ARTIKEL PELAJAREN 21
LAGU 107 Usihlah Kekelengen Jahwe
Cara Ndarami Teman Geluh
“Ise si banci ndatken ndehara si mehuli? Ndehara si mehuli ndauh ergan asangken batu si merga arah laut nari.”—KUA. 31:10.
INTINA
Bas artikel enda sibahas kari prinsip-prinsip Pustaka si banci nampati kalak si atena ndarami teman geluh si cocok. Sibahas ka kari kai si banci ilakoken turang senina bas runggun guna ndukung kalak si atena erjabu e.
1-2. (a) Kai saja nge si perlu ilakoken kalak si lajang denga sope ia ngerondong? (b) Kai nge maksudna “ngerondong”? (Nen “Penjelasen Tambahen.”)
LIT nge rencanandu erjabu? Memang, labo arus erjabu gelah banci ermeriah ukur. Tapi enterem umat Jahwe si lajang denga, la soal si nguda ntah pe si metua, lit rencanana erjabu. Tapi sope kam ngerondong, lit si perlu ilakokenndu. Kai e? Arus paguh lebe kinitekenndu man Jahwe, arus tandaindu bandu, janah ertanggung jawap kam i bas ngaturken sen. a (1 Kor. 7:36) Adi enggo lakokenndu si e, perjabunndu pasti ermeriah ukur.
2 Memang, labo menukah ndarami teman geluh si cocok siakap. (Kua. 31:10) Bicara lit sekalak jelma si ngena atendu, uga nge carandu ngatakenca man bana? Bas artikel enda, sibahas kari kai si banci ilakoken kalak si atena ndarami teman geluh si cocok, janah uga carana mulai ngerondong. b Kenca si e, sibahas kari kai si banci ilakoken turang senina bas runggun guna ndukung kalak si atena erjabu e.
CARA NDARAMI TEMAN GELUH SI COCOK
3. Kai saja si perlu iukuri kalak si lajang denga si atena ndarami teman geluh?
3 Sope kam ngerondong, ulin adi enggo tehndu sipat si uga atendu lit bas calon teman geluhndu. Adi la bage banndu, banci kari sia-siakenndu kesempaten erteman ras kalak si cocok ras kam. Ntah ngerondong kam ras kalak si labo cocok ras kam. Memang, kalak si banci jadi teman geluhndu eme kalak si enggo iperidiken. (1 Kor. 7:39) Tapi labo kerina kalak si enggo iperidiken cocok jadi teman geluhndu. Emaka, ukurilah penungkunen enda: ‘Kai nge cita-citaku? Sipat si uga nge si kudarami bas calon teman geluhku? Masuk akal nge sura-suraku e?’
4. Adi erjabu atendu, kai nge si banci itotokenndu man Jahwe?
4 Adi erjabu atendu, totokenlah e man Jahwe. (Pil. 4:6) Memang labo janjiken Jahwe berekenNa teman geluh man sekalak jelma. Tapi perdiatekenNa keperlunta bage pe perasanta, janah banci sampatiNa kam ndarami teman geluh si cocok. Emaka, teruslah turiken sura-surandu ras perasanndu man baNa. (Ms. 62:8) Totokenlah gelahna sabar kam janah pentar. (Jak. 1:5) Bage me si ilakoken John, c turang seninata si tading bas Amerika Serikat. Bagenda nina, “Kukataken man Jahwe sipat-sipat kai si kudarami bas calon teman geluhku. Ertoto aku gelah banci jumpa ras kalak si cocok jadi teman geluhku. Kupindo man Jahwe gelah sampatiNa aku ncidahken sipat-sipat si banci erban aku jadi perbulangen si mehuli.” Tanya, sekalak turang seninata arah Sri Lanka ngataken, “Sanga kudarami calon teman geluhku, kupindo man Jahwe gelah sampatiNa aku tetap setia man baNa ras ermeriah ukur.” Perlu ingetndu, amin pe lenga kam jumpa ras kalak si cocok akapndu, erjanji Jahwe pasti perdiatekenNa kam janah kelengiNa kam.—Ms. 55:22.
5. Kai nge si banci ilakokenndu gelah banci kam jumpa ras kalak si lajang si engkelengi Jahwe? (1 Korinti 15:58) (Nen ka gambar.)
5 Ikataken bas Pustaka gelah terus min kita “sibuk bas ndahiken dahin Tuhan.” (Baca 1 Korinti 15:58.) Adi terus kam sibuk ngelayani Jahwe janah ergaul ras erbage-bage turang senina, banci reh teremna temanndu. Lit ka kesempatenndu jumpa ras kalak si lajang denga si fokus ngelayani Jahwe bagi kam. Adi usahakenndu mereken si mehulina man Jahwe, pasti meriah ukurndu.
Adi terus kam sibuk ngelayani Jahwe janah ergaul kam ras erbage-bage turang senina, banci kam jumpa ras kalak si cocok jadi teman geluhndu (Nen paragrap 5)
6. Kai nge si perlu iinget kalak si lajang denga sanga ndarami teman geluh?
6 Perlu kam hati-hati, ula min ndarami teman geluh akapndu si pentingna. (Pil. 1:10) Engkai? Sebap si erban tuhu-tuhu meriah ukurta eme hubungenta si rembak ras Jahwe, labo perban kita enggo erjabu ntah pe lenga. (Mat. 5:3) Situhuna perban lajang kam, reh buena kesempatenndu ngelayani Jahwe. (1 Kor. 7:32, 33) Gunakenlah waktundu alu mehuli sanga kam lajang denga. Sekalak turang seninata si gelarna Jessica si tading bas Amerika Serikat, erjabu ia sanga umurna hampir 40 tahun. Nina, “Sanga lajang denga aku, tetap aku sibuk bas dahin erberita. E me si erban puas geluhku amin pe lit sura-suraku erjabu.”
PERDIATEKEN LEBE
7. Engkai maka ulin adi perdiatekenndu lebe kalak si ngena atendu sope turikenndu perasanndu man bana? (Kuan-kuanen 13:16)
7 Uga adi ngena atendu sekalak jelma janah cocok kapndu ia jadi teman geluhndu? Mehuli nge adi mis turikenndu perasanndu man bana? Nina Pustaka, kalak si pentar ukurina lebe sope ia ertindak. (Baca Kuan-kuanen 13:16.) Sope turikenndu perasanndu man bana, ulin nge adi perdiatekenndu ia lebe. Sekalak turang seninata si gelarna Aschwin arah Belanda ngataken, “Ate ngena e banci meter turah, tapi banci ka meter bene. Emaka adi ngena atendu sekalak jelma, perdiatekenlah lebe ia. Perban adi la bage, enggo pe kari kam ngerondong banci mis berubah perasan e.” Selain si e, banci saja kenca perdiatekenndu ia, sadar kam maka labo kepe ia cocok man bandu.
8. Kai nge si perlu itehndu kerna kalak si ngena atendu? (Nen ka gambar.)
8 Kai nge si perlu itehndu kerna kalak si ngena atendu? Sanga bas perpulungen ntah pe bas acara ramah tamah, i je me kesempatenndu ngidah uga kin ia kalakna situhuna, uga sipat-sipatna, janah uga hubungenna ras Jahwe. Perlu tehndu ise saja temanna janah kai nge si usur cakapkenna. (Luk. 6:45) Seri nge cita-cita kena? Banci ka sungkunndu kerna ia man pertua bas runggunna ntah sungkunndu turang senina si paguh kinitekenna situhu-tuhu nandai ia. (Kua. 20:18) Banci ka sungkunndu kalak e kerna uga ia itandai kalak ras sipat-sipatna. (Rut 2:11) Tapi ula sempat lanai kapna nyaman banndu, ergailah perasanna janah ula rusursa kam rembak ras ia ntah pe kerina sungkunindu kerna ia.
Perdiatekenlah lebe kalak si ngena atendu sope turikenndu perasanndu man bana (Nen paragrap 7-8)
9. Sanga turikenndu atendu perasanndu man sekalak jelma, kai si perlu ingetndu?
9 Asa kai nge dekahna perlu perdiatekenndu sekalak jelma sope turikenndu perasanndu man bana? Adi metersa turikenndu perasanndu, banci kari ianggapna kam kalak si merudusa ntah pe la mehuli erban keputusen. (Kua. 29:20) Tapi, adi ndekahsa pe turikenndu perasanndu padahal enggo tehna ngena atendu ia, banci kari katakenna kam la serius kalakna. (Peng. 11:4) Perlu ingetndu, sope turikenndu perasanndu man bana, ula mis akapndu arus kena erjabu. Tapi si pentingna, arus yakin kam enggo kam siap erjabu janah kalak si ngena atendu e pe cocok jadi teman geluhndu.
10. Kai nge si perlu ilakokenndu adi lit kalak si rate ngena man bandu tapi kam lang?
10 Uga adi lit kalak si ngena atena ngidah kam? Adi la atendu ngena ia, cidahkenlah arah perbahanenndu. Ula banndu ngarap ia man bandu padahal labo lit ukurndu man bana, sebap perbahanen si bage la mehuli.—1 Kor. 10:24; Ep. 4:25.
11. Adi ipindo kam ndarami calon teman geluh man sekalak jelma, kai si perlu ingetndu?
11 Bas piga-piga ingan, kalak si lajang denga ijodohken orang tuana ntah pe keluargana. Bas ingan si deban, kalak si lajang denga ipejumpa keluargana ntah pe temanna ras kalak lajang si debanna. Tapi kalak si lajang e kari si erban keputusen cocok kalak e duana ngerondong ntah lang. Adi ipindo kam ndarami calon teman geluh man sekalak jelma, perlu itehndu kalak si uga kin si idaramina. Adi lit kapndu si cocok, perlu tehndu terbuen kerna ia. Contohna, uga sipat-sipatna janah uga hubungenna ras Jahwe. Ndauh pentingen hubungenna ras Jahwe asangken ertana, sekolahna, ntah pe pendahinna. Tapi si erban keputusen guna erjabu ntah lang, arus kalak e duana.—Gal. 6:5.
MULAI NGERONDONG
12. Adi ngena atendu sekalak jelma, uga carandu nuriken perasanndu?
12 Adi ngena atendu sekalak jelma, uga nge carandu nuriken perasanndu? d Banci daramindu kesempaten gelah banci kam langsung ngerana man bana ntah pe arah telepon. Jelas turiken man bana maka ngena atendu ia. (1 Kor. 14:9) Adi perlu ia waktu guna ngukurisa, sabarlah kam. (Kua. 15:28) Adi la ngena atena kam, ula paksandu ia.
13. Kai si perlu ilakokenndu adi lit kalak si nuriken perasanna man bandu? (Kolose 4:6)
13 Uga adi lit kalak si nuriken perasanna man bandu? Mehulilah kam ngaloisa janah ergai perasanna e, perban banci saja enggo erjuang ia gelah pang nurikenca man bandu. (Baca Kolose 4:6.) Adi perlu kam waktu ngukurisa, kataken terus terang. Tapi adi banci, mislah berendu jawapenna. (Kua. 13:12) Adi la tendu ngena ia, terus teranglah turiken man bana janah mehulilah kam ngerana. Cuba perdiateken pengalamen Hans, sekalak turang seninata arah Austria. Sanga lit sekalak diberu si nuriken perasanna man Hans, nina Hans, “Terus terang kukataken man bana uga perasanku janah mehuli aku ngerana, perban la ateku ngarap ia man bangku. Selain si e, ku lebena pe kujaga ranan ras perbahanenku gelah ula akapna enggo lit ukurku man bana.” Tapi, adi ngena atendu man kalak si nuriken perasanna e man bandu, turiken perasanndu e ras kai si arapkenndu arah hubungen kena. Bahaslah uga kari cara kena ngerondong, perban banci saja la seri pendapat kena kerna si e bergantung latar belakang kena ras si debanna.
CARA NDUKUNG TURANG SENINA SI LAJANG
14. Uga carata ndukung turang senina si lajang denga?
14 Uga carata ndukung turang seninata si lajang denga? Salah sada carana eme njaga rananta. (Ep. 4:29) Banci siukuri penungkunen enda: ‘Pernah nge kitik kuban ukur turang senina si lajang denga, padahal erjagar-jagar ngenca ateku? Adi lit kuidah dilaki ras diberu si lajang denga sangana ngerana-ngerana, mis nge kuban kesimpulen kalak e sangana erteman-teman?’ (1 Tim. 5:13) Selain si e, ula siban turang senina si lajang denga e erpengakap maka lit si kurang bas ia perban lenga ia erjabu. Hans si enggo iceritaken ndai ngataken, “Piga-piga turang senina ngataken man bangku, ‘Engkai maka lenga kam erjabu? Enggo metuasa kari kam.’ Ranan si bage banci erban kitik ukur turang senina si lajang denga janah e banci erban kurang ter akap kalak e erjabu.” Padin nge sidarami cara guna muji turang senina si lajang denga.—1 Tes. 5:11.
15. (a) Menurut Roma 15:2, kai si perlu siukuri sope sisampati sekalak jelma ndarami calon teman geluh? (Nen ka gambar.) (b) Kai nge si banci pelajarindu arah video si lit bas cataten i teruh?
15 Uga adi cocok siakap sekalak dilaki ras diberu jadi pasangen? Ikataken bas Pustaka arus siukuri perasan kalak si deban. (Baca Roma 15:2.) Enterem turang senina si lajang denga la meriah akapna adi ijodoh-jodohken, emaka arus siergai keputusenna e. (2 Tes. 3:11) Tapi, lit ka turang senina si lajang denga merhat ia isampati, tapi adi la pindona ula padah lakoken. e (Kua. 3:27) Lit ka si meriah ukurna isampati, tapi carana la tena resmisa. Sekalak turang seninata si lajang denga si tading bas Jerman si gelarna Lydia ngataken, “Banci ajakndu turang senina termasuk piga-piga kalak si lajang denga bas acara ramah tamah. Alu bage, lit kesempaten kalak si lajang denga sitandan. Tapi uga ranan kalak e seterusna, kalak e si metehsa, ula padah campurindu.”
Acara ramah tamah banci jadi kesempaten man turang senina si lajang denga guna sitandan (Nen paragrap 15)
16. Kai nge si perlu iinget turang senina si lajang denga?
16 Kerina kita banci ermeriah ukur la soal enggo erjabu ntah pe lenga. (Ms. 128:1) Adi erjabu atendu tapi lenga jumpa ras kalak si cocok akapndu, teruslah kam sibuk ngelayani Jahwe. Sekalak turang seninata si gelarna Sin Yi si tading bas Makau ngataken, “Situhuna ntisik ngenca kam melajang adi bandingken ras waktundu sanga enggo lit pagi pasangenndu bas doni si mbaru. Emaka, ergailah waktundu e janah gunaken alu mehuli.” Tapi, adi enggo jumpa kam ras kalak si cocok akapndu janah sangana kam ngerondong, bas artikel seterusna sibahas kari uga carana gelahna banci banndu keputusen si mehuli.
LAGU 137 Iergai Jahwe Diberu si Setia
a Guna meteh enggo nge kam banci erjabu ntah lang, nenlah bas jw.org artikel “Pacaran—Bagian 1: Apa Aku Sudah Siap untuk Pacaran?”
b PENJELASEN TAMBAHEN: Bas artikel enda ras artikel seterusna, sekalak dilaki ras diberu ikataken “ngerondong” sanga kalak e duana rusaha gelah tuhu-tuhu sitandan. Tujun ngerondong eme guna nentuken cocok ntah lang kalak e erjabu. Sekalak dilaki ras diberu ikataken mulai ngerondong sanga ituriken kalak e alu jelas maka duana kalak e singenan. Kenca piga-piga waktu dekahna kalak e ngerondong, iban kalak e me keputusen guna erjabu ntah putus.
c Piga-piga gelar enggo iganti.
d Bas piga-piga budaya, biasana dilaki nge si nuriken perasanna man sekalak diberu. Tapi, situhuna sekalak diberu pe banci nge nuriken perasanna man sekalak dilaki. (Rut 3:1-13) Guna meteh terbuen, nen artikel “Kaum Muda Bertanya . . . Bagaimana Cara Menyatakan Perasaan Saya Kepadanya?” bas Sedarlah! 22 Oktober 2004.
e Nen bas jw.org video Kalak si Berhasil Mperjuangken Kinitekenna—Turang Senina si La Erjabu.