1-2. Kai kari sibahas bas artikel enda?

GUNDARI, siidah reh buena bukti maka kita nggeluh bas bagin pendungi wari-wari pendungi. Kentisik nari, ikernepken Jahwe ras Jesus Kristus kerina pemerentahen si nentang Kerajan Dibata. Ope si e terjadi, terus kari raja utara ras raja selatan ermusuhen ras niksa umat Dibata.

² Bas artikel enda sibahas kari nubuat si icatat bas Daniel 11:40–12:1. Sibahas kari ise kin si jadi raja utara gundari. Sibahas ka kari ngkai maka la perlu kita mbiar man kai si nandangi terjadi.

3-4. Ise si jadi raja utara si mbaru? Jelasken.

³ Kenca Uni Soviet ibubarken bas tahun 1991, umat Dibata si mbarenda lit bas kekuasanna ‘ndatken sitik penampat.’ (Dan. 11:34) Maksudna, banci kalak e bebas piga-piga waktu dekahna janah banci kalak e bebas erberita. Hasilna, la ndekah kenca si e, jumlah perberita bas negara-negara bekas Uni Soviet seh ratusen ribu. Tapi bas pudi wari, mulihi lit raja utara si mbaru eme Rusia ras negara-negara si ndukung ia. Bagi si nggo sibahas bas artikel si lewat, pemerentahen si jadi raja utara ras raja selatan lalap ngelakoken si telu enda: (1) isiksana umat Dibata, (2) icidahkenna arah perbahanenna maka segat atena Jahwe ras umatNa, janah (3) simusuhen.

⁴ Emaka, banci sikataken si jadi raja utara eme Rusia ras negara-negara si ndukung ia perban telu alasen enda: (1) Iserangna umat Dibata alu ngelarang pendahin erberita  ras isiksana ratusen ribu turang seninata si tading bas daerah kekuasanna. (2) Arah perbahanenna teridah maka segat atena Jahwe ras umatNa. (3) Iusahakenna gelah hebaten ia asangken raja selatan eme Kuasa Doni Inggris-Amerika. Gundari, mari sibahas terbuen kai silakoken Rusia ras negara-negara si ndukung ia si mbuktiken maka ia me raja utara.

5. Kai si inubuatken bas Daniel 11:40-43?

⁵ Baca Daniel 11:40-43 si lit bas cataten i teruh. * Bas ayat-ayat enda, inubuatken kai pagi si terjadi bas wari-wari pendungi. Nubuat enda nggambarken persaingen antara raja utara ras raja selatan. Ikataken Daniel maka bas wari-wari pendungi pagi, raja utara ras raja selatan “siserang-serangen.”​—Dan. 11:40, NW.

6. Kai buktina maka raja utara ras raja selatan siserang-serangen?

⁶ Raja utara ras raja selatan terus ersaing gelah banci jadi penguasa si megegehna i doni. Misalna, perdiateken kai si terjadi kenca Perang Doni II sanga mulai ikuasai Uni Soviet melala negara i Eropa. Guna ngelawan raja utara e, iban raja selatan perjanjin ras piga-piga negara si deban gelah igabungken kalak e pasukenna. Emaka ibentuk kalak e me sada organisasi si gelarna NATO. Raja utara ras raja selatan pe ersaing alu ngkeriken melala sen gelah reh gegehna pasuken militerna. Selain si e, ilawan raja utara ka raja selatan alu ndukung musuh-musuh raja selatan bas perang, bage ka pe sebalikna. Enda terjadi bas Afrika, Amerika Latin, ras Asia. Bas piga-piga tahun terakhir, Rusia ras negara-negara si ndukung ia reh belinna kekuasanna. Kalak e pe erperang ngelawan raja selatan alu nggunaken komputer ras Internet. Ituduh raja utara maka raja selatan nggunaken program komputer guna ncedai sistem ekonomi ras politikna, janah raja selatan pe bage ka nandangi raja utara. Janah bagi si inubuatken Daniel, terus iserang raja utara umat Dibata.​—Dan. 11:41, NW.

7. Kai nge “Negri si Mejile” e?

⁷ Bas Daniel 11:41 (NW), ikataken maka imasuki raja utara pagi “Negri si Mejile.” Negri kai nge maksudna? Mbarenda, e maksudna negri Israel, si ianggap “negeri si mehulina kal.” (Esek. 20:6) Tapi si terutama erban negri e istimewa eme perban kalak si tading i je nembah Jahwe. Kenca Pentakosta 33 Masehi, “negri” e lanai maksudna sada ingan i doni. Enda masuk akal, perban gundari umat Jahwe lit i belang-belang doni. Emaka, gundari “Negri si Mejile” maksudna pardis rohani si inanami umat Jahwe. Enda termasuk kegiatenta bas nembah Jahwe, bagi perpulungen ras erberita.

8. Uga raja utara masuk ku “Negri si Mejile”?

⁸ Bas wari-wari pendungi, nggo piga-piga kali imasuki raja utara “Negri si  Mejile.” Misalna, sanga Nazi i Jerman jadi raja utara, imasukina “Negri si Mejile” alu niksa ras munuh umat Dibata, khususna sanga perang doni si peduaken. Kenca Perang Doni II, sanga Uni Soviet jadi raja utara, imasukina “Negri si Mejile” alu niksa umat Dibata janah iasingkenna.

9. Bas piga-piga tahun enda, uga Rusia ras negara-negara si ndukung ia masuk ku “Negri si Mejile”?

⁹ Bas piga-piga tahun enda, uga Rusia ras negara-negara si ndukung ia masuk ku “Negri si Mejile”? Bas tahun 2017, ilarang raja utara pendahin umat Jahwe janah ipenjarakenna piga-piga turang seninata. Ilarang raja e ka publikasita, termasuk Pustaka Terjemahan Dunia Baru. Isitana ka kantor cabangta i Rusia bage pe Bale Kerajan ras Bale Kebaktin. Emaka, bas tahun 2018, ikataken Badan Pinpinen maka Rusia ras negara-negara si ndukung ia me si jadi raja utara. Aminna pe umat Jahwe isiksa, la kalak e nggit mberontak ngelawan pemerentah ntah pe iusahakenna ngubah sistem pemerentahen. Sebalikna, iusahaken kalak e ngikuti nasehat Pustaka gelah notoken “kerina si kedudukenna meganjang” ntah pe penguasa, khususna sanga iban penguasa e keputusen si banci mpengaruhi kebebasenta i bas nembah Jahwe.​—1 Tim. 2:1, 2.

10. Italuken raja utara nge pagi raja selatan? Jelasken.

¹⁰ Bas Daniel 11:40-45 (NW), buen ibahas kerna kai si ilakoken raja utara. Payo nge enda ertina italuken raja utara pagi raja selatan? Lang. Terus pagi lit raja selatan seh asa ikernepken Jahwe ras Jesus kerina pemerentahen manusia bas perang Harmagedon. (Ket. 19:20) Ja nari siteh? Mari sibahas kai si inubuatken buku Daniel ras buku Ketangkasen kerna si e.

11. Kai si ibuktiken Daniel 2:43-45? (Nen gambar bas sampul majalah enda.)

¹¹ Baca Daniel 2:43-45. * Ijelasken Daniel kerna sada patung si seh kel belinna, si iban arah erbage-bage logam. Tiap bagin arah patung e nggambarken pemerentahen si mbelin kel kuasana ras pengaruhna man umat Dibata. Kerina pemerentahen e la radu merentah. Nahe si arah teruh arah patung e iban arah besi ras taneh liat. Enda nggambarken pemerentahen si terakhir, eme Inggris ras Amerika Serikat. Nubuat enda mbuktiken maka Kuasa Doni Inggris-Amerika terus pagi lit seh asa ikernepken Kerajan Dibata kerina pemerentahen manusia.

12. Ise si igambarken takal si pepituken arah binatang si seh kel rawana e? Janah ngkai perlu siteh kerna si e?

¹² Rasul Johanes pe inubuatkenna ka kerna pemerentahen-pemerentahen si mbelin kel kuasana ras pengaruhna man umat Jahwe. Bas nubuat e, kerina pemerentahen ndai igambarken bagi binatang si seh kel rawana si pitu takalna. Takal si pepituken arah binatang e nggambarken Kuasa Doni Inggris-Amerika. Enda perlu siteh perban lanai kari lit takal si deban selain si pitu e. Emaka, takal si pepituken arah binatang si seh kel rawana e terus pagi erkuasa seh asa Kristus ras pasukenna  ngkernepken takal e bage pe kerina bagin si deban arah binatang si seh kel rawana e. *​—Ket. 13:1, 2; 17:13, 14.

13-14. Ise “Gog arah negri Magog”? Janah kai si erbanca maka iserangna atena umat Dibata?

¹³ Nubuat si icatat bas Esekiel 38:10-23 njelasken kerna kai si banci saja pagi terjadi sope raja utara ras raja selatan ikernepken. Nubuat Esekiel e ras nubuat si icatat bas Daniel 2:43-45; 11:44–12:1; ras Ketangkasen 16:13-16, 21 banci saja njelasken kerna jangka waktu ras kejadin si seri. Adi tuhu kin bage, banci saja enda me kari si terjadi.

¹⁴ Piga-piga waktu kenca kiniseran si mbelin imulai, “raja-raja si lit i doni” ersada guna mbentuk sada kelompok. (Ket. 16:13, 14; 19:19) Igelari Pustaka kelompok enda “Gog arah negri Magog.” (Esek. 38:2, NW) Iserang kelompok enda pagi umat Dibata janah iusahakenna ngkernepkenca. Kai si erbanca maka iserang kalak e atena umat Dibata? Sanga inubuatken Rasul Johanes kerna si e, ikatakenna maka udan es si seh kel galangna ndabuhi musuh-musuh Dibata. Banci saja udan es e maksudna berita penghukumen si keras si ipeseh umat Jahwe. Berita enda me si banci saja erban ikernepken Gog arah Magog atena umat Dibata.​—Ket. 16:21.

15-16. (a) Kejadin kai nge si igambarken bas Daniel 11:44, 45? (b) Kai pagi si terjadi man raja utara ras pemerentahen si debanna si igelari Gog arah Magog?

¹⁵ Pendahin umat Dibata guna mpeseh berita penghukumen bage pe serangen terakhir si ilakoken musuh Dibata banci saja seri ras kejadin si igambarken bas Daniel 11:44, 45. (Baca.) * Bas ayat e, ikataken Daniel maka “berita si reh i timur ras utara nari” erban  raja utara mbiar, janah “erperang me ia alu merawa.” ‘Ibunuhi raja e atena nterem jelma,’ si banci saja maksudna umat Jahwe. * Emaka, banci saja si imaksudken Daniel eme serangen si terakhir man umat Dibata.

¹⁶ Sanga raja utara ras kerina pemerentahen si debanna nyerang umat Dibata, merawa kel Dibata si Madakuasa, janah imulai me perang Harmagedon. (Ket. 16:14, 16) Paksa si e, ikernepken Jahwe kerina pemerentahen e, eme Gog arah Magog. “La lit si nampatisa.”​—Dan. 11:45.

17. Ise nge Mikhael, “malekat si mbelin” si ikataken bas Daniel 12:1? Kai nge si ilakokenna gundari, janah kentisik nari kai si ilakokenna?

¹⁷ Baca Daniel 12:1. Ijelasken ayat enda uga pagi raja utara ras kerina pemerentahen si debanna ikernepken. Ijelasken ayat enda ka uga pagi kita iselamatken. Mikhael eme gelar si deban arah Rajata, Jesus Kristus. Mulai tahun 1914, sanga ia jadi Raja Kerajan Dibata i surga, mulai ia “ngkawali” umat Dibata. Janah kentisik nari, ikernepkenna me kerina musuhna bas perang Harmagedon. Perang e jadi penutup masa si ikataken Daniel masa si seh kel susahna bas sejarah manusia. Bas nubuat Johanes i buku Ketangkasen, masa e igelari “kiniseran si mbelin.”​—Ket. 6:2; 7:14.

18. Engkai maka la perlu kita mbiar nandangi kai si terjadi pagi?

¹⁸ Ikataken Daniel ras Johanes maka iselamatken Jahwe ras Jesus pagi umat Dibata bas kiniseran si mbelin. Emaka, la perlu kita mbiar nandangi kai si terjadi pagi. Ikataken Daniel maka kalak si “tersurat gelarna i bas kitap Dibata” selamat pagi arah kiniseran si mbelin. (Dan. 12:1) Kai si arus silakoken gelah gelarta tersurat bas kitap e? Arus sibuktiken maka tek kita man Jesus, Anak Biri-Biri Dibata. (Joh. 1:29) Arus ka sibaktiken dirita man Dibata janah iperidiken. (1 Pet. 3:21) Selain si e, arus sidukung Kerajan Dibata alu nampati kalak erlajar kerna Jahwe.

19. Kai si arus silakoken gundari? Janah ngkai?

¹⁹ Gundari nari, arus sipepaguh kinitekenta man Jahwe ras organisasiNa. Arus ka sidukung Kerajan Dibata. Alu bage, iselamatken me kita sanga ikernepken Kerajan Dibata pagi raja utara ras raja selatan.