1-2. Engkai maka perlu sicidahken kekelengen si setia man sada ras si debanna?

ENGKAI maka perlu sicidahken kekelengen si setia man sada ras si debanna? Lit piga-piga alasen si penting, perdiateken kai nina Pustaka enda, “Ula pediat kekelengen si setia bage pe kesetian nadingken kam. . . . Alu bage jadi ate Dibata ras manusia man bandu, sebap tandai kalak kam kalak si erpengangka.” “Dilaki si mehuli mereken keuntungen man dirina.” “Ise pe si erusaha ndatken kebenaren ras kekelengen si setia, datna pagi kegeluhen.”​—Kua. 3:3, 4; 11:17; 21:21.

² Bas ayat-ayat e ndai, lit telu alasenna engkai maka perlu sicidahken kekelengen si setia. Si pertama, banci siban meriah ukur Jahwe. Si peduaken, lit gunana man banta. Contohna, banci lit teman-temanta si mehuli. Si peteluken, banci sidat pasu-pasu bas wari si pepagi, termasuk kegeluhen si rasa lalap. Jelas me, arah kerina alasen ndai perlu siikutken nasehat Jahwe enda: “Cidahken kekelengen si setia ras perkuah ate man kalak si deban.”​—Sak. 7:9.

3. Penungkunen kai saja kari sibahas bas artikel enda?

³ Bas artikel enda, sibahas kari empat penungkunen. Man ise arus sicidahken kekelengen si setia? Kai si banci sipelajari arah buku Rut kerna uga carana ncidahken kekelengen si setia? Uga carata ncidahken kekelengen si setia gundari? Kai gunana man banta adi sicidahken kekelengen si setia?

4. Uga carata ngusih kekelengen Jahwe si setia? (Markus 10:29, 30)

⁴ Bali bagi si enggo sibahas bas artikel pertama, cidahken Jahwe kekelengenNa si setia man kalak si nggit engkelengi Ia ras ngelayani Ia. (Dan. 9:4) Kita pe ‘siusih ateta Dibata selaku anak-anak si ikelengi.’ (Ep. 5:1) Emaka, pasti merhat kel kita ncidahken kekelengen si setia man turang senina si lit bas runggun.​—Baca Markus 10:29, 30.

5-6. Kai ertina “kesetian” si iangkai jelma si enterem?

⁵ Adi reh bagesna siangkai erti kekelengen si setia, reh ulina me carata ncidahken kekelengen si setia e man turang senina. Gelah reh bagesna siangkai erti kekelengen si setia, mari sibahas kai bedana kekelengen si setia ras kesetian si iangkai jelma si enterem. Mari siperdiateken contoh enda.

 ⁶ Adi lit sekalak jelma si erdahin bas sada perusahan ertahun-tahun dekahna, banci sikataken ia karyawan si setia. Tapi sanga erdahin ia bas perusahan e, banci saja labo pernah ia jumpa ras si mpuna perusahan e. Mon-mon, labo ka ia setuju nandangi peraturen si iban perusahan e. Labo kapna meriah erdahin bas perusahan e, tapi nggit ia erdahin i je perban alokenna gaji tiap bulan. Lalap ia erdahin bas perusahan e seh ngasa ia pensiun, ntah pe seh ngasa lit datna dahin si deban si terjilen.

7-8. (a) Kai alasen sekalak jelma ncidahken kekelengen si setia? (b) Engkai maka sibahas kari piga-piga ayat bas buku Rut?

⁷ Selain si ibahas bas  paragrap 6 ndai, lit denga si mbedaken kekelengen si setia ras kesetian, eme alasen sekalak jelma ncidahken duana sipat e. Engkai maka umat Dibata mbarenda nggit ncidahken kekelengen si setia man sada ras si debanna? Nggit kalak e ncidahken kekelengen si setia labo perban enggo bage arusna tapi perban tersuruh ukurna ngelakokenca. Contohna Daud. Tersuruh ukur Daud ncidahken kekelengen si setia man temanna Jonatan, amin pe bunuh bapak Jonatan atena ia. Piga-piga tahun kenca mate Jonatan, tetap denga cidahken Daud kekelengen si setia man anak Jonatan, eme Mepiboset.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Arah piga-piga ayat bas buku Rut banci melala sipelajari kerna kekelengen si setia. Kai si banci sipelajari kerna kekelengen si setia arah kalak si iceritaken bas buku Rut e? Uga carata ndalanken kai si enggo sipelajari e bas runggunta? *

9. Engkai maka ikataken Naomi ihukum Jahwe ia?

⁹ Bas buku Rut, banci sibaca cerita kerna Naomi, permenna Rut, ras dilaki si mbiar man Dibata eme Boas. Boas e sikade-kaden denga ras dilaki Naomi. Perban terjadi kelihen bas Israel, pindah Naomi ras dilakina bage pe anakna ku Moap. I je mate dilaki Naomi. Erjabu anak-anakna ras diberu-diberu Moap, tapi dungna duana anakna e pe mate. (Rut 1:3-5; 2:1) Enda kerina erban getem kel pusuh Naomi ras kitik kel ukurna. Sempat akapna sangana ia ihukum Jahwe. Bagenda nina Naomi nuriken isi pusuhna kerna Dibata, “Enggo hukum Jahwe  kap aku.” “Enggo pagit kel geluhku ban Dibata Si Madakuasa.” Nina ka, “Enggo hukum Jahwe aku, enggo mesera kel geluhku ban Dibata Si Madakuasa.”​—Rut 1:13, 20, 21.

10. Uga tanggapen Jahwe sanga begiNa kata-kata Naomi?

¹⁰ Uga tanggapen Jahwe sanga begiNa kata-kata Naomi e? Labo itadingkenNa pelayanNa si sangana getem pusuhna e. Tapi cidahken Jahwe maka angkaiNa perasan Naomi, perban teh Jahwe “kalak pentar banci adon perban itindas.” (Peng. 7:7) Amin pe bage, Naomi perlu isampati gelah tehna maka labo pernah tadingken Jahwe ia. Uga cara Jahwe nampati Naomi? (1 Sam. 2:8) Ban Jahwe gelah tersuruh ukur Rut ncidahken kekelengen si setia man Naomi. Isampati Rut Naomi alu mehuli gelah ula nai kitik ukurna janah gelah tehna maka keleng denga ate Jahwe ia. Kai si banci sipelajari arah Rut?

11. Engkai maka turang senina nggit terus nampati kalak si sangana sedih ntah pe si kitik ukurna?

¹¹ Kekelengen si setia erban kita nggit nampati kalak si sangana susah. Bali bagi Rut si la pernah nadingken Naomi, enterem turang senina si nggit terus nampati kalak si sangana sedih ntah pe si kitik ukurna si lit bas runggun. Keleng ate kalak e turang senina e janah lalap kalak e nggit nampatisa. (Kua. 12:25; 24:10) Alu bage ikutken kalak e nasehat Paulus enda: “Apuli kalak si susah, sampati kalak si lemah, janah sabarlah man kerina kalak.”​—1 Tes. 5:14.

12. Kai nge biasana cara si mehulina guna nampati turang senina si sangana kitik ukurna?

¹² Cara si mehulina nampati turang senina si sanga kitik ukurna eme sibegiken kalak e janah sibuktiken maka keleng ateta ia. Pasti ergai Jahwe kai si enggo silakoken guna nampati biri-biriNa si meherga. (Ms. 41:1) Bagenda nina Kuan-kuanen 19:17, “Kalak si mehuli man kalak mesera mere pinjamen man Jahwe, upahiNa pagi kai si ilakokenna e.”

13. Kai bedana Rut ras Orpa, janah engkai maka keputusen si ban Rut e salah sada bukti kekelengen si setia? (Nen gambar sampul.)

¹³ Banci reh bagesna siangkai erti kekelengen si setia adi siukuri kai si inanami Naomi kenca mate dilakina ras duana anakna. Sanga teh Naomi “enggo perdiateken Jahwe mulihi umatNa alu mereken pangan,” mulih ia ku kutana. (Rut 1:6) Duana permenna pe ikut ras ia. Sanga bas perdalanen, telu kali isuruh Naomi gelah mulih duana permenna e ku Moap. Kai si lakoken Rut ras Orpa? Ikataken bas Pustaka bagenda, “Ema Orpa simetuana e jenari lawes ia. Tapi Rut tetap ras Naomi.” (Rut 1:7-14) Ilakoken  Orpa kai si pindo Naomi janah mulih ia ku Moap. Tapi Rut tetap ras Naomi. Situhuna Rut pe banci nge mulih ku kutana, tapi perban kekelengenna si setia, tetap ia ikut ras Naomi. (Rut 1:16, 17) Nggit Rut nemani Naomi labo perban arus lakokenna bage, tapi perban tersuruh ukurna ngelakoken si e. Keputusen Rut e eme salah sada bukti kekelengen si setia. Kai si banci sipelajari arah kai si ilakoken Rut e?

14. (a) Kai si ilakoken enterem turang seninata gundari? (b) Menurut Heber 13:16, korban si uga nge si erban meriah ukur Dibata?

¹⁴ Kekelengen si setia erban kita nggit ngelakoken lebihen asangken si iarapken. Bali bagi bas jaman Pustaka, gundari pe enterem turang senina si mbuktiken kekelengen si setia man sada ras si debanna, termasuk man turang senina si lenga tandaina. Contohna, sanga teh kalak e lit terjadi bencana alam, mis darami kalak e uga carana nampatisa. Sanga teh kalak e lit kalak bas runggun si susah ekonomina, mis darami kalak e cara guna nampatisa. Bali bagi kalak si lit bas Makedoni bas abad pertama, gundari pe ilakoken turang senina lebihen asangken si iarapken. Nggit kalak e erkorban ‘lebih asa ngasupna’ gelah banci nampati turang seninana. (2 Kor. 8:3) Pasti meriah ukur Jahwe ngidah kalak e perban buktikenna kekelengenna si setia!​—Baca Heber 13:16.

15-16. Kai buktina Rut la mis nyerah?

¹⁵ Melala pelajaren si mehuli si banci sidat arah Rut ras Naomi. Mari sibahas piga-piga.

¹⁶ Ula mis nyerah. Tangtangna labo nggit Naomi itemani Rut mulih ku Juda. Tapi Rut la mis nyerah. Kai hasilna? “Sanga idah Naomi lalap ate Rut ikut ras ia, lanai suruhna ia mulih.”​—Rut 1:15-18.

17. Kai si banci nampati kita gelah la mis nyerah?

¹⁷ Pelajarenna man banta: Perlu kita sabar sanga sisampati ateta kalak si sangana serbut tangkelenna. Memang ngelakoken si e la menukah, tapi ula kita mis nyerah. Sekalak diberu si merluken penampat banci saja tangtangna la ia nggit ngaloken penampatta. * Amin pe bage, kekelengen si setia erban kita lalap erusaha nampati ia. (Gal. 6:2) Ngarap kita bas sada wari pagi nggit ia siapuli ras nggit ia ngaloken penampatta.

18. Kai si erban Rut sakit hati?

¹⁸ Ula nukah tersinggung. Kenca seh Rut ras Naomi i Betlehem, jumpa Naomi ras tetangga-tetanggana mbarenda. Nina man kalak e, “Sanga aku lawes, la lit si kurang, tapi sanga aku mulih, kadeku pe lanai lit ban Jahwe.” (Rut 1:21) Cuba bayangken uga perasan Rut sanga begina kata-kata Naomi e! Enggo usahaken Rut kel nampati Naomi. Sanga ngandung Naomi, Rut pe ngandung ras ia, iapulina ia janah ras kalak e erdalan erwari-wari dekahna. Tapi bagenda nina Naomi, “Sanga aku mulih, kadeku pe lanai lit ban Jahwe.” Arah kata-kata e, tempa-tempa la iergai Naomi penampat Rut si sangana lit i deherna. Pasti sakit hati kel Rut megi ranan Naomi e. Amin pe bage, labo tadingkenna Naomi.

19. Kai si banci nampati kita gelah la ngadi bas nampati kalak si sangana susah?

 ¹⁹ Pelajarenna man banta: Gundari pe, banci saja lit turang senina si sangana susah akapna janah enggo siusahaken kel nampati ia, tapi belaskenna ranan si erban kitik ukurta. Amin pe bage, ula kita mis tersinggung. Teruslah sisampati ia janah sipindo penampat Jahwe gelah siteh uga cara si mehulina guna nampati ia.​—Kua. 17:17.

20. Kai si erban Rut terpegegehi ras la nyerah?

²⁰ Bereken pergegeh bas waktu si tepat. Enggo buktiken Rut kekelengenna si setia man Naomi, tapi Rut pe perlu ipegegehi. Emaka ban Jahwe tersuruh ukur Boas guna nampati ia. Bagenda nina Boas man Rut, “Mbera-mbera pasu-pasu Jahwe kerina si enggo lakokenndu. Mbera-mbera mbelin kel upah si datndu arah Jahwe nari, Dibata kalak Israel, si teruh kabengNa kam erlindung.” Kena kel ku pusuh Rut kata-kata Boas e. Bagenda nina Rut man Boas, “Enggo apulindu aku, tenang kel kuakap megi rananndu e, amin pe aku labo sierdahinndu.” (Rut 2:12, 13) Tepat waktu kel ranan Boas e. Rananna e erban Rut terpegegehi, emaka la ia nyerah.

21. Bagi si ikataken bas Jesaya 32:1, 2, kai si ilakoken pertua-pertua si ermediate?

²¹ Pelajarenna man banta: Kalak si ncidahken kekelengen si setia man kalak si deban, mon-mon perlu ka ipegegehi. Bage me si ilakoken Boas. Ipujina Rut sanga idahna mehuli perbahanen Rut man Naomi. Gundari pe, sanga idah pertua lit turang senina si nampati kalak si deban bas runggun, ipujina turang senina e. Pujin si bage banci mpegegehi turang senina e. Alu bage, lalap ia nggit ncidahken kekelengen si setia.​—Baca Jesaya 32:1, 2.

22-23. Kai buktina berubah perasan Naomi, janah kai alasenna? (Masmur 136:23, 26)

²² Bas sada wari, bereken Boas melala pangan man Rut ras Naomi. (Rut 2:14-18) Kai nina Naomi kenca bereken Boas melala pangan man kalak e? Nina, “Mbera-mbera ipasu-pasu Jahwe ia, Dibata si mbuktiken kekelengenNa si setia man kalak si nggeluh denga bage pe si enggo mate.” (Rut 2:20a) Berubah kel perasan Naomi! Tangtangna sanga susah akapna, ngandung ia. Nina, ‘Enggo hukum Jahwe aku.’ Tapi gundari, enggo meriah ukurna janah nina, “Jahwe . . . mbuktiken kekelengenNa si setia.” Engkai maka berubah perasan Naomi?

²³ Dungna, teh Naomi maka sedekah enda lalap ia isampati Jahwe. Ibereken Jahwe Rut nampati ia bas perdalanen ku Juda. (Rut 1:16) Gejapken Naomi ka penampat Jahwe arah Boas sanga sikapken Boas keperlun kalak e. Boas eme salah sada dilaki ‘si ertanggung jawap nampati’ kalak e. * (Rut 2:19, 20b) Banci saja bagenda nina Naomi bas ukurna, ‘Kepeken sedekah enda labo pernah itadingken Jahwe aku, lalap nge tegu-teguna aku.’ (Baca Masmur 136:23, 26.) Pasti ngata bujur kel Naomi perban Rut ras Boas la erngadi-ngadi nampati ia! Teluna kalak e pasti tuhu-tuhu ermeriah ukur ras semangat ngelayani Jahwe.

24. Engkai maka terus ateta ncidahken kekelengen si setia man turang seninata?

²⁴ Kai si banci sipelajari arah buku Rut kerna kekelengen si setia? Kekelengen si setia erban kita la mis nyerah sanga nampati turang senina si sangana susah. Kekelengen si setia pe erban kita nggit erkorban nampati kalak e. Pertua-pertua pe perlu mereken kata-kata si mpegegehi bas waktu si tepat man kalak si ncidahken kekelengen si setia. Kita pe pasti meriah kel ukurta sanga siidah turang senina si mulihi ermeriah ukur ras semangat ngelayani Jahwe. (Perb. 20:35) Tapi, alasen si pentingna engkai maka terus sicidahken kekelengen si setia eme perban siusih ateta Jahwe, janah siban ateta meriah ukur Dibata si “dem alu kekelengen si setia.”​—Kel. 34:6; Ms. 33:22.