1-2. Menurut 1 Petrus 4:7, 8, uga carana gelah ngasup kita ngadapi masa-masa si susah?

GUNDARI kita nggeluh bas “wari-wari pendungi” janah reh deherna kita ku kiniseran si mbelin, emaka reh serana keadanta. (2 Tim. 3:1) Misalna, kenca dung pemilu bas sada negeri i Afrika barat, nterem si rubati i je. Lebih enem bulan la aman iakap turang seninanta si tading i je. Kai si erban kalak e ngasup ngadapi keadan e? Lit piga-piga turang seninanta tading bas rumah turang seninanta bas daerah si lebih aman. Nina sekalak turang seninanta, “Bage gia keadanna, banci aku tetap tenang perban lit teman-temanku, labo aku sisada ngadapisa. Banci kami sisampat-sampaten.”

² Sanga terjadi “kiniseran si mbelin” pagi, banci kita tetap tenang perban melala temanta si ngkelengi kita. (Ket. 7:14) Emaka seh kel pentingna sikeleng-kelengen kita gundari nari. (Baca 1 Petrus 4:7, 8.) Mbue si banci sipelajari arah Jeremia. Isampati teman-temanna ia gelah banci selamat sope Jerusalem ikernepken. * Uga caranta ngusih Jeremia?

3. (a) Engkai maka banci saja la ate Jeremia ndeher ras kalak si deban? (b) Kai si iceritaken Jeremia man Baruh? Janah kai hasilna?

³ Lit kira-kira 40 tahun dekahna Jeremia tading i tengah-tengah kalak si la setia, termasuk tetanggana janah banci saja piga-piga kade-kadena arah kutana eme Anatot. (Jer. 11:21;  12:6) Banci saja la ate Jeremia ndeher ras kalak si deban. Tapi la ia bage. Buktina, iceritakenna man sekretarisna si setia eme Baruh uga perasanna, janah situhuna man banta pe iceritakenna kang perban nggo itulis bas Pustaka. (Jer. 8:21; 9:1; 20:14-18; 45:1) Sanga itulis Baruh pengalamen Jeremia si luar biasa, pasti reh kompakna kalak e janah siergan ia duana.​—Jer. 20:1, 2; 26:7-11.

4. Kai tugas si ibereken Jahwe man Jeremia? Engkai maka tugas e erban Jeremia ras Baruh reh kompakna?

⁴ Ertahun-tahun dekahna Jeremia mpersingeti bangsa Israel kerna kai si nandangi terjadi i Jerusalem. Pang kel ia ngelakokenca. (Jer. 25:3) Gelah robah bangsa e, isuruh Jahwe gelah itulis Jeremia kerina persinget Jahwe bas sada gulungen. (Jer. 36:1-4) Banci saja lit piga-piga bulan Jeremia kerja sama ras Baruh ndahiken tugas e. Pasti rusur kalak e ngerana-ngerana janah dungna reh paguhna kiniteken kalak e.

5. Kai buktina Baruh teman si mehuli?

⁵ Kenca dung itulis kalak e gulungen ndai, isuruh Jeremia Baruh mpeseh isi gulungen e man kalak si deban. (Jer. 36:5, 6) Aminna pe seh kel bahayana tugas e, pang Baruh ngelakokenca. Lawes ia ku halamen rumah pertoton janah ibacakenna gulungen e. Pasti meriah kel ukur Jeremia. (Jer. 36:8-10) Kenca si e, ibegi peminpin-peminpin Juda kerna kai si ilakoken Baruh, janah isuruh kalak e ka gelah ibacaken Baruh isi gulungen e! (Jer. 36:14, 15) Ikataken peminpin-peminpin e man Raja Joyakim kai si ikataken Jeremia. Kenca si e ikatakenna man Baruh, “Cebunilah kam ras Jeremia. Ola ise pe bahan si ngetehsa i ja kam.” (Jer. 36:16-19) Pas kel nasehatna e.

6. Kai si ilakoken Jeremia ras Baruh sanga lit tentangen?

⁶ Merawa kel Raja Joyakim sanga itehna isi gulungen ndai, emaka itutungna gulungen e  janah iperentahkenna gelah Jeremia ras Baruh itangkap. Tapi Jeremia la mbiar. Ibuatna ka gulungen si deban, iberekenna man Baruh, janah ikatakenna man Baruh kai si nggo ipeseh Jahwe. Emaka, isuratken Baruh “kerina si enggo isuratken i bas gulungen si pemena.”​—Jer. 36:26-28, 32.

7. Banci saja kai nge hasilna perban kerja sama Jeremia ras Baruh?

⁷ Kalak si ras-ras ia ngadapi masalah biasana banci reh kompakna. Emaka, sanga kerja sama Jeremia ras Baruh guna erban gulungen si mbaru nggantiken gulungen si nggo itutung Raja Joyakim, banci saja reh buena iteh Jeremia sifat-sifat Baruh janah Baruh pe bage kang. Dungna reh kompakna kalak e. Emaka siusihlah kalak e!

8. Engkai maka banci saja mesera siakap rembak ras turang seninanta? Tapi, ngkai maka ula kita nyerah?

⁸ Banci saja la siakap lit waktunta janah la siakap kita banci rembak ras turang seninanta. Ntah pe banci saja mesera siakap nceritaken perasanta man turang seninanta adi pernah kitik ibanna ukurta. (Kua. 18:19b, 24) Tapi ula kita nyerah. Adi isampati turang seninanta ateta kita bas masa-masa si mesera pagi, arus kita rembak ras kalak e gundari nari. Uga carana? Siceritakenlah man turang seninanta uga perasanta bage pe kai si sangana siukuri.​—1 Pet. 1:22.

9. (a) Kai buktina tek Jesus man teman-temanna? (b) Kai gunana adi siceritaken man teman-temanta kai si sangana siukuri bage pe perasanta? Ban contohna.

⁹ Nggit Jesus nceritaken uga perasanna man teman-temanna, la lit si ibunikenna. Enda buktina maka tek Jesus man kalak e. (Joh. 15:15) Banci siusih Jesus. Siceritakenlah man temanta kai si erban meriah ukurta, kai si erban kita kuatir, bage pe kai si la bagi ukurta. Sanga lit kalak si cerita man bandu, tutuslah atendu megikenca. Banci kari idahndu maka seri kepe perukuren, perasan, bage pe tujun kena. Perdiateken pengalamen sekalak turang seninanta si gelarna Cindy, umurna 29 tahun. Lit temanna sekalak perintis si gelarna Marie-Louise, umurna 67 tahun. Tiap wari Kamis erpagi-pagi, ras kalak e erberita, janah melala si icakapken kalak e. Nina Cindy, “Meriah kuakap ngerana-ngerana kerna kai si penting ras teman-temanku. Dungna banci lebih kutandai kalak e.” Bali bagi Cindy, ceritakenndulah man temanndu kai si sangana iukurindu janah begikenndu ka lah temanndu e sanga ia cerita. Adi nggit kam cerita man temanndu, reh kompakna me kena.​—Kua. 27:9, Terjemahan Dunia Baru (NW).

10. Menurut Kuan-kuanen 27:17, kai nge hasilna adi kerja sama kita ras turang seninanta?

¹⁰ Adi kerja sama kita ras turang seninanta janah siidah sifat-sifatna si mehuli, banci kita erlajar arah kalak e janah dungna reh deherna kita ras ia, bali bagi pengalamen Jeremia ras Baruh. (Baca Kuan-kuanen 27:17.) Contohna, sanga erberita kam ras turang seninandu, idahndu maka pang kel ia njelasken kinitekenna. Entah pe idahndu maka tutus kel atena nceritaken kerna Jahwe ras peratenNa. Uga nge perasanndu? Banci reh kelengna atendu ia.

11-12. Ceritaken sada pengalamen si mbuktiken maka banci kita reh kompakna ras turang seninanta adi erberita kita ras kalak e.

¹¹ Perdiateken dua pengalamen si mbuktiken maka banci reh kelengna ateta turang seninanta adi kerja sama kita ras ia bas pelayanen. Contohna, lit sekalak turang seninanta si gelarna Adeline si umurna 23 tahun. Iajakna temanna si gelarna Candice gelah ras kalak e erberita bas daerah si jarang ikerjaken. Nina Adeline, “Erberita kami ku je gelah reh semangatna kami janah reh riahna akap kami erberita.” Kai hasilna? Nina Adeline, “Kenca sada warin kami erberita, rusur kami cerita-cerita. Iceritaken kami uga perasan kami, pengalamen si mejile sanga erberita, bage pe kerna uga Jahwe nggo nampati kami. Meriah kel iakap kami, janah reh buena si nggo iteh kami kerna sada ras si debanna.”

¹² Lit dua turang seninanta arah Prancis si lenga erjabu si gelarna Laïla ras Marianne. Lima minggu kalak e erberita ku Bangui, ibu kota Republik Afrika Tengah. Nina Laïla, “Mon-mon lit nge masalah kami, perban beda sifat kami. Tapi la pernah kami la siperkuanen janah iusahaken kami gelah tetap sikeleng-kelengen, emaka reh kompakna kami. Melala kuidah sifat-sifat mehuli Marianne, misalna uga pe situasi jenda banci idalanina, keleng atena kalak si tading i je, janah semangat kel ia erberita. Dungna lebih kuergai ia.” Labo perlu kam pindah ku  negeri si deban gelah banci igejapkenndu pengalamen si bage. Adi erberita kam ras turang senina bas runggunndu, banci itandaindu kalak e terdeheren janah banci kena reh kompakna.

13. Kai si banci terjadi adi rusur kita kerja sama ras turang seninanta?

¹³ Perban rusur kita kerja sama ras turang seninanta, banci siidah sifat-sifat mehuli kalak e tapi mon-mon banci ka siidah kelemahenna. Uga carana gelah banci kita tetap rembak ras turang seninanta amin gia lit kelemahen kalak e? Mari sibahas ka mulihi contoh Jeremia. Sipelajari kari ngkai maka banci idahna sifat mehuli teman-temanna janah ngkai maka banci ilupakenna kesalahen kalak e.

14. Kai si banci ipelajari Jeremia kerna Jahwe? Janah kai gunana e man bana?

¹⁴ Jeremia me si nulis buku Jeremia bas Pustaka, janah banci saja ia ka si nulis buku 1 ras 2 Raja-Raja. Pasti nggo itehna maka mbelin kel perkuah ate Jahwe man manusia si la sempurna. Misalna, kenca robah Raja Ahap arah perbahanenna si jahat, ikataken Jahwe maka iukumNa pagi keluarga Ahap, tapi labo sanga Ahap nggeluh denga. (1 Raj. 21:27-29) Selain si e, pasti iteh Jeremia ka maka jahaten Manase asangken Ahap. Aminna pe bage, iampuni Jahwe Manase perban robah ia. (2 Raj. 21:16, 17; 2 Kro. 33:10-13) Arah kejadin-kejadin e, pasti iusih Jeremia atena Dibata gelah jadi kalak si sabar janah nggit ngampuni teman-temanna.​—Msm. 103:8, 9.

15. Kai buktina Jeremia sabar bali bagi Jahwe?

¹⁵ Cuba perdiateken kai si ilakoken Jeremia guna nampati Baruh sanga lanai bulat ukurna ngelakoken tugasna. Tapi la mis Jeremia nyerah, tek ia maka Baruh banci denga berubah. Emaka ipeseh Jeremia man Baruh persinget Dibata man bana. Tegas memang berita e, tapi guna kiniulin Baruh. (Jer. 45:1-5) Kai pelajarenna man banta?

16. Menurut Kuan-kuanen 17:9, uga carana gelah tetap kita rembak ras turang seninanta?

¹⁶ La banci siarapken turang seninanta sempurna. Emaka, adi erteman kita ras kalak e, arus siusahaken kel gelah tetap kita rembak ras ia. Adi lit salahna, banci sigunaken Kata Dibata guna mpersingeti ia janah mehuli siban carana. (Msm. 141:5, NW) Adi pernah ceda ukurta iban kalak e, simaafkenlah ia. Janah adi nggo simaafken, ula nai sicakapken kesalahenna e man bana ntah pe man kalak si deban. (Baca Kuan-kuanen 17:9.) Gundari reh serana keadanta, emaka seh kel pentingna mperdiateken sifat-sifat mehuli turang seninanta, ula kelemahenna! Adi silakoken e, reh deherna kita ras kalak e. Seh kel pentingna enda gundari sebap perlu kita teman bas kiniseran si mbelin pagi.

17. Kai buktina Nabi Jeremia teman situhu-tuhu bas masa si susah?

¹⁷ Nabi Jeremia terbukti jadi teman situhu-tuhu bas masa si susah. Misalna, sanga Jeremia imasukken ku sumur si erkubang gelah mate, lit sekalak pejabat istana si gelarna Ebedmelek reh nelamatken ia. Tapi kenca si e, mbiar Ebedmelek ibunuh peminpin-peminpin kari ia. Sanga iteh Jeremia kerna si e, labo ia sinik saja janah labo iakapna banci nge kari Ebedmelek ngadapisa sisada. Amin gia Jeremia ipenjaraken, tetap iusahakenna mpegegehi temanna e. Ikatakenna man Ebedmelek janji Jahwe si banci mpetetap ukurna.​—Jer. 38:7-13; 39:15-18.

18. Menurut Kuan-kuanen 17:17, kai si perlu silakoken sanga susah temanta?

 ¹⁸ Gundari, melala kel masalah si iadapi turang seninanta. Misalna, nterem si susah perban lit bencana alam, perang, ras si debanna. Adi bage si terjadi, banci siajak turang seninanta e tading ras kita. Si debanna banci ka nampati alu mereken sen. Tapi la soal uga pe keadanta, banci kita ertoto man Jahwe gelah isampatiNa turang seninanta. Sanga siteh lit turang seninanta si kitik ukurna, banci saja la siteh kai si man katanken ntah pe kai si arus silakoken. Tapi situhuna kita kerina banci ikut nampati. Misalna, banci siban waktunta guna temanta e. Tutuslah ateta megiken ia sanga ia cerita. Janah banci ka sikataken man bana kai ayat favoritta si banci ngapuli pusuh. (Jes. 50:4) Janah si pentingna, nggitlah kam nampati temanndu sanga perlu ia penampat.​—Baca Kuan-kuanen 17:17.

19. Engkai maka arus siusahaken kel gundari gelah tetap rembak ras turang seninanta?

¹⁹ Arus siusahaken kel gundari gelah tetap rembak ras turang seninanta. Engkai? Sebap iusahaken musuh-musuhta pagi gelah lanai kita ersada, misalna ifitnahna janah ibualina kita. Iusahaken kalak e gelah lanai kita siteken janah dungna simusuhen kita. Tapi labo banci kalak e berhasil. La kalak e ngasup erban kita lanai sikeleng-kelengen. Emaka, teruslah kita rembak ras turang seninanta, labo ngasa kiniseran si mbelin saja, tapi seh rasa lalap!