1-2. (a) Engkai maka ngasup kita megenggeng tiap wari? Jelasken. (b) Kai si man bahasenta bas artikel enda?

SANGA ingetndu masalah si pernah iadapindu, banci saja rukur kam, “Adi perban gegehku saja, labo kuakap aku ngasup.” Enterem kita pernah sigejapken bage. Banci saja pernah kam sakit janah mekelek pinakitndu e, ntah pe mate kalak si ikelengindu. Sanga ingetndu mulihi kai si nggo iadapindu, itehndu maka banci kam megenggeng tiap wari perban ibereken Jahwe ‘kengasupen si luar biasa’ arah kesah si badia.​—2 Kor. 4:7-9.

² Perlu ka kita isampati kesah si badia gelah la kita ipengaruhi doni si jahat enda. (1 Joh. 5:19) Selain si e, perlu ka kita gegeh gelah banci silawan “malekat-malekat jahat.” (Ep. 6:12) Gundari, sibahas dua cara kesah si badia nampati kita. Kenca si e, sibahas ka kari kai si arus silakoken gelah banci kita isampati kesah si badia.

3. Kai salah sada cara Jahwe nampati kita alu kesah si badia?

³ Salah sada cara kesah si badia nampati kita alu mereken gegeh man banta. Alu bage, banci terus sidalanken tanggung jawapta amin gia la menukah, bagi si igejapken Rasul Paulus. Tetap ia semangat ngelayani Jahwe amin gia ngadapi melala masalah perban tek ia nandangi “kuasa Kristus.” (2 Kor. 12:9) Bas tugas utusen injil Paulus si peduaken, labo ia erberita saja tapi arus ka ia erdahin guna ncukupi keperlunna. Tading ia i Korinti bas rumah Akuila ras Persila si dahinna erban kemah. Perban Paulus pe erban kemah kang, erdahin ia piga-piga wari ras kalak e. (Perb. 18:1-4) Perban isampati kesah si badia, ngasup Paulus erdahin guna ncukupi keperlunna janah erberita.

4. Menurut 2 Korinti 12:7b-9, kai masalah si iadapi Paulus?

 ⁴ Baca 2 Korinti 12:7b-9. Bas ayat enda, ikataken Paulus maka erjuang kel ia ngadapi ‘duri i bas dagingna.’ Kai maksudna? Adi lit duri si leket bas dagingta, pasti mesui kel siakap. Emaka, duri si ikataken Paulus ndai maksudna masalah ntah kai pe si erban susah iakap Paulus. Ikatakenna maka masalahna e bali bagi “malekat Setan si terus mekpeki” ia. Banci saja labo Setan ntah pe malekat-malekat jahat si deban si erbanca lit masalah Paulus, tempa-tempa langsung icucukkenna duri ku daging Paulus. Tapi sanga iteh malekat-malekat jahat e kai “duri” si iadapi Paulus, banci saja iusahakenna gelah reh bagesna duri e masuk ku daging Paulus janah reh suina iakapna. Kai si ilakoken Paulus?

5. Uga Jahwe njawap pertoton Paulus?

⁵ Ibuat Jahwe min ate Paulus “duri” e bas ia nari. Nina, “Enggo telu kali aku mindo man [Jahwe] gelah duri e ibuat i bas aku nari.” Tapi, amin gia terus Paulus ertoto, tetap denga lit duri i bas dagingna. La nge ibegi Jahwe toto Paulus e? Labo bage. IbegiNa nge janah ijawapNa. Memang labo bene iban Jahwe masalah Paulus e, tapi ibereNa gegeh gelah ngasup ia ngadapisa. Nina Jahwe, “Paksa kam lemah, kuasaKu jadi sempurna i bas kam.” (2 Kor. 12:8, 9) Perban isampati Dibata, banci tetap dame pusuh Paulus janah meriah ukurna!​—Pil. 4:4-7.

6. (a) Uga Jahwe njawap pertotonta? (b) Arah ayat-ayat si lit bas paragrap enda, janji si apai si mpegegehi kam?

⁶ Bagi Paulus, pernah nge kam ertoto gelah idungi Jahwe masalahndu? Banci saja terus itotokenndu man Jahwe, tapi lalap lenga dung masalahndu e malahen reh beratna. Dungna, banci saja iakapndu lanai keleng ate Jahwe kam. Adi bage si igejapkenndu, ingetlah Paulus. Ijawap Jahwe pertotonna, janah pasti ijawap Jahwe ka pertotonndu! Banci saja labo mis bene iban Jahwe masalahndu. Tapi banci ibere Jahwe kesahNa si badia gelah ngasup kam ngadapisa. (Msm. 61:4, 5) Banci saja bagi ‘ipekpeki ngasa ndabuh’ iakapndu bandu, tapi teklah kam labo kam itadingken Jahwe.​—2 Kor. 4:8, 9; Pil. 4:13.

7-8. (a) Engkai maka kesah si badia bali bagi angin? (b) Kai si ikataken Petrus guna njelasken uga cara kesah si badia nampati kita?

⁷ Uga ka cara kesah si badia nampati kita? Kesah si badia bali bagi angin. Adi lit angin si rembus ku arah tujun kapal, banci kapal e seh ku tujunna amin gia lit badai. Bage ka pe, kesah si badia banci nampati kita gelah terus silayani Jahwe amin gia mbue masalahta si bali bagi badai. Hasilna, seh me kita ku tujunta eme doni si mbaru si ijanjiken Dibata.

⁸ Perban Rasul Petrus mbarenda sekalak nelayan, rusur ia erlayar. Mungkin enda me alasenna maka igunaken Petrus istilah si banci saja lit hubungenna ras erlayar, guna njelasken uga cara kesah si badia nampati kita. Nina, “Nubuat la pernah rehna arah peraten manusia nari, tapi kai si ikataken manusia, rehna i bas Dibata nari, perban kalak e itegu-tegu kesah si badia.” Bas bahasa Junani, kata “itegu-tegu” banci ka iterjemahken jadi “isorong” ntah pe “ibaba.”​—2 Pet. 1:21.

9. Sanga ikataken Petrus penulis Pustaka “itegu-tegu” kesah si badia, istilah kai nge si ipakena?

⁹ Kai nge maksud Petrus e? Bas bahasa Junani, istilah si ipake Petrus kepeken ipake Lukas ka sanga itulisna buku Perbahanen. Istilah e nggambarken sada kapal si “ibabaken angin.” (Perb. 27:15) Menurut sekalak pakar Pustaka, sanga ikataken Petrus penulis Pustaka “itegu-tegu” kesah si badia, ipake Petrus  istilah si lit hubungenna ras erlayar. Jadi si imaksudken Petrus, bali bagi sada kapal ibabaken angin gelah seh ku tujunna, penulis Pustaka pe itegu-tegu kesah si badia gelah banci ilakoken kalak e tugasna. Nina pakar e ka, “Penulis Pustaka bali bagi kapal si nggo ikimbangkenna layarna.” Tugas Jahwe mereken “angin” si iperluken kalak e, eme kesah si badia. Tugas penulis Pustaka ngikutken petunjuk kesah si badia gelah banci ilakokenna dahinna.

10-11. Lit dua si arus silakoken gelah banci isampati kesah si badia kita. Kai saja e? Ban contohna.

¹⁰ Memang gundari lanai ipake Jahwe kesah si badia guna negu-negu kalak gelah nulis buku bas Pustaka. Tapi, igunaken Jahwe denga kesah si badia guna nampati umatNa. Ngasa gundari pe terus ilakoken Jahwe tugasNa. Gelah banci isampati kesah si badia, kita pe arus terus ngelakoken tugasta. Uga carana?

¹¹ Ukuri contoh enda. Gelah kapal banci isorong angin, lit dua si arus ilakoken sekalak pelaut. Si pertama, arus ibanna kapalna bas ingan si rembus angin i je. Labo banci kapal e maju adi ipediatna kapalna tetap bas pelabuhen. Si peduaken, arus mbelang kel ikimbangkenna layarna. Sebap rembus gia angin, adi la kimbang layarna labo banci kapal e maju sebap layar e nge si isorong angin. Bage ka pe, banci terus silayani Jahwe adi isampati kesah si badia kita. Tapi gelah banci isampati kesah si badia, lit dua si arus silakoken. Si pertama, arus silakoken erbage kegiaten si erbanca kita itegu-tegu kesah si badia. Si peduaken, tutuslah ateta i bas ngelakoken kerina kegiaten e, tempa-tempa mbelang kel sikimbangken layarta. (Msm. 119:32) Adi silakoken si e duana, banci isampati kesah si badia kita gelah ngasup ngadapi kerina masalah ras tentangen si bali bagi galumbang bas lawit. Selain si e, isampati kesah si badia ka kita gelah terus setia  ngelayani Jahwe ngayak seh kita ku doni si mbaru.

12. Kai si man bahasenta gundari?

¹² Enggo sibahas ndai dua cara kesah si badia nampati kita. Kesah si badia banci mere gegeh banta janah nampati kita gelah tetap setia amin gia lit masalahta. Selain si e, isampati kesah si badia ka kita gelah ngasup kita terus ngelayani Jahwe janah dungna banci kita nggeluh rasa lalap. Gundari, sibahas ka empat carana gelah banci kita isampati kesah si badia.

13. Menurut 2 Timotius 3:16, 17, kai nge hasilna adi sibaca Pustaka? Tapi kai si arus silakoken?

¹³ Si pertama, pelajarilah Kata Dibata. (Baca 2 Timotius 3:16, 17.) Bas bahasa Junani, kata si iterjemahken jadi “rehna i bas Dibata nari” banci ka ertina “iembusken Dibata.” Igunaken Dibata kesahNa si badia guna “ngembusken,” ntah pe namaken perukurenNa ku bas perukuren kalak si nulis Pustaka. Emaka, sanga sibaca Pustaka janah siukuri alu mbages, kata-kata Dibata banci seh ku pusuh ras perukurenta. Dungna, teriahken kita erban perubahen bagi si iarapken Dibata. (Heb. 4:12) Tapi gelah banci isampati kesah si badia, arus kita ratur mpelajari Pustaka janah siukuri alu mbages. Hasilna, ranan bage pe perbahanenta cocok ras ajaren Pustaka.

14. (a) Engkai maka banci sikataken lit kesah si badia bas perpulungen? (b) Kai ka si perlu silakoken gelah isampati kesah si badia kita?

¹⁴ Si peduaken, rehlah kita ku perpulungen. (Msm. 22:23) Sanga reh kita ku perpulungen, tempa-tempa reh kita ku ingan si rembus angin i je. Kesah si badia Jahwe lit bas perpulungen. (Ket. 2:29) Engkai maka banci sikataken bage? Perban sanga pulung kita radu ras turang seninanta, ertoto kita mindo kesah si badia janah siendeken lagu-lagu si erpalasken Pustaka. Sibegiken ka nasehat arah Pustaka si ipeseh turang seninanta si dilaki si ilantik alu kesah si badia. Kesah si badia pe nampati turang seninanta si diberu guna nikapken janah mpeseh baginna. Tapi gelah banci kita isampati kesah si badia, perlu kang siban persiapen gelah banci sibereken komentar bas perpulungen. Alu bage, sanga reh kita ku perpulungen, seri kita bagi kapal si kimbang kel layarna.

15. Kai si arus silakoken gelah banci isampati kesah si badia kita sanga erberita?

¹⁵ Si peteluken, teruslah kita erberita. Adi sigunaken Pustaka sanga kita erberita ras ngajar, e buktina nggit kita isampati kesah si badia. (Rom. 15:18, 19) Tapi gelah banci isampati kesah si badia, arus kita ratur erberita janah rusur sigunaken Pustaka. Banci reh nukahna siakap mbenaken percakapen ras kalak si deban adi sigunaken contoh percakapen si lit bas Agenda Perpulungen Pelayanen ras Kegeluhen Kristen.

16. Kai cara si utama gelah banci sidat kesah si badia?

¹⁶ Si peempatken, ertotolah man Jahwe. (Mat. 7:7-11; Luk. 11:13) Cara si utama gelah banci sidat kesah si badia adi sipindo langsung man Jahwe i bas toto. La lit si banci ngambati totonta ku Jahwe, janah la lit si banci ngambati Jahwe mereken kesah si badia man banta. Terus isampati kesah si badia kita aminna pe kita ipenjaraken ntah pe iusahaken Setan ngambatisa. (Jak. 1:17) Uga arusna kita ertoto gelah banci isampati kesah si badia? Gelah siteh jawapna, mari sibahas sada perumpaman si bas Injil Lukas ngenca lit. *

17. Arah perumpaman Jesus si lit bas Lukas 11:5-9, 13, kai si banci sipelajari kerna ertoto?

¹⁷ Baca Lukas 11:5-9, 13. Arah perumpaman Jesus banci siteh uga arusna kita ertoto mindo kesah si badia. Bas perumpaman e, banci dungna idat dilaki e kai si iperlukenna ‘erkiteken terus ipindona.’ La ia mbiar mindo penampat temanna amin gia nggo tengah berngi. (Luk. 11:8) * Arah perumpaman enda, pelajaren kai si ipeseh Jesus atena kerna ertoto? Nina, “Teruslah pindo, maka pasti ibereken man kena; teruslah darami, maka pasti dat kena; teruslah tuktuk, maka pasti ibukaken man kena.” Kai pelajarenna banta? Gelah banci isampati kesah si badia kita, teruslah sipindo i bas totonta.

18. Arah perumpaman Jesus, ngkai maka tek kita pasti ibereken Jahwe kesahNa si badia?

¹⁸ Arah perumpaman Jesus pe banci siteh ngkai maka pasti ibereken Jahwe kesahNa si badia. Dilaki si lit bas perumpaman e ndai, sikap atena ngalo-ngalo tamuna. Iberekenna atena pangan man tamuna e si reh tengah berngi, tapi la lit panganna. Ikataken Jesus maka ibereken teman dilaki e ndai dungna roti man bana perban terus ipindona. Kai pelajarenna? Adi manusia si la sempurna saja pe nggit nampati temanna erkiteken terus ipindona, terlebih ka Bapakta si perkeleng i surga. Teklah kita pasti ibereNa kesah si badia adi terus sipindo i bas toto.​—Msm. 10:17; 66:20.

19. Engkai maka tek kita banci kita megenggeng?

¹⁹ Amin gia terus iserang Setan kita, banci kita tetap megenggeng. Engkai? Perban lit dua cara kesah si badia nampati kita. Si pertama, ibere kesah si badia gegeh man banta gelah ngasup kita ngadapi masalahta. Si peduaken, kesah si badia banci nampati kita gelah terus ngelayani Jahwe ngasa reh doni si mbaru. Emaka, siusahakenlah asa ngasupta gelah banci kita isampati kesah si badia!