1. Pelajaren kai si idat Abraham arah Jahwe?

 RIBUN TAHUN si enggo lewat, igunaken Jahwe sada malekat guna ngataken man Abraham maka kernepkenNa ateNa kota Sodom ras Gomora. Amin pe paguh kel kiniteken Abraham man Dibata, tapi mesera kel kapna ngaloken keputusen e. Nina, “Payo nge kernepkenNdu ateNdu kalak si benar radu ras kalak jahat? . . . Me labo mungkin la adil perbahanen Hakim sebelang doni?” Sabar kel Jahwe nampati Abraham ngangkai pelajaren si penting enda: Dibata la pernah engkernepken kalak si benar. Pelajaren enda erguna ka man banta janah banci ngapuli kita.—Kej. 18:​23-33.

2. Engkai maka banci kita tek penghakimen Jahwe e lalap adil ras perkuah?

² Engkai maka banci kita tek penghakimen Jahwe e lalap adil ras perkuah? Perban “Jahwe nenNa isi pusuh kalak.” (1 Sam. 16:7) ‘TehNa uga isi pusuh tiap manusia.’ (1 Raj. 8:39; 1 Kro. 28:9) Enda luar biasa kel. Jahwe ndauh pentaren asangken kita. Emaka, bagenda ikataken Rasul Paulus kerna Dibata Jahwe: “La banci siangkai kerina penghakimenNa, la banci siangkai kerina dalan-dalanNa!”—Rom. 11:33.

3-4. Penungkunen kai nge si banci saja siukuri, janah kai kari sibahas bas artikel enda? (Johanes 5:​28, 29)

³ Amin pe siteh Jahwe lalap ngelakoken kai si benar, tapi banci saja tersungkun-sungkun kita bagi Abraham. Contohna, ‘Lit denga nge arapen man kalak si enggo ikernepken Jahwe, bagi kalak si lit bas Sodom ras Gomora? Lit nge arah kalak e si ipekeke selaku “kalak si la benar”?’—Perb. 24:15.

 ⁴ Mari sibahas mulihi pengangkanta kerna kekeken. Mbaru-mbaru enda, isesuaiken me pengangkanta kerna kai maksudna “ipekeke guna nggeluh si rasa lalap” ras “ipekeke guna ihakimi.” a (Baca Johanes 5:​28, 29.) Perban penyesuaien enda, lit ka pemahamenta si deban si arus isesuaiken. Sibahas kari kerna si e bas artikel enda ras artikel seterusna. Tapi, guna mbahas kerna penghakimen Jahwe, sibahas kari lebe kai si la siteh ras kai si enggo siteh kerna si e.

KAI SI LA SITEH?

5. Mbarenda, uga pengangkanta kerna kalak si ikernepken Jahwe bas Sodom ras Gomora?

⁵ Pernah ibahas bas publikasita kerna kai si terjadi man kalak si ihakimi Jahwe selaku kalak si la benar. Mbarenda sikataken maka kalak si ikernepken Jahwe bagi si lit bas Sodom ras Gomora la pagi ipekeke. Tapi, kenca ipelajari terbagesen janah itotoken alu tutus, lanai cocok sikataken bage. Engkai?

6. Kai saja contohna penghakimen Jahwe man kalak si la benar, janah kai si la ikataken bas Pustaka?

⁶ Lit piga-piga contoh bas Pustaka kerna penghakimen Jahwe man kalak si la benar. Contohna, ikernepken Jahwe kerina kalak bas doni alu Banjir si Mbelin, kecuali Nuah ras keluargana. Iperentahken Jahwe ka kalak Israel guna engkernepken pitu bangsa si tading bas Negri Perjanjin. GunakenNa ka sada malekat guna munuh 185.000 pasuken Assur bas sada berngi. (Kej. 7:23; Ul. 7:​1-3; Jes. 37:​36, 37) Arah contoh e, lit nge ikataken bas Pustaka maka kerina kalak si ikernepken Jahwe e, la pagi ipekeke ntah pe mate seh rasa lalap? La lit. Engkai maka bage ninta?

7. Kai si la siteh kerna kalak si ikernepken bas Banjir si Mbelin, ntah pe kerna kalak Kanaan si italuken kalak Israel? (Nen gambar sampul.)

⁷ Arah contoh-contoh si enggo sibahas ndai, la siteh uga cara Jahwe ngakimi kerina jelma sada per sada. La ka siteh lit ntah lang kesempaten kalak e erlajar kerna Jahwe ras ertobat. Memang sope reh Banjir si Mbelin, ikataken bas Pustaka maka Nuah e “sekalak perberita kebenaren.” (2 Pet. 2:5) Tapi la lit ikataken maka sanga Nuah mbangun bahtra si galang e, enggo erberita ia man kerina jelma si lit i doni. Kalak jahat si tading bas Kanaan pe bage ka. La siteh lit ntah lang kesempaten kalak e erlajar kerna Jahwe ras ertobat.

8. Kai si la siteh kerna kalak Sodom ras Gomora?

⁸ Uga kerna kalak si ikernepken Jahwe bas Sodom ras Gomora? Memang, lit i je tading kalak si benar eme Lut. Tapi la siteh enggo nge erberita Lut man kerina kalak e ntah lang. Bagi si enggo siteh, kalak si tading bas kota Sodom memang jahat. Tapi, mbelin kemungkinenna la teh kalak e mbedaken kai si benar ras kai si salah. Ikataken bas Pustaka, enterem dilaki bas kota e “mulai si nguda nari seh ku si metua” reh ngepung rumah Lut guna erhubungen seks ras tamu-tamu Lut. (Kej. 19:4; 2 Pet. 2:7) Banci nge sikataken maka la lit sada pe arah kalak e si ipekeke Jahwe pagi? Lang, sebap Jahwe Dibata si perkuah. Ikataken Jahwe man Abraham maka la seh sepuluh kalak pe kalak si benar bas kota e. (Kej. 18:32) Emaka, kalak bas kota e memang kalak si la benar, janah patut ihukum Jahwe. Tapi, banci nge sipastiken maka la lit sada pe  arah kalak e si ‘ipekeke pagi selaku kalak si la benar?’ Lang, lenga siteh uga pastina.

9. Kai si la siteh kerna Salomo?

⁹ Bas Pustaka, lit ka ituriken kerna kalak si benar si dungna jadi kalak si la benar. Contohna Raja Salomo. Enggo tandaina Jahwe, janah itehna uga cara nembah Ia. Melala kel pasu-pasu si ibereken Jahwe man bana. Tapi dungna, isembah Salomo berhala. Si e erban merawa kel Jahwe, janah bangsa Israel rate mesui ratusen tahun dekahna perban dosa Salomo e. Kenca mate Salomo, memang ikataken bas Pustaka maka ‘ikuburken ia bas Kota Daud bapakna’ ras nini bulangna si setia. (1 Raj. 11:​5-9, 43; 2 Raj. 23:13) Tapi, labo banci sikataken maka pasti ipekeke Jahwe pagi Salomo, perban labo lit ikataken bas Pustaka kerna si e. Banci saja, lit si erpengakap maka “adi sekalak jelma enggo mate, ia enggo ibebasken arah dosana.” (Rom. 6:7) Tapi, si e labo ertina maka kerina jelma si enggo mate, pasti lit hakna guna ipekeke. Kekeken e hadiah arah Dibata si perkeleng. Tapi hadiah e labo bereNa man kerina jelma. BereNa hadiah e man ise pe si ateNa bereNa kesempaten guna ngelayani Ia seh rasa lalap. (Jop 14:​13, 14; Joh. 6:44) Idat Salomo nge kari hadiah e? La siteh, Jahwe ngenca si metehsa. Tapi siteh, keputusen Jahwe pasti lalap benar.

KAI SI ENGGO SITEH?

10. Uga nge perasan Jahwe sanga ihakimiNa jelma? (Esekiel 33:11) (Nen ka gambar.)

¹⁰ Baca Esekiel 33:11. Ikataken Jahwe man banta uga perasanNa sanga ihakimiNa jelma. Bali bagi si itulis Esekiel, Rasul Petrus pe ikatakenna maka ‘labo ate Jahwe sekalak pe ikernepken.’ (2 Pet. 3:9) Kata-kata enda erban tenang pusuhta. Siteh maka labo ikernepken Jahwe jelma seh rasa lalap adi la lit alasen si tepat. Jahwe e Dibata si dem perkuah ate. Emaka, adi banci denga kin akapNa, pasti cidahkenNa perkuah ateNa.

11. Ise saja nge pagi si la ipekeke, janah ja nari banci siteh kerna si e?

¹¹ Kai si enggo siteh kerna kalak si la pagi ipekeke? Bas Pustaka, sitik ngenca ituriken kerna si e. b Misalna, ikataken Jesus maka Judas Iskariot la pagi ipekeke. (Mrk. 14:21; nen ka keterangen tambahen man Johanes 17:12 bas Kitab Suci Terjemahan Dunia Baru edisi pelajaran.) Engkai? Perban iteh Judas maka kai si ilakokenna e la sesuai ras peraten Jahwe bage pe Jesus, tapi tetap ilakokenna. (Nen keterangen tambahen man Markus 3:29 bas Kitab Suci Terjemahan Dunia Baru edisi pelajaran.) Selain si e, ikataken Jesus ka maka lit piga-piga peminpin agama si nentang ia si la pagi ipekeke. (Mat. 23:33; nen keterangen tambahen “orang” man Johanes 19:11 bas Kitab Suci Terjemahan Dunia Baru edisi pelajaran.) Ikataken Rasul Paulus ka maka kalak murtad si la ertobat la pagi ipekeke.—Heb. 6:​4-8; 10:29.

12. Kai si enggo siteh kerna perkuah ate Jahwe? Ban contohna.

¹² Tapi, enggo siteh maka Jahwe e Dibata si dem perkuah ate. Emaka “labo teNa sekalak pe ikernepken.” Uga cara Jahwe ncidahken perkuah ate man kalak si ngelakoken dosa si serius? Raja Daud ngelakoken piga-piga dosa si serius. Misalna, erlua-lua ia ras munuh. Amin pe bage, perban ertobat Daud, iampuni Jahwe ia.  (2 Sam. 12:​1-13) Raja Manase pe ngelakoken melala perbahanen si jahat segedang geluhna. Tapi, perban ertobat Manase, ampuni Jahwe ia. (2 Kro. 33:​9-16) Arah contoh-contoh enda ndai, tek kita maka pasti cidahken Jahwe perkuah ateNa adi lit kapNa alasenNa ngelakoken si e. Emaka, amin pe enggo lakoken sekalak jelma dosa si serius, tapi adi ertobat ia, lit arapenna guna ipekeke.

13. (a) Engkai maka mekuah ate Jahwe man kalak Niniwe? (b) Kai si kataken Jesus kerna kalak Niniwe?

¹³ Enggo ka siteh perkuah ate Jahwe man kalak Niniwe. Kataken Dibata man Juna, “Enggo Kuidah uga jahatna perbahanen kalak e.” Tapi sanga ertobat kalak e, iampuni Jahwe me kalak e. Perkuah ate Dibata ndauh belinen asangken Juna. Paksa si e, merawa kel Juna. Emaka ingetken Dibata ia maka kalak Niniwe situhuna “la meteh apai si benar apai si salah.” (Jun. 1:​1, 2; 3:10; 4:​9-11) Bas pudi wari, igunaken Jesus contoh kalak Niniwe guna ngajarken kerna keadilen ras perkuah ate Jahwe. Ikataken Jesus maka kalak Niniwe si nggit ertobat ‘keke pagi bas Wari Penghakimen.’—Mat. 12:41.

14. Kai nge maksudna kalak Niniwe “ipekeke guna ihakimi”?

¹⁴ Kai nge maksudna kalak Niniwe ‘keke pagi bas Wari Penghakimen’? Ikataken Jesus maka bas masa depan lit kalak si “ipekeke guna ihakimi.” (Joh. 5:29) Enda terjadi bas Pemerentahen Seribu Tahun Kristus. Sanga si e “kalak si benar ras kalak si la benar” ipekeke pagi. (Perb. 24:15) Kalak si la benar, “ipekeke pagi guna ihakimi.” Maksudna, kenca kalak e ipekeke, iperdiateken Jahwe ras Jesus me kalak e, nggit ntah lang kalak e ndalanken kai si enggo pelajarina. Adi kalak Niniwe si enggo ipekeke e la nggit nembah Jahwe, la pediat Jahwe kalak e tetap nggeluh. (Jes. 65:20) Tapi kalak si setia ngelayani Jahwe, datna me kesempaten nggeluh seh rasa lalap.—Dan. 12:2.

15. (a) Engkai maka ula min sikataken la lit sada pe kalak Sodom ras Gomora si ipekeke pagi? (b) Kai nge maksudna kata-kata si icatat bas Judas 7? (Nen kotak “ Kai nge Maksud Judas?”)

¹⁵ Ikataken Jesus maka beraten hukumen man kalak si nulak ia ras ajarenna,  asangken man kalak bas Sodom ras Gomora. (Mat. 10:​14, 15; 11:​23, 24; Luk. 10:12) Kai nge maksudna? Banci saja lit si erpengakap maka kai si ikataken Jesus e labo situhuna bage maksudna, ntah pe lebih-lebihkenna. Tapi situhuna labo bage. Sanga kataken Jesus kerna kalak Niniwe si ipekeke guna ihakimi, memang bage kin maksud Jesus, labo lebih-lebihkenna. Lit kalak Niniwe si ipekeke pagi guna ihakimi. Emaka banci sikataken, sanga icakapken Jesus kerna “Wari Penghakimen” man kalak Sodom ras Gomora, bage ka nge maksudna. Bali bagi kalak Niniwe, kalak Sodom ras Gomora pe ngelakoken kai si jahat. Kalak Niniwe lit kesempatenna guna ertobat, tapi kalak Sodom ras Gomora la lit kesempatenna. Ikataken Jesus maka kalak “si jahat perbahanenna ipekeke guna ihakimi.” (Joh. 5:29) Banci saja lit piga-piga kalak bas Sodom ras Gomora si ipekeke pagi janah ibereken kesempaten guna ertobat. Emaka, banci saja lit kesempatenta guna ngajari kalak e kerna Jahwe ras Jesus Kristus.

16. Uga pagi Jahwe nentuken kerna ise si ateNa ipekekeNa? (Jeremia 17:10)

¹⁶ Baca Jeremia 17:10. Bas ayat enda, siteh uga cara Jahwe ngakimi sekalak jelma. Jahwe lalap ‘mereksa pusuh janah pereksaNa perukuren si mbagesna.’ Emaka bas nentuken ise pagi si ipekekeNa, pasti ‘balasNa tiap kalak menurut perbahanenna.’ Keputusen Jahwe e tegas, tapi adi banci denga kin akapNa, pasti cidahkenNa perkuah ateNa. Emaka la banci sikataken sekalak jelma la pagi ipekeke adi la lit bukti si jelas bas Pustaka si ngataken kerna si e!

PASTI “ADIL PERBAHANEN HAKIM SEBELANG DONI”

17. Kai arapen man kalak si enggo mate?

¹⁷ Kenca Adam ras Hawa ngikutken Setan mberontak ngelawan Dibata Jahwe, miliaren kalak enggo mate. Kematen eme musuh si kejam kel! (1 Kor. 15:26) Tapi, kai nge arapen man kalak si enggo mate? Sada kelompok si kitik eme 144.000 pengikut Kristus si setia, ipekeke pagi guna  nggeluh seh rasa lalap bas surga. (Ket. 14:1) Enterem ka kalak si engkelengi Jahwe si ‘ipekeke pagi selaku kalak si benar.’ Nggeluh pagi kalak e rasa lalap i doni, adi tetap kalak e setia sedekah Pemerentahen Seribu Tahun Kristus bage pe bas ujin si terakhir. (Dan. 12:13; Heb. 12:1) Bas Pemerentahen Seribu Tahun e pe, “kalak si la benar,” termasuk kalak si la pernah ngelayani Jahwe ntah pe “kalak si jahat perbahanenna,” ibereken pagi kesempaten guna robah janah ngelayani Dibata Jahwe alu setia. (Luk. 23:​42, 43) Tapi kalak si jahat, si sengaja mberontak ngelawan Jahwe ras peratenNa la pagi ipekeke.—Luk. 12:​4, 5.

18-19. (a) Engkai maka kita tek penghakimen Jahwe pasti adil? (Jesaya 55:​8, 9) (b) Kai kari sibahas bas artikel seterusna?

¹⁸ Ula kita sitik pe ragu man penghakimen Jahwe, sebap kerina keputusenNa pasti adil! Bali bagi Abraham, tek kita Jahwe e “Hakim sebelang doni” si sempurna, pentar, ras perkuah. Enggo ilatihNa AnakNa Jesus janah berekenNa tanggung jawap guna ngakimi kerina jelma. (Joh. 5:22) Iteh Jahwe ras Jesus kai si lit bas pusuh kerina jelma. (Mat. 9:4) Emaka, sanga ihakimi Jahwe ras Jesus sekalak jelma, tek kita keputusen e pasti “adil”!

¹⁹ Teruslah kita tek man Jahwe bage pe man kerina keputusenNa. Siteh maka kita labo cocok jadi hakim, Jahwe ngenca si cocokna! (Baca Jesaya 55:​8, 9.) E me sebapna tek kita pasti tepat cara Jahwe ras Jesus ngakimi kerina kalak. Tek kita maka Rajata Jesus, pasti usihna keadilen ras perkuah ate Bapakna alu sempurna. (Jes. 11:​3, 4) Tapi, uga pagi Jahwe ngakimi jelma bas kiniseran si mbelin? Kai nge si la siteh? Kai si enggo siteh? Sibahas kari jawapenna bas artikel seterusna.