1. Kai saja nge si tehndu arah pertemuan tahunen 2023?

 BAS pertemuan tahunen 2023, a lit pengangkanta si isesuaiken janah lit ka pengumumen kerna dahin erberita. Contohna, arah pertemuan e siteh maka banci saja piga-piga kalak lit denga pagi kesempatenna jadi umat Dibata kenca Babilon si Mbelin ikernepken. Siteh ka maka mulai November 2023, perberita Kerajan lanai perlu ngelaporken kerina kegiatenna bas pelayanen. Tapi, enda labo ertina dahin erberita enggo kurang penting.

2. Engkai maka dahin erberita reh pentingna gundari? (Markus 13:10)

² Tambah warina, dahin erberita reh pentingna. Engkai? Perban waktu erberita reh sitikna. Cuba siinget kai si ikataken Jesus kerna dahin erberita bas wari-wari pendungi. (Baca Markus 13:10.) Bas cataten Matius pe ikataken Jesus maka berita si meriah iberitaken pagi i belang-belang doni sope reh “kedungen e.” (Mat. 24:14) Enggo itetapken Jahwe “wari ras jamna” si e terjadi. (Mat. 24:36; 25:13; Perb. 1:7) Tiap wari, kedungen e reh deherna. (Rom. 13:11) Emaka, arus terus kita erberita seh ngasa reh kedungen e.

3. Engkai maka nggit kita erberita?

³ Lit penungkunen si perlu siukuri, eme: Engkai maka kita nggit erberita si meriah? Lit telu alasenna. Si  pertama, perban meherga siakap kebenaren. Si peduaken, keleng ateta kerina kalak. Si peteluken, keleng ateta Jahwe ras gelarNa, janah enda me alasen si pentingna. Mari sibahas sada per sada.

PERBAN MEHERGA SIAKAP KEBENAREN

4. Kai nge silakoken sanga sibegi berita si meriah?

⁴ Pasti meriah ukurta sanga lit sibegi berita si meriah. Misalna, sanga lit kade-kadeta si lahir anakna, bage ka pe sanga enggo ndekah sidarami dahin janah dungna sidat dahin e. Pasti mis ateta siceritaken man kalak si deban. Uga kerna berita si meriahna eme berita kerna Kerajan Dibata? Mis ka nge atendu iceritakenndu?

5. Uga nge perasanndu sanga tangtangna tehndu kebenaren? (Nen ka gambar.)

⁵ Uga nge perasanndu sanga tangtangna tehndu kebenaren arah Pustaka? Pasti meriah kel ukurndu! (Luk. 24:32) Meriah kel akapndu sanga tangtangna tehndu maka keleng ate Jahwe man bandu. Banci kam jadi bagin keluargaNa, janah lanai ndekah masapkenNa kerina kesusahen. Tehndu ka maka banci kam jumpa ras keluarga ntah pe temanndu si enggo mate, janah mbue ka janji Dibata si debanna. (Mrk. 10:​29, 30; Joh. 5:​28, 29; Rom. 8:​38, 39; Ket. 21:​3, 4) Meherga kel akapndu kebenaren si enggo pelajarindu e, janah bagikenndu atendu man kalak si deban!—Bandingken Jeremia 20:9.

6. Kai si banci pelajarindu arah pengalamen Ernest ras Rose?

⁶ Cuba siukuri pengalamen enda. Lit turang seninata si gelarna Ernest. b Sanga umurna kira-kira sepuluh tahun,  mate bapakna. Emaka tersungkun-sungkun ia. Nina, “Ku surga nge bapakku? Banci denga nge aku jumpa ras ia?” Usur ia reh ku kuburen bapakna, sujud ia janah ertoto ia. Nina, “O Dibata, i ja nge bapakku?” Sanga idahna anak-anak si deban lit bapakna, cian atena. Tapi kira-kira 17 tahun kenca mate bapakna, erlajar Pustaka ia. Dungna tehna uga keadan kalak mate. Tehna maka kalak mate labo gejapna kai pe bali bagi kalak si sangana entabeh perpedemna. Tehna ka maka kalak mate banci nggeluh mulihi. (Peng. 9:​5, 10; Perb. 24:15) Terjawap me penungkunenna sedekah enda. Meherga kel kapna kai si enggo pelajarina e. Diberuna pe si gelarna Rose nggit erlajar Pustaka janah meriah kapna erberita. Bas tahun 1978, ras-ras kalak e iperidiken. Meriah akap kalak e erberita man temanna, keluargana, bage pe man kalak si deban. Hasilna, banci sampati kalak e lebih 70 kalak guna nandai Jahwe ras iperidiken.

7. Adi kebenaren e enggo mbages rurat bas pusuhta, kai nge silakoken? (Lukas 6:45)

⁷ Adi kebenaren e enggo mbages rurat bas pusuhta, pasti lanai tersinikken kita. (Baca Lukas 6:45.) Perasanta bali bagi murid-murid Jesus bas abad pertama, si ngataken, “La terngadiken kami ngerana kerna kai si enggo idah kami ras si begi kami.” (Perb. 4:20) Perban meherga siakap kebenaren si enggo sipelajari arah Pustaka, siceritaken ateta man enterem kalak.

PERBAN KELENG ATETA KALAK SI DEBAN

8. Engkai maka meriah ukurta mberitaken berita si meriah? (Nen kotak “ Kelengi Kerina Kalak—Jadikenlah Murid.”) (Nen ka gambar.)

⁸ Bali bagi Jahwe ras Jesus, kita pe keleng ateta kalak si deban. (Kua. 8:31; Joh. 3:16) Mekuah ateta ngidah kalak si ‘la nandai Dibata’ ras si ‘la lit arapenna.’ (Ep. 2:12) Perban melala masalah si adapi kalak e, tempa-tempa ndabuh kalak e ku lubang si seh kel bagesna. Tapi lit bas kita nali si banci narik kalak e ndarat arah lubang e, eme berita si meriah kerna Kerajan Dibata. Perban keleng ateta janah mekuah ateta ngidah kalak e, tutus ateta mberitaken berita si meriah. Sanga begi kalak e berita si meriah, lit me arapen kalak e. Banci kalak e ermeriah ukur gundari janah banci ka dat kalak e “kegeluhen situhu-tuhu” eme kegeluhen si rasa lalap bas doni si mbaru.—1 Tim. 6:19.

9. Persinget kai nge pagi sipeseh, janah engkai? (Esekiel 33:​7, 8)

 ⁹ Perban keleng ateta kalak, nggit kita mpersingeti jelma si enterem maka kedungen doni si jahat enda enggo ndeher. (Baca Esekiel 33:​7, 8.) Mekuah ateta kalak e termasuk keluargata si la nembah Jahwe. Enterem arah kalak e ndahiken dahinna tiap wari janah la tehna kai si nandangi terjadi. Ntisik nari terjadi me “kiniseran si mbelin si lenga pernah terjadi mulai kin doni lit seh ngasa gundari, janah ndigan pe lanai pagi terjadi.” (Mat. 24:21) Merhat kita gelah teh kalak e min kai pagi si terjadi bas kiniseran si mbelin. Tangtangna, ikernepken pagi kerina agama palsu. Kenca si e, ikernepken me pemerentahen Setan bas Harmagedon. (Ket. 16:​14, 16; 17:​16, 17; 19:​11, 19, 20) Ertoto kita gelah enterem jelma nggit megiken persinget e janah nggit nembah Jahwe radu ras kita. Tapi kai pagi si terjadi man kalak si la nggit megiken persinget e, termasuk keluargata?

10. Engkai maka reh pentingna dahin erberita gundari?

¹⁰ Bali bagi si enggo ituriken bas artikel sebelumna, banci saja lit kalak si dungna tek man Jahwe kenca idahna Babilon si Mbelin ikernepken. Banci saja selamatken Jahwe ateNa kalak e. Perban si e, penting kel gelah terus kita erberita gundari nari. Cuba ukuri enda: Berita si ipeseh kita gundari, banci saja inget kalak e pagi. (Bandingken Esekiel 33:33.) Perban si e, tersuruh ukur kalak e nembah Jahwe sanga lit denga waktu. Mbarenda, lit sekalak penjaga penjara bas Pilipi si dungna tek man Dibata kenca terjadi “gempa si megegeh.” Bage ka me pagi, banci saja kalak si gundari la nggit megi beritata, dungna tek ia man Dibata kenca idahna Babilon si Mbelin ikernepken.—Perb. 16:​25-34.

PERBAN KELENG ATETA JAHWE RAS GELARNA

11. Uga carata mereken kemulian ras kehamaten man Jahwe? (Ketangkasen 4:11) (Nen ka gambar.)

¹¹ Alasen si pentingna nggit kita erberita eme perban keleng ateta Jahwe ras gelarNa si badia. Erberita si meriah me salah sada carata guna muji Dibata. (Baca Ketangkasen 4:11.) Pasti setuju kita maka Jahwe Dibata si metunggung ngaloken kemulian ras kehamaten janah Ia Dibata si erkuasa. Sibereken kemulian ras kehamaten man baNa sanga siceritaken man kalak maka Ia si “nciptaken kerina si lit,” janah perban Ia nge maka  banci kita nggeluh. Sibereken ka waktuta, gegehta, ras kai pe si lit bas kita guna ngelakoken pelayanenta sesuai ras keadanta. (Mat. 6:33; Luk. 13:24; Kol. 3:23) Jelas me, perban keleng ateta Dibata, nggit kita nceritaken kerna Ia. Meriah ka ukurta nceritaken kerna gelarNa bage pe sipat-sipatNa. Engkai?

12. Uga nge carata mpebadia gelar Jahwe?

¹² Perban keleng ateta Jahwe, nggit kita mpebadia gelarNa. (Mat. 6:9) Perban Jahwe enggo ipitnah Setan, sibela ateta Jahwe. (Kej. 3:​1-5; Jop 2:4; Joh. 8:44) Sanga kita erberita, semangat kita cerita man kalak kerna uga kin situhuna Jahwe e. Meriah ukurta gelah teh kalak maka mbelin kel kekelengen Jahwe janah adil pemerentahenNa. Selain si e, kerina masalah si terjadi gundari, lanai pagi lit perban Kerajan Dibata. Kerina pagi kalak banci nggeluh dame ras ermeriah ukur. (Ms. 37:​10, 11, 29; 1 Joh. 4:8) Adi siceritaken kerna Jahwe man kalak si deban, enggo ikut kita mpebadia gelarNa. Meriah ka ukurta perban enggo silakoken tugasta selaku Saksi Jahwe. Engkai maka bage ninta?

13. Engkai maka sada kehamaten man banta banci jadi Saksi Jahwe? (Jesaya 43:​10-12)

¹³ Ipilih Jahwe kita jadi ‘saksiNa.’ (Baca Jesaya 43:​10-12.) Piga-piga tahun si lewat, ikataken Badan Pinpinen bas suratna bagenda: “Sada kehamaten si mbelin man banta banci jadi sekalak Saksi Jahwe.” c Engkai? Cuba ukuri contoh enda. Adi ituduh kalak kam ngelakoken si salah, pasti daramindu sekalak jelma si banci mbela kam. Ise nge si pilihndu? Pasti kalak si tandaindu janah tek  kam man bana, kalak si deban pe tek man bana. Bage ka me sanga pilih Jahwe kita jadi SaksiNa. TandaiNa kel kita, tek Ia banci nge situriken maka Ia ngenca Dibata si benar. Sada kehamaten man banta banci jadi SaksiNa. Emaka, bas tiap kesempaten siceritaken gelarNa janah sibela Ia. Alu bage tuhu-tuhu me kita Saksi Jahwe!—Ms. 83:18; Rom. 10:​13-15.

TERUS ERBERITA SEH KU KEDUNGENNA

14. Kai nge si terjadi ntisik nari?

¹⁴ Tertima-tima kel kita ngidah kai si terjadi ntisik nari. Ngarap kita gelah reh teremna kalak ngaloken kebenaren sope reh kiniseran si mbelin. Selain si e, siarapken denga kel gelah bas kiniseran si mbelin e pe pagi, lit denga kalak si ndarat arah doni si ikuasai Setan enda janah ergabung ras kita guna muji Jahwe!—Perb. 13:48.

15-16. Kai nge si terus silakoken, janah ngasa ndigan?

¹⁵ Sope reh kedungen e, lit dahin si penting si lanai pagi ndigan pe ilakoken mulihi. Pendahin e eme mberitaken berita si meriah kerna Kerajan Dibata ku sebelang doni. Tapi, labo e saja ngenca siberitaken, arus ka sipersingeti kalak maka doni si jahat enda nandangi ikernepken. Emaka, sanga reh pagi wari penghakimen e, iteh kalak e me berita si ipeseh kita e rehna arah Dibata Jahwe.—Esek. 38:23.

¹⁶ Kai nge tekadta? Sipebelinlah pengerganta man kebenaren, sipebelin kekelengenta man kalak si deban, janah si pentingna sipebelinlah kekelengenta man Dibata Jahwe ras gelarNa. Adi bage siban, terus kita semangat erberita seh ngasa ikataken Jahwe, “Enggo bias!”