BAS jaman Pustaka, tugas sekalak pengurus eme ngurus rumah tangga ntah pe taneh ras bangunen kalak si deban. Bas bahasa Heber ras Junani, kata si iterjemahken jadi “pengurus” banci ka maksudna sekalak pengawas ntah pe kepala rumah tangga.

Sanga Jusup anak Jakup jadi budak i Mesir, jadi pengurus ia bas rumah tuanna. Janah, nggo ‘iendesken tuanna kerinana man Jusup.’ (Kej. 39:2-6) Bas pudi wari, sanga Jusup jadi penguasa i Mesir, ia pe lit ka pengurus rumahna.​—Kej. 44:4.

Bas jaman Jesus, biasana si mpuna juma la tading bas jumana, tapi bas kota si deban. Emaka ibanna pengurus-pengurus gelah iperdiatekenna kerina aron si erdahin i je tep-tep wari.

Kalak si uga nge si banci jadi pengurus? Menurut sekalak penulis arah Roma bas abad pertama si gelarna Columella, sekalak budak si isuruh jadi pengawas ntah pe pengurus arus “nggo lit pengalamenna.” Arus “ipastikenna maka tutus ate kerina si erdahin i je ndahiken tugasna, tapi la banci ia kejam man kalak e.” Ikataken Columella ka, “Si pentingna, ula min jago kapna bana janah arus ia nggit erlajar.”

Bas Pustaka lit ituriken kerna sekalak pengurus bage pe pendahinna. Contoh e njelasken kerna piga-piga kegiaten bas runggun Kristen. Misalna, iiahken Rasul Petrus kalak Kristen gelah igunaken kalak e kengasupenna si idatna i bas Dibata nari guna ‘ngelayani kalak si deban selaku pengurus si mehuli arah lias ate Dibata si mbelin.’​—1 Pet. 4:10.

Bas perumpaman Jesus si lit bas Lukas 16:1-8, igunakenna ka contoh kerna sekalak pengurus. Selain si e, sanga ikataken Jesus kerna tanda kerehenna selaku Raja, ipetetap Jesus ukur murid-muridna maka ilantikna pagi “budak si setia janah pentar,” ntah pe “pengurus si setia.” Tugas utama pengurus e mereken pangan rohani alu ratur man kerina pengikut Kristus i bas wari-wari pendungi. (Mat. 24:45-47; Luk. 12:42) Isikapken pengurus si setia e melala publikasi si banci mpegegehi kinitekenta, janah gundari publikasi e nggo seh ku belang-belang doni. Ngata bujur kel kita perban banci sidat kerina publikasi e.