Nubuat-nubuat bas bagan enda nggambarken piga-piga kejadin si terjadi i bas waktu si seri. Kerina nubuat e mbuktiken maka kita nggeluh bas “wari-wari pendungi.”​—Dan. 12:4.

• Ayat: Ket. 11:7; 12:13, 17; 13:1-8, 12

  Nubuat: “Binatang si seh kel rawana” nggo erkuasa i doni lebih 3.000 tahun dekahna. Bas wari-wari pendungi, takal si pepituken arah binatang si seh kel rawana e mekelek lukana. Bas pudi wari, malem takalna e, janah “kerina manusia si tading i doni” jadi pengikutna. Igunaken Setan binatang si seh kel rawana e guna “ngelawan anak-anak diberu e si sisa denga.”

  Kejadinna: Kenca Banjir si Mbelin, melala pemerentahen manusia si nentang Dibata mulai erkuasa. Lebih 3.000 tahun kenca si e, salah sada pemerentahen e eme Inggris bene kekuasanna bas Perang Doni I. Tapi kenca si e, ergabung Inggris ras Amerika Serikat janah mulihken ia megegeh. Khususna bas wari-wari pendungi, igunaken Setan kerina pemerentahen i doni guna niksa umat Dibata.

• Ayat: Dan. 11:25-45

  Nubuat: Bas wari-wari pendungi, raja utara ras raja selatan terus ermusuhen guna ndatken kekuasan.

  Kejadinna: Jerman erperang ngelawan Inggris ras Amerika Serikat. Bas tahun 1945, Uni Soviet ras negara-negara si ndukung ia jadi raja utara. Bas tahun 1991, Uni Soviet lanai lit, janah bas pudi wari, Rusia ras negara-negara si ndukung ia jadi raja utara.

• Ayat: Jes. 61:1; Mal. 3:1; Luk. 4:18

  Nubuat: Ikirimken Jahwe utusen si “nikapken dalan” ope Kerajan Dibata merentah. Mulai iberitaken utusen enda ‘berita si mehuli man kalak si meteruk ukur.’

  Kejadinna: Mulai tahun 1870-en, C. T. Russell ras teman-temanna erusaha kel ngangkai kai situhuna si iajarken Pustaka. Bas tahun 1881, iteh kalak e me maka umat Dibata arus erberita. Iterbitken kalak e artikel-artikel bagi “Idarami 1.000 Perberita” ras “Ipilih guna Erberita.”

• Ayat: Mat. 13:24-30, 36-43

  Nubuat: Iamburken musuh sesa ku tengah-tengah page. Turah me sesa e janah e erban page lanai teridah. Sanga masa rani, ipisahken me sesa e arah page.

  Kejadinna: Mulai tahun 1870, reh jelasna me teridah kai bedana kalak Kristen situhu-tuhu ras si palsu. Bas wari-wari pendungi, ipepulung me kalak Kristen situhu-tuhu janah ipisahken arah kalak Kristen si palsu.

• Ayat: Dan. 2:31-33, 41-43

  Nubuat: Nahe si iban arah besi ras taneh liat. Nahe e eme nahe patung si iban arah erbage-bage jenis logam.

  Kejadinna: Taneh liat nggambarken rakyat si lit bas pemerentahen Inggris ras Amerika Serikat. Ilawan rakyat duana pemerentahen e. Perban lit perlawanen arah rakyat, duana pemerentahen e la banci tuhu-tuhu ndalanken kekuasanna si bali bagi besi.

• Ayat: Mat. 13:30; 24:14, 45; 28:19, 20

  Nubuat: “Page” ipepulung ku bas ‘lumbung’ janah “budak si setia janah pentar” ipilih guna ngurus ‘pelayan-pelayan rumah.’ “Berita si meriah kerna Kerajan” mulai iberitaken “i belang-belang doni.”

  Kejadinna: Bas tahun 1919, budak si setia ilantik guna ngurus umat Dibata. Kenca si e, reh semangatna Ajar-Ajar Pustaka si Badia erberita. Gundari, Saksi-Saksi Jahwe erberita i bas lebih 200 negri. Iban kalak e ka publikasi si erpalasken Pustaka bas lebih 1.000 bahasa.

• Ayat: Dan. 12:11; Ket. 13:11, 14, 15

  Nubuat: Lit binatang si seh kel rawana si dua tandukna. Isuruhna kerina kalak i doni erban “patung binatang si seh kel rawana” si pitu takalna. ‘Iberekenna ka kesah’ man patung e. 

  Kejadinna: Liga Bangsa-Bangsa mulai ibentuk Kuasa Doni Inggris-Amerika. Pemerentahen-pemerentahen si debanna pe ikut ka ndukung organisasi e. Bas pudi wari, raja utara pe ikut ka ergabung, tapi arah tahun 1926 seh tahun 1933 ngenca. Tek kalak maka Liga Bangsa-Bangsa banci erban dame doni enda. Gundari, iakap kalak Perserikatan Bangsa-Bangsa pe banci erban dame doni enda. Tapi, Kerajan Dibata ngenca si banci ngelakokenca.

• Ayat: Dan. 8:23, 24

  Nubuat: Sekalak raja si ganas erban “kecedan si mejin.”

  Kejadinna: Enterem kel jelma si ibunuh Kuasa Doni Inggris-Amerika janah melala kel banna si ceda. Misalna bas Perang Doni II, idabuhken Amerika Serikat dua bom atom ku negri si jadi musuh Inggris ras Amerika Serikat. Parah kel akibat bom e. Ope si e, la nggo pernah lit senjata si bage kel hebatna.

• Ayat: Dan. 11:31, NW; Ket. 17:3, 7-11

  Nubuat: ‘Binatang si seh kel rawana si warnana megara bagi api’ janah lit sepuluh tandukna ndarat arah lubang si seh kel bagesna. Ia me raja si pewaluhken. Bas buku Daniel, raja enda igelari “kai si erban ciga ate si erban hancur.”

  Kejadinna: Sanga Perang Doni II, Liga Bangsa-Bangsa lanai aktif. Kenca perang, iban me PBB. Bali bagi Liga Bangsa-Bangsa, PBB pe imuliaken padahal Kerajan Dibata me si arusna imuliaken. Iserang PBB pagi agama.

• Ayat: 1 Tes. 5:3; Ket. 17:16

  Nubuat: Iumumken bangsa-bangsa “dame ras aman.” Kenca si e “sepuluh tanduk” bage pe “binatang si seh kel rawana” nyerang “pelacur e” janah ikernepkenna. Jenari, kerina pemerentahen ikernepken.

  Kejadinna: Ikataken bangsa-bangsa maka kalak e nggo berhasil erban doni enda jadi dame ras aman. Kenca si e, bangsa-bangsa si ndukung PBB ngkernepken agama palsu. Paksa si e me mulai terjadi kiniseran si mbelin. Ngadi kiniseran e sanga ikernepken Jesus kerina doni Setan i Harmagedon.

• Ayat: Esek. 38:11, 14-17; Mat. 24:31

  Nubuat: Iserang Gog negri umat Dibata. Kenca si e, ipepulung malekat “kalak si nggo ipilih.”

  Kejadinna: Raja utara ras kerina pemerentahen si debanna nyerang umat Dibata. La ndekah kenca imulai serangen enda, kalak Kristen si ipilih ku surga si lit denga i doni ipepulung ku surga.

• Ayat: Esek. 38:18-23; Dan. 2:34, 35, 44, 45; Ket. 6:2; 16:14, 16; 17:14; 19:20

  Nubuat: Si nangkih kuda mbentar “naluken musuh-musuhna” alu ngkernepken Gog ras pasukenna. “Binatang si seh kel rawana” ibenterken “ku danau api,” janah lit sada batu si ngkernepken patung si seh kel belinna.

  Kejadinna: Jesus, Raja Kerajan Dibata, nelamatken umat Dibata. Radu ras 144.000 bage pe pasuken malekatna, ikernepkenna pagi bangsa-bangsa si nyerang umat Dibata. E me kedungen doni Setan enda.