Nina sekalak turang seninata si gelarna Sara, * “Aku kalakna permela janah kurang percaya diri. Emaka, la kuakap meriah erteman ras kalak si kai pe embusina janah lebihsa percaya dirina. Riahen kuakap erteman ras kalak si lembut ras meteruk ukur. Bage me kerina temanku. Emaka, banci bebas kuakap cerita man kalak e kerna uga perasanku ras masalahku.”

Arah kata-kata Sara e, banci siteh maka adi kita jadi kalak si lembut, meriah akap kalak erteman ras kita. Jahwe pe meriah ka ukurNa ngidah kita. Nina Pustaka, “Pakekenlah . . . lemah lembut.” (Kol. 3:12) Kai ertina lemah lembut? Kai buktina Jesus e lembut? Janah, ngkai maka meriah ukurta adi kita lemah lembut?

Sipat lemah lembut banci lit bas kita adi dame pusuhta. Kalak si lemah lembut mehuli perbahanenna man kalak si deban. Janah, tetap ka ia tenang sanga terjadi kai si la bagi ukurna.

Bas Pustaka, kata Junani si iterjemahken jadi “lemah lembut” ipake ka guna nggambarken kuda si meliar si nggo melemuk. Aminna pe kuda e ikataken nggo melemuk, labo ertina kuda e jadi lemah. Situhuna megegeh denga nge kuda e. Bage ka pe, kalak si lemah lembut labo ertina ia lemah. Situhuna ia kalak si megegeh. Engkai? Perban banci ikuasaina sifatna si la mehuli janah iusahakenna tetap dame ras kalak si deban.

Banci saja bagenda kita rukur, ‘Aku kalakna labo lembut.’ Selain si e, perban nterem kalak bas sekelilingta rusur ipaksakenna pendapatna janah la sabar, banci saja mesera siakap jadi kalak si lembut. (Rom. 7:19) Memang, perlu siusahaken gelah banci jadi kalak si lembut. Tapi, kesah si badia Jahwe banci nampati kita gelah la nyerah. (Gal. 5:22, 23) Engkai maka perlu siusahaken gelah jadi kalak si lembut?

Adi kita lembut, meriah akap kalak erteman ras kita. Bagi Sara si nggo ituriken ndai, pasti meriah siakap erteman ras kalak si lembut. Jesus eme contoh kalak si seh kel lembutna janah melias. (2 Kor. 10:1) Anak-anak pe nggit ndeher ras Jesus aminna pe lenga itandai kalak e ia. Padahal biasana anak-anak la nggit erteman ras kalak si lenga itandaina.​—Mrk. 10:13-16.

Adi kita lembut, sifat e erguna man banta  bage pe man kalak si lit i sekelilingta. Engkai? Adi kita lembut, la kita menukah nembeh ntah pe merawa. (Kua. 16:32) Alu bage, la kitik siban ukur kalak si deban, termasuk kalak si keleng ateta. Selain si e, perban la kitik siban ukur kalak, kita pe la siakap salah banta.

Aminna pe sibuk kel Jesus janah mberat tanggung jawapna, tetap ia lembut man kerina kalak. Enterem kalak bas jaman Jesus mesera kel pergeluhna janah perlu ipegegehi. Emaka pasti malem kel pusuh kalak e sanga ikataken Jesus, “Marilah, . . . sebap aku melias dingen lembut janah meteruk ukur.”​—Mat. 11:28, 29.

Uga carana gelah kita lembut bagi Jesus? Perlu sipelajari Pustaka gelah siteh uga perbahanen Jesus man kalak si deban bage pe kai si ilakokenna sanga ngadapi masalah. Kenca si e, sanga mesera siakap lembut, perlu siusahaken ngusih Jesus. (1 Pet. 2:21) Lit telu si erban Jesus jadi kalak si lembut. Mari sibahas.

Jesus tuhu-tuhu meteruk ukur. Ikataken Jesus maka ia “lembut janah meteruk ukur.” (Mat. 11:29) Bas Pustaka, kata “lembut” rusur ipersada ras kata “meteruk ukur” perban lit hubungenna duana sifat e. (Ep. 4:1-3) Kai kin hubungenna?

Adi kita meteruk ukur, la siakap penting banta ntah pe la menukah kitik ukurta. Uga tanggapen Jesus sanga ikataken kalak ia “rangap ras peminem anggur”? Ibuktikenna arah perbahanenna maka kai si ikataken kalak e salah. Alu lembut ikataken Jesus “kepentaren teridah arah perbahanen kap.”​—Mat. 11:19.

Adi kitik ukurndu megi ranan kalak kerna sukundu, jenis kelaminndu, ntah pe latar belakangndu, usahakenlah lembut nanggapisa. Nina sekalak pertua i Afrika Selatan si gelarna Peter, “Adi kitik ukurku sanga megi ranan kalak, lalap kuukuri, ‘Kai nge si ilakoken Jesus?’” Nina ka, “Kuusahaken gelah la penting kuakap bangku.”

Iangkai Jesus maka manusia e la sempurna. Ilakoken murid-murid Jesus atena kai si benar. Tapi perban la sempurna, mon-mon gagal kalak e ngelakokenca. Misalna, bas berngi sope Jesus mate, terpedem Petrus, Jakup, ras Johanes, padahal nggo isuruh Jesus kalak e tetap erjaga-jaga. Iangkai Jesus ngkai kalak e terpedem. Nina, “Pusuh tuhu semangat, tapi daging lemah.” (Mat. 26:40, 41) Perban iangkai Jesus keadan rasul-rasulna, la nembeh atena kalak e.

Sekalak turang senina si gelarna Mandy, mbarenda rusur kel ipandangina kalak si deban, tapi gundari iusahakenna kel lembut bagi Jesus. Nina, “Kuusahaken kel gelah terus kuinget maka kerina kalak la sempurna. Janah kuusahaken ka mperdiateken sifat-sifat mehuli arah kalak si deban, bagi si ilakoken Jahwe.” Jelas me, adi sipertimbangken keadan kalak si deban bagi Jesus, banci kita lembut man kalak.

Tuhu-tuhu tek kel Jesus man Dibata Jahwe. Sanga Jesus i doni, rusur kel kalak la adil man bana. Rusur kalak salah paham man bana, segat ate kalak ia, janah isiksa ka ia. Aminna pe bage, tetap ia lembut perban “iserahkenna kerina man Hakim si adil,” eme Jahwe. (1 Pet. 2:23) Iteh Jesus maka Bapakna si i surga pasti nampati ia gelah banci terus setia janah pasti iukum Bapakna kalak si la adil man bana.

Adi merawa kita sanga la adil kalak man banta, siban keadanna reh parahna. Banci saja lit alasenta merawa. Tapi perban kerina kita la sempurna, banci salah tindakenta bage pe tanggapenta. Erkiteken si e me maka iingetken Pustaka kita, “Rawa manusia labo maba kai si benar i lebe-lebe Dibata.”​—Jak. 1:20.

Nina sekalak turang seninata i Jerman si gelarna Cathy, “Mbarenda, arus kuakap kubela diriku sendiri, perban labo kari lit kalak si mbela aku.” Bas pudi wari, kenca iusahakenna tek man Jahwe, berubah me ia. Nina, “Gundari, labo lalap perlu kubela diriku. Banci aku lembut perban kuteh maka imasapken Jahwe pagi kerina si la mehuli bas doni enda.” Adi pernah kalak la adil man bandu, perlu kam tek man Dibata bali bagi si ilakoken Jesus. Alu bage banci kam terus lembut.

Pernah bagenda nina Jesus, “Ermeriah ukur me kalak si melias janah lembut.” (Mat. 5:5) Emaka, adi ermeriah ukur ateta, arus kita lembut. Kai saja gunana adi kita lembut? Mari sibahas piga-piga contohna.

Sanga la siangkan perbulangen ras ndeharana, sifat si lembut banci erban kalak e tetap erdame. Nina Robert, sekalak turang senina i Australia, “Sanga merawa aku, mon-mon kubelasken ranan si erban kitik ukur ndeharaku, padahal labo bage nge maksudku. Tapi kata-kataku e la banci kutarik mulihi. Menyesal kel aku perban nggo kitik kuban ukurna.”

Bas rananta, “kerina kita rusur erban salah” janah kata-katata si la siukuri lebe banci erban ceda hubungenta ras teman geluhta. (Jak. 3:2) Emaka, adi la kita siangkan ras teman geluhta, perlu kita tetap tenang janah sijaga rananta. (Kua. 17:27) Banci bage siban adi kita lembut.

Iusahaken Robert kel gelah tetap tenang janah ngkuasai dirina. Kai hasilna? Nina, “Gundari, adi la kami siangkan, kuusahaken tutus ateku megiken ia, lembut ngerana, janah la menukah nembeh. Dungna reh ulina hubungenku ras ndeharaku.”

Adi kita lembut, banci reh ulina hubungenta ras kalak si deban. Biasana, kalak si menukah kitik ukurna la melala temanna. Tapi adi lembut kita, banci ‘siusahaken njaga persadan bage pe nggeluh alu dame.’ (Ep. 4:2, 3) Nina Cathy si ituriken ndai, “Perban aku lembut, meriah aku ras ise pe, termasuk ras kalak si la mehuli perbahanenna.”

Adi kita lembut, banci dame siakap. Ikataken bas Pustaka maka “kepentaren si rehna arah surga” banci erban kita lembut janah dame siakap. (Jak. 3:13, 17) Jelas me, adi kita lembut, banci ‘tenang ukurta.’ (Kua. 14:30) Sekalak turang seninata si gelarna Martin, iusahakenna kel gelah banci lembut. Nina, “Gundari lanai aku mekeng janah lanai aku nggit maksa kalak. Reh damena pusuhku janah meriah ukurku.”

Mon-mon, mesera siakap lembut. Nina sekalak turang senina, “Jujur saja, seh asa gundari mon-mon la terkuasai aku rawaku.” Tapi ingetlah, perban Jahwe si nuruhsa gelah kita lembut, pasti isampatiNa kita ngelakokenca. (Jes. 41:10; 1 Tim. 6:11) Banci ‘idungiNa pelatihenta’ janah ‘ibanNa kita megegeh.’ (1 Pet. 5:10) Dungna, bagi Rasul Paulus, banci kita jadi “lemah lembut ras melias” bagi Kristus.​—2 Kor. 10:1.