1. Penungkunen kai saja si banci turah bas pusuhta?

NTISIK nari ihancurken me agama palsu, reh ka serangen Gog arah Magog, bage pe perang Harmagedon. Sanga ukurindu kerna si e, pernah nge kam mbiar? Pernah nge tersungkun-sungkun kam, ‘Ngasup nge pagi aku tetap setia sanga terjadi kerina kejadin e?’ Adi bage perasanndu, pembahasen kerna kata-kata Jesus bas ayat tema artikel enda banci nampati kam. Bagenda nina Jesus man murid-muridna, “Ula pediat latih ukur kena. Erkinitekenlah man Dibata, erkiniteken ka lah man bangku.” (Joh. 14:1) Adi paguh kinitekenta, la kita mbiar ngadapi kai pe si nandangi terjadi.

2. Uga carata mpepaguh kinitekenta, ras kai kari sibahas bas artikel enda?

² Gundari pe, melala masalah siadapi si nguji kinitekenta. Adi siukuri uga carata ngadapi masalah e, banci sipegegehi kinitekenta. Banci siteh bas kai saja perlu sipegegehi kinitekenta. Alu bage, ngasup kita ngadapi masalah si terjadi pagi. Bas artikel enda, sibahas kari empat situasi si iadapi murid-murid Jesus mbarenda, si mbuktiken maka perlu denga pepaguh kalak e kinitekenna. Sibahas ka kari uga kita ngadapi masalah-masalah si seri gundari ras uga e nikapken kita ngadapi tentangen si nandangi terjadi.

3. Bagi si icatat bas Matius 6:30, 33, kai nge si ijelasken Jesus kerna erkiniteken man Dibata?

³ Wajar nge adi sekalak kepala keluarga sikapkenna atena pangan, paken, ras ingan tading man diberuna ras anak-anakna. Tapi, labo lalap nukah ngelakoken si e perban kita nggeluh bas masa si sulit. Piga-piga turang seninata lanai lit dahinna, amin pe tutus tena ndarami dahin, lalap lenga datna dahin. Lit ka si la nggit ngaloken dahin si la cocok man  kalak Kristen. Sanga terjadi si bage, perlu kita tek maka pasti sikapken Jahwe keperlun keluargata. Jelasken Jesus uga pentingna kerna si e man murid-muridna sanga khotbah ia i gunung. (Baca Matius 6:30, 33.) Adi tek kel kita maka labo itadingken Jahwe kita, banci tetap siutamaken ngelayani Jahwe. Sanga siidah uga Jahwe nampati kita ndatken keperlunta, reh rembakna me kita ras Ia janah reh paguhna kinitekenta.

4-5. Kai si nampati sada keluarga sanga kuatir kalak e kerna keperlunna?

⁴ Cuba siukuri uga cara Jahwe nampati keluarga Castro si tading i Venezuela sanga kuatir kalak e kerna uga ndatken keperlunna. Mbarenda, keluarga Castro banci ndatken keperlunna arah hasil juma kalak e. Bas sada wari, lit piga-piga dilaki reh ku ingan kalak e, buatna taneh kalak e, janah suruhna kalak e lawes. Bagenda nina kepala keluarga e si gelarna Miguel, “Gundari sitik nari ngenca taneh si banci perjumai kami janah e pe pinjam kami arah kalak si deban. Tiap erpagi-pagi, ertoto aku gelah sikapken Jahwe keperlun kami bas wari e.” Amin pe mesera pergeluh keluarga e, tetap kalak e tek maka pasti sikapken Bapakta Jahwe keperlun kalak e tiap wari. Ratur kalak e reh ku perpulungen bage pe erberita. Tetap pelebe kalak e Jahwe bas geluhna, janah bereken Jahwe keperlun kalak e.

⁵ Sanga Miguel ras diberuna, Yurai, ngadapi masalah, labo masalahna saja si ukurina, tapi si iukuri kalak e uga cara Jahwe mereken keperlun kalak e. Mon-mon, gunaken Jahwe turang senina mereken kai si perluken kalak e ntah pe nampati Miguel ndatken dahin. Selain si e, gunaken Jahwe kantor cabang guna nikapken piga-piga keperlun kalak e. Labo pernah tadingken Jahwe kalak e. Hasilna, reh paguhna me kiniteken keluarga e. Anak kalak e sintua si gelarna Yoselin nuriken sada contoh uga Jahwe nampati kalak e. Kenca si e bagenda nina, “Terpegegehi kel aku ngidah cara Jahwe nampati kami. Ia me temanku. Tek aku, lalap nge aku sampatiNa.” Nina ka, “Masalah si adapi keluarga kami nikapken kami ngadapi masalah si terberaten pagi.”

6. Uga carandu mpegegehi kinitekenndu sanga ngadapi masalah ekonomi?

⁶ Sangana nge adapindu masalah ekonomi? Adi bage si adapindu, pasti susah akapndu. Amin pe bage, banci gunakenndu situasi e mpegegehi kinitekenndu. Ertotolah man Jahwe, baca ras ukurilah kata-kata Jesus si icatat bas Matius 6:25-34. Ukurilah pengalamen-pengalamen si lit bas jamanta gundari, si mbuktiken maka pasti lalap isikapken Jahwe keperlun kalak si tetap sibuk ngelayani Ia. (1 Kor. 15:58) Alu bage, reh tekna me kam maka lalap nge kam isampati Jahwe, bagi Ia enggo nampati kalak si deban si ngadapi masalah si seri. Teh Jahwe kai si perlukenndu  ras tehNa uga cara nikapkenca. Sanga gejapkenndu penampat Jahwe, reh paguhna me kinitekenndu. Alu bage, ngasup kam pagi ngadapi masalah si terberaten.​—Hab. 3:17, 18.

7. Bagi si ikataken bas Matius 8:23-26, uga “angin si seh kel meterna” nguji kiniteken murid-murid Jesus?

⁷ Sanga Jesus ras murid-muridna sangana bas perahu i laut, rempet rembus angin si seh kel meterna. Emaka, gunaken Jesus kesempaten e nampati murid-muridna gelah angkai kalak e maka perlu pegegehi kalak e kinitekenna. (Baca Matius 8:23-26.) Megegeh kel angin si rembus e, emaka masuken lau ku perahu kalak e, tapi paksa si e entabeh kap Jesus tunduh. Perban mbiar kel murid-murid e, medakina Jesus. Emaka sungkun Jesus kalak e, “Engkai maka mbiar kel kena, o kena si kitik kinitekenna?” Arusna teh murid-murid maka ngasup nge Jahwe ngelindungi Jesus bage pe kalak si lit ras ia. Kai nge pelajarenna man banta? Kiniteken si paguh banci nampati kita ngadapi masalah si mberat, si bali ras angin si seh kel meterna.

8-9. Kai masalah si nguji kiniteken Anel, ras kai si nampati ia?

⁸ Cuba ukuri pengalamen Anel, sekalak turang seninata si lajang denga, si tading i Puerto Riko. Reh paguhna kinitekenna sanga adapina masalah si mberat. Masalah si adapina eme bencana alam. Mulai adapina masalah e sanga hancur rumahna perban kena Badai Maria bas tahun 2017. Perban kejadin e, lanai lit dahinna. Bagenda nina Anel, “Kuatir aku perban masalah e. Tapi, kuusahaken tek man Jahwe ras ertoto aku man baNa. La kupediat perasan kuatirku e erban aku ngadi ngelakoken kai si banci kulakoken.”

⁹ Alasen si deban si nampati Anel ngasup ngadapi masalahna eme perban nggit ia patuh. Bagenda nina, “Perban patuh aku man petunjuk organisasi Jahwe, enda erban aku tenang. Banci kuidah uga Jahwe nampati aku arah turang senina, pegegehi kalak e aku, janah berekenna kai si kuperluken.” Nina ka, “Bereken Jahwe lebihen asa si kupindo. Enda erban reh paguhna kinitekenku.”

10. Kai si banci lakokenndu adi sangana susah kapndu perban masalah si seh kel beratna?

¹⁰ Sangana nge mberat masalahndu? Banci saja susah akapndu perban bencana alam ntah pe perban mekelek penakitndu. Emaka latih kapndu rukur janah la tehndu kai si arus lakokenndu. Banci saja kuatir kam, tapi ula pediat perasan kuatir e erban bene kinitekenndu man Jahwe. Reh rembaknalah kam ras Jahwe arah toto. Pegegehilah kinitekenndu alu ngukuri kai si enggo ilakoken Jahwe bas nampati kam. (Ms. 77:11, 12) Teklah kam maka labo ndigan pe kam itadingken Jahwe.

11. Engkai maka arus kita patuh man kalak si ilantik Jahwe guna minpin kita?

 ¹¹ Kai deba nari si banci nampati kita gelah ngasup ngadapi masalah? Bagi si kataken Anel ndai, penting kel nggit patuh. Siusahakenlah tek man kalak si ilantik guna minpin kita, sebap Jesus ras Jahwe pe tek man kalak e. Memang, mon-mon banci saja lit petunjuk si bereken kalak e man banta si kurang pas siakap. Tapi adi lalap kita patuh, pasti pasu-pasu Jahwe kita. Arah Pustaka bage pe arah pengalamen kalak si setia, banci siidah buktina maka kalak e banci selamat perban ia patuh. (Kel. 14:1-4; 2 Kro. 20:17) Emaka, ukurilah pengalamen-pengalamen si bage. Adi bage banndu, reh nukahna me kam patuh man petunjuk organisasi Jahwe, gundari bage pe pagi. (Heb. 13:17) Alu bage, lanai kam biar ngadapi kiniseran si mbelin si nandangi terjadi.​—Kua. 3:25.

12. Menurut Lukas 18:1-8, kai hubungenna kiniteken ras megenggeng ngadapi perbahanen si la adil?

¹² Iteh Jesus maka pasti iadapi murid-muridna perbahanen si la adil. Guna nampati kalak e, berekenna sada perumpaman si icatat bas buku Lukas. Ceritaken Jesus kerna sekalak janda si lalap usahakenna ndatken keadilen arah sekalak hakim si la adil. Tek diberu e maka pasti begiken hakim e pemindonna adi lalap ia reh. Dungna, begiken hakim e pemindonna. Kai pelajarenna man banta? Jahwe labo la adil. Emaka nina Jesus, “Pasti bereken Dibata keadilen man kalak si pilihNa, si erlebuh man baNa suari ras berngi.” (Baca Lukas 18:1-8.) Kenca si e nina Jesus ka, “Sanga Anak manusia reh, lit nge dapetina kiniteken si bagenda bas doni?” Sanga siadapi perbahanen si la adil, banci sibuktiken maka paguh kinitekenta adi sabar ras megenggeng kita bali bagi janda ndai. Adi bage paguhna kinitekenta, banci kita tek maka pasti sampati Jahwe kita. Banci ka kita tek maka toto erkuasa kel. Banci saja totota ijawap alu cara si la isangka-sangka.

13. Uga toto nampati sada keluarga sanga adapi kalak e perbahanen si la adil?

¹³ Cuba ukuri pengalamen arah Vero, si tading i Republik Demokratik Kongo. Ia ras dilakina si lenga saksi bage pe anakna si diberu si umurna 15 tahun, kiam arah kutana nari perban lit serangen arah sada kelompok tentera. Sanga bas perdalanen, ipengadi tentera-tentera kalak e, janah ancamna kalak e maka bunuhna atena kalak e. Megi si e ngandung Vero. Emaka petenang anakna ia janah megang ia ertoto. Bas totona e mulih-ulih ia erlebuh man Jahwe. Sanga dung ia ertoto, sungkun komandan tentera e ia, nina, “Ise si ngajari kam ertoto?” Nina ngaloisa, “Mamakku, ajarina aku contoh toto si lit bas Matius 6:9-13.” Nina komandan e, “Lawes dage kam  ras orang tuandu. Mbera-mbera Jahwe Dibata kena ngelindungi kena!”

14. Kai si banci saja nguji kinitekenta, ras kai si banci nampati kita gelah ngasup ngadapisa?

¹⁴ Pengalamen-pengalamen ndai ngajarken man banta maka penting kel ertoto. Tapi, uga adi totondu la mis ijawap ntah pe la ijawap alu cara si luar biasa? Enda banci saja nguji kinitekenndu. Tapi, usihlah janda si lit bas perumpaman Jesus ndai, tetaplah kam ertoto. Teklah kam maka labo kam pernah itadingken Dibatata, janah pasti ijawapNa totondu alu erbage cara bas waktu si tepat. Teruslah pindo kesah si badia Dibata Jahwe. (Pil. 4:13) Ingetlah maka kentisik nari mbue kel pasu-pasu si bereken Jahwe man bandu seh ngasa lupa kam kerina masalah si pernah adapindu. Adi tetap kam setia ngadapi masalahndu ras gejapkenndu penampat Jahwe, reh gegehna me kam ras ngasup kam ngadapi masalah si nandangi terjadi.​—1 Pet. 1:6, 7.

15. Bagi si itulis bas Matius 17:19, 20, kai masalah si adapi murid-murid Jesus?

¹⁵ Iajari Jesus murid-muridna maka adi erkiniteken kalak e ngasup kalak e ngadapi erbage-bage masalah si mberat. (Baca Matius 17:19, 20.) Bas sada wari, la banci ipelawes murid-murid Jesus sada malekat jahat. Padahal enggo pernah berhasil ipelawes kalak e malekat jahat. Engkai maka bage? Ijelasken Jesus maka perlu kalak e terbuen kiniteken. Katakenna maka adi paguh kiniteken kalak e, ngasup kalak e ngadapi masalah si bali bagi gunung. Gundari pe, banci saja siadapi masalah si seh kel beratna si tempa-tempa la terdungi.

16. Uga kiniteken Geydi man Dibata nampati ia tetap megenggeng amin pe dilakina ibunuh?

¹⁶ Cuba perdiateken pengalamen Geydi, arah Guatemala. Dilakina si gelarna Edi, mate ibunuh sanga mulih kalak e arah perpulungen nari. Uga kiniteken Geydi man Dibata nampati ia gelah megenggeng amin pe ceda kel pusuhna? Bagenda nina, “Kuturiken kerina masalahku arah toto, e erban tenang kuakap. Banci kugejapken uga Jahwe mperdiateken aku arah keluargaku ras arah teman-temanku bas runggun. Perban tetap aku sibuk ngelayani Jahwe, alu manjar-anjar reh urakna ateku ceda e, janah e nampati aku ndalani tiap warina ras la kuatirsa kerna wari si pepagi. Arah pengalamen e, erlajar aku maka masalah kai pe pagi terjadi man bangku, ngasup nge aku ngadapisa alu penampat Jahwe, Jesus, ras turang senina.”

17. Kai si banci silakoken sanga siadapi masalah si bagi gunung?

¹⁷ Sangana nge kam erceda ate perban lit kalak si keleng atendu si enggo mate? Pegegehilah kinitekenndu nandangi arapen kekeken alu mbaca contoh-contoh kerna kalak si ipekeke si icatat bas Pustaka. Sangana  nge ceda pusuhndu perban lit anggota keluargandu si ipedarat arah runggun? Erlajarlah kam guna mbuktiken maka pengaturen si iban Dibata kerna kalak si ipedarat arah runggun, e me si mehulina. La soal kai masalahndu, banlah e guna mpegegehi kinitekenndu. Turiken kerina isi pusuhndu man Jahwe. Ula kam nerapken bana, tapi tetaplah rembak ras turang seninandu. (Kua. 18:1) Lakokenlah kai si banci nampati kam megenggeng, amin pe mon-mon tangis kam sanga ngelakokenca. (Ms. 126:5, 6) Tetaplah kam ratur reh ku perpulungen, erberita, ras mbaca Pustaka. Teruslah inget pasu-pasu si luar biasa si enggo ijanjiken Jahwe man bandu bas wari si pepagi. Sanga idahndu uga Jahwe nampati kam, reh paguhna me kinitekenndu man baNa.

18. Kai nge si banci ilakokenndu adi tehndu maka kinitekenndu perlu denga ipegegehi?

¹⁸ Banci saja sanga adapindu masalahndu si mbarenda ntah pe si gundari, tehndu maka perlu denga kepe pegegehindu kinitekenndu. Amin pe bage, ula kitik ukurndu. Anggaplah e kesempaten guna mpegegehi kinitekenndu. Ertotolah man Dibata bagi pemindon rasul-rasul Jesus, sanga katakenna, “Pegegehi min kiniteken kami.” (Luk. 17:5) Selain si e, ukurilah kerna contoh-contoh si enggo sibahas bas artikel enda. Ingetlah kerina penampat Jahwe man bandu, bali bagi Miguel ras Yurai. Tetaplah ertoto man Jahwe terlebih sanga mberat kel masalahndu, bali bagi anak Vero ras Anel ndai. Ingetlah maka banci saja bereken Jahwe penampat arah keluarga ntah pe teman-temanta, bali bagi si igejapken Geydi ndai. Adi nggit kam ngaloken penampat Jahwe bas ngadapi masalahndu si gundari, reh tekna me kam maka ngasup kam pagi ngadapi masalah kai pe si terjadi.

19. Kerna kai nge Jesus tek, ras kerna kai nge kam tek?

¹⁹ Isampati Jesus murid-muridna guna meteh bas kai saja perlu pegegehi kalak e kinitekenna. Amin pe bage, labo pernah sangsi Jesus maka pasti banci adapi kalak e masalah si terjadi pagi alu penampat Jahwe. (Joh. 14:1; 16:33) Selain si e, tek ia maka lit pagi sada kelompok jelma si enterem si selamat ngelewati kiniseran si mbelin perban paguh kinitekenna. (Ket. 7:9, 14) Ikut nge pagi kam selamat? Alu penampat Jahwe, banci kam ikut selamat adi gundari nari lakokenndu asa ngasupndu mpegegehi kinitekenndu!​—Heb. 10:39.