1. Banci kita tek nandangi dua hal kai?

KELENG ate Dibata Jahwe man umatNa, nai nari, gundari, seh rasa lalap. Ngena ka ate Jahwe keadilen. (Msm. 33:5) Emaka banci kita tek: (1) Sanga lit si la adil man umatNa, ceda kel ukur Jahwe. (2) Erjanji Ia maka pasti iukumNa kalak si la adil man umatNa. Bas artikel si pertama arah empat artikel enda, * nggo sipelajari maka kekelengen me dasar Undang-Undang si ibereken Dibata man kalak Israel erkelangken Musa. Undang-Undang e ngiahken kalak gelah adil man kerina jelma, termasuk man kalak si lemah. (Ul. 10:18) Arah Undang-Undang e terbukti maka iperdiateken Jahwe kel umatNa.

2. Penungkunen kai si man bahasenta?

² Undang-Undang Musa lanai berlaku tahun 33 Masehi sanga runggun Kristen mulai lit. Adi bage, lit denga nge undang-undang man kalak Kristen si dasarna eme kekelengen janah ngiahken kalak gelah adil? Lit. Lit undang-undang si mbaru man kalak Kristen. Bas artikel enda, sibahas lebe undang-undang kai kin e. Kenca si e, sijawap penungkunen enda: Kai buktina kekelengen me dasar undang-undang e? Kai buktina undang-undang e ngiahken kalak gelah adil? Janah menurut undang-undang e, uga arusna perbahanen kalak si lit tanggung jawapna sanga erurusen ras kalak si deban?

3. Kai si termasuk bas “undang-undang Kristus” si icatat bas Galati 6:2?

³ Baca Galati 6:2. Kalak Kristen patuh man “undang-undang Kristus.” Labo iban Jesus daptar peraturen man pengikutna,  tapi si iberekenna eme petunjuk, perentah, ras patoken guna idalanken. Emaka, si termasuk bas “undang-undang Kristus” eme kerina si iajarken Jesus. Gelah lebih siangkai undang-undang e, mari sibahas paragrap berikutna.

4-5. Uga nge cara Jesus ngajar, janah ndigan ia ngajar?

⁴ Uga cara Jesus ngajar? Si pertama, iajarina kalak arah rananna. Kata-katana “erkuasa” perban si iajarkenna eme kebenaren kerna Dibata, kai situhuna tujun nggeluh enda, janah kerna Kerajan Dibata si ndungi kerina masalah manusia. (Luk. 24:19) Si peduaken, Jesus ngajar arah perbahanenna. Arah carana nggeluh, iajarina pengikutna kerna uga arusna cara kalak e nggeluh.​—Joh. 13:15.

⁵ Ndigan nge Jesus ngajar? Sanga ia ngelayani i doni. (Mat. 4:23) Iajarina ka pengikutna la ndekah kenca ia ipekeke. Misalna, pernah icidahkenna bana man murid-muridna si jumlahna kira-kira lebih 500 kalak, janah iperentahkenna kalak e guna ‘erban murid.’ (Mat. 28:19, 20; 1 Kor. 15:6) Selaku kepala runggun, terus iajari Jesus murid-muridna kenca nggo mulih ia ku surga. Misalna, kira-kira tahun 96 Masehi, ipindoken Jesus gelah ipegegehi ras inasehati Rasul Johanes kalak Kristen si ipilih ku surga.​—Kol. 1:18; Ket. 1:1.

6-7. (a) I ja nge ajaren Jesus icatat? (b) Kai buktina patuh kita man undang-undang Kristus?

⁶ I ja nge ajaren Jesus icatat? Bas empat buku Injil melala icatat kerna kai si ikataken Jesus ras kai saja si ilakokenna i doni. Arah buku-buku si deban bas Kitap-Kitap Junani Kristen pe banci siteh terbagesen kerna uga perukuren Jesus, perban si nulissa eme kalak si itegu-tegu kesah si badia janah bas kalak e pe lit “perukuren Kristus.”​—1 Kor. 2:16.

⁷ Pelajarenna: Erguna kel pengajaren Jesus bas kegeluhenta. Emaka undang-undang Kristus negu-negu kerina perbahanenta sanga kita i rumah, bas ingan erdahin, i sekolah, bage pe bas runggun. Banci sipelajari undang-undang e adi sibaca janah siukuri alu mbages Kitap-Kitap Junani Kristen. Sibuktiken maka patuh kita man undang-undang e adi nggit kita ndalanken kerina petunjuk, perentah, ras patoken si lit bas  Kitap-Kitap e. Adi patuh kita man undang-undang Kristus, sipatuhi me Dibatata si perkeleng eme Jahwe. Ia me Sumber kerina pengajaren Jesus.​—Joh. 8:28.

8. Kai nge dasar undang-undang Kristus?

⁸ Rumah si paguh pasti paguh pondasina, emaka aman iakap kalak si tading bas rumah e. Bage ka pe, undang-undang si mehuli arus paguh pondasina ntah pe dasarna gelah aman iakap kalak si ndalankenca. Dasar undang-undang Kristus eme kekelengen. Enda me dasar ntah pe pondasi si mehulina. Engkai maka bage?

9-10. Kai contohna maka kekelengen me si ngiahken Jesus bas kerina perbahanenna, janah uga carata ngusih ia?

⁹ Si pertama, kekelengen me si ngiahken Jesus bas kerina perbahanenna. Perban keleng ate Jesus kalak si deban, mekuah atena kalak e. Emaka iajarina nterem jelma, ipepalemna kalak si sakit, iberena kalak si melihe man, janah ipekekena kalak si nggo mate. (Mat. 14:14; 15:32-38; Mrk. 6:34; Luk. 7:11-15) Amin gia arus ikorbanken Jesus waktu ras tenagana guna ngelakoken si e, tapi tetap iutamakenna kepentingen kalak si deban asangken kepentingenna. Bukti si mbelinna maka keleng ate Jesus manusia eme nggit ia mate guna nebus kita.​—Joh. 15:13.

¹⁰ Pelajarenna: Banci siusih Jesus adi siutamaken kepentingen kalak si deban. Siusih ka Jesus adi sipebelin sipat perkuah ate man kalak bas daerahta. Adi erberita kita janah siajarken kerna berita si meriah perban mekuah ateta kalak si deban, e buktina sipatuhi undang-undang Kristus.

11-12. (a) Kai buktina maka iperdiateken Jahwe kel kita? (b) Uga carata ngusih kekelengen Jahwe?

¹¹ Si peduaken, ibuktiken Jesus maka perkeleng kel Bapakna. Sanga ngelayani i doni, ibuktiken Jesus maka iperdiateken Jahwe kel umatNa. Salah sada cara Jesus mbuktikenca eme alu ngajarken maka kerina kita meherga iakap Jahwe, Bapakta si i surga. (Mat. 10:31) Meriah kel ukur Jahwe ngalo-ngalo biri-biri si bene si nggo ertobat janah mulihken ku runggun. (Luk. 15:7, 10) Ibuktiken Jahwe kekelengenNa man banta alu mereken AnakNa guna nebus kita.​—Joh. 3:16.

¹² Pelajarenna: Uga carata ngusih kekelengen Jahwe? (Ep. 5:1, 2) Meherga siakap turang seninata, janah meriah siakap ngalo-ngalo “biri-biri si bene” si mulihken ku Jahwe. (Msm. 119:176) Sibuktiken maka keleng ateta turang seninata adi nggit kita mereken waktu ras gegehta guna nampati kalak e, khususna sanga perlu ia penampatta. (1 Joh. 3:17) Adi sikelengi kalak si deban, e buktina sipatuhi undang-undang Kristus.

13-14. (a) Menurut Johanes 13:34, 35, kai perentah Jesus man pengikutna, janah ngkai maka e sada perentah si mbaru? (b) Uga carata ndalanken perentah si mbaru e?

¹³ Si peteluken, iperentahken Jesus pengikutna gelah ncidahken kekelengen si nggit erkorban. (Baca Johanes 13:34, 35.) Enda perentah si mbaru man pengikut Jesus, perban kekelengen si bage la lit iperentahken bas Undang-Undang si ibereken Dibata man kalak Israel. Menurut perentah si mbaru e, arus sikelengi turang seninata bali bagi Jesus ngkelengi kita. E ertina arus sicidahken kekelengen si nggit erkorban. * Arus sikelengi turang seninata lebihen asangken dirita. Perban keleng kel ateta kalak e, mate pe nggit kita guna kalak e, bali bagi si ilakoken Jesus man banta.

¹⁴ Pelajarenna: Uga carata ndalanken perentah si mbaru e? Intina, nggitlah kita erkorban guna turang seninata. Perban keleng  kel ateta kalak e, nggit kita erban pengorbanen si mbelin, eme mate guna kalak e. Selain si e, nggit ka kita erban pengorbanen si la bage kel belinna. Contohna, banci saja erusaha kita nampati turang seninata si nggo metua gelah banci reh ku perpulungen. Nggit ka kita mengalah gelah meriah ukur turang seninata, ntah banci ka kita cuti arah dahinta guna nampati turang seninata si kena bencana. Adi silakoken e, sibuktiken maka sipatuhi undang-undang Kristus. Siban ka runggunta jadi ingan si aman man kerina turang seninata.

15-17. (a) Kai nge si ilakoken Jesus si mbuktiken maka ia adil? (b) Uga carata ngusih Jesus?

¹⁵ Bas Pustaka, kata “keadilen” maksudna ngelakoken kai si benar menurut Dibata alu la mbeda-bedaken kalak. Kai buktina maka undang-undang Kristus ngiahken kalak gelah adil?

¹⁶ Si pertama, mari sibahas kai si ilakoken Jesus si mbuktiken maka ia adil. Bas jaman Jesus, segat ate peminpin agama Jahudi man kalak si la Jahudi, rendah akapna kalak Jahudi si la ikut sekolah agama, janah la iergai kalak e diberu. Tapi, Jesus lalap adil janah la ibeda-bedakenna kalak. La itulakna kalak si la Jahudi si erkiniteken man bana. (Mat. 8:5-10, 13) La ia negatip man kalak si deban janah erberita ia man kerina kalak, si bayak ntah pe si mesera. (Mat. 11:5; Luk. 19:2, 9) La pernah isakitina ntah pe kasar ia man diberu. Tapi mehuli perbahanenna janah iergaina kalak e, termasuk si rendah iakap kalak.​—Luk. 7:37-39, 44-50.

¹⁷ Pelajarenna: Banci siusih Jesus alu la mbeda-bedaken kalak. Erberita kita man kerina jelma si nggit megiken kita, la soal kai agamana janah la soal ia bayak ntah mesera. Kalak Kristen si dilaki ngusih Jesus alu ngergai diberu janah mehuli perbahanenna man kalak e. Adi silakoken e, sibuktiken maka sipatuhi undang-undang Kristus.

18-19. Kai si iajarken Jesus kerna keadilen, janah kai pelajarenna banta?

¹⁸ Si peduaken, mari sibahas kai si iajarken Jesus kerna keadilen. Iajarkenna patoken-patoken si banci nampati pengikutna gelah adil man kalak si deban. Contohna eme Aturen Emas. (Mat. 7:12) Ateta adil min kalak man banta. Emaka, kita pe arus adil man kalak si deban. Adi silakoken e, kalak si deban pe teriahken gelah adil banta. Tapi uga adi lit kalak si la adil banta? Iajari Jesus ka pengikutna gelah tek maka ‘ibereken Dibata keadilen man kalak si erlebuh man baNa suari ras berngi.’ (Luk. 18:6, 7) Kata-kata e eme janji maka Jahwe, Dibata si adil, meteh kerina masalahta bas wari-wari pendungi enda, janah pasti iberekenNa keadilen man banta bas waktu si cocok iakapNa.​—2 Tes. 1:6.

¹⁹ Pelajarenna: Adi sidalanken patoken-patoken si iajarken Jesus, adil me perbahanenta man kalak si deban. Janah adi rate mesui kita perban la adil kalak man banta bas doni Setan enda, terapuli kel kita perban siteh maka pasti ibereken Jahwe keadilen man banta.

20-21. (a) Uga arusna perbahanen kalak si lit tanggung jawapna sanga erurusen ras kalak si deban? (b) Uga cara perbulangen ncidahken kekelengen si nggit erkorban, janah uga arusna perbahanen perbapan man anakna?

²⁰ Menurut undang-undang Kristus, uga arusna perbahanen kalak si lit tanggung jawapna sanga erurusen ras kalak si deban? Perban kekelengen me dasar undang-undang e, kalak si lit tanggung jawapna arus perkeleng janah ngergai kalak si deban si lit bas tanggung jawapna. Arus inget kalak e maka ate Kristus sicidahken min lalap kekelengen i bas kerina perbahanenta.

 ²¹ I bas keluarga. Perbulangen arus ngkelengi ndeharana “bali bagi Kristus nandangi runggun.” (Ep. 5:25, 28, 29) Arus icidahken perbulangen kekelengen si nggit erkorban bali bagi Kristus. Kekelengen e icidahkenna alu ngutamaken kepentingen ndeharana asangken kepentingenna. Banci jadi mesera iakap piga-piga perbulangen ngelakokenca, perban kitik-kitikna nari kalak si lit i sekelilingna la perkeleng ras la adil. Janah banci jadi mesera iakapna mperobahi kebiasanna si la mehuli, tapi arus ia berubah gelah banci idalankenna undang-undang Kristus. Perbulangen si ncidahken kekelengen si nggit erkorban pasti iergai ndeharana. Perbapan si tuhu-tuhu ngkelengi anakna arusna ula min erban anakna rate mesui arah ranan bage pe perbahanenna. (Ep. 4:31) Tapi, adi ikelengina janah melias ia man anak-anakna, pasti aman iakap kalak e. Perbapan si bage pasti ikelengi anakna janah tek kalak e man bana.

22. Menurut 1 Petrus 5:1-3, ‘biri-biri’ e sekerajangen ise, janah uga arusna perbahanen pertua man kalak e?

²² I bas runggun. Arus inget pertua maka ‘biri-biri’ bas runggun labo sekerajangen kalak e. (Joh. 10:16; baca 1 Petrus 5:1-3.) Istilah “rarasen biri-biri Dibata,” “i lebe-lebe Dibata,” ras ‘kalak si nggo iserahken Dibata’ ngingetken pertua maka kerina biri-biri e sekerajangen Jahwe. AteNa gelah ikelengi janah lembut min perbahanen pertua man biri-biriNa. (1 Tes. 2:7, 8) Adi idalanken pertua tanggung jawapna selaku permakan alu perkeleng, pasti ngena ate Jahwe ia. Pertua si bage pe pasti ikelengi janah iergai turang seninana.

23-24. (a) Kai nge si ilakoken pertua sanga lit si ngelakoken dosa si mbelin? (b) Kai si arus inget pertua sanga lit kalak si ngelakoken dosa si mbelin?

²³ Kai nge si ilakoken pertua sanga lit si ngelakoken dosa si mbelin? Si ilakoken kalak  e la seri ras kai si ilakoken hakim-hakim ras peminpin-peminpin i Israel mbarenda. Menurut Undang-Undang Musa, dilaki-dilaki si nggo ilantik e labo saja ngurus masalah rohani, tapi iurusna ka masalah hukum si la lit hubungenna ras masalah rohani. Tapi menurut undang-undang Kristus, adi lit si ngelakoken dosa si mbelin, si iurus pertua eme masalah rohani saja. Iteh kalak e maka nggo ibereken Dibata tanggung jawap man pemerentah guna ngurus kasus pidana ras perdata. * Enda termasuk tanggung jawap guna mereken hukumen bagi denda ntah pe hukumen penjara.​—Rom. 13:1-4.

²⁴ Kai tanggung jawap pertua adi lit kalak bas runggun si ngelakoken dosa si mbelin? Ipake kalak e Pustaka guna mereksa masalahna ras erban keputusen. Inget kalak e maka kekelengen me si jadi dasar undang-undang Kristus. Emaka kekelengen ngiahken pertua guna ngukuri: Kai nge si perlu ilakoken guna nampati kalak bas runggun si jadi korban arah dosa si mbelin? Perban keleng ate pertua man kalak si erdosa e, iukurina ka: Ertobat nge ia? Banci denga nge ia isampati gelah rembak mulihi ras Jahwe?

25. Kai si man bahasenta bas artikel berikutna?

²⁵ Ngata bujur kel kita perban lit undang-undang Kristus! Adi kerina kita erusaha ndalankenca, siban me runggunta jadi ingan si aman janah kerina kalak bas runggun banci nggejapken maka ia ikelengi ras iergai. Tapi gundari, kita nggeluh bas doni si melala kel “kalak jahat” janah kalak e “reh dekahna reh jahatna.” (2 Tim. 3:13) Emaka arus kita hati-hati. Uga nge keadilen Dibata teridah bas runggun Kristen sanga lit pelecehen seksual man anak-anak? Sibahas kari e bas artikel berikutna.