1-2. (a) Kai si nandangi iumumken bangsa-bangsa? (b) Penungkunen kai saja si man bahasenta?

CUBA bayangkenndu, edenga kel iumumken bangsa-bangsa “dame ras aman” bagi si nggo ikataken bas Pustaka. Banci saja ikataken kalak e nggo seh kel amanna doni enda. Iusahakenna gelah tek kalak maka nggo idungina kerina masalah bas doni enda. Tapi la banci ipengadi kalak e kai si nandangi terjadi! Engkai? Menurut Pustaka, ‘rempet me kalak e ikernepken i bas waktu si kentisik,’ janah “la banci ielakken kalak e.”​—1 Tes. 5:3.

² Lit piga-piga penungkunen si penting si perlu sibahas: Kai saja nge si terjadi pagi bas “kiniseran si mbelin”? Kai nge ate Jahwe silakoken paksa si e? Janah, kai si banci silakoken gundari gelah banci kita tetap setia sanga terjadi pagi kiniseran si mbelin?​—Mat. 24:21.

3. Menurut Ketangkasen 17:5, 15-18, kai si ilakoken Dibata guna ngkernepken “Babilon si Mbelin”?

³ Baca Ketangkasen 17:5, 15-18. “Babilon si Mbelin” pasti ikernepken! Bagi si nggo ituriken ndai, la banci ipengadi bangsa-bangsa kai si nandangi terjadi. Engkai? Sebap ‘itamaken Dibata pagi i bas pusuh kalak e sura-sura guna ndalanken peratenNa.’ Iban Dibata pagi “sepuluh tanduk” arah ‘binatang si seh kel rawana si megara bagi api’ ngelakoken peratenNa. “Binatang si seh kel rawana e” maksudna Perserikatan Bangsa-Bangsa, janah sepuluh tandukna e eme kerina kuasa politik si ndukung ia. Iban Dibata pagi turah sura-sura kuasa politik ngkernepken kerina agama palsu, termasuk agama-agama si ngaku  Kristen. * (Ket. 17:3, 11-13; 18:8) Sanga terjadi pagi si e, imulai me kiniseran si mbelin. Seh kel senggetna pagi kerina kalak i doni ngidah kejadin e janah ngeri kel iakapna.

4. (a) Kai si banci saja ikataken bangsa-bangsa guna njelasken ngkai maka iserang kalak e Babilon si Mbelin? (b) Kai si banci saja ilakoken kalak si pernah jadi anggota agama palsu?

⁴ La siteh kai alasen bangsa-bangsa pagi maka ikernepkenna Babilon si Mbelin. Banci saja ikataken kalak e maka agama-agama nge si erbanca la banci dame doni enda, janah ikatakenna ka maka lalap ikut campur agama bas politik. Entah pe banci saja ikatakenna nggo mbuesa erta si ipepulung agama-agama e. (Ket. 18:3, 7) Sanga iserang bangsa-bangsa pagi Babilon si Mbelin, banci jadi kerina agama nge si ikernepkenna, labo anggota agama e. Kenca masap pagi agama-agama e, sadar me anggotana maka nggo ikecewaken peminpin agamana ia, janah banci saja ikataken kalak e maka labo ia pernah jadi anggota agama e.

5. Kai janji Jahwe kerna kiniseran si mbelin? Janah ngkai?

⁵ La lit ikataken Pustaka uga dekahna Babilon si Mbelin e ikernepken, tapi siteh maka e labo ndekah. (Ket. 18:10, 21) Enggo erjanji Jahwe maka “ipegendekNa” masa kiniseran e gelah agama si benar bage pe ‘kalak si nggo ipilih Dibata’ la ikut kernep. (Mrk. 13:19, 20) Kai nge ate Jahwe silakoken kenca imulai kiniseran si mbelin bage pe sope perang Harmagedon?

6. Kai si arus silakoken kenca ndarat arah Babilon si Mbelin?

⁶ Bagi si nggo sibahas bas artikel si nggo lewat, ate Jahwe gelah tuhu-tuhu ndarat umatNa arah Babilon si Mbelin. Tapi labo e saja. Arus siusahaken gelah terus silayani Jahwe. Mari sibahas dua carana.

7. (a) Kai buktina tuhu-tuhu sidalanken patoken Jahwe kerna lagu langkah? (b) Menurut Heber 10:24, 25, ngkai maka seh kel pentingna reh ku perpulungen khususna gundari?

 ⁷ Si pertama, arus tuhu-tuhu sidalanken patoken Jahwe kerna lagu langkah. La banci siikutken lagu langkah si la mehuli bas doni enda. Misalna, ciga ateta kai pe si lit hubungenna ras perbahanen seks si salah, bagi dilaki erjabu ras dilaki, diberu ras diberu, bage pe perbahanen si debanna si ilakoken kalak homo. (Mat. 19:4, 5; Rom. 1:26, 27) Si peduaken, arus kita terus pulung ras turang seninanta bas perpulungen, la soal e bas Bale Kerajan, i rumah-rumah, ntah pe erbuni-buni. Kai pe si terjadi, la kita nggit sekali pe la reh ku perpulungen. Janah arus ‘reh tutusna ateta reh ku perpulungen erkiteken siidah wari e nggo reh deherna.’​—Baca Heber 10:24, 25.

8. Kai si banci saja berubah pagi bas beritanta?

⁸ Sanga terjadi pagi kiniseran si mbelin, banci saja isi beritanta berubah. Adi gundari, siberitaken berita si meriah kerna Kerajan Dibata janah siusahaken ngajari kalak gelah jadi murid Kristus. Tapi mbelin kemungkinenna, siumumken pagi berita si seh kel kerasna. Nina Pustaka berita e bali bagi udan es si bagi batu galangna. (Ket. 16:21) Banci saja siumumken pagi maka lanai ndekah tuhu-tuhu kernep me doni Setan. I bas waktuna pagi, siteh nge kai berita si man pesehenta bage pe uga cara mpesehsa. Banci saja seri denga carana ras cara si nggo sipake bas pelayanenta sedekah lebih seratus tahun enda. Entah pe, banci jadi lit ka cara-cara si deban. La soal uga pe carana, banci saja sipeseh pagi berita penghukumen arah Jahwe. Enda sada kehamaten man banta!​—Esek. 2:3-5.

9. Kai si banci saja ilakoken bangsa-bangsa sanga sipeseh beritanta? Tapi, tek kita kerna kai?

⁹ Perban isi beritanta e, mbelin kemungkinenna ipengadi bangsa-bangsa atena kita gelah ula nai kita pernah erberita. Emaka arus kita terus ernalem man Jahwe janah tek man baNa, bali bagi si nggo silakoken bas pelayanenta gundari. Tek kita maka pasti isampati Jahwe kita gelah ngasup ngelakoken peratenNa.​—Mi. 3:8.

10. Bagi si ikataken Lukas 21:25-28, uga perasan kalak sanga kiniseran si mbelin pagi?

¹⁰ Baca Lukas 21:25-28. Enterem kalak sengget sanga terjadi pagi kiniseran si mbelin. Engkai? Perban kerina si tempa-tempa paguh bas doni enda janah si tempa-tempa lit kari rasa lalap, kepeken rempet kernep. Mbiar kel kalak e, mbiar ia mate sebap seh kel ngerina wari e janah lenga pernah terjadi si bage. (Sep. 1:14, 15) Paksa si e, banci saja umat Jahwe pe mesera kel pergeluhna. Perban la kita bagin arah doni enda, banci saja melala masalah si man adapenta. Janah banci saja la tercukupi kerina keperlunta.

11. (a) Kenca ikernepken pagi agama Palsu, ngkai maka Saksi-Saksi Jahwe terus iperdiateken kalak bage pe peminpin doni enda? (b) Engkai maka la kita perlu mbiar nandangi kiniseran si mbelin?

¹¹ Pasti segat pagi ate kalak si agamana nggo ikernepken ngidah Saksi-Saksi Jahwe terus denga ndalanken agamana. Janah icidahkenna atena segat e, misalna arah Internet. Segat ate bangsa-bangsa ras Setan si jadi penguasana ngidah kita perban agamanta nari ngenca si la ikernepken. Ikernepken kalak e atena kerina agama bas doni enda, tapi lit  denga si la banci ikernepkenna. Emaka terus kita iperdiateken kalak. Ersada me bangsa-bangsa janah iusahakenna kel ngkernepken umat Jahwe. Paksa si e me kalak e jadi Gog arah Magog. * (Esek. 38:2, 14-16) Adi siukuri kai si terjadi pagi bas kiniseran si mbelin, banci saja mbiar kita, apai ka la siteh kai saja pagi si terjadi i je. Tapi situhuna labo kita perlu mbiar. Ibereken Jahwe pagi petunjuk-petunjuk gelah banci kita selamat. (Msm. 34:20) ‘Tedis kita janah jurgak’ sebap siteh ‘pembebasenta nggo ndeher.’ *

12. Kai si ilakoken “budak si setia janah pentar” guna nampati kita ngadapi kai si terjadi pagi?

¹² Enggo iusahaken “budak si setia janah pentar” nampati kita gelah tetap kita setia sanga terjadi pagi kiniseran si mbelin. (Mat. 24:45) Melala cara si ilakoken kalak e. Misalna arah acara kebaktin regional tahun 2016-2018. Kerina kebaktin e ngiahken kita gelah sipebelin sifat-sifat si mehuli gundari nari perban nggo reh deherna wari Jahwe. Mari sibahas sifat-sifat e.

13. Kai si arus silakoken gelah banci terus setia man Jahwe? Janah ngkai maka gundari nari arus silakoken e?

¹³ Setia: Tema kebaktin regional tahun 2016 “Tetaplah Setia man Jahwe!” Bas kebaktin e sipelajari carana tetap setia man Jahwe, eme tetap ndeher ras Ia. Sipelajari ka carana banci ndeher ras Jahwe, eme terus sipelajari Pustaka janah tutuslah kita ertoto. Adi bage siban, banci kita tetap megenggeng uga pe beratna keadanta. Janah perban nggo seh kel deherna kiniseran si mbelin e, pasti kita iuji setia ntah lang kita man Dibata bage pe KerajanNa. Banci jadi lalap kita itokohi kalak. (2 Pet. 3:3, 4) Enda banci terjadi perban la kita ikut bas bagin si apai pe arah doni Setan. Emaka arus kita terus setia man Jahwe gundari nari gelah banci kita tetap setia bas kiniseran si mbelin e pagi.

14. (a) Perubahen kai si terjadi pagi nandangi turang seninanta si minpin umat Dibata i doni? (b) Engkai maka arus kita tetap setia bas kiniseran si mbelin?

¹⁴ Sanga terjadi pagi kiniseran si mbelin, kerina kalak Kristen si ipilih ku surga si lit denga i doni, ipepulung pagi ku surga sebap ikut kalak e bas perang Harmagedon. (Mat. 24:31; Ket. 2:26, 27) Emaka Badan Pinpinen, si kerina anggotana ipilih ku surga, lanai minpin umat Dibata i doni. Tapi, tetap nge lit pagi si ngaturken kelompok jelma si nterem eme turang seninanta si dilaki si ncukupi syarat janah kalak e bagin arah biri-biri si deban. Arus sibuktiken maka setia kita man Jahwe alu ndukung turang seninanta e janah sidalanken petunjuk si dat kalak e arah Dibata. Adi selamat ateta, arus sidalanken petunjuk arah kalak e!

15. Kai si perlu silakoken gelah banci terus kita megenggeng? Janah ngkai maka arus gundari nari silakoken e?

¹⁵ Megenggeng: Tema kebaktin regional tahun 2017 “Jangan Menyerah!” Kebaktin enda ngiahken kita gelah terus  megenggeng sanga ngadapi erbage masalah. Sipelajari ka cara gelah banci megenggeng la soal uga pe keadanta eme adi tuhu-tuhu ernalem kita man Jahwe janah tek man baNa. (Rom. 12:12) Mbera la silupaken janji Jesus, nina, “Kalak si megenggeng seh ku kedungenna iselamatken pagi.” (Mat. 24:13) Emaka arus kita terus megenggeng la soal kai pe masalahta. Adi megenggeng kita gundari nari ngadapi kerina masalahta, reh paguhna me kinitekenta sope kiniseran si mbelin imulai.

16. Kai si banci erban kita pang? Janah uga carana gelah banci kita reh pangna?

¹⁶ Pang: Tema kebaktin regional tahun 2018 “Ula Mbiar!” Bas kebaktin e sipelajari maka labo kengasupenta si erbanca kita pang. Bali bagi si nggo sibahas ndai, banci kita megenggeng adi tek kita man Jahwe. Kita pe banci pang adi tek ka kita man Jahwe. Kai si perlu silakoken gelah reh tekna kita man Jahwe? Arus sibaca Pustaka tiap wari janah siukuri alu mbages kai si pernah ilakoken Jahwe guna nelamatken umatNa. (Msm. 68:21; 2 Pet. 2:9) Sanga kiniseran si mbelin pagi, iserang bangsa-bangsa kita. I je me kari seh kel perluna kita erkiniteken janah la mbiar. (Msm. 112:7, 8; Heb. 13:6) Adi ernalem kita gundari nari man Jahwe janah tuhu-tuhu tek man baNa, banci kita pang ngadapi serangen Gog pagi. *

17. Engkai maka la perlu kita mbiar Harmagedon e? (Nen gambar bas sampul majalah enda.)

¹⁷ Bagi si nggo ituriken bas artikel si nggo lewat, teremen arah kita lahir bas wari-wari pendungi. Tapi lit nge arapenta banci selamat arah kiniseran si mbelin. Bas pendungi wari-wari pendungi e pagi, terjadi me perang Harmagedon si luar biasa. Tapi la perlu kita mbiar. Engkai? Sebap labo kita si erperang tapi Jahwe. (Kua. 1:33; Esek. 38:18-20; Sak. 14:3) Kenca ibereken Jahwe perentah, ipinpin Jesus Kristus me pasuken Dibata guna erperang. PasukenNa eme kalak Kristen si nggo ku surga bage pe malekat-malekat si seh kel buena. Iserangna me  Setan, malekat-malekat jahat, ras pasuken Setan si lit i doni.​—Dan. 12:1; Ket. 6:2; 17:14.

18. (a) Kai janji Jahwe? (b) Kai si ikataken Ketangkasen 7:9, 13-17 si erbanca kam tek kerna wari si pepagi?

¹⁸ Enggo erjanji Jahwe, nina, “La lit senjata si banci nakiti kam.” (Jes. 54:17) Umat Jahwe si setia eme “kelompok jelma si nterem” pasti “selamat ngelewati kiniseran si mbelin”! Kenca si e banci kalak e terus ngelayani Jahwe. (Baca Ketangkasen 7:9, 13-17.) Adi sibaca janji-janji bas Pustaka, banci kita tek maka selamat nge kita pagi! Siteh maka “ijagai Jahwe kalak si setia.” (Msm. 31:23, NW) Bas wari si pepagi, kerina si ngkelengi Jahwe janah muji Ia pasti ermeriah ukur perban gelar Jahwe nggo imuliaken.​—Esek. 38:23.

19. Kai masa depan si luar biasa si lanai ndekah sidat?

¹⁹ Uga nge kira-kira jadina isi 2 Timotius 3:2-5 adi ayat e ipake guna njelasken kerna kalak si nggeluh bas doni si mbaru si bebas arah pengaruh Setan? (Nen kotak “ Uga nge Sifat Manusia bas Doni si Mbaru?”) Sekalak turang seninanta si gelarna George Gangas, * si pernah jadi anggota Badan Pinpinen, ngataken, “Adi kerina jelma si lit bas doni enda turang seninanta, pasti la tanggung siakap riahna! Kentisik nari, banci kam nggeluh bas doni si mbaru. Enda sada kesempaten si seh kel mehergana. Kam banci nggeluh rasa lalap, bali bagi Jahwe si nggeluh rasa lalap.” Tuhu-tuhu luar biasa kel arapen e!