1. Engkai maka Jahwe ngenca si arus sisembah?

JAHWE kap Si Nciptaken kita, janah Ia si mereken kegeluhen man banta. Emaka Ia saja ngenca si arus sisembah. (Ket. 4:11) Tapi, arus kita hati-hati. Amin gia keleng ateta Jahwe janah sihamati Ia, banci saja dungna lanai bulat ukurta nembah Jahwe perban nggo pentingen siakap si deban. Emaka perlu sipelajari ngkai maka sempat e terjadi. Tapi sibahas lebe kai maksudna Jahwe saja ngenca sisembah.

2. Menurut Matius 4:10, kai nge buktina tuhu-tuhu keleng ateta Jahwe?

² Menurut Pustaka, Jahwe saja ngenca sisembah adi tuhu-tuhu keleng ateta Ia. Emaka la sipediat ise pe ntah kai pe erban lanai keleng ateta Jahwe.​—Baca Matius 4:10.

3. Kai saja nge alasenna maka Jahwe ngenca sisembah?

³ Mbue kel alasenta maka Jahwe saja ngenca sisembah. Nggit kita nembah Ia perban nggo sipelajari kerna Ia. Luar biasa kel siakap sifat-sifatNa si mejile. Siteh kai si ngena ateNa ras kai si segat ateNa, janah perasanta bali bagi Ia. Siteh ka maka ate Jahwe ermeriah ukur min kita seh rasa lalap perban ngelayani Ia. E me sebapna sidalanken kai si ipindoNa. Janah luar biasa kel siakap banci kita jadi teman Dibata. (Msm. 25:14) Perban nggo erlajar kita kerna Dibata, reh deherna me kita ras Ia.​—Jak. 4:8.

4. (a) Kai si igunaken Iblis gelah lanai Jahwe saja ngenca sisembah? (b) Kai si man bahasenta bas artikel enda?

 ⁴ Doni enda ikuasai Iblis. Emaka igunakenna doni enda gelah pentingen siakap sura-suranta asangken peraten Dibata, janah iusahakenna ka gelah siikutken sura-suranta si salah. (Ep. 2:1-3; 1 Joh. 5:19) Kai tujunna? Ate Setan gelah lanai bulat ukurta ngkelengi Jahwe janah dungna lanai Ia saja ngenca sisembah. Mari sibahas dua cara Setan. Si pertama, igodana kita gelah ngayaki sen. Si peduaken, iusahakenna gelah meriah siakap hiburen si la ngena ate Dibata.

5. Engkai maka arus kita hati-hati gelah ula mata duiten?

⁵ Kerina kita ersura-sura gelah bias panganta, lit uista, janah sikap inganta tading. Tapi arus kita hati-hati gelah ula kita bali bagi kalak bas doni enda si “mata duiten” janah ngayaki erta. (2 Tim. 3:2) Iteh Jesus maka banci saja tergoda murid-muridna jadi mata duiten. Emaka nina, “Ise pe la banci jadi budak man dua tuan. Erkiteken pasti nembeh atena si sekalak janah ikelengina si deban, ntah pe setia ia man si sekalak tapi la diatena si deban. La kena banci jadi budak man Dibata bage pe man Kebayaken.” (Mat. 6:24) Adi lit kalak si nembah Jahwe tapi mbue kel keri waktu ras gegehna guna ngayaki kebayaken, tempa-tempa ia nggo jadi budak man dua tuan. Labo Jahwe ngenca si isembahna.

6. Kai si banci sipelajari arah kata-kata Jesus man runggun i Laodikea?

⁶ Sope tahun 100 Masehi, ikataken turang senina bas runggun i Laodikea, “Bayak aku, melala ertaku, janah labo aku  kurang kai pe.” Tapi menurut Jahwe ras Jesus, kalak e “mesera, la ermeriah ukur, pentang, janah tilanjang.” Ipersingeti Jesus kalak e labo perban kalak e bayak, tapi perban nggo pentingen iakap kalak e sen ras erta janah nggo ceda dungna hubungenna ras Jahwe. (Ket. 3:14-17) Adi sisadari maka nggo mulai kita mata duiten, mislah sipesikap caranta rukur. (1 Tim. 6:7, 8) Adi lang, lanai kari bulat ukurta nembah Jahwe janah Jahwe pe lanai ngena ateNa kita. Ate Jahwe sikelengi min Ia alu bulat ukur. (Mrk. 12:30) Engkai maka sempat sen jadi si pentingna bas geluhta?

7-9. Kai si banci sipelajari arah pengalamen sekalak pertua si gelarna David?

⁷ Perdiateken pengalamen David, sekalak pertua si semangat bas Amerika Serikat. Tutus kel atena erdahin. Emaka naik pangkat ia bas kantorna janah ia jadi salah sada karyawan si mehulina bas negeri e. Nina David, “Kuakap sange Jahwe nge si erbanca aku sukses.” Tapi, payo kin bage?

⁸ Dungna isadari David maka pendahinna e banci erban ia lanai rembak ras Jahwe. Nina, “Sanga perpulungen ras sanga erberita pe aku, masalah bas inganku erdahin si lalap kuukuri. Galang kel gajiku, tapi reh dekahna reh stresna aku janah nggo mulai lit masalah bas perjabunku.”

⁹ Iteh David maka perlu ipastikenna mulihi kai si pentingna i bas geluhna. Nina, “Robah ateku.” Ikatakenna man bosna maka iubahna atena jadwalna erdahin. Kai si terjadi? Ipecat ia! Kai si ilakokenna? Nina David, “Paginna, mis kuisi formulir guna jadi perintis ekstra  tetap.” Gelah lit sen kalak e, erdahin me David ras ndeharana guna mbersihken gedung-gedung. Kenca si e, jadi perintis biasa me ia, janah dungna ndeharana pe ikut merintis. Ipilih kalak e pendahin si rendah iakap kalak, tapi labo dalih iakap kalak e perban labo e si pentingna. Aminna pe gundari gaji kalak e sepersepuluh arah gajina si mbarenda ngenca, tapi nggo bias iakap kalak e guna ncukupi keperlunna tiap bulan. Iban kalak e Jahwe si pentingna bas geluhna, janah banci idahna maka tuhu-tuhu icukupi Jahwe keperlun kalak si mpelebe Kerajan Dibata.​—Mat. 6:31-33.

10. Uga carana njaga pusuhta?

¹⁰ La soal mbue ntah lang senta, arus sijaga pusuhta. Uga carana? Arus kita hati-hati gelah ula kita mata duiten. Janah ula sempat pentingen siakap pendahinta asangken pelayanenta man Jahwe. Kai si banci silakoken gelah si e la terjadi? Cuba ukuri piga-piga penungkunen enda: ‘Sanga aku perpulungen ntah pe erberita, pendahinku nge si lalap kuukuri? Mbiar nge aku lalap adi lanai kari bias senku? Sen ras erta nge si erbanca lit masalah bas perjabunku? Nggit nge aku ngelakoken dahin si rendah iakap kalak gelah banci reh buena waktuku ngelayani Jahwe?’ (1 Tim. 6:9-12) Sanga siukuri penungkunen-penungkunen enda, ingetlah maka keleng ate Jahwe kita. Erjanji Jahwe man kalak si tutus atena nembah Ia, nina, “Labo ndigan pe kam Kutadingken janah labo ndigan pe kam Kupediat.” E me sebapna ikataken Paulus, “Ula min kena mata duiten.”​—Heb. 13:5, 6.

11. Kai pengaruhna hiburen?

¹¹ Ate Jahwe meriah min siakap geluhta. Nina Pustaka, “La lit si terulin man manusia seakatan man, minem dingen ermeriah-meriah ngenanami ulih latihna.” (Peng. 2:24) Salah sada si erban meriah ukurta eme hiburen. Tapi bas doni enda melala kel hiburen si la mehuli pengaruhna man banta. Akibatna lanai masalah iakap kalak kai si segat ate Dibata, janah dungna meriah ka iakapna.

12. Menurut 1 Korinti 10:21, 22, ngkai maka arus kita hati-hati sanga milih hiburen?

¹² Adi ateta nembah Jahwe saja, la banci kita man i bas “meja Jahwe” janah man i bas “meja malekat-malekat jahat.” (Baca 1 Korinti 10:21, 22.) Adi man  kita ras sekalak jelma, e tandana erteman kita ras ia. Adi sipilih hiburen si lit kekerasenna, lit hubungenna ras ilmu sihir, perbahanen seks si salah, ntah pe perbahanen ras sura-sura si jahat, tempa-tempa sangana sipan pangan si isikapken musuh-musuh Dibata, janah radu kita man ras musuh-musuh Dibata e. Akibatna, kita nge si rugi janah lanai kita ndeher ras Jahwe.

13-14. (a) I bas kai nge hiburen seri ras pangan? (b) Menurut Jakup 1:14, 15, ngkai maka hiburen si la mehuli banci ngerugiken kita?

¹³ I bas kai nge hiburen seri ras pangan? Sanga kita man, banci sipilih kai si ateta simasukken ku babahta. Tapi adi nggo sibendut pangan e, lanai banci siatur kai pengaruh pangan e bas dagingta. Adi sehat panganta, kita pe reh sehatna. Tapi adi la sehat panganta, kita pe dungna sakit. Banci saja la mis teridah akibatna, tapi dungna pasti nge teridah.

¹⁴ Bage ka pe kerna hiburen. Sanga sipilih hiburen, banci sipilih kai si ateta simasukken ku pikirenta. Tapi kenca si e, lanai banci siatur kai pengaruh hiburen e bas pusuh ras perukurenta. Hiburen si mehuli erguna man banta, tapi hiburen si la mehuli ngerugiken kita. (Baca Jakup 1:14, 15.) Banci saja la mis teridah kai pengaruh hiburen si la mehuli ndai, tapi pasti nge dungna teridah. E me sebapna nina Pustaka, “Ula tertipu. Dibata la banci itokohi. Sebap kai si isuan kalak, e ka nge si iperanina. Kalak si nuan sue ras sura-sura daging si erdosa, iperanina me pengkernepen arah sura-sura dagingna si erdosa e.” (Gal. 6:7, 8) Jelas me, arus situlak kerina hiburen si lit hubungenna ras kai si segat ate Jahwe!​—Msm. 97:10.

15. Kai nge hadiah si ibereken Jahwe man banta?

¹⁵ Enterem umat Jahwe meriah iakapna nonton JW Broadcasting^®, stasiun televisi Internet Saksi Jahwe. Nina sekalak turang seninanta si gelarna Marilyn, “Meriah kel kuakap perban lit JW Broadcasting. Banci kutonton kerina acarana perban kerinana erguna man bangku. Sanga melungen kuakap ntah pe kitik ukurku, kutonton khotbah ntah pe acara Ibadah Pagi si banci mpegegehi aku. Dungna reh deherna aku ras Jahwe bage pe organisasiNa. JW Broadcasting tuhu-tuhu ngubah kegeluhenku.” Enggo nge igunakenndu hadiah arah Jahwe enda? Acara JW Broadcasting lit tiap bulan. Selain si e, melala ka video, rekamen audio, bage pe lagu-lagu si banci mpegegehi kita, janah ndigan pe ateta banci sitonton ntah pe sibegiken kerinana e.

16-17. Engkai maka arus sibatasi waktunta guna hiburen? Janah uga cara ngelakokenca?

¹⁶ Arus kita hati-hati kerna hiburen kai si ateta sipilih. Tapi labo e saja. Arus ka siatur asa kai buena waktunta keri guna hiburen e. Adi lang, banci saja nggo buen keri waktunta guna hiburen asangken ngelayani Jahwe. Enterem kalak mesera iakapna mbatasi waktuna guna hiburen. Lit sekalak turang seninanta si umurna 18 tahun, gelarna Abigail. Nina, “Kenca nggo latih kuakap sada warin, biasana santai-santai aku janahna nonton TV. Tapi adi la hati-hati, la kugejap nggo erjam-jam aku nonton TV.” Sekalak turang-seninanta si nguda denga si gelarna Samuel ngataken, “Mon-mon, nggo mbue kel kutonton video si gendek bas Internet. Tangtangna sada video ngenca si kutonton, tapi la gejap nggo lit telu seh ku empat jam kepe aku nonton.”

 ¹⁷ Uga carana gelah banci ibatasindu waktundu guna hiburen? Si pertama, perlu itehndu lebe asa kai buena waktu si ipakendu guna hiburen. Banci ibanndu cataten bas sada minggu. Tulislah i je asa kai buena waktundu nonton TV, ngenen Internet, ras main game bas HP ntah pe tablet. Adi nggo mbuesa kapndu keri waktundu, banlah jadwal. Utamakenlah lebe kai si lebih penting, kenca si e maka banndu waktu guna hiburen. Kenca si e, pindolah penampat Jahwe gelah banci ikutindu jadwal si nggo ibanndu. Alu bage, banci reh buena waktundu ras gegehndu guna pelajaren pribadi, kebaktin jabu, perpulungen, bage pe guna erberita. Adi nggo leben ipakendu waktundu guna Jahwe, pasti reh riahna kari iakapndu sanga ipakendu waktundu guna hiburen.

18-19. Kai buktina maka Jahwe ngenca sisembah?

¹⁸ Itulis Rasul Petrus maka doni Setan enda nandangi ikernepken janah nandangi reh me doni si mbaru. Kenca si e nina, “Turang senina si kukelengi, sanga itimai kena si enda kerina, usahakenlah asa bancina gelah i bas kedungenna idapeti Dibata kena bersih ras la erpandangen janah nggeluh alu dame ras Ia.” (2 Pet. 3:14) Adi sipatuhi pedah bas ayat e janah siusahaken asa ngasupta gelah ngena ate Jahwe ngidah kita bage pe ngidah pelayanenta, sibuktiken me maka Jahwe saja ngenca sisembah.

¹⁹ Terus iusahaken Setan ras doni si ikuasaina enda gelah lanai siakap Jahwe si pentingna bas geluhta. (Luk. 4:13) Tapi, la soal tentangen kai pe si man adapenta, la sipediat ise pe ntah kai pe erban lanai keleng ateta Jahwe. Siusahakenlah gelah Jahwe saja ngenca sisembah i bas geluhta, sebap Ia ngenca si patut isembah!