Bas perjanjin e pe iban ka keputusen guna erban sada organisasi si mbaru eme Liga Bangsa-Bangsa. Tujunna eme “gelah banci bangsa-bangsa kerja sama janah doni enda banci dame ras aman.” Melala gereja si ndukung Liga Bangsa-Bangsa e. Ikataken Majelis Nasional Gereja-Gereja Kristus i Amerika maka Liga Bangsa-Bangsa e eme “organisasi politik si jadi wakil Kerajan Dibata i doni.” Idukung Majelis e Liga Bangsa-Bangsa, buktina ikirimkenna piga-piga utusen ku Konferensi Perdamaian Paris. Ikataken salah sada utusen e maka “nggo imulai me jaman si mbaru i bas doni enda” erkiteken lit konferensi e.

Bas tahun 1919, memang nggo imulai sada jaman si mbaru, tapi e la lit hubungenna ras konferensi perdamaian ndai. I bas tahun e imulai me sada jaman si mbaru i bas dahin erberita si ilakoken umat Jahwe. Ipegegehi Jahwe kalak e gelah semangat mulihi erberita man nterem jelma lebih asa si nggo-nggona. Tapi gelah enda banci terjadi, arus lit perubahen bas situasi Ajar-Ajar Pustaka si Badia.

Pemilihen anggota dewan direksi Lembaga Alkitab ras Risalah Menara Pengawal nggo irencanaken gelah iban bas wari Sabtu, 4 Januari 1919. Tapi, Joseph F. Rutherford si minpin organisasi paksa si e, ipenjaraken denga ia erkiteken tuduhen palsu. Ipenjaraken ia radu ras pitu turang seninanta si dilaki bas Atlanta, Georgia, AS. Emaka arus iban turang seninanta keputusen enda: Perlu nge ntah lang turang seninanta si ipenjaraken e ndai iganti, ntah kalak e saja si ipilih mulihi jadi pengurus?

Sanga bas penjara, lalap iukuri turang seninanta Rutherford uga kari masa depan organisasi. Lit piga-piga turang senina si erpengakap maka arus lit si nggantiken ia jadi presiden Lembaga. Meteh si e, itulisna surat man turang seninanta si erban rapat. I bas suratna e, ikataken Rutherford gelah Evander J. Coward saja si ipilih jadi presiden. Ikataken Rutherford maka Coward e “tenang,” “pentar,” janah “setia man Tuan.” Tapi nterem turang seninanta la atena bage. Ate kalak e gelah pemilihen dewan direksi itunda seh ngayak enem bulan. Tim kuasa hukum si mbela waluh turang seninanta si ipenjaraken ndai pe setuju ras pendapat e. Sanga arih-arih kalak e kerina kerna  kai si arus ilakoken, lit piga-piga turang seninanta si dungna sitahanen.

Iceritaken Richard H. Barber maka kenca kejadin e, iusahaken sekalak turang seninanta si lit i je gelah tenang mulihi keadanna. Nina turang seninanta e, “Aku labo memang ahli hukum, tapi kuteh nge kai si arus silakoken bukti kita setia. Ate Dibata gelah kita setia. Adi menurutku, cara si mehulina guna mbuktiken maka setia kita man Dibata eme sibanlah pemilihen gundari janah sipilihlah mulihi turang seninanta Rutherford jadi presiden.”​—Msm. 18:25, Terjemahan Dunia Baru.

Kenca si e, iceritaken turang seninanta A. H. Macmillan si ipenjaraken radu ras Rutherford maka paginna ituktuk Rutherford dingding penjarana janah nina, “Ku darat ban tanndu.” Kenca si e, ibereken Rutherford man bana sada telegram si isina kerna hasil pemilihen. Inen Macmillan isi telegram e, janah mis itehna kai ertina. Kerina anggota dewan direksi nggo ipilih mulihi, janah Joseph Rutherford ras William Van Amburgh ipilih ka mulihi jadi pengurus. Enda ertina, turang seninanta Rutherford tetap jadi presiden Lembaga.

Sanga turang seninanta si waluh kalak ndai ipenjaraken, iusahaken Ajar-Ajar Pustaka si Badia mbebasken turang seninanta e ndai. Iban kalak e sada petisi ntah pe surat permohonen man pemerentah janah ipindoken kalak e man kalak si deban gelah nggit nandatanganisa. Perban perpang kel turang seninanta e, berhasil idatna lebih 700.000 tanda tangan. Sope ibereken kalak e petisi ndai man pemerentah, turang seninanta Rutherford ras pitu turang seninanta si debanna nggo leben ibebasken bas wari Rabu, 26 Maret 1919.

Nina turang seninanta Rutherford man kalak si ngalo-ngalo ia sanga ia mulih, “Tek aku si enda kerina terjadi gelah siap kita ngadapi masaIah si terberaten pagi. . . . Perjuangen kena labo gelah turang senina kena bebas arah penjara. Labo e situhuna tujun kena. . . . Tujun perjuangen kena eme gelah banci mberitaken kerna Kebenaren. Ipasu-pasu me kalak si nggo ngelakokenca.”

Banci siidah penampat Jahwe sanga turang seninanta erjuang bas pengadilen. Bas tanggal 14 Mei 1919, iban pengadilen banding keputusen enda: “Kerina kalak si ituduh bas kasus enda . . . la iadili alu adil, bagi si arusna ialoken kalak e. Emaka tuduhen nandangi kalak e ibatalken.” Enda sada keputusen si seh kel mantapna. Engkai? Turang seninanta e ndai nggo ituduh ngelakoken piga-piga kejahaten si mbelin. Adi ikurangi ngenca hukumen kalak e ntah pe idatna grasi (ibebasken bage saja), tetap denga lit cataten kejahaten kalak e. Tapi perban tuduhen nandangi kalak e nggo ibatalken janah la lit tuduhen si deban nandangi kalak e, lanai lit cataten kejahaten kalak e. Hasilna, banci mulihi ibela Hakim Rutherford umat Jahwe secara hukum bas Mahkamah Agung Amerika Serikat. Lit piga-piga kali ibelana umat Jahwe kenca ia ibebasken.

Nina turang seninanta Macmillan, “La ate kami kundul-kundul saja janah nimai iangkat Tuan kami ku surga. Sadar kami maka lit si arus ilakoken kami gelah banci iteh kami kai situhuna peraten Tuan.”

Tapi, la banci mis ilanjutken turang seninanta bas kantor pusat dahin si nggo ilakoken kalak e sedekah ertahun-tahun. Engkai maka bage? Perban sanga ipenjaraken denga turang seninanta si waluh kalak ndai, lit piga-piga alat bas mesin cetak si nggo ceda iban kalak. Enda erbanca kitik ukur turang seninanta, janah lit piga-piga si sangsi banci denga nge ntah lang kita erberita.

Lit denga nge si nggit megiken berita si meriah kerna Kerajan Dibata si iberitaken Ajar-Ajar Pustaka si Badia? Ipeseh turang seninanta Rutherford atena sada khotbah gelah iteh kalak e jawapenna. Kerina kalak iundang gelah reh. Nina turang seninanta Macmillan, “Bicara la lit kari kalak si reh, e tandana nggo dung dahin erberita.”

Emaka bas wari Minggu, 4 Mei 1919, amin gia turang seninanta Rutherford sangana mekelek pinakitna, tetap ipesehna khotbah si erjudul “Arapen man Manusia si Ngenanami Kiniseran” i Los Angeles, Kalifornia. Lit kira-kira 3.500 kalak si reh, janah lit ratusen kalak si la banci masuk perban lanai siat inganna. Paginna, lit ka 1.500 kalak si reh. Gundari iteh turang seninanta maka nterem denga kepe kalak si nggit megiken berita si meriah!

Kenca si e, lit si iban turang seninanta e ndai si mbelin pengaruhna nandangi dahin erberita si ilakoken Saksi-Saksi Jahwe seh asa gundari.

Bas The Watch Tower 1 Agustus 1919, lit pengumumen kerna sada kebaktin man jelma si nterem si iban bas awal September i Cedar Point, Ohio. Lit sekalak Ajar-Ajar Pustaka si Badia si nguda denga arah Missouri, gelarna Clarence B. Beaty.  Nina, “Enterem kel kalak si reh atena ku acara e.” Lebih 6.000 turang seninanta si reh ku kebaktin e. Enda la isangka-sangka kami. Si mantapna ka, lebih 200 kalak si iperidiken bas Danau Erie si la ndauh je nari.

Bas tanggal 5 September 1919 eme wari si pelimaken bas kebaktin e, ipeseh turang seninanta Rutherford sada khotbah si erjudul “Si Ipindoken man Kerina si Erdahin.” Bas khotbah e, iumumkenna ka maka nggo lit sada majalah si mbaru si gelarna The Golden Age. * I bas majalah e “lit ituriken berita si terbaru kerna peristiwa-peristiwa si penting janah ijelaskenna ka arah Pustaka ngkai maka peristiwa-peristiwa e terjadi.””

Kerina Ajar-Ajar Pustaka si Badia iiahken gelah pang erberita nggunaken majalah si mbaru e. Lit sada surat si njelasken uga kari carana dahin erberita e ilakoken. Ikataken bas surat e, “Man kam kerina si nembah Jahwe [nggo iperidiken], ingetlah maka sada kehamaten si mbelin banci ngelayani Dibata. Gunakenlah kesempaten enda janah usahakenndulah asa ngasupndu erberita ku belang-belang doni.” Enterem turang seninanta si semangat ndalankenca! Hasilna, bas bulan Desember, lit lebih 50.000 si atena langganen majalah The Golden Age.

Bas pendungi tahun 1919, umat Jahwe nggo mulihi iorganisasi alu mehuli. Kalak e pe jadi semangat ka mulihi. Selain si e, piga-piga nubuat si penting si lit hubungenna ras wari-wari pendungi nggo terjadi. Bas Maleaki 3:1-4, ikataken maka umat Dibata iuji ras imurniken, janah e nggo terjadi. Umat Jahwe nggo bebas arah “Babilon si Mbelin,” janah Jesus nggo ngelantik “budak si setia janah pentar.” * (Ket. 18:2, 4; Mat. 24:45) Gundari nggo banci idalanken Ajar-Ajar Pustaka si Badia dahin si ibereken Jahwe man kalak e.