MORDEKAI eme kalak Jahudi si rusur iceritaken bas buku Ester. Ia sekalak tabanen si erdahin bas istana Persia bas abad awal pelimaken SM, eme “bas jaman [Raja] Ahasweros.” (Gundari enterem kalak si tek maka Ahasweros e eme Xerxes I.) Mbarenda, igagalken Mordekai rencana kalak si atena munuh raja. Ngata bujur kel raja man bana. Emaka iaturken raja gelah ibereken penghormaten man Mordekai i lebe-lebe jelma si enterem. Bas pudi wari, kenca Haman mate (musuh Mordekai ras musuh kalak Jahudi si debanna) iangkat raja me Mordekai jadi perdana menteri. Perban ia enggo jadi perdana menteri, banci iban Mordekai peraturen si erban kerina kalak Jahudi bas Kerajan Persia la ibunuh.​—Est. 1:1; 2:5, 21-23; 8:1, 2; 9:16.

Lit piga-piga ahli sejarah bas awal abad pe-20-ken si ngataken maka buku Ester e cerita hayalen ngenca, janah Mordekai labo pernah lit. Tapi bas tahun 1941, idat arkeolog me penemuan si banci mbuktiken maka Mordekai si lit bas Pustaka si Badia e memang tuhu-tuhu pernah lit. Kai si idat kalak e?

Idat peneliti-peneliti me tulisen Persia si iban alu hurup paku. Bas tulisen e lit gelar Marduka (bas bahasa Karo, Mordekai). Dahinna bagin administrasi, banci saja jadi akuntan i Susan. Arthur Ungnad, sekalak ahli sejarah negri-negri Timur ngataken maka tulisen si idat e me “tulisen si pertama si nulisken gelar Mordekai selain Pustaka.”

Bas pudi wari, iterjemahken ahli-ahli ka ribun tulisen Persia si deban. Arah tulisen si iterjemahken e lit lempengen Persepolis, si idat arah reruntuhen bas ingan perbendaharan i deher tembok kota. Lempengen-lempengen e lit bas jaman Xerxes I, janah itulis bas bahasa kalak Elam. Bas lempengen-lempengen e lit piga-piga gelar si ikataken bas buku Ester. a

Bas piga-piga lempengen Persepolis lit itulisken gelar Marduka, eme sekertaris kerajan si erdahin bas istana i Susan sedekah pemerentahen Xerxes I. Bas salah sada arah lempengen e ikataken maka Marduka sekalak penerjemah. Si e cocok ras kai si ikataken Pustaka kerna Mordekai. Ia eme pejabat si erdahin bas istana Raja Ahasweros (Xerxes I) janah silang-langna tehna dua bahasa. Mordekai rusur kundul i gerbang istana raja i Susan. (Est. 2:19, 21; 3:3) Gerbang e bangunen si galang ingan pejabat-pejabat istana erdahin.

Mbue kel si seri antara Marduka si ituriken bas lempengen-lempengen e ras Mordekai si ituriken bas Pustaka. Duana kalak e nggeluh bas waktu ras ingan si seri, kedudukenna pe seri, ras inganna erdahin pe seri. Arah kerina e, banci siban kesimpulen maka Marduka ras Mordekai eme kalak si seri.