ARTIKEL PELAJAREN 22
LAGU 127 Jelma si Uga kin Aku Arusna
Cara Ngerondong si Erban Meriah Ukur Jahwe
‘Kejilen si rehna arah pusuh nari merga kel.’—1 PET. 3:4.
INTINA
Sibahas kari kai si banci ilakoken kalak si sangana ngerondong gelah banci erban keputusen si mehuli, janah uga turang senina bas runggun banci ndukung kalak e.
1-2. Uga nge perasan piga-piga kalak kerna ngerondong?
SANGA sekalak jelma ngerondong, banci saja masa-masa e erban meriah kel ukurna. Adi sangana kam ngerondong pasti atendu gelah kerinana erdalan alu mehuli. Melala kalak si ngerondong pe bage ka nge perasanna. Tia, a sekalak turang senina arah Etiopia ngataken, “Salah sada masa-masa si meriahna bas geluhku eme sanga aku ngerondong denga ras perbulangenku. Icakapken kami kerna kai si penting janah tawa ka kami. Meriah kel ukurku sanga kuteh maka enggo jumpa aku ras kalak si kukelengi ras si engkelengi aku.”
2 Tapi, lit sekalak turang seninata arah Belanda si gelarna Alessio. Nina, “Memang meriah ukurku nandai ndeharaku sanga kami ngerondong denga. Tapi lit ka nge tentangenna.” Bas artikel enda, sibahas kari piga-piga tentangen si banci saja iadapi kalak si ngerondong. Selain si e, sibahas ka kari prinsip Pustaka si banci nampati kalak si ngerondong erban keputusen si mehuli. Sibahas ka kari, uga turang senina bas runggun banci ndukung kalak si ngerondong.
KAI NGE TUJUNNA NGERONDONG?
3. Kai nge tujunna ngerondong? (Kuan-kuanen 20:25)
3 Memang, banci saja meriah ukur sekalak jelma sanga ngerondong. Tapi situhuna ngerondong eme keputusen si serius perban arus iban kalak e keputusen erjabu ntah lang. Bas acara perjabun kalak e pagi, erjanji kalak e i lebe-lebe Jahwe maka kalak e sikeleng-kelengen ras siergan segedang geluhna. Perban si e, sope kalak e erjanji, pasti arus ukuri kalak e alu mbages kerna janji e. (Baca Kuan-kuanen 20:25.) Sanga kalak e ngerondong, banci kalak e sitandan sada ras si debanna gelah banci iban kalak e keputusen si mehuli. Banci saja keputusen kalak e erjabu ntah pe putus. Adi putus kalak e, labo ertina kalak e gagal. Situhuna, enggo ban kalak e keputusen si mehuli, sebap e me tujunna ngerondong.
4. Engkai maka arus benar cara rukurta kerna ngerondong?
4 Engkai maka arus benar cara rukurta kerna ngerondong? Perban adi benar cara rukur kalak si lajang kerna ngerondong, pasti la kalak e nggit ngerondong adi la lit tujunna guna erjabu. Tapi labo kalak si lajang ngenca si arus benar perukurenna kerna ngerondong. Kerina kita arus benar perukurenta. Contohna, lit kalak si erpengakap adi sekalak jelma ngerondong, arus ia erjabu ras rondongna e. Kai nge pengaruhna perukuren si bage man turang seninata si lajang denga? Sekalak turang seninata si gelarna Melissa, si tading i Amerika Serikat ngataken, “Piga-piga turang senina bas runggun ngarap gelah kalak si ngerondong arus erjabu. Dungna, la pe akap kalak e cocok, teruskenna erjabu. Si debanna mbiar dungna ngerondong. Enda me si erban latih ukur kalak si lajang denga.”
UGA CARANA GELAH TANDAINDU RONDONGNDU TERBAGESEN?
5-6. Kai saja nge si perlu iteh kalak si sangana ngerondong? (1 Petrus 3:4)
5 Adi sangana kam ngerondong, uga nge carandu meteh enggo nge kam siap erjabu ntah lang? Arus tuhu-tuhu lebe tandaindu rondongndu e. Memang sope kam ngerondong, enggom perdiatekenndu rondongndu e. Tapi gundari me waktuna guna meteh terdauhen uga kin situhuna rondongndu e. (Baca 1 Petrus 3:4.) Si e termasuk uga hubungenna ras Jahwe. Uga sipat-sipatna ras carana rukur. Selain si e, perlu tehndu jawapen arah penungkunen-penungkunen enda: ‘Cocok nge ia jadi teman geluhku? Banci nge kukelengi ia janah ermediate aku man bana? Banci ka nge ia bage man bangku?’ (Kua. 31:26, 27, 30; Ep. 5:33; 1 Tim. 5:8) ‘Banci nge kualoken kekurangenna janah ia pe bage man bangku?’ b (Rom. 3:23) Perlu ingetndu, si pentingna labo asa buena persaman kena, tapi uga cara kena ngadapi perbedan kena.
6 Kai ka si perlu tehndu sanga kena ngerondong? Sope reh bagesna kekelengenndu man rondongndu, arus bahas kena kerna hal-hal si penting. Contohna kerna rencana kena ras cita-cita kena. Tapi uga kerna masalah pribadi? Bagi masalah kesehaten, sen, ras kenangen buruk si pernah adapindu? Memang labo arus kerinana ibahas kena adi mbaru denga kena ngerondong. (Bandingken Johanes 16:12.) Tapi, adi metersa kapndu sungkunina masalah pribadindu, kataken man bana. Perlu ingetndu, lit nge kari waktuna arus tehna kerinana gelah banci banna keputusen si mehuli. Emaka jujurlah kam man bana.
7. Uga nge carana gelah reh bagesna tandaindu rondongndu? (Nen ka kotak “ Ngerondong Jarak Jauh.”) (Nen ka gambar.)
7 Uga nge carana gelah reh bagesna tandaindu rondongndu? Arus jujur kena duana sanga kena ngerana-ngerana, sungkunilah ia janah tutuslah atendu megikenca. (Kua. 20:5; Jak. 1:19) Gelah reh riahna kap kena ngerana, banci ras-ras kena ngelakoken piga-piga kegiaten bagi man, erdalan-dalan bas ingan jelma si enterem, ras erberita. Banci ka kena ergaul ras turang senina bage pe keluarga kena. Selain si e, ban kenalah rencana guna ngelakoken piga-piga kegiaten si banci nampati kam meteh uga perbahanen rondongndu sanga erurusen ras erbage-bage jelma bage pe bas erbage-bage situasi. Bage me si ilakoken Aschwin, arah Belanda ras rondongna Alicia. Nina, “Ras-ras kami ndahiken piga-piga kegiaten si sederhana bagi erdakan ras si debanna. Perban si e, reh bagesna me ia kutandai, ia pe bage ka. Dungna, kuteh me sipat-sipatna si mehuli ras kekurangenna.”
Adi ras-ras kena ngelakoken sada kegiaten, banci kena ngerana-ngerana janah reh bagesna kena sitandan duana (Nen paragrap 7-8)
8. Kai saja nge manpaatna adi kalak si ngerondong ras-ras erlajar?
8 Banci ka tandaindu rondongndu terbagesen adi ras-ras kena mpelajari topik-topik arah Pustaka. Adi enggo pagi kena erjabu, arus ban kena ibadah keluarga gelah tetap andalken kena Jahwe. (Peng. 4:12) Tapi amin pe kena ngerondong denga, perlu ban kena jadwal guna ras-ras erlajar. Memang, kalak si ngerondong lenga banci ikataken sada keluarga. Kam si dilaki pe, lenga bo banci ikataken kepala man rondongndu. Tapi adi teratur kena erlajar duana, banci tehndu uga paguhna hubungen rondongndu ras Jahwe. Max ras Laysa, si tading i Amerika Serikat, nuriken kai ka manpaatna perban ras-ras ia erlajar. Nina Max, “Sanga mbaru denga kami ngerondong, ras-ras kami mpelajari publikasi si mbahas topik kerna ngerondong, erjabu, ras erkeluarga. Perban si e, banci bahas kami topik-topik si penting si la pernah seh ukur kami ku je.”
KAI DEBA NARI SI PERLU IUKURI?
9. Kai saja nge si perlu iukuri kalak si ngerondong kerna ise si banci meteh hubungen kalak e?
9 Ise nge si perlu meteh hubungen kena? Si e kena si mutuskenca. Sanga mulai kena ngerondong, banci saja la ate kena enterem si metehsa. (Kua. 17:27) Bage ban kena, perban la ate kena enterem si nungkunisa, janah la atendu latih ukurndu perban si e. Tapi adi la kataken kena man ise pe, dungna erbuni-buni me kena ngerondong. Si enda banci bahaya. Emaka, ulin nge adi kataken kena man kalak si banci mereken nasehat ras penampat man kena. (Kua. 15:22) Contohna, banci kataken kena man piga-piga anggota keluarga kena, teman kena si terteki, ntah pe man pertua.
10. Kai si arus ilakoken kalak si ngerondong gelah tetap bersih lagu langkahna i lebe-lebe Jahwe? (Kuan-kuanen 22:3)
10 Kai nge si perlu ilakoken kalak si ngerondong gelah tetap bersih lagu langkahna i lebe-lebe Jahwe? Sanga reh bagesna kekelengenndu man rondongndu, biasana rusur atendu rembak ras ia. Kai nge si banci nampati kam gelah tetap bersih lagu langkahndu i lebe-lebe Jahwe? (1 Kor. 6:18) Ula cakapken kena kerna perbahanen seks si salah. Ula kena dua-dua saja bas ingan si melungen janah ula mbuesa inem kena inemen si lit alkoholna. (Ep. 5:3) Engkai? Perban si e banci erban turah napsundu janah mesera kapndu ngendalikenca. Emaka rusurlah cakapken kai si banci lakoken kena gelah tetap bersih lagu langkah kena sanga ngerondong. (Baca Kuan-kuanen 22:3.) Bage me si ilakoken Dawit ras Almaz arah Etiopia. Nina kalak e, “Biasana adi jumpa ate kami, pilih kami ingan si melala jelma, la pernah kami dua-dua bas motor ntah pe bas rumah. Perban si e, la lit si erban kami tergoda ngelakoken kai si salah.”
11. Kai nge si perlu iukuri kalak si ngerondong sanga cidahken kalak e atena ngena?
11 Uga nge carandu ncidahken atendu ngena man rondongndu? Kam me si nentukenca. Tapi perlu ingetndu, adi turah sura-surandu si salah guna ngelakoken perbahanen seks, si e banci erban mesera kapndu erban keputusen si mehuli. (Ende. 1:2; 2:6) Banci ka mesera kapndu ngendaliken dirindu. Dungna ilakokenndu me dosa. (Kua. 6:27) Perban si e, sanga mbaru denga kena ngerondong, bahas kena min prinsip-prinsip Pustaka kerna batasen-batasen si perlu itetapken kena. c (1 Tes. 4:3-7) Selain si e, ukuri ka penungkunen enda: ‘Uga nge pendapat kalak sanga idahna kami ncidahken ate ngena? Sanga cidahken kami ate ngena man sada ras si debanna, banci nge turah sura-sura si salah bas kami?’
12. Kai nge si perlu ukurindu adi beda pendapat kam ras rondongndu?
12 Uga nge cara kena ndungi masalah sanga beda pendapat kena? E labo ertina la kena cocok duana. Engkai? Perban kerina kalak si ngerondong pasti pernah beda pendapat. Perjabun banci paguh labo perban perbulangen ras ndehara lalap sependapat, tapi perban nggit kalak e ras-ras ngatasi perbedan. Cara kena ndungi masalah sanga kena ngerondong, ncidahken uga pagi cara kena ndungi masalah kenca erjabu. Cuba ukuri enda: ‘Banci nge kami tenang duana janah lembut sanga ndungi masalah? Nggit nge kami ngakui kesalahen kami janah usahaken kami mpehulisa? Banci nge kami mis simaap-maapen?’ (Ep. 4:31, 32) Tapi, adi rusursa kena beda pendapat janah mesera kap kena ndungi masalah sanga ngerondong, banci saja bage ka nge pagi adi enggo kena erjabu. Emaka adi la kapndu cocok rondongndu e ras kam, padin kena putus. E me keputusen si mehulina man kena duana. d
13. Kai si banci nampati kam erban keputusen si mehuli kerna asa dekahna kam ngerondong?
13 Si mehulina, asa kai nge dekahna kena ngerondong? Adi merudu-rudu erban keputusen, biasana la mehuli hasilna. (Kua. 21:5) Emaka perlu ukurindu enggo nge bias waktundu nandai rondongndu ntah lenga. Tapi, ula ndekahsa kena ngerondong. Perban nina Pustaka, “Arapen si la terjadi erban getem pusuh.” (Kua. 13:12) Selain si e, adi rusursa kena ras duana, reh serana kari kap kena ngelawan godan ngelakoken perbahanen seks si salah. (1 Kor. 7:9) Asangken lalap ukuri kena kerna asa dekahna kena ngerondong, pangen ukuri kena penungkunen enda, ‘Kai deba nari si perlu kuteh kerna rondongku gelah banci kuban keputusen si mehuli?’
UGA CARA NDUKUNG TURANG SENINA SI SANGANA NGERONDONG?
14. Uga carata ndukung turang seninata si sangana ngerondong? (Nen ka gambar.)
14 Adi lit siteh turang seninata sangana ngerondong, uga nge carata ndukung kalak e? Banci siajak kalak e ras-ras man, ibadah keluarga, ntah pe rekreasi. (Rom. 12:13) Adi bage siban, banci sisampati kalak si ngerondong gelah reh bagesna kalak e sitandan duana. Banci ka sitemani kalak e ku sada ingan, ras kita sada motor, ntah pe siajak kalak e ku rumahta gelah ula kalak e dua-dua saja sanga ngerondong. (Gal. 6:10) Alicia, si enggo ituriken ndai, ngataken uga turang senina bas runggun nampati ia sanga ngerondong ras Aschwin. Nina, “Meriah ukur kami duana sanga ikataken turang senina banci kami reh ku rumahna. Alu bage, banci kami duana ngerana-ngerana, tapi tetap lit si ngawasisa.” Adi ipindo kam nemani kalak si sangana ngerondong, e sada kesempaten si mehuli guna nampati kalak e. Tapi, ula pediat la lit si ngawasi kalak e. Amin pe bage perlu ka berendu waktu ras kesempaten gelah banci kalak e duana ngerana.—Pil. 2:4.
Adi siteh lit turang seninata sangana ngerondong, banci sidarami cara guna ndukung kalak e (Nen paragrap 14-15)
15. Kai ka si banci silakoken guna ndukung turang senina si sangana ngerondong? (Kuan-kuanen 12:18)
15 Cara si deban guna ndukung turang seninata si sangana ngerondong eme arah rananta. Mon-mon, perlu sikendaliken dirita. (Baca Kuan-kuanen 12:18.) Contohna, enggo pe siteh turang seninata e sangana ngerondong, ula min sikata-kataken man kalak si deban. Padin nge ia si langsung ngatakenca man kalak e. Selain si e, pasti la kita nggit ncikurakken turang seninata si sangana ngerondong e, ntah sipandangi keputusen kalak e. (Kua. 20:19; Rom. 14:10; 1 Tes. 4:11) Ula min rusur sisungkuni kalak e ndigan ate kalak e erjabu. Elise ras perbulangenna nuriken pengalamenna sanga kalak e ngerondong, nina, “Mela kami adi lit si nungkun ndigan ate kami erjabu, padahal lenga lit bahas kami duana kerna si e.”
16. Uga nge arusna tanggapenta adi lit turang seninata si putus?
16 Uga adi lit turang seninata si sangana ngerondong tapi dungna putus? Ula min sisungkun-sungkuni kalak e engkai maka ia putus, ntah pe sisalahken salah sada arah kalak e. (1 Pet. 4:15) Sekalak turang seninata si gelarna Lea ngataken, “Pernah kubegi cakapken kalak engkai maka aku putus ras rondongku. Padahal labo teh kalak e alasen situhuna. Sakit hati kel aku perban si e.” Bagi si enggo sibahas bas paragrap sebelumna, adi lit turang seninata si dungna putus, labo situhuna kalak e gagal. Situhuna, enggo seh tujun kalak e ngerondong eme erban keputusen si mehuli. Tapi kalak si putus, biasana sedih janah melungen kapna. Emaka perlu sisampati kalak e.—Kua. 17:17.
17. Kai nge si arus terus ilakoken kalak si ngerondong?
17 Pasti melala tentangen si iadapi kalak si ngerondong. Amin pe bage, banci kalak e tetap ermeriah ukur. Sekalak turang seninata si gelarna Jessica ngataken, “Melala si arus usahaken kami sanga kami ngerondong. Tapi meriah ukurku perban pake kami waktu ras gegeh kami gelah reh bagesna kami sitandan duana.” Adi sangana kam ngerondong, teruslah usahaken gelah reh bagesna tandaindu rondongndu. Alu bage, pasti banci ban kena keputusen si mehuli.
LAGU 49 Erban Meriah Ukur Jahwe
a Piga-piga gelar enggo iganti.
b Guna meteh penungkunen si deban si perlu iukuri, nen Pertanyaan Kaum Muda—Jawaban yang Praktis, Jilid 2, hal. 39-40.
c Njemak-njemak alat kelamin sekalak jelma, termasuk perbahanen seks si salah. Adi lit kalak bas runggun si bage perbahanenna, pertua arus erban panitia pengadilen guna ngatasi masalah e. Selain si e, adi lit kalak si njemak-njemak payudara ntah pe kata-katana erban turah napsu kalak, la soal e arah pesan ntah pe telepon, banci saja iban panitia pengadilen, bergantung situasina.
d Guna meteh terbuen, nen artikel “Pertanyaan Pembaca” bas Menara Pengawal 15 Agustus 1999.