1-2. Engkai maka perlu tutus ate umat Dibata mpelajari buku Imamat?

IKATAKEN Rasul Paulus man temanna si nguda denga eme Timotius maka “kerina isi Kitap si Badia rehna i bas Dibata nari janah erguna.” (2 Tim. 3:16) Si termasuk bas Kitap si Badia e eme buku Imamat. Uga nge pendapatndu kerna buku e? Piga-piga kalak erpengakap maka bas buku e melala peraturen si lanai erguna man banta gundari. Tapi labo bage menurut umat Dibata.

² Buku Imamat itulis lebih 3.500 tahun si nggo lewat. Tapi tetap lit iban Jahwe buku e ngasa gundari “guna ngajar kita.” (Rom. 15:4) Arah buku Imamat banci siteh uga perukuren ras perasan Jahwe, emaka perlu tutus ateta mpelajarisa. Situhuna, mbue si banci sipelajari arah buku e. Gundari sibahas empat pelajarenna.

3. Engkai maka lit korban binatang si ipersembahken bas Wari Pendamen?

³ Pelajaren si pertama: Gelah ialoken Jahwe persembahenta, arus siusahaken gelah ngena ateNa kita. Tiap tahun, pulung bangsa Israel sanga Wari Pendamen. Bas wari e, ipersembahken imam si mbelin korban binatang. Perban lit korban binatang e, iteh bangsa Israel maka perlu kalak e ibebasken arah dosa. Bas wari e, arus ibaba imam si mbelin dareh korban binatang ndai ku Ingan si Badiana Kel gelah dosa bangsa e banci iampuni. Tapi sope si e, lit tugas si ndauh pentingen si arus ilakokenna lebe.

4. Bagi si ikataken bas Imamat 16:12, 13, kai si ilakoken imam si mbelin sanga tangtangna ia masuk ku Ingan si Badiana Kel bas Wari Pendamen? (Nen gambar bas sampul majalah enda.)

 ⁴ Baca Imamat 16:12, 13. Cuba sibayangken kai si terjadi sanga Wari Pendamen. Bas wari e, arus telu kali imam si mbelin masuk ku Ingan si Badiana Kel si lit bas tabernakel. Sanga tangtangna ia masuk, ijemakna ingan si isina kemenyan si merim bage pe ingan arah emas si isina rara api. Ngadi ia i lebe-lebe tirai si nutupi dalan masuk ku Ingan si Badiana Kel. Kenca si e, masuk ia alu mehamat ku ingan e janah cinder ia i lebe-lebe peti perjanjin. Tempa-tempa sangana ia cinder i lebe-lebe Dibata Jahwe! Kenca si e, alu manjar-anjar itamakenna kemenyan ndai ku rara api, emaka nggo merim kel ingan e. * Dung e masuk ka kari ia ku Ingan si Badiana Kel janah ibabana dareh persembahen dosa. Jadi, itutung imam si mbelin e lebe kemenyan sope ipersembahkenna dareh persembahen dosa.

5. Kai si banci sipelajari kerna kemenyan si igunaken sanga Wari Pendamen?

⁵ Kai si banci sipelajari kerna kemenyan si igunaken sanga Wari Pendamen? Nina Pustaka, pertoton umat Jahwe si setia bali bagi kemenyan. (Msm. 141:2; Ket. 5:8) Sanga ibaba imam si mbelin kemenyan ku lebe-lebe Jahwe, mehamat kel ia ngelakokenca. Bage ka pe, mehamatlah kita sanga ertoto man Jahwe perban luar biasa kel siakap Ia. Ngata bujur kel kita man Jahwe, sebap aminna pe Ia si nciptaken kerinana tapi nggit Ia rembak ras kita bagi sekalak bapak si rembak ras anakna. (Jak. 4:8) Nggit ka Ia jadi Temanta! (Msm. 25:14) Enda sada kehamaten banta. Perban meherga kel siakap e, la ateta erban Dibata Jahwe kecewa.

6. Itutung imam si mbelin lebe kemenyan sope ipersembahkenna korban. Kai nge si banci sipelajari kerna Jesus je nari?

⁶ Enggo sibahas ndai maka arus itutung imam si mbelin lebe kemenyan sope ipersembahkenna korban. Alu bage, tek ia maka pasti ngena ate Dibata ia sanga ipersembahkenna korban. Kai pelajarenna? Sanga Jesus i doni, lit si penting si arus ilakokenna lebe sope ia mate jadi korban. Enda ndauh pentingen asangken nelamatken manusia. Kai kin e? Arus patuh ia man Jahwe janah tetap setia segedang geluhna i doni gelah ialoken Jahwe korban si ipersembahkenna. Alu bage, ibuktiken Jesus maka ndalanken patoken Jahwe bas kegeluhen eme pilihen si mehulina. Ibuktiken Jesus ka maka Jahwe ngenca si cocokna kel merentah janah lalap adil caraNa merentah.

7. Engkai maka terus iusahaken Jesus erban meriah ukur Bapakna segedang geluhna?

⁷ Sanga Jesus i doni, melala godan ras tentangen si iadapina. Itehna ka maka seh kel suina iakapna pagi nandangi mate. Aminna pe bage, la pernah sekali pe ia la patuh man Jahwe. Ibuktikenna atena maka cara Jahwe merentah me si mehulina. (Pil. 2:8) Sanga latih iakap Jesus rukur, ertoto ia “janah serko ia alu iluh mambur.” (Heb. 5:7) Arah pertoton Jesus si bulat ukur teridah maka ia setia man Jahwe, janah e erbanca reh paguhna sura-surana gelah tetap patuh man Bapakna. Pertoton Jesus e bali bagi kemenyan si merim kel iakap Jahwe. Segedang geluhna, terus iusahaken Jesus erban meriah ukur Bapakna janah ibuktikenna maka Jahwe ngenca si cocokna kel merentah.

8. Uga caranta ngusih Jesus?

⁸ Banci siusih Jesus adi siusahaken kel  patuh man Jahwe janah tetap setia man baNa. Sanga lit masalahta, tutuslah ateta ertoto mindo penampat Jahwe, perban meriah siban ateta ukurNa arah keputusenta. Adi silakoken e, sidukung me cara Jahwe merentah. Siteh maka labo ibegiken Jahwe pertotonta adi silakoken kai si segat ateNa. Tapi, adi silakoken kai si ngena ateNa, teklah kita maka pertotonta bali bagi kemenyan si merim kel iakap Jahwe. Janah banci kita tek adi patuh ras setia kita man Bapakta i surga, pasti meriah kel ukurNa.​—Kua. 27:11.

9. Engkai maka ibereken kalak Israel persembahen persadan?

⁹ Pelajaren si peduaken: Silayani Jahwe perban ngata bujur kita man baNa. Sipelajari kari kerna si e sanga sibahas kerna persembahen persadan, ntah pe korban persadan, si ibereken kalak Israel. * Arah buku Imamat siteh maka ibereken kalak Israel persembahen persadan “jadi persembahen pengataken bujur.” (Im. 7:11-13, 16-18) Iberekenna persembahen e labo perban arus iberekenna tapi perban nggit ia merekenca. Emaka persembahen e iberekenna arah ukurna meriah perban keleng atena Dibata Jahwe. Kalak si man daging binatang si ikorbanken e eme kalak si mereken persembahen e, keluargana, bage pe imam-imam. Tapi, piga-piga bagin arah binatang e man Jahwe saja ngenca ibereken. Kai saja kin e?

10. I bas kai saja nge persembahen persadan si ijelasken bas Imamat 3:6, 14-16 seri ras pelayanen Jesus?

¹⁰ Pelajaren si peteluken: Perban keleng ateta  Jahwe, sibereken si mehulina man baNa. Menurut Jahwe, lemak bagin si mehulina si lit bas binatang. IkatakenNa ka maka ginjal bage pe piga-piga bagin si deban arah binatang e bagin si meherga. (Baca Imamat 3:6, 14-16.) Emaka, pasti meriah kel ukur Jahwe adi nggit kalak Israel mpersembahken lemak bage pe bagin-bagin si meherga ndai man baNa. Adi ibereken kalak Israel persembahen si bage, e buktina iberekenna atena si mehulina man Jahwe. Bage ka pe, nggit Jesus mereken si mehulina man Jahwe. Perban keleng atena Jahwe, tutus kel atena ngelayani Ia. (Joh. 14:31) Meriah kel iakap Jesus ngelakoken peraten Jahwe, janah ngena kel atena undang-undang Dibata. (Msm. 40:9) Pasti meriah kel iakap Jahwe ngidah Jesus si nggit ngelayani Ia bas pusuhna nari!

11. Engkai maka persembahen persadan seri ras pelayanenta? Janah ngkai maka meriah ukurta metehsa?

¹¹ Bali bagi persembahen persadan, pelayanenta man Jahwe pe jadi bukti maka keleng kel ateta Ia. Emaka, siberekenlah si mehulina man Jahwe. Pasti meriah kel ukurNa ngidah jutan kalak si nggit ngelayani Ia perban keleng kel ate kalak e Jahwe janah nggit kalak e ndalanken patokenNa! Iidah Jahwe ras iergaiNa kai si ilakoken kita. Tapi labo e saja, idahNa ka janah iergaiNa alasenta ngelakokenca. Pasti meriah kel ukurta metehsa. Misalna, adi kam nggo metua janah lanai melala si banci ilakokenndu bas pelayanen, teklah kam maka iangkai Jahwe nge keadanndu. Banci saja la mbue iakapndu si banci ilakokenndu man Jahwe, tapi iteh Jahwe maka nggo ilakokenndu kai si banci ilakokenndu perban keleng atendu Ia. Pasti ialoken Jahwe kai si iberekenndu, adi si iberekenndu e si mehulina.

12. Uga perasan Jahwe sanga lit si mereken persembahen persadan? Janah ngkai maka e mpegegehi kita?

¹² Kai si banci sipelajari arah persembahen persadan? Sanga bagin-bagin si mehulina arah binatang si ikorbanken ndai itutung, nangkih me asapna janah pasti meriah ukur Jahwe. Emaka, pasti meriah ka ukur Jahwe adi silayani Ia bas pusuhta nari janah sibereken si mehulina man baNa. (Kol. 3:23) Bayangkenlah cirem Jahwe ngidah kam terus setia. La soal mbue ntah lang si banci iberekenndu man Jahwe, meherga kel iakapNa kerina. Janah pasti ingetNa e seh rasa lalap.​—Mat. 6:20; Heb. 6:10.

13. Menurut Imamat 9:23, 24, kai si ilakoken Jahwe guna mbuktiken maka ipasu-pasuNa imam-imam si mbaru denga ilantik?

¹³ Pelajaren si peempatken: Ipasu-pasu Jahwe organisasiNa si lit i doni. Perdiateken kai si terjadi bas tahun 1512 SM sanga tabernakel ipasang i teruh Deleng Sinai. (Kel. 40:17) Paksa si e, ipinpin Musa upacara guna ngelantik Arun ras anak-anakna jadi imam. Pulung me bangsa Israel guna ngenen uga imam-imam e mpersembahken korban binatang si tangtangna kel iberekenna man Jahwe. (Im. 9:1-5) Kai si ilakoken Jahwe guna mbuktiken maka ngena ateNa imam-imam si mbaru denga ilantik e? Sanga ipasu-pasu Arun ras Musa bangsa Israel, ipenusur Jahwe me api guna nutung kerina persembahen si lit i datas ingan persembahen.​—Baca Imamat 9:23, 24.

14. Bas jamanta gundari, ise nge maksudna imam-imam arah keluarga Arun?

¹⁴ Engkai maka ipenusur Jahwe api e? Perban ibuktiken Jahwe ateNa maka idukungNa Arun ras anak-anakna si nggo ipilihNa jadi imam. Sanga iidah bangsa Israel idukung Jahwe imam-imam e, iteh kalak e me maka ia pe arus ka idukungna imam-imam e. Lit nge hubungen peristiwa e ras  kita gundari? Lit. Kerina imam e ndai nggambarken imam-imam si terbelinen. Imam si Mbelin si lebih mulia eme Jesus Kristus, janah lit 144.000 kalak si ngelayani radu ras ia pagi jadi imam ras raja i surga.​—Heb. 4:14; 8:3-5; 10:1.

15-16. Kai buktina idukung Jahwe “budak si setia janah pentar”?

¹⁵ Bas tahun 1919, ilantik Jesus piga-piga turang seninanta si dilaki si ipilih ku surga jadi “budak si setia janah pentar.” Iaturken kalak e dahin erberita janah iberena ‘pangan man pengikut Kristus i bas waktu si tepat.’ (Mat. 24:45) Tek nge kita idukung Dibata budak si setia janah pentar?

¹⁶ Terus iusahaken Setan ras pengikutna mpengadi pendahin budak si setia. Adi la isampati Jahwe, labo banci ilakoken kalak e pendahinna. Terus ibereken budak si setia pangan rohani man pengikut Kristus i sebelang doni amin gia pernah terjadi perang doni si pertama ras si peduaken, pernah ka terjadi krisis ekonomi i sebelang doni, janah umat Dibata pe terus ianiaya ras ngadapi perbahanen si la adil. Cuba ukuri uga buena pangan rohani si banci sidat gundari! Publikasinta lit lebih 900 bahasa buena, janah kerina la nggalar. Jelas me, idukung Jahwe budak si setia. Bukti si deban idukung Jahwe kalak e teridah arah pendahin erberita. Berita si meriah nggo iberitaken “i belang-belang doni.” (Mat. 24:14) Emaka banci kita tek maka tuhu-tuhu idukung Jahwe janah ipasu-pasuNa organisasiNa gundari.

17. Kai si banci silakoken guna ndukung organisasi Jahwe?

¹⁷ Cuba siukuri penungkunen enda: ‘Ngata bujur nge aku perban nggo bas organisasi  Jahwe aku?’ Bas jaman Musa, ipenusur Jahwe api bas langit nari guna mbuktiken maka ngena ateNa imam-imam si nggo ilantik. Gundari pe nggo jelas iban Jahwe buktina maka organisasi enda me si igunakenNa. Pasti ngata bujur kel kita. (1 Tes. 5:18, 19) Kai si banci silakoken guna ndukung organisasi Jahwe? Sidalankenlah kai si nggo sipelajari arah Pustaka si nggo sidat arah publikasinta, perpulungen, bage pe kebaktin. Janah sidukung ka organisasi Jahwe adi tutus ateta erberita ras ngajar.​—1 Kor. 15:58.

18. Kai si ateta siusahaken?

¹⁸ Teruslah siusahaken ndalanken kai si nggo sipelajari arah buku Imamat. Ateta ialoken Jahwe min persembahenta. Silayani ateta Ia perban ngata bujur kita baNa. Teruslah sibereken si mehulina man Jahwe perban keleng kel ateta Ia. Janah, sidukung ka ateta organisasi Jahwe asa ngasupta. Alu bage, sibuktiken man Jahwe maka ngata bujur kel kita banci jadi SaksiNa. Sada kehamaten kel e banta!