1-2. (a) Kai contohna maka manusia perlu iapuli janah banci ngapuli kalak si deban? (b) Engkai maka lit piga-piga anak si mesui kel atena?

KERINA manusia perlu iapuli janah banci ka iapulina kalak si deban. Enda luar biasa kel. Contohna, sanga lit anak si kitik denga main-main, ndabuh ia janah luka tiwenna, mis daramina Mamak ntah pe Bapakna janahna ngandung. Labo banci ipepalem orang tuana luka e, tapi banci iapulina anakna. Isungkunna, “Kena kai kam e, Nakku?” Kenca si e iapusna iluhna, ipetenangna ia, idakepna, janah itambarina ntah pe minakina anakna e. Kenca si e, lanai anak e ngandung janah mulihken ka ia main-main. Dungna malem me lukana ndai.

² Tapi mon-mon, anak-anak ilukai alu cara si terkeleken. Lit piga-piga si nggo ilecehken. Banci saja, nggo ilecehken anak e sekali ntah pe piga-piga kali sedekah ertahun-tahun. E erban mesui kel atena janah lalap ingetna. Bas piga-piga kasus, kalak si ngelakoken pelecehen e itangkap janah iukum. Tapi si debanna lang. Aminna pe si ngelakoken pelecehen e mis iukum, tetap denga anak si ilecehken e rate mesui nggo pe ia dewasa.

3. Menurut 2 Korinti 1:3, 4, kai nge peraten Jahwe, janah penungkunen kai si man bahasenta?

³ Adi lit turang seninata i bas runggun si ilecehken sanga kitik denga janah mesui denga kel atena, kai si banci nampati ia? (Baca 2 Korinti 1:3, 4.) Jelas me, ate Jahwe gelah umatNa ikelengi ras iapuli. Emaka mari sibahas telu penungkunen enda: (1) Engkai maka kalak si pernah ilecehken sanga kitik denga perlu iapuli? (2) Ise si banci ngapulisa? (3) Uga nge cara ngapulisa?

4-5. (a) Engkai maka perlu siteh anak-anak la seri ras kalak dewasa? (b) Adi anak-anak ilecehken, kai akibatna man bana?

⁴ Anak-anak la seri ras kalak dewasa. La seri cara kalak e ngadapi perbahanen si la mehuli. Engkai maka perlu siteh e? Gelah siteh ngkai maka piga-piga kalak si nggo dewasa si pernah ilecehken sanga kitik denga, banci saja perlu iapuli aminna pe nggo ertahun-tahun si lewat kejadin e. Mari sibahas piga-piga contohna.

⁵ Perlu kel iakap anak-anak ndeher ras kalak si mpebelin ia janah tek man kalak e. Sanga lit kalak si ndeher ras ermediate man anak-anak janah tek anak e man bana, aman iakap anak e janah dungna tek ia man kerina si ngkelengi ia. (Msm. 22:10) Si sedihna, pelecehen anak biasana terjadi i rumah, janah si ngelakokenca eme keluargana si ndeherna kel ras ia bage pe kalak si deban si ndeher ras keluarga e. Adi si ngelecehken anak e eme kalak si itekina, dungna mesera kel iakapna tek man kalak si deban ngasa ertahun-tahun dekahna.

6. Engkai maka pelecehen anak eme perbahanen si kejam ras bahaya?

⁶ Anak-anak e lemah, emaka pelecehen anak eme perbahanen si kejam ras bahaya. Bahaya kel adi anak-anak ipaksa ngelakoken perbahanen si lit hubungenna ras seks sope ia dewasa. Adi anak-anak ilecehken, banci dungna salah perukurenna kerna seks. Banci ka la merga akapna bana janah lanai ia tek man kalak si deban.

7. (a) Engkai maka menukah iakap si ngelakoken pelecehen guna nipu ras ngelecehken anak-anak, janah kai si ilakokenna? (b) Kai nge akibatna bual e man anak-anak?

⁷ Cara rukur anak-anak lenga bagi kalak dewasa. Lenga banci ibanna keputusen, lenga itehna si apai si bahaya janah lenga banci ipedauhna bahaya e. (1 Kor. 13:11) Emaka, menukah kel iakap si ngelakoken pelecehen guna nipu ras ngelecehken anak-anak. Ibualina anak-anak e, misalna ikatakenna maka anak e ilecehken perban salah anak e sendiri. Isuruhna gelah ula iceritaken anak e man ise pe, bicara laporkenna pe, labo kari lit si tek man bana ntah pe si nampati ia. Banci ka ikatakenna maka perbahanen seks si ilakoken kalak dewasa ras anak-anak labo salah adi kalak e nggo singenan. Perlu waktu ertahun-tahun man anak-anak maka itehna kerina e situhuna bual. Kenca nggo galang pe ia, tetap denga iakapna maka ia nggo ceda, salah akapna bana, janah la kapna ia patut ikelengi ras iapuli.

8. Engkai kita tek maka banci iapuli Jahwe kalak si rate mesui?

⁸ Arah keterangen e, siteh me dungna ngkai maka kalak si pernah ilecehken rate mesui kel ia ertahun-tahun dekahna. Perbahanen e seh kel jahatna ras kejam! Perban nggo melala kel pelecehen anak gundari, jelas me maka kita nggeluh bas wari-wari pendungi. Enterem kalak gundari “la lit kekelengenna” janah “kalak jahat ras penipu reh dekahna reh jahatna.” (2 Tim. 3:1-5, 13) Taktik si iban Setan seh kel jahatna, janah si sedihna melala kalak si ngelakoken kai si ngena ate Setan. Tapi, ndauh kel gegehen Jahwe asangken Setan ras pengikutna. Iteh Jahwe nge kerina taktik Setan. Iteh Jahwe ka uga suina pusuhta, janah banci iapuliNa kita. Ngata bujur kel kita perban Dibata si isembah kita eme “Dibata sumber kerina pengapul. IapuliNa kita i bas kerina kiniseranta, alu bage banci siapuli kalak si deban si ngenanami kiniseran kai pe alu pengapul si nggo sialoken i bas Dibata nari.” (2 Kor. 1:3, 4) Ise nge si igunaken Jahwe guna mereken pengapul?

9. Bagi si ikataken Raja Daud bas Masmur 27:10, kai nge si ilakoken Jahwe man kalak si la iperdiateken orang tuana?

⁹ Piga-piga anak si ilecehken la ilindungi orang tuana, padahal iteh orang tuana kerna pelecehen e. Lit ka anak-anak si ilecehken kalak si ndeher ras ia. Anak-anak si bage me si khususna perlu iapuli. Iteh Raja Daud banci kita tek maka Jahwe lalap ngapuli kita. (Baca Masmur 27:10.) Tek Daud maka Jahwe me Bapak man kalak si la iperdiateken keluargana. Uga cara Jahwe ngelakokenca? IgunakenNa umatNa si setia. Turang seninata i bas runggun bali bagi keluargata. Ikataken Jesus maka kalak si nembah Jahwe eme seninana, turangna, ras nandena.​—Mat. 12:48-50.

10. Kai si ikataken Rasul Paulus guna njelasken dahinna selaku pertua?

¹⁰ Mari sibahas sada contoh uga maka banci runggun bali bagi keluarga. Rasul Paulus eme pertua si setia janah nggit kerja keras. Ia jadi usihen si mehuli, janah itegu-tegu kesah si badia ka ia guna ngiahken kalak ngusih ia bali bagi ia pe ngusih Kristus. (1 Kor. 11:1) Perdiatekenlah uga Paulus njelasken dahinna selaku pertua, nina, “Lembut perbahanen kami man kena, bali bagi sekalak nande si sangana pepinemken anakna.” (1 Tes. 2:7) Gundari pe, pertua banci ngerana alu lembut janah melias sanga iapulina kalak arah Pustaka.

11. Janari siteh maka labo pertua saja si banci mereken pengapul?

¹¹ Pertua saja nge si banci ngapuli korban pelecehen? Lang. Kerina kita ertanggung jawap guna ‘terus ngapuli sada ras si debanna.’ (1 Tes. 4:18) Turang seninata si diberu si paguh kinitekenna khususna banci mpegegehi seninana si perlu iapuli. Emaka, cocok kel adi ipeseri Jahwe diriNa ras sekalak pernanden si ngapuli anakna. (Jes. 66:13) Bas Pustaka pe lit contoh kerna diberu-diberu si ngapuli kalak si rate mesui. (Jop 42:11) Seh kel riahna ukur Jahwe ngidah turang seninata si diberu ngapuli seninana si rate mesui! Mon-mon,  banci ipindoken pertua man sekalak turang seninata si diberu si paguh kinitekenna gelah iapulina diberu si rate mesui ndai. *

12. Kai si la banci silakoken sanga nampati kalak si deban?

¹² Sanga nampati turang seninata, ula min sisungkuni ia kai si la atena iceritakenna. (1 Tes. 4:11) Emaka, kai si banci silakoken man kalak si merluken penampat ras pengapul? Mari sibahas lima cara arah Pustaka gelah banci siapuli kalak si deban.

13. Menurut 1 Raja-Raja 19:5-8, kai si ilakoken malekat Jahwe man Elia, janah uga kita banci ngusihsa?

¹³ Sampatilah ia. Sanga kiam Nabi Elia arah kalak si atena munuh ia, kitik kel ukurna janah mate saja atena. Isuruh Jahwe me sada malekat si megegeh ndahi Elia. Ibereken malekat e man bana kai si iperlukenna paksa si e eme pangan, janah iahkenna ka Elia gelah man. (Baca 1 Raja-Raja 19:5-8.) Arah cerita e sidat me pelajaren penting enda: Sada perbahanen si mehuli, aminna pe biasa saja, mbelin kel gunana. Misalna sibereken pangan, hadiah, ntah pe situlis kata-kata si banci mpegegehi ia bas surat ntah pe kartu. Alu bage, banci sicidahken keleng ateta man turang seninata si sangana kitik ukurna. Adi la siakap ntabeh ncakapken kerna kai si sipatna pribadi ntah pe kai si erban ia rate mesui, tetap denga nge kita banci ermediate alu ngelakoken piga-piga cara si ndai.

14. Kai pelajaren si banci sidat arah pengalamen Elia?

¹⁴ Banlah gelah aman iakapna janah terapuli ia. Lit ka pelajaren si deban si banci sidat arah pengalamen Elia. Alu mukjizat, isampati Jahwe Nabi Elia gelah banci ia ndauh erdalan ku Deleng Horeb. Banci saja aman iakap Elia bas ingan si ndauh e perban i je me mbarenda iban Jahwe perjanjin ras umatNa. Janah banci saja nggo ndauh akapna ia arah kalak si atena munuh ia. Kai pelajarenna man banta? Adi ateta ngapuli korban pelecehen, tangtangna lebe arus siusahaken gelah aman iakapna. Misalna, sope ngapuli turang seninata si diberu si rate mesui e, arus inget pertua maka banci saja lebih aman iakapna janah lebih terapuli ia adi ngerana-ngerana kalak e i rumah janahna minem teh asangken bas Bale Kerajan. Si deban mungkin sebalikna.

15-16. Kai maksudna jadi kalak si nggit megiken?

¹⁵ Nggitlah megiken. Bas Pustaka lit pedah enda: “Tiap kalak arus nggit lebe megiken, ula minter ngerana.” (Jak. 1:19) Tuhu-tuhu nge kam nggit megiken? Banci saja siakap kalak si nggit megiken e eme kalak si itatapna temanna ngerana janahna sinik. Tapi labo e saja si maksudna nggit megiken. Misalna sanga ikataken Elia dungna man Jahwe uga suina pusuhna, tuhu-tuhu ibegiken Jahwe ia. Iteh Jahwe maka mbiar kel Elia, sisada akapna bana, janah sia-sia akapna kerina si nggo ilakokenna. Perban keleng ate Jahwe Elia, isampatiNa ia ngatasi perasanna e. Ibuktiken Jahwe maka tuhu-tuhu ibegikenNa Elia.​—1 Raj. 19:9-11, 15-18.

¹⁶ Sanga megiken turang seninata, uga carana mbuktiken maka keleng ateta ia? Mon-mon arah rananta si mehuli aminna pe gendek, banci teridah uga perasanta. Banci sikataken, “Pasti mberat kel kapndu me. Seh naring ukurna erban bage!” Banci ka sisungkun turang seninata si sangana rate mesui e guna mastiken maka tuhu-tuhu siangkai kai si ikatakenna. Rananta si mehuli banci erban ia tek maka tuhu-tuhu  sibegiken ia janah siusahaken ngangkai keadanna.​—1 Kor. 13:4, 7.

17. Engkai maka arus kita sabar janah “ula minter ngerana”?

¹⁷ Tapi, arus kita hati-hati gelah “ula minter ngerana.” Ula sipotong ia ngerana guna mereken pedah man bana ntah pe guna ngataken maka nggo salah carana rukur. Janah sabarlah! Sanga iceritaken Elia dungna perasanna man Jahwe, teridah maka susah janah sedih kel iakapna. Kenca ipegegehi Jahwe kiniteken Elia, iulihina ka kai si nggo ibelaskenna ndai. (1 Raj. 19:9, 10, 13, 14) Kai pelajarenna? Mon-mon kalak si sangana rate mesui arus mulih-ulih iturikenna uga perasanna. Bagi Jahwe, nggitlah kita megikenca alu sabar. Asangken erusaha ndungi masalahna, padin sepenggejapen kita ras ia janah mekuah ateta ia.​—1 Pet. 3:8.

18. Engkai maka adi ertoto kita ras kalak si sangana rate mesui banci erban ia terapuli?

¹⁸ Ertotolah ras ia alu tutus. Kalak si sangana rate mesui banci saja lanai ngasup ertoto. Banci saja la metunggung akapna ia ndeheri Jahwe. Salah sada cara ngapuli kalak si bage eme ertoto ras ia janah mbelasken gelarna bas toto e. Sikataken man Jahwe maka keleng kel ateta ia janah turang senina bas runggun pe tuhu-tuhu ngkelengi ia. Banci sipindo gelah iapuli janah ipetenang Jahwe biri-biriNa si meherga e. Toto si bage tuhu-tuhu kel ngapuli ia.​—Jak. 5:16.

19. Kai si banci silakoken sope ngapuli kalak?

¹⁹ Pilihlah kata-kata si mpepalem pusuh janah banci ngapuli. Siukurilah lebe sope kita ngerana. Ranan si la iukuri lebe banci ngelukai ukur kalak, tapi ranan si mehuli banci mpepalem pusuh. (Kua. 12:18) Emaka ertotolah man Jahwe, pindo penampatNa gelah rananta mehuli, banci ngapuli, janah mpepalem pusuh. Ingetlah maka kata-kata si mehulina guna ngapuli kalak eme kata-kata Dibata si lit bas Pustaka.​—Heb. 4:12.

20. Uga perasan turang seninata si pernah ilecehken, janah kai si ateta gelah iinget kalak e?

 ²⁰ Piga-piga turang seninata si pernah ilecehken banci saja nggo melket akapna bana, la kapna ia meherga, la kapna lit si ngkelengi ia, janah la kapna ia metunggung ikelengi. Tapi kerina e labo tuhu! Emaka gunakenlah Pustaka gelah ingetna maka keleng kel ate Jahwe ia. (Nen kotak “ Pengapul arah Pustaka.”) Ingetlah uga malekat mpegegehi Nabi Daniel sanga lemah ia janah kitik ukurna. Ate Jahwe gelah iteh Daniel maka keleng ateNa ia janah meherga iakapNa. (Dan. 10:2, 11, 19) Bage ka pe, turang seninata si rate mesui perban pernah ilecehken pasti meherga iakap Jahwe!

21. Kai nge pagi si terjadi man kerina kalak jahat si la nggit ertobat, janah kai si ateta siusahaken?

²¹ Sanga ngapuli kalak si deban, sisampati ia gelah ingetna maka keleng ate Jahwe ia. Janah ula pernah kita lupa maka Jahwe e Dibata si adil. ItehNa kerina kalak si pernah ilecehken, amin gia la lit si metehsa. Idah Jahwe kerinana, janah pasti iukumNa kerina si pernah ngelakoken pelecehen si la nggit ertobat. (Bil. 14:18) Gundari, siusahakenlah ngkelengi kalak si pernah ilecehken. Bas wari si pepagi, tuhu-tuhu ipepalem Jahwe kerina si pernah ndatken perbahanen si la mehuli arah Setan ras doni si jahat enda. Arapen e erban malem kel pusuhta! Lanai bo ndekah, kejadin si erban kita rate mesui ilupaken kerina.​—Jes. 65:17.