SEKALAK peramal cuaca mperdiateken gambar arah satelit. Idahna nandangi reh me badai si hebat ku daerah si nterem kel jelma i je. Perban mbiar ia mate kalak e, iusahakenna kel mpersingeti kalak e sanga lit denga waktu.

Gundari pe, sangana ipersingeti Jahwe kerina kalak kerna sada “badai” si seh kel bahayana janah ndauh hebaten asangken badai si apai pe si pernah sibegi bas ramalen cuaca. Uga cara Jahwe ngelakokenca? Janah ngkai kita tek maka pasti ibereken Jahwe waktu man kalak gelah banci robah? Sope sijawap penungkunen-penungkunen e, mari sibahas lebe piga-piga persinget si mbarenda ibereken Jahwe.

Bas jaman Pustaka mbarenda, ipersingeti Jahwe lebe kalak si la patuh man baNa sope ibanNa “badai” ntah pe iukumNa kalak e. (Kua. 10:25; Jer. 30:23) Lalap ipastiken Jahwe gelah lit waktu kalak e robah janah patuh man baNa. Ikataken Jahwe ka man kalak e uga cara ngelakokenca. (2 Raj. 17:12-15; Neh. 9:29, 30) Gelah nggit kalak e ertobat, rusur igunaken Jahwe umatNa si lit i doni guna mpeseh berita penghakimen janah ngiahken kalak gelah mis robah.​—Amos 3:7.

Salah sada si igunaken Dibata mpeseh berita penghakimen eme Nuah. Kalak bas jaman Nuah seh kel jahatna ras kejam. Ertahun-tahun dekahna, pang kel Nuah mpersingeti kalak kerna Banjir si Mbelin si nandangi terjadi i doni. (Kej. 6:9-13, 17) Ikataken Nuah ka man kalak e kai si arus ilakoken gelah banci selamat. Perban terus iberitaken Nuah kerna si e, bas Pustaka igelari me ia “sekalak perberita kerna kebenaren.”​—2 Pet. 2:5.

Amin gia nggo iusahaken Nuah asa ngasupna, tetap la ibegiken kalak berita si ipesehna si rehna i bas Dibata nari. E buktina la kalak e erkiniteken. Akibatna, ‘reh Banjir si Mbelin janah ngkernepken kalak e kerina.’ (Mat. 24:39; Heb. 11:7) Sanga reh Banjir si Mbelin e, la banci isalahken kalak e Dibata perban nggo leben ipersingeti Dibata kalak e.

Mon-mon, ipersingeti Jahwe manusia la ndekah ope reh “badai” penghakimenNa. Amin gia bage, lalap ipastiken Dibata gelah lit waktu kalak e robah. Misalna, sope iban Jahwe Sepuluh Bencana bas Mesir, ipersingetiNa lalap kalak e. Contohna, isuruh Jahwe me Musa ras Harun mpersingeti Paro ras pejabat-pejabatna kerna bencana si pepituken, eme udan es si seh kel ngerina. Persinget e ibereken sada wari ope reh udan es e. Lit denga nge waktu kalak e ndarami ingan si aman? Nina Pustaka, “Piga-piga kalak pegawai raja mbiar erkiteken kai si ikataken [Jahwe], emaka ibabana budak-budakna ras asuh-asuhenna ku rumah. Tapi si debanna la diatena pe kata persinget [Jahwe], ipelepasna saja budak-budakna ras asuh-asuhenna i darat.” (Kel. 9:18-21) Jelas me, ibereken Jahwe waktu man kalak e guna matuhi persingetNa, emaka kalak si mis patuh man baNa la mbue kel ia rugi bagi kalak si deban.

Ipersingeti Dibata ka Paro ras pejabat-pejabatna ope reh ibanNa bencana si pesepuluhken. Tapi motu kel kalak e, la diatena persinget e. (Kel. 4:22, 23) Akibatna, mate me kerina anak dilaki sintua bas negeri e. Seh kel sedihna! (Kel. 11:4-10;  12:29) Lit denga nge waktu kalak e guna matuhi persinget e? Lit! Mis ipersingeti Musa kalak Israel kerna bencana si pesepuluhken e janah ikatakenna ka kai si arus ilakoken kalak e gelah keluargana banci selamat. (Kel. 12:21-28) Perban patuh kalak e man Jahwe, lit kira-kira telu juta kalak si banci nadingken Mesir. Kalak e eme kalak Israel bage pe “bangsa si deban,” si termasuk ka i je kalak Mesir.​—Kel. 12:38.

Arah contoh-contoh ndai, banci siteh maka lalap ibereken Jahwe waktu man kalak guna matuhi persingetNa. (Ul. 32:4) Engkai maka bage iban Jahwe? Nina Rasul Petrus, ‘Labo ate Jahwe sekalak pe ikernepken tapi gelah kerina min ertobat.’ (2 Pet. 3:9) Jelas me, ermediate kel Jahwe man manusia. AteNa jera dingen robah min kalak e sope reh penghakimenNa.​—Jes. 48:17, 18; Rom. 2:4.

Gundari pe, arus ipatuhi kerina kalak persinget si penting si sangana ipeseh i sebelang doni. Sanga Jesus i doni, ikatakenna maka ikernepken me pagi doni enda bas “kiniseran si mbelin.” (Mat. 24:21) Jelas kel ipebetehken Jesus kerna kai saja pagi si terjadi sanga reh deherna kedungen e. Gundari banci siidah ras sigejapken maka kai si ikataken Jesus nggo terjadi i sebelang doni.​—Mat. 24:3-12; Luk. 21:10-13.

Perban nubuat Jesus ndai, iiahken Jahwe kalak gelah patuh man baNa janah ngelayani Ia. Ate Jahwe gelah kalak si patuh man baNa banci ermeriah ukur gundari janah pagi pe banci ndatken pasu-pasu bas doni si mbaru si nggo ijanjikenNa. (2 Pet. 3:13) Ipebetehken Jahwe man kalak e “berita si meriah kerna Kerajan [Dibata]” gelah kalak si tek man janji-janji Jahwe banci selamat. Bagi si nggo ikataken Jesus, berita si meriah e sangana ‘iberitaken i belang-belang doni guna kesaksin man kerina bangsa.’ (Mat. 24:14) Enggo iaturken Dibata gelah iberitaken umatNa berita si meriah e bas kira-kira 240 negeri. Ate Jahwe gelah nterem kalak patuh man persingetNa janah banci selamat arah “badai” penghakimenNa si adil si lanai ndekah terjadi.​—Sep. 1:14, 15; 2:2, 3.

Jelas me, arah bukti-bukti si nggo sibahas ndai, lalap ibereken Jahwe waktu man kalak guna matuhi persingetNa. Penungkunenna gundari, nggit nge kalak matuhi persinget Dibata sanga lit denga waktu? Lit tugasta guna mpeseh berita arah Dibata. Teruslah sisampati nterem jelma gelah banci kalak e selamat arah doni si jahat enda si nandangi ikernepken.