1. Kai buktina nggit Jahwe rembak ras kita?

 IUNDANG Jahwe kita gelah rembak ras Ia. (Jak. 4:8) Nggit Jahwe jadi Dibatata, Bapakta, ras Temanta. JawapNa totota janah sampatiNa kita sanga mesera situasita. IgunakenNa ka organisasiNa ngajari kita ras ngelindungi kita. Tapi, kai si arus silakoken gelah banci rembak ras Jahwe?

2. Uga carana gelah rembak kita ras Jahwe?

² Gelah banci kita rembak ras Jahwe, perlu kita ertoto man baNa, sibaca KataNa, ras siukuri. Alu bage, keleng ateta Ia janah sihamati Ia. Teriahken ka kita patuh man baNa ras muji Ia, perban metunggung kel Ia ngaloken si e kerina. (Ket. 4:11) Reh bagesna sitandai Jahwe, reh tekna kita man baNa bage pe man organisasiNa si ipakeNa nampati kita.

3. Uga cara Setan nirangken kita arah Jahwe, tapi kai si nampati kita gelah la sitadingken Dibata ras organisasiNa? (Masmur 31:13, 14)

³ Iusahaken Setan nirangken kita arah Jahwe, apai ka sanga lit masalahta. Uga carana? Alu manjar-anjar usahakenna gelah lanai kita tek man Jahwe bage pe man organisasiNa. Tapi banci kita la terpengaruh. Adi kinitekenta tetap paguh janah sitik pe la kita ragu, pasti la sitadingken Dibata ras organisasiNa.​—Baca Masmur 31:13, 14.

4. Kai kari sibahas bas artikel enda?

 ⁴ Bas artikel enda sibahas kari telu tentangen si ipake Setan si rehna arah kalak si la ngelayani Jahwe. Kerina tentangen e banci manjar-anjar erban kita lanai tek man Jahwe bage pe organisasiNa. Uga tentangen e nirangken kita arah Jahwe janah kai si banci silakoken gelah la kita terpengaruh?

5. Engkai maka masalahta banci erban kita manjar-anjar lanai tek man Jahwe ras organisasiNa?

⁵ Mon-mon lit masalahta. Contohna, itentang keluargata kita ntah pe lanai lit pendahinta. Engkai maka masalah e banci manjar-anjar erban kita lanai tek man Jahwe ras man organisasiNa? Adi masalahta la dung-dung, banci dungna kitik ukurta janah stres kita. Igunaken Setan me kesempaten e erban kita erpengakap maka labo keleng ate Jahwe man banta. Ate Setan, mulai min sisalahken Jahwe ras organisasiNa. E me si terjadi man piga-piga kalak Israel i Mesir. Tangtangna, tek kalak e maka enggo ipilih Jahwe Musa ras Harun guna mbebasken kalak e arah perbudaken. (Kel. 4:29-31) Tapi dungna, kenca iban Raja Mesir geluh kalak e reh susahna, isalahken kalak e Musa ras Harun. Ning kalak e, “Gara-gara kena enggo segat ate raja ras pejabat-pejabatna man kami. Enggo bere kena pedang bas tanna guna munuh kami.” (Kel. 5:19-21) Isalahken kalak e pelayan Dibata si setia! Adi enggo megenggeng kam ngadapi masalah si la dung-dung, uga carana gelah tetap kam tek man Jahwe bage pe man organisasiNa?

6. Bali bagi Nabi Habakuk, kai si banci silakoken sanga lit masalahta? (Habakuk 3:17-19)

⁶ Ertotolah kam, turiken isi pusuhndu man Jahwe janah pindolah penampatNa. Mbarenda, mbue kel masalah si iadapi Nabi Habakuk. Pernah ia ragu keleng nge ate Jahwe ia ntah lang. Tapi, turikenna perasanna man Jahwe sanga ia ertoto. Nina, “O Jahwe, asa kai nari dekahna aku arus erlebuh mindo penampat? Ndigan nge begikenNdu aku? . . . Engkai maka pediatNdu terjadi penindasen?” (Hab. 1:2, 3) Ijawap Jahwe toto Habakuk, umatNa si setia e. (Hab. 2:2, 3) Kenca ukuri Habakuk alu mbages kerna uga Jahwe nelamatken umatNa mbarenda, mulihi ka meriah ukurna. Tek ia maka iperdiateken Jahwe ia janah pasti sampati Jahwe ia megenggeng ngadapi masalah kai pe. (Baca Habakuk 3:17-19.) Kai pelajarenna? Sanga lit masalahndu ertotolah kam man Jahwe. Turikenlah perasanndu man baNa. Kenca si e, pindolah penampatNa. Pasti bereken Jahwe gegeh man bandu gelah banci kam megenggeng. Sanga gejapkenndu penampat Jahwe, reh tekna kam man baNa.

7. Kai si ikataken keluarga Shirley, tapi kai si nampati ia tetap erkiniteken man Jahwe?

⁷ Teruslah lakoken kegiaten rohani. E me si ilakoken Shirley, sekalak turang seninata arah Papua Nugini, sanga lit masalahna. b Keluargana mesera, janah mon-mon kurang pangan kalak e. Lit keluarga Shirley si usahakenna gelah lanai Shirley tek man Jahwe, nina, “Nindu lit kesah si badia si nampati kam, ja dage buktina? Keluargandu mesera  denga. Sia-sia nge kam erberita.” Bagenda nina Shirley, “Sempat kang aku rukur, ‘Tuhu kin keleng ate Dibata kami?’ Tapi, mis aku ertoto man Jahwe janah kuturiken man baNa kerina si lit bas ukurku. Tetap aku mbaca Pustaka bage pe mbaca publikasita, tetap aku erberita ras reh ku perpulungen.” Dungna, sadar Shirley maka lalap nge iperdiateken Jahwe keluargana. Labo pernah keluarga kalak e kelihen, janah tetap nge kalak e ermeriah ukur. Nina Shirley, “Banci kugejapken maka enggo ijawap Jahwe totoku.” (1 Tim. 6:6-8) Bagi Shirley, adi terus lakokenndu kegiaten rohani, la lit masalah ntah pe perasan ragu si banci nirangken kam arah Jahwe.

8. Kai si banci saja terjadi man turang seninata si lit tanggung jawapna?

⁸ Arah laporen berita ntah pe media sosial, isebarken musuh-musuhta informasi si la tuhu kerna turang senina si lit tanggung jawapna. (Ms. 31:13) Lit turang senina si itangkap janah ituduh ngelanggar hukum. Bas abad pertama, e me si terjadi man Paulus. Uga tanggapen kalak Kristen bas abad pertama?

9. Uga nge tanggapen piga-piga kalak Kristen abad pertama sanga Rasul Paulus ipenjaraken?

⁹ Lit piga-piga kalak Kristen bas abad pertama si lanai ndukung Rasul Paulus sanga ia ipenjaraken i Roma. (2 Tim. 1:8, 15) Engkai? Banci saja mela kalak e perban ianggap jelma si enterem Paulus e penjahat. (2 Tim. 2:8, 9) Selain si e, banci saja mbiar kalak e ikut ka ia ianiaya. La soal kai alasen kalak e, banci sibayangken uga perasan Paulus si enggo megenggeng ngadapi erbage-bage kesusahen, janah mate pe ia nggit guna kalak e. (Perb. 20:18-21; 2 Kor. 1:8) Pasti la kita nggit bagi kalak si lanai ndukung Paulus sanga iperlukenna penampat. Kai si perlu siinget sanga turang seninata si lit tanggung jawapna ianiaya?

10. Kai si perlu siinget sanga turang senina si lit tanggung jawapna ianiaya, janah engkai?

 ¹⁰ Ingetlah engkai maka kita ianiaya janah ise si erban kita ianiaya. Bas 2 Timotius 3:12 ikataken, “Kerina kalak si atena nggeluh sesuai ras peraten Dibata bas persadan ras Kristus Jesus isiksa ka nge pagi.” Emaka la kita sengget sanga usahaken Setan nyerang turang senina si lit tanggung jawapna. Tujun Setan eme gelah turang senina e lanai setia man Jahwe janah erban kita kerina mbiar.​—1 Pet. 5:8.

11. Kai si banci sipelajari arah usihen Onesiporus? (2 Timotius 1:16-18)

¹¹ Teruslah dukung turang seninandu si sangana ianiaya, janah ula tadingken kalak e. (Baca 2 Timotius 1:16-18.) Bas abad pertama lit kalak Kristen si la nadingken Paulus, gelarna eme Onesiporus. “La ia mela amin pe [Paulus] ipenjaraken.” Daram-daramina Paulus. Sanga enggo jumpa kalak e, usahakenna asa ngasupna nampati Paulus. Ngelakoken si e banci saja erban terancam geluhna. Kai pelajarenna? Ula perban mbiar kita man manusia, dungna lanai sidukung turang seninata si ianiaya. Siusahakenlah mbela kalak e janah sisampati kalak e asa ngasupta. (Kua. 17:17) Perlu kel kalak e sikelengi ras sidukung.

12. Kai si banci sipelajari arah turang seninata si lit i Rusia?

¹² Cuba siperdiateken kai si ilakoken turang seninata bas Rusia guna nampati turang seninana si ipenjaraken. Sanga lit si ibaba ku pengadilen, enterem turang seninata si reh guna ndukung kalak e. Kai pelajarenna? Sanga turang senina si lit tanggung jawapna ipitnah, itangkap, ntah pe ianiaya, ula kita mbiar. Sitotokenlah kalak e, siperdiateken keperlun keluargana, janah sidarami cara guna ndukung kalak e.​—Perb. 12:5; 2 Kor. 1:10, 11.

13. Engkai maka adi kita itokoh-tokohi banci dungna mulai kita lanai tek man Jahwe ras organisasiNa?

¹³ Banci saja keluargata, temanta erdahin, ntah pe temanta sekolah nokoh-nokohi kita perban ikut kita erberita ras siikutken patoken Jahwe si meganjang. (1 Pet. 4:4) Banci saja ning kalak e, “Meriah nge kuakap ras kam, tapi mbuesa kuakap aturen bas agamandu e janah la kuakap masuk akal.” Selain si e, banci saja lit si la kapna pas carata erurusen ras kalak si ipecat. Banci saja ning kalak e, “Banci ka nge nindu kam kalak perkeleng adi bagena perbahanenndu.” Kata-kata si bage banci erban kita ragu nandangi patoken Jahwe. Banci saja rukur kita, ‘La kin lah mbuesa si pindo Jahwe arah aku? La kin lah kakusa organisasi Jahwe enda?’ Adi bage perasanta, kai si perlu silakoken gelah banci tetap rembak ras Jahwe bage pe organisasiNa?

14. Kai si arusna silakoken adi lit si nokoh-nokohi kita perban siikutken patoken Jahwe? (Masmur 119:50-52)

¹⁴ Ertekadlah terus ngikutken patoken Jahwe. Lalap ikutken Jop patoken Jahwe amin pe itokoh-tokohi. Iusahaken salah sada teman palsu Jop gelah tek Jop maka labo diate Dibata ia amin pe ilakokenna kai si benar. (Jop 4:17, 18; 22:3) Tapi Jop la tek man bual e. Tehna maka patoken Jahwe nge si benar, janah ertekad ia guna terus ngikutkenca.  La pediatna ise pe erban ia lanai setia. (Jop 27:5, 6) Kai pelajarenna? Ula sempat perban itokoh-tokohi kalak kam dungna ragu kam man patoken Jahwe. Ukurilah pengalamenndu sedekah enda. Pasti enggo lalap gejapkenndu maka patoken Jahwe e benar janah erguna. Ertekadlah terus ndukung organisasi Jahwe si ngikutken patoken e. Alu bage, amin pe lalap kita itokohi, la lit si banci nirangken kita arah Jahwe.​—Baca Masmur 119:50-52.

15. Engkai maka Brizit itokoh-tokohi?

¹⁵ Cuba siperdiateken pengalamen Brizit, sekalak turang seninata arah India, si itokohi keluargana. La ndekah kenca ia iperidiken bas tahun 1997, dilakina si labo Saksi Jahwe lanai erdahin. Emaka, iban dilakina me keputusen gelah kalak e ras anakna pindah ku rumah orang tua dilakina e, si tading bas kota si deban. Reh belinna me tentangen si arus iadapi Brizit. Perban dilakina lanai erdahin, arus ia erdahin guna nampati keluargana. Selain si e, runggun si ndeherna pe kira-kira 350 kilometer dauhna. Si sedihna ka, itentang keluarga dilakina ia perban kinitekenna. Mberat kel tentangen e, seh ngasa arus ka kalak e pindah. Kenca si e, rempet mate dilakina. Dung e, mate ka anakna si umurna 12 tahun perban kanker. Isalahken kade-kadena ka Brizit perban kerina kejadin e. Ikataken kalak e maka adi la ia jadi Saksi Jahwe, labo terjadi kerina e. Tapi, tetap Brizit tek man Jahwe janah tetap rembak ras organisasi Jahwe.   

16. Pasu-pasu kai si dat Brizit perban tetap ia rembak ras Jahwe bage pe ras organisasiNa?

¹⁶ Perban ndauh kel rumah Brizit arah runggun, iahken pertua keliling ia gelah erberita ia bas inganna e janah banna perpulungen bas rumahna. Tangtangna, labo kap Brizit ia ngasup ngelakokenca. Tapi tetap ikutkenna kai si ikataken pertua keliling e. Erberita ia, banna perpulungen bas rumahna, janah teratur  ia ibadah keluarga ras anak-anakna. Kai hasilna? Mbue kalak si erlajar Pustaka ras ia janah mbue ka si iperidiken. Bas tahun 2005 mulai ia merintis biasa. Perban tek ia man Jahwe janah setia ia man organisasi Jahwe, datna mbue pasu-pasu. Anak-anakna setia ngelayani Jahwe, janah gundari bas ingan e enggo lit dua runggun. Tek Brizit maka Jahwe me si mereken gegeh sanga lit masalahna ras tetap megenggeng sanga itokoh-tokohi keluargana.

17. Kai tekadta?

¹⁷ Ate Setan tek min kita maka tadingken Jahwe kita sanga lit masalahta. Selain si e, ate Setan tek min kita maka adi sidukung organisasi Jahwe, reh serana me keadanta. Ate Setan mbiar min kita sanga turang senina si lit tanggung jawapna ituduh, ianiaya, ntah pe ipenjaraken. Selain si e, usahakenna gelah sanga kita itokoh-tokohi mulai kita lanai tek man patoken Jahwe bage pe man organisasi Jahwe. Tapi enggo siteh taktik Setan janah la kita nggit itipuna. (2 Kor. 2:11) Ertekadlah kita gelah la tek man bual Setan janah tetap setia man Jahwe ras organisasiNa. Ingetlah labo kam pernah tadingken Jahwe. (Ms. 28:7) Emaka, ula pediat kai pe nirangken kam arah Jahwe!​—Rom. 8:35-39.

18. Kai kari sibahas bas artikel seterusna?

¹⁸ Bas artikel enda enggo sibahas tentangen arah kalak si labo Saksi Jahwe. Tapi kinitekenta man Jahwe bage pe man organisasiNa banci iuji sanga lit masalahta bas runggun. Uga carana gelah berhasil kita ngadapisa? Sibahas kari kerna si e bas artikel seterusna.