1-2. (a) Engkai maka kalak si mbaru erjabu arus tek man Jahwe? (Masmur 37:3, 4) (b) Kai kari sibahas bas artikel enda?

NANDANGI erjabu nge kam ntah mbaru denga kam erjabu? Adi ue, pasti lanai kam sabar ndalani geluhndu ras si atendu ngena. Memang, mon-mon lit nge masalah bas perjabun janah arus ban kena erbage-bage keputusen si penting. Cara kena ndungi masalah ras erban keputusen mpengaruhi keriahen ukur kena bas wari si pepagi. Adi tek kena man Jahwe, pasti banci ban kena keputusen si mehuli. Perjabun kena pe reh paguhna janah reh riahna ukur kena. Tapi adi la dalanken kena nasehat-nasehat si bereken Jahwe, banci turah masalah bas perjabun kena janah dungna la kena ermeriah ukur.​—Baca Masmur 37:3, 4.

² Amin pe artikel enda khusus iban man kalak si mbaru erjabu, tapi tentangen-tentangen si nandangi sibahas banci saja iadapi kerina perbulangen ras ndehara. Bas artikel enda, sibahas ka kari usihen piga-piga dilaki ras diberu si setia si iceritaken bas Pustaka. Arah usihen kalak e, banci sidat piga-piga pelajaren si banci sidalanken bas geluhta, termasuk bas perjabun. Sibahas ka kari piga-piga usihen arah turang senina bas jaman gundari.

3-4. Tentangen kai saja si banci saja iadapi kalak si mbaru erjabu?

³ Kalak si mbaru erjabu banci saja iarapken gelah perjabunna bagi jelma si enterem. Contohna, banci saja iarapken orang tua ras kade-kadena gelah mis lit anak kalak e.  Banci ka isuruh teman-temanna ras keluargana gelah ban kalak e rumahna ras tukurna barang-barang si erban entabeh pergeluh kalak e. Situhuna tujun kalak e mehuli nge.

⁴ Adi perbulangen ras ndehara la hati-hati sanga erban keputusen, banci dungna melala utang kalak e. Adi e si terjadi, perbulangen ras ndehara arus lalap erdahin gelah banci galarina utangna e. Dungna, perban dekahen kalak e erdahin, banci saja lanai lit waktuna pelajaren pribadi, ibadah keluarga, ras erberita. Mon-mon, arus kalak e lembur gelah reh buena dat kalak e sen ras gelah tetap lit dahinna, dungna e erban kalak e lanai banci ikut pulung. Akibatna, melala kesempaten si mehuli bas ngelayani Jahwe si sia-siaken kalak e.

5. Kai si banci pelajarindu arah pengalamen Klaus ras Marisa?

⁵ Melala pengalamen si mbuktiken maka ngayaki erta labo erban meriah ukur. Cuba ukuri pengalamen Klaus ras diberuna Marisa. * Sanga kalak e mbaru erjabu, duana kalak e erdahin gelah entabeh pergeluhna. Tapi, labo kalak e tuhu-tuhu ermeriah ukur. Nina Klaus, “Memang melala sen kami janah entabeh pergeluh kami, tapi la lit cita-cita rohani kami. Situhuna, latih kel kap kami janah stres kami.” Banci saja kam pe bage si gejapkenndu adi lalap ayakindu erta janah la kam banci puas. Amin pe bage, ula kitik ukurndu. Adi erlajar kam arah usihen kalak si deban, e banci nampati kam erban perubahen. Si pertama, mari sibahas kai si banci ipelajari perbulangen arah usihen Raja Josapat.

6. Bagi nasehat si lit bas Kuan-kuanen 3:5, 6, kai si ilakoken Raja Josapat sanga mberat kel masalahna?

⁶ Kam perbulangen, mon-mon mberatsa nge kapndu tanggung jawapndu? Adi ue, usihen Raja Josapat banci erguna man bandu. Josapat e sekalak raja janah mbelin kel tanggung jawapna nandangi kerina rakyatna. Kai si ilakokenna guna ndalanken tanggung jawapna si mbelin e? Usahaken Josapat kel asa ngasupna guna ngelindungi rakyatna. Ipepaguhna kota-kota i Juda janah bentukna pasuken si mbelin si jumlahna lebih 1.160.000 prajurit. (2 Kro. 17:12-19) Bas pudi wari iadapi Josapat masalah si mberat. Enterem kel pasuken kalak Ammon, kalak Moap, ras kalak arah pegunungen Seir reh nyerang ia, nyerang keluargana, ras rakyatna. (2 Kro. 20:1, 2) Kai si ilakoken Josapat? Pindona penampat ras gegeh arah Jahwe. Si lakokenna e sesuai ras nasehat si lit bas Kuan-kuanen 3:5, 6. (Baca.) Toto Josapat si meteruk ukur, itulis bas 2 Kronika 20:5-12. Arah totona e, banci siidah  maka tek kel Josapat man Jahwe. Uga cara Jahwe njawap totona?

7. Uga cara Jahwe njawap toto Josapat?

⁷ Ngerana Jahwe man Josapat arah kalak Lewi si gelarna Jahasiel. Nina Jahwe, “Buatlah ingan kena, tetaplah tedis, janah nenlah uga Jahwe nelamatken kena.” (2 Kro. 20:13-17) Cara enda la biasa bas erperang, tapi perentah e rehna arah Jahwe nari, labo arah jelma. Tek kel Josapat man Dibatana, janah lakokenna pas kel bagi si perentahken Jahwe. Sanga lawes ia ras rakyatna njumpai pasuken musuh, si itama Josapat bas barisen si arah lebe eme penyanyi-penyanyi si la beluh erperang, labo prajurit-prajurit si erpengalamen. Tepati Jahwe janjiNa man Josapat janah taluken Jahwe pasuken musuh e.​—2 Kro. 20:18-23.

8. Kai si banci ipelajari perbulangen arah usihen Josapat?

⁸ Kam perbulangen, banci kam erlajar arah usihen Josapat. Kam me si ertanggung jawap ngurus kerina keperlun keluargandu. Perban si e, kerja keras kam ngelindungi ras cari makan man keluargandu. Tapi sanga adapindu masalah, banci saja la kapndu kam ngasup ndungisa sisada. Emaka ula andalken gegehndu saja, tapi pindolah penampat Jahwe. Arus ka terus kam ertoto ras ndeharandu. Daramilah pentunjuk Jahwe arah Pustaka ras publikasi si isediaken organisasi Dibata. Kenca si e, dalankenlah nasehat si idatndu. Banci saja, la kalak setuju nandangi keputusen si ibanndu si erpalasken Pustaka janah anggapna kam kalak motu. Akap kalak e sen ras erta ngenca si banci ngelindungi keluargandu. Tapi, ingetlah usihen Josapat. Tek ia man Jahwe janah buktikenna arah perbahanenna. Labo tadingken Jahwe raja si setia e, janah kam pe labo pagi tadingken Jahwe. (Ms. 37:28; Heb. 13:5) Kai deba nari si banci ilakoken perbulangen ras ndehara gelah banci kalak e tuhu-tuhu ermeriah ukur?

9. Kai nge kesimpulenta kerna Nabi Jesaya ras diberuna?

⁹ Si pentingna akap Jesaya ras diberuna eme ngelayani Jahwe. Jesaya sekalak nabi, janah diberuna pe banci saja lit tugasna guna mpeseh berita perban ia igelari “sekalak nabiah.” (Jes. 8:1-4) Tutus kel ate Jesaya ras diberuna ngelayani Jahwe, janah e si pentingna akap kalak e. Duana kalak e jadi usihen si mejile man perbulangen ras ndehara!

10. Adi ipelajari perbulangen ras ndehara nubuat Pustaka, engkai maka banci reh belinna usaha kalak e mereken si mehulina man Jahwe?

¹⁰ Perbulangen ras ndehara banci ngusih Jesaya ras diberuna guna mereken si mehulina bas pelayanen. Banci reh paguhna kiniteken kalak e man Jahwe alu mpelajari nubuat-nubuat Pustaka ras uga nubuat e terjadi. * (Tit. 1:2) Banci ka ukuri kalak e kai si banci ilakokenna guna erban nubuat bas Pustaka terjadi. Contohna, banci kalak e ikut ndukung nubuat Jesus terjadi alu mberitaken berita si meriah i belang-belang doni sope reh kedungen e. (Mat. 24:14) Adi perbulangen ras ndehara reh tekna maka nubuat Pustaka pasti terjadi, reh belinna me usaha kalak e mereken si mehulina man Jahwe.

11. Kai saja si banci ilakoken Persila ras Akuila, janah engkai?

¹¹ Kalak si mbaru erjabu banci erlajar arah usihen sekalak diberu si gelarna Persila ras dilakina Akuila. Duana kalak e eme kalak Jahudi si tading bas Roma. Kalak e jadi kalak Kristen kenca begina berita si meriah kerna Jesus. Pasti sikap pergeluh kalak e bas Roma. Tapi kenca iperentahken Kaisar Klaudius gelah kerina kalak Jahudi nadingken Roma, berubah kel situasi kalak e. Cuba ukuri pengaruhna man Akuila ras Persila. Arus tadingken kalak e daerah si enggo tandaina. Bas pudi wari, arus daramina rumah si mbaru janah imulaina bisnisna erban kemah bas ingan si mbaru e. Perban melala kel perubahen bas geluh kalak e, banci denga nge berekenna si mehulina man Jahwe? Banci saja enggo tehndu jawapenna. Kenca pindah kalak e ku Korinti, Akuila ras Persila nampati runggun si lit i je, janah kerja sama kalak e ras Paulus guna mpegegehi turang senina si lit i je. Pindah kalak e ku kota-kota si merluken terbuen perberita. (Perb. 18:18-21; Rom. 16:3-5) Duana kalak e pasti ermeriah ukur janah datna pasu-pasu!

12. Engkai maka perbulangen ras ndehara perlu erban cita-cita rohani?

¹² Gundari pe perbulangen ras ndehara banci ngusih Persila ras Akuila adi pelebe kalak e Kerajan Dibata. Perlu cakapken kena kerna cita-cita rohani kena. Si mehulina guna ncakapken si e eme sanga kena ngerondong denga. Adi enggo ban kena cita-cita rohani janah usahaken kena guna ndatkenca, banci melala kesempaten kena guna nggejapken penampat arah Jahwe nari. (Peng. 4:9, 12) Perdiateken pengalamen Russell ras Elizabeth. Nina Russell, “Sanga ngerondong denga kami, cakapken kami kerna cita-cita rohani kami.” Nina Elizabeth, “Tujun kami ncakapken si e gelah kenca erjabu kari kami, la ban kami keputusen si erban mesera kap kami ndatken cita-cita e.” Dungna, Russell ras Elizabeth banci pindah ku Mikronesia guna  ngelayani bas daerah si merluken terbuen perberita.

13. Bagi si ikataken bas Masmur 28:7, kai hasilna adi tek kita man Jahwe?

¹³ Bali bagi Russell ras Elizabeth, enterem kalak si enggo erjabu usahakenna gelah banci reh buena waktuna bas pelayanen. Adi perbulangen ras ndehara erban cita-cita rohani janah usahaken kalak e guna ndatkenca, banci melala gunana man kalak e. Banci gejapken kalak e penampat Jahwe, kiniteken kalak e pe reh paguhna, janah tuhu-tuhu kalak e ermeriah ukur.​—Baca Masmur 28:7.

14. Kai buktina Rasul Petrus ras diberuna tek man janji si lit bas Matius 6:25, 31-34?

¹⁴ Perbulangen ras ndehara banci ka ngusih Rasul Petrus ras diberuna. Kira-kira enem bulan seh ngasa setahun kenca tangtangna jumpa Petrus ras Jesus, arus ban Petrus keputusen si penting. Guna ncukupi keperlun keluargana erdahin Petrus jadi sekalak nelayan. Emaka sanga suruh Jesus gelah tadingken Petrus pendahinna ras ikutkenna ia, arus ukuri Petrus keadan keluargana. (Luk. 5:1-11) Dungna, nggit Petrus nemani Jesus bas pelayanenna. E keputusen si mehuli! Tek kita maka diberu Petrus pasti ndukung keputusenna e. Ikataken bas Pustaka maka kenca Jesus ipekeke, diberu Petrus ikut nemani Petrus bas pelayanen piga-piga waktu dekahna. (1 Kor. 9:5) Perban diberuna kalak Kristen si mehuli, banci inasehati Petrus perbulangen-perbulangen ras ndehara-ndehara Kristen. (1 Pet. 3:1-7) Jelas me, Petrus ras diberuna tek man janji Jahwe maka bereken Jahwe nge keperlun kalak e adi ipelebena Kerajan Dibata.​—Baca Matius 6:25, 31-34.

15. Kai si banci pelajarindu arah pengalamen Tiago ras Esther?

¹⁵ Adi enggo ertahun-tahun dekahna kam erjabu, kai si banci lakokenndu gelah lit sura-surandu mereken terbuen bas pelayanen? Salah sada carana eme erlajar arah pengalamen kalak si deban. Contohna, banci bacandu seri artikel “Mereka Merelakan Diri.” * Kenca mbaca artikel-artikel e, Tiago ras diberuna Esther arah Brasil nari, nggejapken maka tersuruh ukur kalak e ngelayani bas daerah si merluken terbuen perberita. Nina Tiago, “Kenca baca kami uga Jahwe nampati umatNa bas jaman gundari, kami pe merhat nggejapken penampat Jahwe e.” Dungna, pindah kalak e ku Paraguay. I je ngelayani kalak e bas daerah bahasa Portugis mulai tahun 2014. Nina Esther, “Salah sada ayat si kena kel ku pusuh kami eme Epesus 3:20. Sedekah kami ngelayani Jahwe rusur gejapken kami maka payo kel kata-kata e.” Bas surat Paulus ku runggun Epesus, erjanji Paulus maka pasti bereken Jahwe ndauh buen asangken pemindonta.” Payo kel, itepati Jahwe lalap janjiNa e!

16. Man ise perbulangen ras ndehara si nguda denga mindo nasehat sanga ukurken kalak e kerna cita-cita rohani?

¹⁶ Perbulangen ras ndehara si nguda denga banci erlajar arah kalak si deban si enggo lalap tek man Jahwe. Piga-piga perbulangen ras ndehara banci saja  enggo puluhen tahun ngelayani sepenuh waktu. Adi sangana ukurken kena kerna cita-cita rohani kena, pindolah nasehat arah kalak e. Enda me cara si deban guna mbuktiken maka tek kena man Jahwe. (Kua. 22:17, 19) Pertua-pertua pe banci nampati perbulangen ras ndehara si nguda denga bas erban cita-cita rohani ras ndatkenca.

17. Kai si adapi Klaus ras Marisa, janah kai si banci sipelajari arah pengalamen kalak e?

¹⁷ Banci saja enggo lit rencanata guna mereken terbuen bas pelayanen. Tapi mon-mon rencanata e la bagi sura-surata. Contohna Klaus ras Marisa, si enggo iceritaken ndai. Kenca telu tahun kalak e erjabu, pindah kalak e jadi sukarelawan bas proyek pembangunen kantor cabang i Finlandia. Kepeken enem bulan ngenca kalak e banci tading i je. Tangtangna kecewa kalak e, tapi la ndekah kenca si e iundang kalak e ngikuti kursus bahasa Arab. Gundari, meriah akap kalak e ngelayani bas daerah bahasa Arab bas negri si deban. Nina Marisa, “Sanga si e mbiar aku ncubaken kai si mbaru janah arus aku tek kel man Jahwe. Tapi kugejapken maka lalap sampati Jahwe kami alu cara-cara si la isangka kami. Kenca dalani kami kerina e, reh paguhna kinitekenku man Jahwe.” Bali bagi pengalamen e ndai, kam pe banci tek maka ipasu-pasu Jahwe nge kam adi tuhu-tuhu kam tek man baNa.

18. Uga perbulangen ras ndehara mbuktiken maka tek kel kalak e man Jahwe?

¹⁸ Perjabun eme hadiah si meherga arah Jahwe. (Mat. 19:5, 6) Ate Jahwe gelah perbulangen ras ndehara ermeriah ukur perban hadiah e. (Kua. 5:18) Kam perbulangen ras ndehara si nguda denga, ukurilah kai si sangana ayaki kena bas perjabun kena. Usahaken kena nge asa ngasup kena guna mbuktiken maka ergai kena hadiah si bereken Jahwe e? Ertotolah man Jahwe. Daramilah prinsip-prinsip Pustaka si banci nampati kena. Kenca si e, dalankenlah nasehat si enggo bereken Jahwe e. Adi ngelayani Jahwe ban kena si pentingna bas perjabun kena, pasti tuhu-tuhu meriah ukur kena janah dat kena pasu-pasu!