Itehndu nge?
Kai nge si terjadi man kota Niniwe kenca jaman Juna?
ASSUR enggo jadi kerajan si galangna i doni bas abad pepituken SM. Sada artikel bas blog arah The British Museum ngataken, “Daerah kekuasan Assur eme mulai arah Kiprus si lit i bagin barat seh ku Iran si lit i bagin timur, janah pernah ka seh ku daerah Mesir.” Ibu kota Assur eme Niniwe. Paksa si e, kota e me si galangna i doni. Bas kota e, melala monumen si galang ras mejile, taman si mejile, istana si galang, ras perpustakan si lengkap. Bali bagi raja-raja Assur si debanna, Raja Asyurbanipal pe ikatakenna maka ia “raja doni.” Si e banci siteh arah tulisen-tulisen i dingding, si idat arah reruntuhen Niniwe. Paksa si e, Assur ras Niniwe tempa-tempa la banci italuken.
Paksa si e Assur me Kuasa Doni si mbelinna kerajanna
Amin pe bage, sanga erkuasa kel Assur, ernubuat nabi Jahwe si gelarna Sepanya, nina, ‘Hancurken Jahwe pagi Assur, banNa pagi Niniwe la terurus, kerah bagi gurun pasir.’ Selain si e, Nabi Nahum pe ernubuat, nina, “Rampaslah pirak, rampaslah emas! . . . Kota e kosong, la terurus, janah hancur! . . . Kerina kalak si ngidah kam kiam pagi nadingken kam, nina, ‘Niniwe enggo ihancurken!’” (Sep. 2:13; Nah. 2:9, 10; 3:7) Paksa si e, banci saja la akap kalak masuk akal sanga begina nubuat e. Banci saja bagenda nina bas ukurna, ‘La kuakap mungkin Assur si bagenda megegehna banci italuken.’
Niniwe tuhu-tuhu jadi kota si la terurus
Tapi kepeken, nubuat kerna Assur tuhu-tuhu terjadi. Bas pendungi abad pepituken SM, italuken kalak Babilon ras Media me Assur. Itadingken pendudukna me kota Niniwe janah dungna lanai inget kalak. Menurut sada karya tulis si iterbitken The Metropolitan Museum of Art i New York, “Bas Abad Pertengahen (antara tahun 500 seh 1500 M), kota e enggo lanai teridah janah arah Pustaka ngenca banci teh kalak kerna Niniwe.” Menurut Biblical Archaeology Society, bas awal tahun 1800-en “la lit ise pe si banci mastiken maka ibu kota Assur si galang e memang pernah lit.” Tapi bas pudi wari, bas tahun 1845, sekalak arkeolog si gelarna Austen Henry Layard mulai igalina reruntuhen kota Niniwe. Si idatna arah reruntuhen e mbuktiken maka mbarenda kota Niniwe memang luar biasa.
Jelas me, kerina nubuat kerna kota Niniwe tuhu-tuhu terjadi. Enda erban kita reh tekna maka nubuat Pustaka kerna kedungen kuasa politik bas jamanta pe pasti pagi terjadi.—Dan. 2:44; Ket. 19:15, 19-21.
