1. Kai si arapken Jahwe arah kita?

PENTING kel akap Jahwe kekelengen si setia. (Hos. 6:6) Ate Jahwe bage ka min perasanta. Arah Nabi Miha, iiahken Dibata kita gelah ‘sicidahken kekelengen si setia.’ (Mi. 6:8) Tapi sope silakoken si e, perlu siteh kai kin ertina kekelengen si setia e.

2. Kai kin kekelengen si setia e?

² Kai kin kekelengen si setia e? Istilah “kekelengen si setia” lit kira-kira 220 kali i bas Pustaka si Badia Terjemahen Doni si Mbaru. Menurut “Kamus Pustaka si Badia” si lit bas terjemahen e, kekelengen si setia maksudna “kekelengen si ibuktiken perban lit janji kesetian ras hubungen si rembak. Istilah enda rusur ipake man kekelengen Dibata nandangi manusia, tapi kekelengen enda pe ibuktiken manusia man sesama manusia.” Jahwe me usihen si mehulina bas ncidahken kekelengen si setia. Bas artikel enda, sibahas kari uga cara Jahwe mbuktiken kekelengen si setia man manusia. Bas artikel seterusna, sibahas kari uga kita selaku umat Dibata ngusih Jahwe bas mbuktiken kekelengen si setia man sada ras si debanna.

3. Kai si ituriken Jahwe kerna diriNa man Musa?

³ La ndekah kenca kalak Israel ndarat arah Mesir, ituriken Jahwe man Musa kerna ise gelarNa ras uga sipat-sipatNa. Nina, “Jahwe, Jahwe kap Dibata si perkuah, si mehuli, la nukah merawa, janah dem alu kekelengen si setia ras kebenaren. Kucidahken kekelengen si setia man ribun kalak. Kuampuni kesalahen, pelanggaren, ras dosa.” (Kel.  34:6, 7) Mpepalem pusuh kel kata-kata e. Ituriken Jahwe man Musa salah sada si erban kekelengenNa luar biasa. Kai e? Mari sibahas.

4-5. (a) Uga Jahwe nuriken kerna diriNa? (b) Penungkunen kai saja kari sibahas?

⁴ Labo saja ikataken Jahwe lit bas Ia kekelengen si setia, tapi ikatakenNa maka Ia “dem alu kekelengen si setia.” Kata-kata “dem alu kekelengen si setia” lit ka lima kali nari iulihi bas ayat si deban. (Bil. 14:18; Ms. 86:15; 103:8; 145:8; Jun. 4:2) Bas kerina ayat e, kata-kata “dem alu kekelengen si setia” ipake man Jahwe ngenca, la pernah man manusia. E buktina penting kel akap Jahwe kekelengen si setia e. * E me sebapna bagenda nina Raja Daud, “O Jahwe, kekelengenNdu si setia seh ku langit . . . O Dibata, kekelengenNdu si setia seh kel mergana! Manusia erlindung i teruh kabengNdu.” (Ms. 36:5, 7) Enggo nge bagi Daud perasanta kerna kekelengen Jahwe si setia e?

⁵ Gelah reh bagesna siangkai kerna kekelengen si setia e, mari sibahas dua penungkunen enda: Man ise saja cidahken Jahwe kekelengenNa si setia? Ras kai gunana man banta perban cidahken Jahwe kekelengenNa si setia?

6. Man ise saja cidahken Jahwe kekelengenNa si setia?

⁶ Man ise saja cidahken Jahwe kekelengenNa si setia? Labo man kerina kalak cidahken Jahwe kekelengenNa si setia, tapi man kalak si rembak ras Ia ngenca. Dibata Jahwe setia man kalak si rembak ras Ia. IberekenNa man kalak e masa depan si cerah janah lalap pagi keleng ateNa kalak e.

7. Kai buktina keleng ate Jahwe kerina jelma?

⁷ Keleng ate Jahwe kerina jelma. Kai buktina? Bagenda nina Jesus man sekalak dilaki si gelarna Nikodemus, “Perban keleng kel ate Dibata doni enda emaka berekenNa AnakNa si tonggal, gelah ise pe si erkiniteken man bana la ikernepken tapi ndatken kegeluhen si rasa lalap.”​—Joh. 3:1, 16; Mat. 5:44, 45.

8-9. (a) Engkai maka cidahken Jahwe kekelengenNa si setia man umatNa? (b) Kai si nandangi sibahas?

⁸ Bagi si enggo sibahas ndai, cidahken Jahwe kekelengenNa si setia man kalak si  rembak ras Ia ngenca, eme man umatNa. Si e jelas kel teridah arah kai si ikataken Raja Daud ras Nabi Daniel. Misalna, bagenda nina Daud, “Lalap min cidahkenNdu kekelengenNdu si setia man kalak si nandai Kam.” “Kekelengen Jahwe si setia lit rasa lalap man kalak si mbiar man baNa.” Bagenda ka nina Daniel, ‘O Jahwe Dibata si benar, si ncidahken kekelengen si setia man kalak si engkelengi Ia ras si patuh man perentah-perentahNa.’ (Ms. 36:10; 103:17; Dan. 9:4) Jelas me cidahken Jahwe kekelengenNa man umatNa, perban itandai kalak e Ia, mbiar kalak e man baNa, keleng atena Ia, janah patuh kalak e man perentahNa. Payo, man kalak si nembah Jahwe alu cara si benar ngenca cidahken Jahwe kekelengenNa si setia.

⁹ Ope lenga sisembah Jahwe, enggo sigejapken kekelengenNa si cidahkenNa man kerina jelma. (Ms. 104:14) Tapi gundari, perban enggo sisembah Jahwe, sigejapken ka kekelengenNa si setia. Ipetetap Jahwe ukur pelayan-pelayanNa, nina, “KekelengenKu si setia labo pagi pindah arah kam nari.” (Jes. 54:10) Payo, bagi si igejapken Daud, “Istimewa pagi ban Jahwe umatNa si setia.” (Ms. 4:3) Perban enggo siteh maka keleng kel ate Jahwe kita, kai si arus silakoken? Bagenda nina salah sada penulis buku Masmur si itegu-tegu kesah si badia, “Ise pe si pentar pasti perdiatekenna kerna si e, janah ukurina alu mbages kekelengen si setia arah Jahwe.” (Ms. 107:43) Emaka, mari sibahas telu cara Jahwe ncidahken kekelengenNa si setia ras kai gunana man banta.

10. Kai gunana man banta kekelengen Jahwe si tetap lit rasa lalap? (Masmur 31:7)

¹⁰ Kekelengen Dibata si setia tetap lit rasa lalap. Kata-kata enda lit 26 kali itulis bas Masmur 136. Bas ayat si pertama, nina, “Katakenlah bujur man Jahwe sebap mehuli kap Ia, kekelengenNa si setia tetap lit rasa lalap.” (Ms. 136:1) Bas ayat 2 seh ngasa ayat 26, rusur iulih-ulihi kata-kata “sebap kekelengenNa si setia tetap lit rasa lalap.” Adi sibaca kerina  Masmur 136 e, pasti luar biasa siakap ngidah uga cara Jahwe mbuktiken kekelengenNa si setia si la erngadi-ngadi. Kata-kata “sebap kekelengenNa si setia tetap lit rasa lalap” erban kita tek maka la pernah berubah kekelengen Dibata man umatNa. Enda pasti erban tetap ukurta perban siteh maka labo itadingken Jahwe umatNa. Lalap ikelengiNa ras itegu-teguNa kalak si ngelayani Ia, terlebih ka sanga susah keadan kalak e. Gunana man banta: Perban siteh labo kita itadingken Jahwe, enda erban kita tetap paguh ras ermeriah ukur. Emaka amin pe melala masalah si terjadi, banci tetap siadapi ras tetap silayani Jahwe.​—Baca Masmur 31:7.

11. Bagi si ikataken bas Masmur 86:5, kai si erban Jahwe nggit ngampuni?

¹¹ Kekelengen Dibata si setia erban Ia nggit ngampuni. Sanga idah Jahwe kalak si ersalah ertobat ras lanai ilakokenna kesalahenna e, kekelengen si setia erban Ia nggit ngampuni. Bagenda nina Daud kerna Jahwe, “La hukumNa kita menurut dosa-dosata, la balasNa kita menurut kesalahenta.” (Ms. 103:8-11) Pernah gejapken Daud maka latih kel ukurna sanga isalahken pusuh peratenna ia. Tapi, gejapken Daud ka maka Jahwe e Dibata si “nggit ngampuni.” Kai si erban Jahwe nggit ngampuni? Jawapenna lit bas Masmur 86:5. (Baca.) Jelas me, bali bagi kata-kata Daud bas totona, Jahwe nggit ngampuni perban dem kekelengenNa si setia nandangi kerina kalak si erlebuh man baNa.

12-13. Adi lalap salah siakap banta perban kesalahenta si mbarenda, kai si banci nampati kita?

¹² Wajar nge adi salah siakap banta sanga siban kesalahen. Perasan si bage situhuna mejile nge, perban e banci erban kita tuhu-tuhu ertobat ras lanai ngelakoken kesalahen e. Tapi, lit piga-piga umat Dibata si lalap kapna salah bana perban kesalahenna si mbarenda. Amin pe enggo tuhu-tuhu kalak e ertobat, lalap denga kapna ia lenga iampuni Jahwe. Adi bage gundari perasanndu, kai si banci nampati kam? Ukurilah kekelengen Jahwe si setia si lalap ateNa cidahkenNa man umatNa.

 ¹³ Gunana man banta: Amin pe la kita sempurna, banci meriah siakap ngelayani Jahwe alu pusuh peraten si bersih. Engkai? Perban “banci kita ibersihken arah kerina dosa nari alu dareh AnakNa, Jesus.” (1 Joh. 1:7) Adi kitik ukurndu perban kesalahenndu, ingetlah maka merhat kel Jahwe ngampuni kam adi enggo kam ertobat. Cuba siperdiateken kai nina Daud kerna kekelengen Jahwe si setia ras uga Jahwe ngampuni kita. Itulisna bagenda, “Bagi langit ganjangen asangken doni, bage me belinna kekelengenNa si setia man kalak si mbiar man baNa. Bagi dauhna matawari terbit ku matawari terbenam, bage me dauhna pelanggarenta ipedauhNa arah kita nari.” (Ms. 103:11, 12) Jelas me, nggit Jahwe ‘tuhu-tuhu ngampuni kita.’​—Jes. 55:7.

14. Ras kai nge iumpamaken Daud kekelengen Dibata si setia si ngelindungi kita? Jelasken.

¹⁴ Kekelengen Dibata si setia ngelindungi kita secara rohani. Bagenda nina Daud bas totona man Jahwe, “Kam kap inganku cebuni, lindungiNdu pagi aku arah kesusahen nari. Perban selamatkenNdu aku, sora surak-surak ermeriah ukur lit i sekelilingku. . . . Kalak si tek man Jahwe pasti pagi ikelilingi kekelengenNa si setia.” (Ms. 32:7, 10) Bas jaman si mbarenda, penduduk sada kota ilindungi tembok si lit i sekeliling kota e. Bali bagi tembok e, kekelengen Jahwe si setia lit i sekelilingta janah lindungina kita arah kerina bahaya si banci ncedai pertemanenta ras Ia. Kekelengen Jahwe si setia pe erban Ia nggit narik kita gelah rembak ras Ia.​—Jer. 31:3.

15. Engkai maka kekelengen si setia banci ipeseri ras ingan erlindung bage pe benteng?

¹⁵ Iban Daud perumpaman si deban guna ncidahken uga Dibata ngelindungi umatNa. Itulisna bagenda, “Kam kap inganku erlindung si aman, janah Kam kap Dibata si mbuktiken kekelengen si setia man bangku.” Bagenda ka nina Daud kerna Jahwe, “CidahkenNa kekelengenNa si setia man bangku janah Ia kap bentengku, Ia kap inganku erlindung si aman ras si nelamatken aku, perisaiku bage pe inganku cicio.” (Ms. 59:17; 144:2) Engkai maka ipeseri Daud kekelengen Jahwe si setia ras ingan erlindung bage pe benteng? La soal i japa pe kita tading, adi sisembah denga Jahwe, pasti lindungiNa kita gelah tetap kita rembak ras Ia. Banci ka kita tek kerna si e arah piga-piga ayat si lit bas Masmur 91. Bagenda nina penulis masmur e, “Kukataken pagi man Jahwe, ‘Kam kap inganku erlindung ras bentengku.’”(Ms. 91:1-3, 9, 14) Musa pe ipakena ka kata-kata si seri sanga iumpamakenna kerna perlindungen arah Jahwe. (Ms. 90:1, ctt.) Selain si e, sanga nandangi mate Musa, ipakena ka sekali nari kata-kata e. Itulisna bagenda, “Mulai mbarenda nari Dibata kap ingan erlindung, rasa lalap pagi tanNa natang kam.” (Ul. 33:27) Kai si banci sipelajari kerna Jahwe arah kata-kata “rasa lalap pagi tanNa natang kam”?

16. Uga cara Jahwe nampati kita? (Masmur 136:23)

¹⁶ Adi tek kita maka Jahwe lalap ngelindungi kita, pasti aman siakap. Tapi, mon-mon banci saja kitik ukurta janah mesera siakap ngatasisa. Sanga bage situasita, kai nge si ilakoken Jahwe man banta? (Baca Masmur 136:23.) Alu manjar-anjar, itatangNa kita janah isampatiNa kita gelah lanai kitik ukurta. (Ms. 28:9; 94:18) Gunana man banta: Perban tek  kita Dibata banci lalap siandalken, lit dua gunana man banta. Si pertama, la soal i japa pe kita tading, tek kita maka lalap lit inganta erlindung si aman. Si peduaken, banci sigejapken maka Bapakta si i surga ermediate kel man banta.

17. Kai si erban kita tek maka lalap nge cidahken Dibata kekelengenNa si setia? (Masmur 33:18-22)

¹⁷ Bali bagi si enggo sibahas, sanga siadapi kesusahen banci kita tek maka lalap isampati Jahwe kita gelah tetap setia man baNa. (2 Kor. 4:7-9) Bagenda nina Nabi Jeremia, “Perban kekelengen Jahwe si setia, la kita kernep. Perkuah ateNa la pernah keri.” (Pern. 3:22) Banci kita tek maka lalap cidahken Jahwe kekelengenNa si setia man banta, perban ikataken bas Pustaka maka “mata Jahwe terus mperdiateken kalak si mbiar man baNa, si ngarapken kekelengenNa si setia.”​—Baca Masmur 33:18-22.

18-19. (a) Kai nge si perlu siinget? (b) Kai kari sibahas bas artikel seterusna?

¹⁸ Kai nge si perlu siinget? Sope sisembah Jahwe, enggo sigejapken kekelengenNa si icidahkenNa man kerina jelma. Tapi gundari, kenca sisembah Ia, sigejapken ka kekelengenNa si setia. Kekelengen Jahwe si setia me si erban Ia nggit ngelindungi kita. PastikenNa gelah tetap kita rembak ras Ia janah tepatiNa pagi janjiNa man banta. AteNa gelah erteman kita ras Ia seh rasa lalap! (Ms. 46:1, 2, 7) Emaka, la soal kai pe masalah si sangana siadapi, pasti bereken Jahwe gegeh man banta gelah banci kita tetap setia.

¹⁹ Enggo sibahas erbage-bage cara si ilakoken Jahwe guna ncidahken kekelengenNa si setia man umatNa. Ate Jahwe gelah sicidahken ka kekelengen si setia man sada ras si debanna. Uga carata ngelakokenca? Bas artikel seterusna, sibahas kari kerna topik si penting e.