1. Kesempaten kai nge si ibereken Jahwe man banta?

IBEREKEN Jahwe kesempaten man banta guna milih uga caranta ndalani kegeluhenta. Tapi iajariNa ka kita uga carana erban keputusen si mehuli. Janah pasti isampati Jahwe kita gelah berhasil adi siban keputusen si erban meriah ukurNa. (Msm. 119:173) Adi terus sidalanken pedah si nggo sipelajari bas Pustaka, reh ulina me keputusenta.​—Heb. 5:14.

2. Tentangen kai si banci saja siadapi kenca siban sada keputusen?

² Amin gia nggo mehuli keputusenta, banci saja mesera siakap ndungi kai si nggo simulai. Perdiateken piga-piga contoh enda: Sekalak anak perana ibacana atena Pustaka ngayak dung. Piga-piga minggu nggo ratur ibacana, tapi dungna lanai teruskenna. Sekalak turang seninanta si diberu jadi perintis biasa atena, tapi lalap ia tertaren-taren. Kerina pertua bas sada runggun nggo sada arihna gelah reh rusurna ndahi turang senina guna mpermakani kalak e. Tapi nggo erbulan-bulan dekahna, lalap lenga imulai kalak e. Memang labo seri teluna contoh e ndai, tapi lit nge persamanna. Iban kalak e keputusen, tapi la tuhu-tuhu idalankenna. Enda me si iadapi kalak Kristen bas abad pertama i Korinti. Mari sibahas kai si banci sipelajari arah kalak e.

3. Kai keputusen si iban kalak Korinti? Tapi kai si terjadi?

³ Kira-kira tahun 55 M, iban kalak Kristen i Korinti keputusen si penting. Itehna maka mesera pergeluh turang seninana i Jerusalem ras Judea. Ibegi kalak e ka maka runggun si deban pe sangana mpepulung sen guna nampati kalak e. Perban kalak Korinti e mehuli janah nggit mere, tersuruh ukurna guna  nampati, emaka isungkunna Rasul Paulus uga carana. Ibereken Paulus petunjuk man runggun e janah isuruhna Titus nampati mpepulung sen. (1 Kor. 16:1; 2 Kor. 8:6) Tapi piga-piga bulan kenca si e, ibegi Paulus maka lenga kepe ipepulung kalak Korinti sumbangen ndai. Adi la mis ipepulung kalak e, la kari lit sumbangen e bas waktu si nggo itentuken, dungna la banci ibaba ku Jerusalem radu ras sumbangen runggun-runggun si deban.​—2 Kor. 9:4, 5.

4. Menurut 2 Korinti 8:7, 10, 11, kai si ikataken Paulus man kalak Korinti gelah ilakoken kalak e?

⁴ Enggo iban kalak Korinti keputusen si mehuli. Ipuji Paulus kalak e perban paguh kinitekenna janah nggit kalak e mere alu ukur meriah. Tapi arus ka iiahken Paulus kalak e gelah idungina kai si nggo imulaina. (Baca 2 Korinti 8:7, 10, 11.) Arah contoh e, siteh maka kalak Kristen si setia pe banci saja mesera iakapna ndalanken keputusen si nggo ibanna.

5. Penungkunen kai saja si man bahasenta?

⁵ Bali bagi kalak Korinti, banci saja mesera siakap ndalanken keputusenta. Engkai? Perban la kita sempurna, banci jadi lalap kita tertaren-taren. Ntah pe perban lit kejadin si la sisangka-sangka, dungna la banci sidalanken keputusenta. (Peng. 9:11; Rom. 7:18) Uga carana gelah banci siban keputusen si mehuli? Uga carana mereksa mulihi keputusen si nggo siban? Janah uga carana gelah banci sidungi kai si nggo simulai?

6. Ndigan nge kira-kira perlu sisesuaiken keputusenta?

⁶ Lit piga-piga keputusen penting si lanai banci iubah. Misalna, kenca nggo siban keputusen guna ngelayani Jahwe, arus terus silayani Ia. Selain si e, arus ka kita terus setia man teman geluhta. (Mat. 16:24; 19:6) Tapi mon-mon, lit keputusen si perlu isesuaiken perban nggo berubah keadanta. Emaka, uga carana gelah banci siban keputusen si mehulina?

7. Kai si banci sipindo i bas totonta? Janah ngkai?

⁷ Ertotolah mindo kepentaren. Isuruh Jahwe Jakup nulisken kata-kata enda, “Adi lit i bas kena si kurang pentar, teruslah ia mindo man Dibata, janah pasti ialokenna. Sebap Dibata mere alu simpar man kerina kalak.” (Jak. 1:5) Mon-mon kerina kita “kurang pentar.” Emaka sipindolah penampat Jahwe sanga siban keputusen bage pe sanga sipereksa mulihi keputusen e. Pasti isampati Jahwe kam erban keputusen si mehuli.

8. Sope erban keputusen, kai si banci silakoken?

⁸ Banlah riset. Pelajarilah Pustaka janah bacalah publikasi arah organisasi Jahwe. Selain si e, pindolah pedah arah kalak si itekindu. (Kua. 20:18) Enda khususna perlu ilakokenndu sanga igantindu atendu pendahinndu, pindah atendu ku daerah si deban, ntah pe sanga ipilihndu atendu pendidiken gelah banci ibiayaindu dirindu janah tetap ngelayani Jahwe.

9. Kai gunana adi jujur kita man dirinta?

⁹ Ukurilah kai alasenndu erban keputusen. Penting iakap Jahwe alasenta erban keputusen. (Kua. 16:2) Ate Jahwe jujur min kita i bas kerinana. Emaka sanga siban ateta keputusen, arus kita jujur man dirinta bage pe man kalak si deban kerna alasenta erban keputusen e. Adi la kita jujur, banci saja mesera siakap ndalanken keputusen e. Misalna, lit sekalak turang seninanta si nguda denga si nggo jadi perintis biasa. Tapi la ndekah kenca e, nggo mulai mesera iakapna dat jam dinas si nggo itetapken. Janah lanai bagi si mbarenda iakapna riahna. Banci saja iakapna ia jadi perintis gelah meriah ibanna ukur Jahwe. Tapi banci saja, alasen situhuna gelah meriah ibanna ukur orang tuana ntah pe kalak si deban.

10. Kai nge si banci erban kita robah?

 ¹⁰ Cuba ukuri contoh enda. Lit sekalak si erlajar Pustaka ngadi atena ngisap. Erjuang kel ia, emaka sada ntah dua minggu tertahanna denga la ngisap. Tapi ngisap ka ia mulihi. Tapi, perban keleng atena Jahwe janah meriah atena ibanna ukur Dibata, banci dungna ia ngadi ngisap.​—Kol. 1:10; 3:23.

11. Engkai maka arus jelas siban tujunta?

¹¹ Jelaslah ban tujunndu. Adi jelas siban tujunta, reh nukahna siakap ngelakokenca. Misalna, banci saja reh rusurna atendu mbaca Pustaka. Tapi adi la jelas ibanndu rencanandu, banci saja labo kari lakokenndu e. * Ntah pe, banci saja reh rusurna ate pertua-pertua mpermakani turang senina bas runggun, tapi lalap lenga ilakoken kalak e. Gelah banci ilakokenna, perlu iukurina penungkunen-penungkunen enda: “Enggo nge ban kami daftar ise saja si ate kami ipermakani kami? Enggo nge jelas ban kami ndigan dahi kami kalak e?”

12. Kai si banci saja perlu silakoken, janah ngkai?

¹² Masuk akal lah kam. Perban terbatas waktu, gegeh, bage pe senta ntah pe kai si lit bas kita, la banci silakoken kerina si ateta silakoken. Emaka perlu kita masuk akal. Mon-mon, perlu ka siubah keputusen si nggo siban perban la kepe banci silakoken. (Peng. 3:6) Banci saja nggo siukuri mulihi keputusenta, nggo sisesuaiken, janah nggo banci siakap silakoken. Tapi uga carana gelah banci sidungi kai si nggo simulai? Mari sibahas lima carana.

13. Uga carana gelah banci datndu gegeh i bas ndalanken keputusenndu?

¹³ Ertotolah mindo gegeh. Banci ibereken Dibata ‘gegeh guna ngelakoken’ keputusenta. (Pil. 2:13) Emaka ertotolah kita mindo kesah si badia gelah ibereken Jahwe gegeh man banta. Teruslah kita ertoto amin gia tempa-tempa totonta e lenga ijawap. Nina Jesus, “Teruslah pindo [kesah si badia], maka pasti ibereken man kena.”​—Luk. 11:9, 13.

14. Menurut Kuan-kuanen 21:5, kai si perlu silakoken gelah reh nukahna siakap ngelakoken keputusenta?

¹⁴ Banlah rencana. (Baca Kuan-kuanen 21:5.) Gelah banci idungindu sada dahin, perlu ibanndu rencana, kenca si e lakokenlah. Bage ka pe, sanga erban keputusen atendu, banlah daftar kai saja si perlu, gelah banci ilakokenndu keputusenndu e. Adi lit si mesera kel iakapndu ngelakokenca, sitik-sitiklah dahikenndu gelah reh nahangna iakapndu. Alu bage, banci kari itehndu uga buena dahin si nggo ilakokenndu. Iiahken Paulus turang senina i Korinti gelah ipepulung kalak e sen “i bas wari pertama tiap minggu” gelah lanai perlu ipepulung kalak e sanga reh kari Paulus. (1 Kor. 16:2) Selain si e, adi sitik-sitik sidahiken dahin si mesera, dungna la latihsa siakap ndahikenca.

15. Kenca ibanndu rencana, kai si banci ilakokenndu?

¹⁵ Kenca banndu rencana, tulislah rencanandu e. Alu bage, banci reh nukahna iakapndu ngelakokenca. (1 Kor. 14:40) Misalna, lit petunjuk man badan pertua gelah ipilih kalak e sekalak pertua si tugasna ncatat kerina keputusen kalak e. Janah icatatna ka ise si itugasken ngelakoken keputusen e janah ndigan e arus dung. Pasti reh nukahna iakap kalak e ndalanken keputusen si nggo ibanna. (1 Kor. 9:26) Kita pe banci ka siban bage sanga erban keputusen. Misalna, banci ibanndu daftar kai saja si perlu ilakokenndu tiap wari, janah banlah urutenna sue ras si apai atendu leben ilakokenndu. Alu bage, banci  idungindu kai si nggo imulaindu janah reh buena si banci ilakokenndu.

16. Kai ka si perlu silakoken? Kai si ikataken Roma 12:11 kerna si e?

¹⁶ Teruslah usahaken. Arus lit usahanta gelah banci silakoken rencananta janah sidungi kai si nggo simulai. (Baca Roma 12:11.) Ikataken Paulus man Timotius gelah “tutus” atena janah terus iusahakenna jadi guru si mehuli. Banci ka sidalanken kai si ikataken Paulus e gelahna banci sidat cita-citanta i bas ngelayani Jahwe.​—1 Tim. 4:13, 16.

17. Uga caranta ndalanken pedah bas Epesus 5:15, 16 sanga ngelakoken keputusenta?

¹⁷ Gunakenlah waktundu alu mehuli. (Baca Epesus 5:15, 16.) Adi lakokenndu atendu keputusenndu, tetapkenlah waktuna janah ula nai iubahndu. Ula timaindu reh waktu si tepat, sebap lenga bo tentu kari lit. (Peng. 11:4) Ula mbuesa igunakenndu waktu ras gegehndu guna kai si kurang penting. Banci kari latihsa akapndu ntah pe lanai lit waktundu guna kai si terpentingen. (Pil. 1:10) Adi banci, pilihndulah waktu si cocok gelah la kam iganggu kalak. Banci ka ikatakenndu man kalak e maka perlu kam konsentrasi. Janah adi banci, matekenlah HP-ndu janah ula nen e-mail ntah pe media sosial. *

18-19. Uga carana gelah banci silakoken keputusenta amin gia lit tentangen?

¹⁸ Teruslah inget hasilna. Hasil keputusenndu seri bagi ingan si dahindu atendu. Bicara itutup pe dalanna ku je, pasti daramindu dalan si deban, la kam nyerah perban merhat kel kam ku je. Bage ka pe, bicara lit pe kari tentangen ntah pe terpaksa siubah keputusenta, la kita mis nyerah perban siinget lalap hasil keputusenta.​—Gal. 6:9.

¹⁹ Memang la menukah erban keputusen si mehuli, janah banci saja mesera ndalankenca. Tapi, banci ibere Jahwe kepentaren ras gegeh man banta guna ndungi kai si nggo simulai.