1. Kai saja si banci ilakoken Jahwe gelah terjadi peratenNa?

DIBATA JAHWE banci jadi kai pe gelah terjadi peratenNa. Contohna, banci Ia jadi Guru, Bapak si mereken pengapul, ras Perberita si meriah. (Jes. 48:17; 2 Kor. 7:6; Gal. 3:8) Tapi, rusur ka igunaken Jahwe manusia guna ngelakoken peratenNa. (Mat. 24:14; 28:19, 20; 2 Kor. 1:3, 4) Banci ka ibereken Jahwe kepentaren ras gegeh man banta gelah banci kita jadi kai pe si iperlukenNa gelah terjadi peratenNa. Enda cocok ras erti gelar Jahwe, janah piga-piga pakar pe setuju kerna si e.

2. (a) Engkai maka mon-mon sangsi kita erguna ntah lang kita man Jahwe? (b) Kai si man bahasenta bas artikel enda?

² Ateta min erguna kita man Jahwe. Tapi lit piga-piga kalak si sangsi erguna ntah lang ia man Jahwe. Engkai? Perban la mbue iakapna si banci ilakokenna erkiteken keadanna, nggo metua ia, ntah pe la kapna ia ngasup. Si debanna nggo bias iakapna kai si nggo ilakokenna bas pelayanen, piah dungna lanai kapna perlu mereken terbuen. Bas artikel enda, sibahas kari kai si ibereken Jahwe man banta gelah ngasup kita ngelakoken peratenNa. Selain si e, sibahas ka piga-piga contoh bas Pustaka kerna dilaki ras diberu si ngelakoken peraten Jahwe. Arah contoh e banci siteh kai si ilakoken Jahwe guna mpeturah sura-sura umatNa ras mereken gegeh man kalak e i bas ngelakoken peratenNa. Si terakhir, sibahas kari uga carana gelah nggit kita igunaken Jahwe.

3. Menurut Pilipi 2:13, kai si ilakoken Jahwe gelah lit sura-suranta ngelakoken peratenNa?

³ Baca Pilipi 2:13. * Banci ibereken Jahwe man banta sura-sura guna ngelakoken peratenNa. Uga carana? Banci saja lit siteh turang seninanta bas runggun si perlu penampat ntah pe lit sada tugas si perlu ilakoken. Ntah pe banci saja ibacaken pertua sada surat arah kantor cabang kerna daerah si merluken terbuen perberita. Sanga siteh kerna si e, banci saja rukur kita, ‘Uga carana aku nampatisa?’ Ntah pe banci saja kita isuruh ngelakoken sada tugas si mberat janah la siakap kita ngasup ngelakokenca. Ntah pe kenca sibaca sada ayat, banci saja rukur kita, ‘Uga nge carana gelah banci kugunaken ayat enda sanga nampati kalak si deban?’ Labo pernah ipaksa Jahwe kita ngelakoken kai pe. Tapi, adi idahNa lit ukurta guna nampati, banci iberekenNa sura-sura banta guna ngelakokenca.

4. Kai si ilakoken Jahwe gelah lit gegehta guna ngelakoken peratenNa?

⁴ Banci ka ibereken Jahwe banta gegeh guna ngelakoken peratenNa. (Jes. 40:29) IberekenNa kesah si badia gelah banci kita reh beluhna. (Kel. 35:30-35) Arah organisasiNa, banci ka iajari Jahwe kita uga carana ngelakoken sada tugas. Banci ka ipindondu penampat kalak si deban adi la tehndu uga carana ngelakoken sada tugas. Selain si e, ula kam sangsi mindo man Jahwe, Bapakta si i surga, gelah iberekenNa ‘kengasupen si luar biasa.’ (2 Kor. 4:7; Luk. 11:13) Bas Pustaka, lit iceritaken kerna uga Jahwe nampati nterem dilaki ras diberu alu mereken sura-sura ras gegeh man kalak e guna ngelakoken peratenNa. Sanga sibahas kari e, cuba perdiateken kai si banci ilakoken Jahwe guna nampati kam ngelakoken peratenNa bali bagi si ilakokenNa man kalak e ndai.

5. Kai si banci sipelajari arah cara Jahwe nggunaken Musa mbebasken umatNa?

⁵ Igunaken Jahwe Musa guna mbebasken kalak Israel. Tapi ndigan nge mulai igunaken Jahwe ia? Labo sanga nggo ngasup iakap Musa ia perban nggo ‘iajari ia kerna kerina kepentaren kalak Mesir.’ (Perb. 7:22-25) Tapi, mulai ia igunaken Jahwe kenca nggo iajari Jahwe ia jadi kalak si meteruk ukur janah lembut. (Perb. 7:30, 34-36) Isampati Jahwe ka ia gelah pang ngerana man penguasa si hebatna kel i Mesir. (Kel. 9:13-19) Kai si banci sipelajari arah cara Jahwe nggunaken Musa? Kalak si igunaken Jahwe eme kalak si nggit ngusih sifat-sifatNa janah si nggit mindo gegeh man baNa.​—Pil. 4:13.

6. Kai si banci sipelajari arah cara Jahwe nggunaken Barsilai sanga nampati Raja Daud?

⁶ Ratusen tahun kenca si e, igunaken Jahwe Barsilai guna nampati Raja Daud. Bas sada wari, sanga kiam Daud ras anak buahna arah Absalom eme anak Daud, ‘melihe kalak e, muas janah latih’ akapna. Paksa si e Barsilai nggo metua. Tapi nggit ia ras piga-piga kalak si debanna mereken keperlun Daud ras anak buahna amin gia kesah taruhenna. Aminna pe Barsilai nggo metua, labo iakapna lanai ia erguna man Jahwe. Tapi, meriah ukurna mere kai si lit bas ia guna nampati umat Dibata. (2 Sam. 17:27-29) Kai pelajarenna banta? La soal kita nggo metua ntah pe nguda denga, banci igunaken Jahwe kita guna nampati turang seninanta si sangana susah, ntah e bas daerahta ntah pe bas negara si deban. (Kua. 3:27, 28; 19:17) Amin gia la  banci langsung sisampati, banci sibereken sumbangen guna ndukung pendahin sebelang doni. Alu bage, kerina turang seninanta i sebelang doni banci tersampati sanga perlu kalak e penampat.​—2 Kor. 8:14, 15; 9:11.

7. Uga cara Jahwe nggunaken Simeon? Janah ngkai maka contoh e banci mpegegehi kita?

⁷ Lit sekalak dilaki si nggo metua i Jerusalem si setia ngelayani Jahwe, gelarna Simeon. Erjanji Jahwe bana maka pasti idahna lebe Mesias sope ia mate. Pasti terpegegehi kel Simeon megi janji e perban nggo ndekah kel itimaina Mesias. Ipasu-pasu Jahwe ia perban paguh kinitekenna janah megenggeng. Bas sada wari, reh ia ku rumah pertoton “alu penegu-negu kesah si badia.” Idahna i je Jesus si bayi denga. Igunaken Jahwe Simeon guna mpeseh nubuat kerna anak e, si jadi Kristus pagi. (Luk. 2:25-35) Banci saja nggo mate Simeon sope imulai Jesus pelayanenna i doni. Amin gia bage, ngata bujur kel ia perban datna kesempaten si istimewa. Janah bas wari si pepagi terbuen ka datna pasu-pasu! Bas doni si mbaru pagi, iidah dilaki si setia e me uga pemerentahen Kristus masu-masu kerina kalak i doni. (Kej. 22:18) Kita pe banci ngata bujur man Jahwe perban nggo igunakenNa kita ngelayani Ia bas erbage cara.

8. Kai si ilakoken Jahwe gelah banci igunakenNa kita bali bagi Ia nggunaken Barnabas?

⁸ Bas abad pertama Masehi, lit sekalak dilaki si meriah akapna mere, gelarna Jusup. Nggit ia igunaken Jahwe. (Perb. 4:36, 37) Igelari rasul-rasul ka ia Barnabas, si ertina “Kalak si Nggit Nampati.” Engkai? Banci saja perban Jusup e melias janah beluh ia ngapuli. Misalna, kenca Saul jadi kalak Kristen, nterem turang senina mbiar ndeher ras Saul perban isiksana mbarenda kalak Kristen. Tapi, nggit Barnabas ngapuli ras nampati Saul, janah pasti ngata bujur kel ia perban mehuli kel Barnabas e. (Perb. 9:21, 26-28) Bas pudi wari, iteh pertua i Jerusalem maka perlu ipegegehi kalak e turang senina si lit bas Antiokia i Siria. Ise si isuruh kalak e? Barnabas. Pas kel pilihen kalak e! Ikataken bas Pustaka maka ‘ipegegehi Barnabas kerina kalak e gelah tetap setia man Tuan alu tekad si paguh.’ (Perb. 11:22-24) Gundari pe, banci ka igunaken Jahwe kita guna ngapuli turang seninanta. Misalna, banci saja igunaken Jahwe kita guna ngapuli turang seninanta si erceda ate perban nggo mate kalak si ikelengina. Ntah, adi lit si sangana sakit ntah pe gulut ukurna, banci saja iiahken Jahwe kita guna ngapuli kalak e. Banci saja teriahken kita ndahi kalak e ntah pe nelepon ia. Nggit nge kam igunaken Jahwe bagi Ia nggunaken Barnabas?​—1 Tes. 5:14.

9. Kai si banci sipelajari arah cara Jahwe nampati Vasily gelah jadi pertua si mehuli?

⁹ Isampati Jahwe sekalak turang seninanta si gelarna Vasily gelah jadi permakan si mehuli bas runggun. Sanga Vasily jadi pertua bas umur 26 tahun, la kapna ia ngasup perban kurang denga pengalamenna i bas nampati turang senina, khususna si sangana ngadapi masalah. Tapi, ilatih pertua-pertua si nggo erpengalamen ia janah iajari ka ia bas Sekolah Pelayanen Kinirajan. Iusahaken Vasily kel gelah banci jadi pertua si reh ulina. Misalna, ibanna daftar kerna tujun-tujun si sederhana si atena ilakokenna. Kenca nggo banci ilakokenna tujun-tujunna e ndai, reh semangatna ia. Nina, “Kai si kubiarken mbarenda, gundari nggo e si erbanca meriah kel ukurku. Sanga isampati Jahwe aku gelah kuteh ayat si cocok guna ngapuli turang senina bas runggun, puas kel kuakap.” Kam turang senina kami si dilaki, adi nggit kam igunaken  Jahwe bagi Vasily ndai, pasti isampatiNa kam gelah ngasup ndalanken tanggung jawap si terbelinen bas runggun.

10. Kai si ilakoken Abigail? Janah kai si banci ipelajarindu arah ia?

¹⁰ Bas sada wari, iayak-ayak Raja Saul me Daud ras anak buahna, emaka perlu kalak e penampat. Ipindo anak buah Daud sitik pangan man Nabal. Nabal e kalak Israel si seh kel bayakna. Pang kalak e mindo pangan man Nabal perban nggo ijagai kalak e asuh-asuhen Nabal bas padang rumput. Tapi perban Nabal e egois, la ia nggit mereken kai pe man kalak e. Merawa kel Daud janah ibunuhna atena Nabal bage pe kerina dilaki si lit bas keluargana. (1 Sam. 25:2-13, 22) Lit ndehara Nabal si gelarna Abigail, seh kel ia jilena janah pentar. Pang Abigail njumpai Daud, erjimpuh ia bas nahe Daud, janah ipindona gelah ula Daud balas dendam sebap arus kari ia ertanggung jawap nandangi dareh kalak e. Ikatakenna man Daud gelah ipediatna Jahwe si ndungi masalah e. Jadi kel ate Daud ngidah perbahanen ras ranan Abigail si meteruk ukur janah pentar. Iteh Daud maka Jahwe me si nuruh Abigail njumpai ia. (1 Sam. 25:23-28, 32-34) Ipebelin Abigail sifat-sifat si banci erban ia erguna man Jahwe. Bali bagi Abigail, turang seninanta si diberu pe banci igunaken Jahwe guna mpegegehi keluargana bage pe kalak si deban bas runggun adi terus kalak e meteruk ukur, perpang, janah pentar.​—Kua. 24:3; Tit. 2:3-5.

11. Kai si ilakoken anak-anak Sallum si diberu? Janah ise si ngusih kalak e gundari?

¹¹ Ratusen tahun kenca si e, igunaken Jahwe anak-anak Sallum si diberu guna mpekena tembok Jerusalem. (Neh. 2:20; 3:12) Aminna pe kalak e anak penguasa, tapi nggit kalak e ngelakoken dahin si mberat janah bahaya. (Neh. 4:15-18) Beda kel kalak e ras kalak si terpandang arah Tekoa nari si ‘la nggit ikut erdahin’! (Neh. 3:5) Pasti meriah kel ukur anak-anak Sallum e perban tembok e nggo dung ibangun bas 52 wari ngenca! (Neh. 6:15) Bas jamanta gundari, nterem turang seninanta si diberu nggit ngelakoken pelayanen si badia man Jahwe janah tugas e istimewa. Misalna, lit si ikut mbangun bage pe ngurus bangunen si ipake guna muji Jahwe. Pendahin e banci erdalan alu mehuli perban isampati diberu-diberu si semangat, beluh, janah setia.

12. Kai si ilakoken Jahwe gelah banci igunakenNa kita bali bagi Ia nggunaken Tabita?

¹² Iiahken Jahwe Tabita ngelakoken ‘melala perbahanen si mehuli janah nampati kalak si mesera,’ khususna diberu-diberu si nggo mbalu. (Perb. 9:36) Perban mehuli kel ia janah rusur kel ia mere, nterem kel si erceda ate sanga ia mate. Tapi meriah kel ukur kalak e sanga ipekeke Rasul Petrus ia. (Perb. 9:39-41) Kai si banci sipelajari arah Tabita? La soal kita nggo metua ntah pe nguda denga, dilaki ntah pe diberu, kerina kita banci nampati turang seninanta.​—Heb. 13:16.

13. Uga Jahwe nggunaken sekalak turang seninanta si diberu si permela? Janah kai si ikataken turang seninanta e?

¹³ Lit sekalak turang seninanta si permela janah merhat ia jadi utusen injil, gelarna Ruth. Sanga kitik denga ia, semangat kel ia mbagiken risalah arah rumah ku rumah. Ikatakenna maka meriah kel iakapna ngelakokenca. Tapi la ia pang ngerana i lebe-lebe pintu kalak janah nceritaken kerna Kerajan Dibata. Aminna pe Ruth permela, sanga umurna 18 tahun ia nggo jadi perintis biasa. Bas tahun 1946, ikut ia Sekolah Alkitab Gilead Menara Pengawal janah  kenca si e ngelayani ia i Hawaii ras Jepang. Igunaken Jahwe ia guna mberitaken berita si meriah man nterem kel kalak bas dua ingan e ndai. Kenca nggo menam 80 tahun Ruth ngelayani, ikatakenna, “Lalap aku ipegegehi Jahwe. IsampatiNa aku gelah lanai permela. Tek kel aku maka banci igunaken Jahwe ise pe si nggit mindo penampatNa.”

14. Menurut Kolose 1:29, kai si arus silakoken adi nggit kita igunaken Jahwe?

¹⁴ Mbarenda nari, nggo igunaken Jahwe umatNa guna ngelakoken erbage-bage tugas. Adi kam, banci nge kam igunaken Jahwe? Banci, adi nggit kam ngusahakenca. (Baca Kolose 1:29.) Adi nggit kam igunaken Jahwe, banci isampatiNa kam gelah jadi perberita si semangat, guru si beluh ngajar, teman si mehuli janah beluh ngapuli, beluh erdahin, ntah jadi kai pe si iperluken Jahwe gelah terjadi peratenNa.

15. Menurut 1 Timotius 4:12, 15, kai si perlu ipindo turang senina si dilaki si nguda denga man Jahwe?

¹⁵ Uga kam turang senina kami si dilaki si nguda denga? Gundari, melala iperluken dilaki-dilaki si semangat gelah jadi sinampati runggun. Bas runggun-runggun gundari, buen pertua asangken sinampati runggun. Nggit nge kam turang senina kami si dilaki si nguda denga dat terbuen tanggung jawap bas runggun? Mon-mon lit si ngataken, “Jadi perberita saja pe nggom kuakap bias.” Adi bage pengakapndu, pindolah penampat Jahwe gelah turah sura-surandu jadi sinampati runggun. Janah pindo ka man Jahwe gelah iberekenNa kam gegeh guna ngelayani Ia asa ngasupndu. (Peng. 12:1) Perlu kel kami penampat kena!​—Baca 1 Timotius 4:12, 15.

16. Kai nge si perlu sipindoken man Jahwe? Janah ngkai?

¹⁶ Banci iban Jahwe kam jadi kai pe si iperlukenNa gelah terjadi peratenNa. Emaka, pindolah man Jahwe gelah turah sura-surandu ngelakoken tugas si iberekenNa, janah pindolah gegeh guna ngelakokenca. La soal kam nguda denga ntah pe nggo metua, gunakenlah waktundu, gegehndu, bage pe kerina si lit bas kam guna muji Jahwe. (Peng. 9:10) Banci saja mbiar kam ntah pe la kapndu kam ngasup. Tapi ula min perban si e bene dungna kesempatenndu si meherga guna mereken si mehulina man Jahwe. Adi sibereken si mehulina, simuliaken me Jahwe, Dibatanta si perkeleng. Tuhu-tuhu sada kehamaten kel man banta!