuk man pertua e janah mon-mon isesuaikenna ka petunjuk e. Kai tujunna? Guna mastiken maka lalap idalanken pertua undang-undang Kristus janah gelah adil ras perkeleng perbahanen kalak e sanga lit si ngelakoken dosa pelecehen anak.
SI ILAKOKEN PERTUA SANGA LIT DOSA SI MBELIN
10-12. (a) Sanga itangani pertua perbahanen salah si serius, kai si arus inget kalak e, janah kai saja si arus iukurina? (b) Menurut Jakup 5:14, 15, kai si iusahaken pertua?
10 Sanga itangani pertua perbahanen salah si serius, arus inget kalak e undang-undang Kristus. Arus perkeleng perbahanen kalak e man tiap kalak bas runggun janah arus ilakokenna kai si benar ras adil menurut Dibata. Emaka, sanga iteh pertua lit kalak si nggo ngelakoken dosa si mbelin, arus iukuri kalak e lebe piga-piga hal. Si terutama perlu iukuri pertua eme gelah gelar Jahwe imuliaken janah la ihina kalak. (Im. 22:31, 32; Mat. 6:9) Erusaha ka kel pertua nampati turang senina bas runggun gelah tetap ndeher ras Jahwe. Iapuli ras ipegegehi pertua ka kalak si jadi korban arah dosa si mbelin.
11 Pertua pe erusaha mastiken nggo ertobat ntah lang kalak si ngelakoken dosa si mbelin e. Adi nggo ertobat ia, isampati pertua ia gelah rembak mulihi ras Jahwe. (Baca Jakup 5:14, 15.) Kalak Kristen si ipuaskenna atena sura-surana si salah janah dungna ngelakoken dosa si mbelin bali bagi kalak si sakit. Enda maksudna lanai ia rembak ras Jahwe. * Pertua bali bagi dokter. Iusahakenna gelah “kalak si sakit [maksudna si ngelakoken dosa e] jadi sehat.” Nasehat si ibereken kalak e arah Pustaka banci nampati ia gelah rembak mulihi ras Dibata. Tapi, enda banci terjadi adi tuhu-tuhu ia ertobat.—Perb. 3:19; 2 Kor. 2:5-10.
12 Jelas me, mberat kel tanggung jawap pertua-pertua. Keleng kel ate kalak e turang senina bas runggun perban nggo ibereken Dibata tanggung jawap guna ngurus umatNa alu cara si adil ras perkeleng. (1 Pet. 5:1-3) Ate kalak e gelah aman iakap turang senina bas runggun. Emaka, adi lit kenca laporen kerna dosa si mbelin, termasuk pelecehen anak, mis itangani kalak e. Kai saja si ilakokenna? Mari sibahas penungkunen si lit bas paragrap 13, 15, ras 17.
13-14. Arus nge patuh pertua man undang-undang pemerentah bas inganna tading kerna ngelaporken kalak si iduga ngelakoken pelecehen anak? Jelasken.
13 Arus nge patuh pertua man undang-undang pemerentah bas inganna tading kerna ngelaporken kalak si iduga ngelakoken pelecehen anak? Arus. Bas piga-piga negara, lit undang-undang si ngataken maka pelecehen anak arus ilaporken. Pertua bas negara e arus patuh man undang-undang e. (Rom. 13:1) Undang-undang si bage labo ertentangen ras undang-undang Dibata. (Perb. 5:28, 29) Emaka adi lit si ngelaporken man pertua kerna pelecehen anak, mis isungkun pertua ku kantor cabang gelah itehna cara ngelaporkenca.
14 Sanga pertua ngerana man korban, orang tuana, ntah pe man kalak si meteh kerna pelecehen e, alu mehuli ikataken pertua maka lit hak kalak e ngelaporkenca ku pemerentah. Tapi uga adi si ilaporken e kalak si lit bas runggun janah melala kalak si nggo metehsa? Kalak Kristen si ngelaporkenca la perlu erpengakap maka nggo ceda banna gelar Dibata, perban si ngelakoken pelecehen e me si nggo erban ceda gelar Dibata.
15-16. (a) Menurut 1 Timotius 5:19, ngkai maka silang-langna arus lit dua saksi sope iban pertua panitia pengadilen? (b) Kai nge si ilakoken pertua sanga itehna lit kalak bas runggun si iduga ngelakoken pelecehen anak?
15 Sope iban pertua panitia pengadilen, ngkai maka silang-langna arus lit dua saksi? Perban bage kin maka adil nina Pustaka. Adi lit kalak si iduga ngelakoken dosa si mbelin tapi la iakuina, arus lit dua saksi sope iban pertua panitia pengadilen. (Ul. 19:15; Mat. 18:16; baca 1 Timotius 5:19.) Adi bage, arus nge lit dua saksi gelah banci silaporken kerna pelecehen anak ku pemerentah? Lang. La perlu lit dua saksi sope pertua ntah pe kalak si deban ngelaporken kejahaten e ku pemerentah.
16 Sanga iteh pertua lit kalak bas runggun si iduga ngelakoken pelecehen anak, iusahakenna ngikuti undang-undang si berlaku kerna ngelaporken perbahanen si bage, janah iselidikina uga kejadin situhuna. Kenca si e, iputusken kalak e arah Pustaka perlu ntah lang iban panitia pengadilen. Isungkuni pertua lebe kalak si iduga e tuhu ntah lang nggo ilakokenna pelecehen anak. Adi la iakuina, isungkuni pertua me kalak si deban si mungkin meteh kai si terjadi. Panitia pengadilen banci iban adi lit silang-langna dua saksi, eme si ngelaporkenca ras sekalak nari si meteh kejadin e ntah pe pernah idahna kejadin si bage ilakoken kalak si iduga e. * Bicara kalak si ngelaporkenca ngenca si jadi saksi, labo ertina kai si ikatakenna e la tuhu. Aminna pe la lit dua saksi guna mbuktiken maka sekalak jelma nggo ngelakoken pelecehen anak, iteh pertua nge maka kalak si iduga e banci saja nggo ngelakoken dosa si mbelin si nakiti kalak si deban. Terus iapuli pertua ras ipegegehina kalak si nggo isakiti e. Janah, iperdiateken pertua kel turang senina bas runggun guna ngelindungi kalak e arah kalak si iduga ngelakoken pelecehen anak.—Perb. 20:28.
17-18. Jelaskenlah kai si ilakoken panitia pengadilen.
17 Kai nge si ilakoken panitia pengadilen? Iputusken panitia e banci ntah lang kalak si nggo ngelakoken dosa si mbelin tetap bas runggun. Labo panitia e si erban keputusen gelah si ngelakoken pelecehen e iukum perban nggo ilanggarna salah sada undang-undang pemerentah. Panitia e la ikut campur kerna uga cara pemerentah ngukum kalak si ngelanggar undang-undang e.—Rom. 13:2-4; Tit. 3:1.
18 Bas panitia pengadilen, si itangani pertua eme hubungen kalak si ersalah e ras Dibata bage pe ras turang senina. Igunaken kalak e Pustaka guna erban keputusen nggo ertobat ntah lang kalak si ngelakoken pelecehen e. Adi la ia ertobat, ikataken pertua man bana maka ipecat me ia. Kenca si e iumumken kalak e bas runggun maka ia lanai sekalak Saksi Jahwe. (1 Kor. 5:11-13) Adi ertobat ia, banci ia tetap bas runggun. Tapi, ikataken pertua man bana maka banci saja lanai ia dat tugas kai pe bas runggun ertahun-tahun dekahna, ntah pe seh segedang geluhna. Perban keleng kel ate pertua anak-anak, iusahakenna gelah aman iakap kalak e. Emaka ipersingeti pertua tep-tep orang tua bas runggun guna njaga anakna gelah la ndeher ras kalak si ngelakoken pelecehen e. Sanga mpersingeti orang tua, pertua arus hati-hati gelah ula ikatakenna ise kalak si nggo pernah ilecehken.
LINDUNGILAH ANAKNDU
Banci ilindungi orang tua anakna arah pelecehen seksual adi iajarina kerna kai si arus iteh kalak e soal seks. Guna ngelakokenca, banci igunaken orang tua keterangen si nggo ibereken organisasi Jahwe. (Nen artikel pelajaren 19, paragrap 19-22)
19-22. Kai si banci ilakoken orang tua guna ngelindungi anakna? (Nen gambar bas sampul majalah enda.)
19 Ise nge si terutama ertanggung jawap ngelindungi anak-anak arah bahaya? Orang tua. * Anak-anakndu eme pemere arah Dibata. Nina Pustaka, “[Jahwe] kap si mereken anak-anak e.” (Msm. 127:3) Enggo ibereken Jahwe man bandu tanggung jawap guna ngelindungi anak-anakndu. Kai si banci ilakokenndu guna ngelindungi anak-anakndu arah pelecehen seksual?
20 Si pertama, arus itehndu kai kin pelecehen e. Arus itehndu kalak si uga kin si ngelakoken pelecehen anak e janah kai saja taktikna nipu anak-anak. Arus ka itehndu keadan kai saja ntah pe ise saja si banci mbahayaken anakndu. (Kua. 22:3; 24:3) Ingetlah, kalak si biasana ngelakoken pelecehen eme kalak si nggo itandai anak e janah tek anak e man bana.
21 Si peduaken, rusurlah kam ngerana ras anakndu janah iahken ia gelah terus terang man bandu. (Ul. 6:6, 7) E ertina sanga ngerana anakndu, begikenlah ia alu tutus. (Jak. 1:19) Ingetlah maka anak si nggo ilecehken biasana mbiar ntah pe la nggit nurikenca man ise pe. Engkai? Perban akapna labo kari tek kalak man bana, ntah pe nggo iancam si ngelakoken pelecehen e ia. Adi la bagi biasana akapndu anakndu, sungkunilah ia alu manjar-anjar janah sabarlah kam megikenca.
22 Si peteluken, ajarilah anakndu. Ajarilah anakndu kai si perlu itehna kerna seks. Keterangen si iberekenndu arus sue ras umurna gelah banci iangkaina. Ajari ia gelah itehna kai si man katankenna ras kai si arus ilakokenna adi lit si atena njemak-njemak ia alu cara si la sopan. Organisasi Jahwe nggo mereken melala keterangen si banci ipakendu guna ngelindungi anakndu.—Nen kotak “ Pelajarilah, jenari Ajari Anakndu.”
23. Uga nge perasanta nandangi pelecehen seksual man anak-anak, janah penungkunen kai si man bahasenta bas artikel berikutna?
23 Selaku Saksi Jahwe, ciga kel ateta pelecehen seksual man anak-anak perban e dosa si seh kel belinna ras perbahanen si seh kel jahatna. Sidalanken ateta undang-undang Kristus, emaka la silindungi kalak si ngelakoken pelecehen arah akibat si arus itanggungna perban dosana. Tapi, adi lit turang seninata si pernah ilecehken, uga carata nampatisa? Jawapenna lit bas artikel berikutna.
LAGU 103 Pertua Pemere Jahwe
^ par. 5 Bas artikel enda sibahas kari uga carana ngelindungi anak-anak arah pelecehen seksual. Sibahas ka uga pertua banci ngelindungi runggun janah uga orang tua banci ngelindungi anak-anakna.
^ par. 3 PENJELASEN: Adi lit kalak dewasa si nggunaken anak-anak guna muasken napsu seksna, enda igelari pelecehen seksual man anak-anak. Banci saja si ilakokenna eme erhubungen seks, hubungen seks arah babah ntah pe arah anus, njemak-njemak alat kelamin anak e, buah dadana, buta-butana, ntah pe perbahanen najis si debanna. Si melalana jadi korban eme anak-anak si diberu, tapi anak dilaki pe lit ka si jadi korban. Amin gia buen si ngelakoken pelecehen anak eme dilaki, tapi lit ka nge diberu si ngelakokenca.
^ par. 5 PENJELASEN: I bas artikel enda bage pe bas artikel berikutna, “korban” maksudna kalak si pernah ilecehken sanga anak-anak denga. Ikataken ia korban perban nggo imanpaatken ia, mesui kel atena, janah labo ia si salah.
^ par. 11 Adi lit kalak si lemah kinitekenna janah ngelakoken dosa si mbelin, labo banci e ijadikenna alasen gelah la ertanggung jawap kerna kesalahenna e. Tetap ia arus ertanggung jawap man Jahwe perban nggo ipilihna ngelakoken si salah.—Rom. 14:12.
^ par. 16 Anak si nggo ilecehken la perlu ikut sanga ijumpai pertua kalak si iduga nggo ngelecehken anak e, gelah anak e la reh sedihna janah la reh biarna. Orang tuana ntah pe kalak dewasa si deban si iteki anak e banci nceritaken man pertua kerna kai si nggo terjadi.
^ par. 19 Si ikataken orang tua i jenda termasuk ka kalak si mpebelin ntah pe kalak si deban si ibereken tanggung jawap guna ngurus anak si kitik denga.
