1-2. (a) Menurut Epesus 6:16, ngkai maka perlu siban ‘kiniteken jadi ampang-ampangta’? (b) Penungkunen kai saja si man bahasenta?

IBANNDU nge ‘kiniteken jadi ampang-ampangndu’? Ue, pasti. (Baca Epesus 6:16.) Bali bagi ampang-ampang banci ngelindungi prajurit, kiniteken pe banci ngelindungi kam arah kai si la mehuli bas doni enda, misalna perbahanen seks si salah, kekerasen, bage pe kerina si la cocok ras kai si ikataken Pustaka.

² Tapi, gundari kita nggeluh bas “wari-wari pendungi,” janah kinitekenta pe terus iuji. (2 Tim. 3:1) Uga nge carana gelah banci itehndu paguh denga ntah lang kinitekenndu? Janah kai nge si banci ilakokenndu gelah tetap paguh kinitekenndu? Sibahas kari jawapenna.

3. Kai si ilakoken prajurit gelah tetap awet ampang-ampangna? Janah ngkai?

³ Bas jaman Pustaka, ampang-ampang si ipake prajurit biasana ilapisi kulit. Itama prajurit minak ku ampang-ampangna e gelah bagin si ilapisi kulit ndai banci tetap awet, janah bagin si lit logamna la karaten. Adi lit si ceda bas ampang-ampangna e, pasti iusahakenna mpekenasa gelah siap ia katawari pe perlu erperang. Kai nge hubungen contoh e ras kinitekenta?

4. Engkai maka perlu siperiksa kinitekenta? Janah uga carana?

⁴ Perban kita kalak Kristen, ikut kita bas perang rohani janah  salah sada musuhta eme malekat-malekat jahat. Emaka, bali bagi prajurit si mbarenda, perlu terus siperiksa janah siurus ampang-ampangta eme kinitekenta gelah katawari paksa pe siap kita erperang. (Ep. 6:10-12) La banci kalak si deban si nggantiken kam ngelakokenca. Uga nge carana gelah banci itehndu paguh ntah lang kinitekenndu sanga kam iuji? Ertotolah kam lebe mindo penampat Dibata. Kenca si e, gunakenlah Kata Dibata gelah itehndu bagi si iarapken Dibata ntah lang kinitekenndu. (Heb. 4:12) Nina Pustaka, “Ernalemlah man Dibata alu bulat ukurndu. Ndigan pe ola ernalem man pemetehndu jine.” (Kua. 3:5, 6) Gundari, cuba ukuri kai si terjadi mbaru-mbaru enda bas geluhndu janah kai si ilakokenndu. Misalna, pernah nge mesera kel ekonomindu? Sanga iusahakenndu ngatasi masalah e, ingetndu nge janji Jahwe si lit bas Heber 13:5? Nina ayat e, “Labo ndigan pe kam Kutadingken janah labo ndigan pe kam Kupediat.” Tek nge kam pasti isampati Jahwe kam bagi janjiNa e? Adi tek kam, e buktina ijagandu kinitekenndu tetap paguh.

5. Kai si banci saja itehndu sanga iperiksandu kinitekenndu?

⁵ Sanga iperiksandu kinitekenndu, banci saja sengget kam perban itehndu lit kepeken kelemahenndu si la itehndu sedekah enda. Misalna, banci saja isadarindu maka nggo lemah kinitekenndu perban nggo kuatirsa kam, lit ibegindu berita si la tuhu, ntah pe perban kitik ukurndu. Adi bage si terjadi, kai si banci ilakokenndu gelah ula reh lemahna kinitekenndu?

6. Salah nge adi kita kuatir? Ban contohna.

⁶ Mon-mon perlu nge kita kuatir. Misalna, kuatir kita erban Jahwe ras Jesus kecewa. (1 Kor. 7:32) Adi silakoken dosa si serius, banci saja kuatir kita banci ntah lang rembak kita mulihi ras Dibata. (Msm. 38:19) Banci saja kuatir ka kita erban teman geluhta kecewa. Selain si e, banci saja kuatir kita la banci sibereken kai si iperluken keluarganta ntah pe la banci sisampati turang seninanta.​—1 Kor. 7:33; 2 Kor. 11:28.

7. Menurut Kuan-kuanen 29:25, ngkai maka ula kita mbiar man manusia?

⁷ Tapi, adi nggo kuatirsa kita, dungna lemah kinitekenta. Misalna, banci saja lalap kita kuatir bias ntah lang kari panganta ras si man pakenta. (Mat. 6:31, 32) Perban lalap siukuri kerna si e, banci saja mulai siayaki sen ras erta janah dungna kita pe jadi mata duiten. Enda banci erban lemah kinitekenta man Jahwe janah lanai kita rembak ras Ia. (Mrk. 4:19; 1 Tim. 6:10) Selain si e, banci jadi lalap siukuri uga pendapat kalak kerna kita. Dungna mbiar kita itokohi kalak ntah pe isiksa kalak si nentang, janah biaren kita ngenen kalak e asangken man Jahwe. Gelah ula kita mbiar man manusia, teruslah kita ertoto gelah banci kita pang janah ipegegehi Jahwe kinitekenta.​—Baca Kuan-kuanen 29:25; Luk. 17:5.

8. Kai si arus silakoken adi lit si ngataken kai si la tuhu man banta?

⁸ Setan eme “bapak kalak si perbual.” Igunakenna kalak si lit bas kuasana gelah reh mbarna bual kerna Jahwe bage pe kerna turang seninanta. (Joh. 8:44) Misalna, igunaken kalak murtad situs Internet, TV, ras si debanna guna pembarken kai si la tuhu kerna organisasi Jahwe. Kerina bual e salah sada “panah si gara” i bas Setan nari. (Ep. 6:16) Kai si arus silakoken adi lit si ngataken bual si bage man banta? Ula sibegiken! Engkai? Perban tek kita man Jahwe bage pe turang seninanta. La kita nggit ngerana-ngerana ras  kalak murtad alu cara kai pe. La soal kai pe topikna ntah kai pe alasenna, la kita nggit sijawapen ras kalak e, amin gia penasaren kel kita kerna kai si ikatakenna.

9. Kai akibatna adi kitik ukurta?

⁹ Adi kitik ukurta, banci dungna lemah kinitekenta. Mon-mon, kitik ukurta perban lit masalahta. Memang, la banci sipediat bage saja masalah e, tapi ula ka min lalap siukuri. Engkai? Perban adi lalap siukuri, banci kita lupa kerina si mehuli si nggo ijanjiken Jahwe man banta. (Ket. 21:3, 4) Dungna banci lemah kinitekenta janah lanai silayani Jahwe. (Kua. 24:10) Tapi situhuna lit carana gelah ula kitik ukurta.

10. Kai si banci ipelajarindu arah surat si itulis sekalak turang seninanta?

¹⁰ Lit sekalak turang seninanta i Amerika Serikat si ngurus perbulangenna si mekelek pinakitna. Mari siperdiateken kai si ilakokenna gelah tetap paguh kinitekenna. Itulisna surat ku kantor pusat, nina, “Perban mesera kel keadan kami, mon-mon kitik ukur kami janah stres kami. Tapi, tetap paguh arapen kami. Bujur kel ningku man Jahwe kerna kerina si nggo iberekenNa guna ngapuli kami ras mpegegehi kiniteken kami. IbereNa kami nasehat janah ipetetapNa ukur kami. Perlu kel kami si e. Tersampati kel kami gelah terus ngelayani Jahwe janah ngasup kami ngadapi masalah si igunaken Setan gelah kami lemah.” Arah kata-kata turang seninanta e ndai, siteh maka situhuna lit nge carana gelah ula kitik ukurta! Uga carana? Ingetlah maka masalahndu e ujin arah Setan. Teklah kam maka pasti kam iapuli Jahwe. Janah tutuslah atendu mpelajari kerina pangan rohani si nggo isikapken Jahwe.

11. Gelah siteh paguh denga ntah lang kinitekenta, penungkunen kai saja si perlu siukuri?

¹¹ Adi menurutndu, nggo nge paguh kinitekenndu? Cuba ukuri penungkunen-penungkunen enda: Bas piga-piga bulan enda, kuatirsa denga nge kam? Nggit nge kam megiken ntah pe sitahanen ras kalak murtad kerna kai si la tuhu si ikataken kalak e? Janah, rusur denga nge kitik ukurndu? Adi lanai kam kuatirsa, la kam nggit megiken kalak murtad, janah  nggo lanai rusur kitik ukurndu, e tandana paguh denga kinitekenndu. Tapi perlu kita terus hati-hati, sebap lit senjata-senjata si deban si ipake Setan ngelawan kita. Mari sibahas salah sada senjata e.

12. Kai nge akibatna adi kita mata duiten?

¹² Adi kita mata duiten, banci dungna lemah kinitekenta janah lanai tutus ateta ngelayani Jahwe. Nina Rasul Paulus, “Sekalak prajurit labo ikut campur i bas urusen bisnis, gelah banci isenangkenna kalak si ndaptarken ia.” (2 Tim. 2:4) Mbarenda, prajurit Roma la iijinken ngelakoken pendahin si deban. Kai nge akibatna adi la kalak e patuh?

13. Engkai maka sekalak prajurit la banci erbisnis?

¹³ Cuba bayangkenndu enda. Bas sada wari sanga erpagi-pagi, lit sada kelompok prajurit si sangana latihen nggunaken pedang, tapi lit sekalak si la reh. Prajurit si la reh ndai sangana erbinaga pangan i tiga. Kenca nggo ben, ipereksa prajurit-prajurit e senjatana janah igarut ntah pe ipetelap kalak e pedangna. Tapi prajurit si erbinaga ndai sibuk ia erban pangan gelah banci idayakenna paginna. Kepeken paginna rempet reh musuh. Menurutndu, prajurit si apai nge si nggo ersikap guna erperang janah meriah ibanna ukur komandanna? Janah adi ikut kam bas perang e, prajurit si apai nge si atendu jadi temanndu? Prajurit si nggo ersikap ntah prajurit si sibuk ndai?

14. Selaku prajurit-prajurit Kristus, kai nge si pentingna man banta?

¹⁴ Kita bali bagi prajurit-prajurit si nggo ersikap ndai. Si pentingna man banta eme erban meriah ukur Komandanta, Jahwe ras Jesus. Ndauh kel ergan e asangken kai pe si banci ibereken doni Setan. Siusahakenlah gelah terus lit waktu ras gegehta guna ngelayani Jahwe. Janah teruslah sijaga gelah tetap paguh kinitekenta eme ampang-ampangta bage pe senjata si debanna si rehna i bas Dibata nari.

15. Persinget kai nge si ibereken Paulus, janah ngkai?

¹⁵ Arus terus kita metenget! Engkai? Ipersingeti Rasul Paulus maka “kalak si usahakenna jadi bayak” pasti “nadingken  kinitekenna.” (1 Tim. 6:9, 10) Kata-kata “nadingken kinitekenna” maksudna lanai siakap penting kinitekenta adi lalap siukuri uga carana ndatken barang-barang si la siperluken. Dungna lit ‘sura-suranta si motu ras si la erguna.’ Arus siinget maka banci igunaken Setan sura-sura si bage jadi senjata gelah lemah kinitekenta.

16. Kenca sibaca Markus 10:17-22, penungkunen kai saja si banci siukuri?

¹⁶ Banci saja lit senta guna nukur melala barang. Salah nge adi situkur barang si la siperluken tapi merhat kita nukursa? Lenga tentu. Tapi, cuba ukuri penungkunen enda: Bicara ngasup pe kita nukursa, lit nge waktunta makesa janah ngasup nge kita ngurussa? Enggo nge kelengsa ateta barang e? Adi nggo kelengsa ateta, banci nge dungna bali kita ras dilaki si nulak undangen Jesus guna mereken terbuen bas pelayanen? (Baca Markus 10:17-22.) Asangken keri waktunta ndarami sen ras erta, ndauh ulin adi sederhana geluhta janah sigunaken waktu ras gegehta si meherga i bas ngelakoken peraten Dibata!

17. Kai si la banci silupaken?

¹⁷ Ula pernah kita lupa maka gundari sangana kita ikut bas perang rohani, janah arus kita ersikap guna erperang tiap wari. (Ket. 12:17) Kita sendiri me si arus njaga kinitekenta gelah tetap paguh. Labo banci turang seninanta si ngelakokenca banta.

18. Bas jaman si mbarenda, ngkai maka nteguh kel ijemak prajurit ampang-ampangna?

¹⁸ Mbarenda, sekalak prajurit pasti ihamati kalak adi pang ia sanga erperang. Tapi, pasti mela kel iakapna adi mulih ia janah la lit ampang-ampangna. Nina sekalak ahli sejarah Roma si gelarna Tacitus, “Seh kel melana adi itadingken prajurit ampang-ampangna.” E me salah sada alasenna ngkai maka nteguh kel ijemak prajurit ampang-ampangna.

19. Uga carana gelah banci nteguh sijemak ampang-ampangta?

¹⁹ Gelah banci nteguh sijemak ampang-ampangta eme kinitekenta, arus ratur kita reh ku perpulungen janah situriken man kalak si deban kerna gelar Jahwe ras KerajanNa. (Heb. 10:23-25) Selain si e, perlu ka sibaca Pustaka tiap wari janah ertoto kita man Jahwe gelah isampatiNa kita ndalanken perentahNa. (2 Tim. 3:16, 17) Alu bage, senjata kai pe si ipake Setan ngelawan kita labo banci erban kita susah seh rasa lalap. (Jes. 54:17) Ampang-ampangta eme kinitekenta banci ngelindungi kita. Radu ras turang seninanta, banci kita tetap pang janah banci tiap wari kita menang i bas perang rohani. Janah si pentingna, bas pihak Jesus kita pagi sanga imenangkenna perang ngelawan Setan ras pengikutna. Sada kehamaten kel e banta!​—Ket. 17:14; 20:10.