1. Engkai maka kita tek gundari kita nggo nggeluh bas “wari-wari pendungi”?

TAHUN piga kam lahir? Kenca 1914 nge? Adi bage, lahir kenca kam, kam nggeluh bas “wari-wari pendungi” doni enda. (2 Tim. 3:1) Pernah ikataken Jesus kai saja si terjadi bas wari-wari pendungi. Misalna terjadi perang, kurang pangan, gempa, melala pinakit, reh buena kejahaten, janah umat Jahwe pe isiksa. Pasti pernah sibegi kerna si e. (Mat. 24:3, 7-9, 12; Luk. 21:10-12) Enggo ka siidah uga sifat manusia si gundari bali bagi si pernah ikataken Rasul Paulus. (Nen kotak “ Uga nge Sifat Manusia si Gundari?”) Emaka selaku umat Jahwe, tek kita maka gundari kita nggo nggeluh bas “wari-wari pendungi.”

2. Penungkunen kai saja si ijawap kari?

² Perban nggo ndauh kel kita arah tahun 1914, pasti gundari nggo seh kita bas bagin pendungi “wari-wari pendungi.” Lanai ndekah ikernepken me doni enda, emaka perlu siteh jawapen piga-piga penungkunen si penting enda: Kai saja nge si terjadi bas bagin pendungi “wari-wari pendungi”? Janah kai ate Jahwe si arus silakoken janahta nimai si e kerina terjadi?

3. Menurut 1 Tesalonika 5:1-3, kai nge si iumumken bangsa-bangsa pagi?

³ Baca 1 Tesalonika 5:1-3. Lit ituriken Paulus kerna “wari Jahwe.” “Wari Jahwe” si ikataken bas ayat e imulai sanga ikernepken pagi “Babilon si Mbelin,” eme kerina agama palsu si lit i doni enda, janah “wari” e idungi sanga reh  Harmagedon. (Ket. 16:14, 16; 17:5) Sope reh “wari” e, iumumken bangsa-bangsa pagi, “Dame ras aman!” Mon-mon ikataken peminpin doni kang “dame ras aman” sanga ibahas kalak e uga carana gelah reh kompakna sada negara ras negara si debanna. * Tapi pengumumen e labo seri ras pengumumen “dame ras aman” si lit bas Pustaka. Kai bedana? Sanga lit pagi pengumumen e, iakap nterem kalak nggo berhasil peminpin-peminpin doni enda erban doni reh amanna. Tapi kepeken, nandangi imulai me “kiniseran si mbelin” janah ‘rempet kalak e ikernepken.’​—Mat. 24:21.

4. (a) Kai si lenga siteh kerna pengumumen “dame ras aman”? (b) Kai saja si nggo siteh kerna pengumumen e?

⁴ Lit piga-piga si nggo siteh kerna pengumumen “dame ras aman” e. Tapi lit ka piga-piga si la siteh. La siteh kai nge alasenna maka iumumken peminpin-peminpin doni bage, janah labo ka siteh uga kin kari pengumumen e. Selain si e, la siteh lit nge kari piga-piga pengumumen ntah sada pengumumen ngenca. Tapi kai pe si terjadi, la kita tertipu. Enggom siteh maka peminpin-peminpin doni la banci erban doni enda tuhu-tuhu dame. Siteh ka arah Pustaka, pengumumen e jadi tanda maka nandangi reh me “wari Jahwe”!

5. Menurut 1 Tesalonika 5:4-6, kai si arus silakoken gelah siap kita ngadapi “wari Jahwe”?

⁵ Baca 1 Tesalonika 5:4-6. Ikataken Paulus man banta kai si arus silakoken gelah siap kita ngadapi “wari Jahwe.” Nina, “Ula kita medem bagi kalak si deban.” Tapi arus kita ‘tetap medak janah erjaga-jaga.’ Misalna, arus kita tetap netral janah arus kita hati-hati gelah ula kita ikut bas urusen politik doni enda. Adi sempat kita ikut bas urusen politik, nggo ikut kita jadi “bagin i bas doni enda.” (Joh. 15:19) Siteh maka Kerajan Dibata ngenca si banci erban doni enda tuhu-tuhu dame.

6. Engkai maka perlu sisampati kalak si deban? Janah uga carana?

⁶ Selain sipastiken ‘tetap kita medak janah erjaga-jaga,’ sisampati ka kalak si deban gelah itehna kai si ikataken Pustaka kerna kai si terjadi pagi bas doni enda. Silakokenlah e gundari perban adi nggo reh pagi kiniseran si mbelin, lanai lit kesempaten kalak nembah Jahwe. Emaka, perban sitik nari ngenca waktuna, sigunakenlah waktu e erberita! *

7. Kai si ate Jahwe silakoken gundari?

⁷ Enggo seh kel deherna wari Jahwe e. Emaka ate Jahwe terus min kita semangat erberita perban sitik nari ngenca  waktuna. Arus ka sipastiken maka ‘sibuk kita i bas ndahiken dahin Tuhan.’ (1 Kor. 15:58) Mbarenda nggo ikataken Jesus kai si arus silakoken. Kenca ikatakenna kai saja si terjadi bas wari-wari pendungi, ikatakenna ka, “Janah, berita si meriah e arus iberitaken lebe man kerina bangsa.” (Mrk. 13:4, 8, 10; Mat. 24:14) Emaka ingetlah: Tiap ikut kam erberita, nggo ikut kam erban nubuat Pustaka terjadi.

8. Kai buktina dahin erberita terus reh majuna?

⁸ Kai buktina dahin erberita terus reh majuna? Tiap tahun, reh teremna si nggit megiken berita si meriah kerna Kerajan Dibata. Contohna, cuba ukuri kerna jumlah perberita i sebelang doni si erbuena bas wari-wari pendungi enda. Bas tahun 1914, lit 5.155 perberita bas 43 negeri. Gundari, lit kira-kira 8,5 juta perberita bas 240 negeri! Tapi dahin erberita lenga bo dung. Arus terus sipebetehken man kalak maka Kerajan Dibata ngenca si banci ndungi kerina masalah manusia.​—Msm. 145:11-13.

9. Engkai maka arus terus kita erberita?

⁹ Terus kita erberita ngasa nggo dung kari nina Jahwe. Asa kai nari nge dekahna lit waktu kalak guna nandai Dibata Jahwe ras Jesus Kristus? (Joh. 17:3) La siteh. Si nggo siteh, sope reh kiniseran si mbelin, ise pe si “pusuh ras perbahanenna ngaloken kebenaren guna kegeluhen si rasa lalap” banci denga ibegina berita si meriah janah ikut ngelayani Jahwe. (Perb. 13:48) Uga caranta nampati kalak sanga lit denga waktu?

10. Kai saja si ibereken Jahwe gelah banci sisampati kalak meteh kebenaren?

¹⁰ Mbue kel si nggo ibereken Jahwe arah organisasiNa gelah banci sisampati kalak meteh kebenaren. Misalna, ilatih kita tiap minggu bas perpulungen tengah pekan. Iajari kita i je uga carana gelah reh beluhna kita erberita ras ndahi mulihi. Iajari ka kita uga carana nampati kalak erlajar Pustaka. Selain si e, nggo ibereken organisasi Jahwe man banta Alat-Alat Pengajarenta. Kerina publikasi si lit bas Alat-Alat Pengajarenta nampati kita . . .

• bas mbenaken percakapen,

• gelah nggit kalak megiken kita,

• gelah nggit kalak meteh terbuen kerna Pustaka,

•   sanga sisampati kalak erlajar Pustaka, bage pe

• ngiahken kalak mbuka situs jw.org janah ngundang ia ku Bale Kerajan.

Labo lit ertina Alat-Alat Pengajarenta e adi la sipake. * Misalna, jumpa kam ras kalak si nggit megiken beritanta. Adi iberekenndu man bana risalah ntah pe majalah, banci kari baca-bacana e ngasa reh ka kam mulihi ndahi ia. Arus iusahaken kerina umat Jahwe erberita asa ngasupna tiap bulan, sebap enda tanggung jawapna.

11. Engkai maka iban Pelajaren Pustaka Online?

¹¹ Lit ka cara Jahwe nampati kalak meteh kebenaren, eme arah Pelajaren Pustaka Online si lit bas jw.org^®. * Engkai maka iban cara si bage? Bas tiap bulan, lit ribun kalak i sebelang doni si ndarami uga carana mpelajari Pustaka bas Internet. Pelajaren si lit bas jw.org banci nampati kalak e gelah mulai ipelajarina Pustaka. Selain si e, banci saja kalak si ijumpai kita sanga erberita la ia mis nggit erlajar Pustaka. Adi bage, banci sibuka jw.org janah situduhken bana Pelajaren Pustaka Online bas bahasa si iangkaina ntah pe banci ka sikirimken link ntah alamat Internetna.

12. Kai saja si banci ipelajari arah Pelajaren Pustaka Online?

¹² Si ibahas bas Pelajaren Pustaka Online eme: “Pustaka ras Pengarangna,” “Tokoh-Tokoh Utama bas Pustaka,” bage pe “Arapen si Lit bas Pustaka.” Sanga ipelajari kalak kerna si e, dungna banci itehna:

• maka lit gunana Pustaka e man bana,

• ise Jahwe, Jesus, ras malekat-malekat,

• kai tujun Dibata nciptaken manusia, bage pe

• ngkai maka lit kejahaten ras kiniseran

Bas pelajaren e pe ijelasken ka kai si ilakoken Jahwe guna . . .

• nasapken kiniseran ras kematen,

• mpekeke kalak si nggo mate, bage pe

• ngkernepken pemerentahen manusia si erban kita susah janah nggantikenca alu Kerajan Dibata.

13. Adi nggo ipelajari sekalak jelma pelajaren online, perlu denga nge ia erlajar Pustaka ras sekalak Saksi? Jelasken.

¹³ Iban pelajaren online labo ertina lanai perlu kalak erlajar ras Saksi Jahwe. Enggo ibereken Jesus banta tugas si penting guna ngajari kalak gelah jadi muridna. Ateta min gelah kalak si berminat nggit ia mbuka pelajaren online, nggit ia mpelajarisa, janah merhat ka ia meteh terbuen. Alu bage, dungna banci saja nggit ia erlajar Pustaka. Bas bagin pendungi tiap pelajaren online, iiahken kalak e gelah ipindona erlajar Pustaka ras sekalak Saksi. Tiap wari, lit lebih 230 kalak i sebelang doni si mindokenca! Seh kel pentingna erlajar Pustaka ras sekalak Saksi!

14. Menurut perentah Jesus bas Matius 28:19, 20, kai si arus silakoken? Janah ngkai?

¹⁴ Baca Matius 28:19, 20. Sanga sisampati kalak erlajar Pustaka, arus siusahaken asa ngasupta ‘erban kalak e jadi murid Jesus’ janah ‘siajari ia ngelakoken kerina si nggo iperentahken Jesus.’ Perlu ka sisampati ia gelah itehna maka arus ilayanina Jahwe. Emaka perlu siiahken ia gelah idalankenna kai si nggo ipelajarina, iberekenna geluhna man Jahwe, janah iperidiken. Enda ngenca carana gelah banci  kalak e selamat bas wari Jahwe.​—1 Pet. 3:21.

15. I bas kai la ateta siban sia-sia waktunta? Janah ngkai?

¹⁵ Bagi si nggo sibahas ndai, lanai mbue waktunta. Kentisik nari, ikernepken me doni enda. Emaka sia-sia kel waktunta adi siterusken erlajar Pustaka ras kalak si la atena tutus jadi umat Jahwe. (1 Kor. 9:26) Enggo ngasak kel dahinta e! Enterem denga si perlu mbegiken berita si meriah sope terlambat.

16. Menurut Ketangkasen 18:2, 4, 5, 8, kai si arus silakoken? (Nen ka cataten i teruh.)

¹⁶ Baca Ketangkasen 18:2, 4, 5, 8. Ikataken Jahwe ka bas ayat-ayat enda kai si ateNa ilakoken umatNa. Arus ipastiken kalak Kristen situhu-tuhu maka sitik pe lanai ia ikut bas Babilon si Mbelin. Sope erlajar Pustaka, banci saja si erlajar e ikut denga bas agama palsu. Misalna, ikut denga ia bas acara agamana ntah pe acara si deban si lit hubungenna ras agamana e, ntah pe isumbangkenna denga senna man agama e. Gelah banci ia jadi perberita si lenga iperidiken, arus ipastikenna lebe maka tuhu-tuhu lanai ia ikut bas agama palsu. Arus itulisna surat pengunduren diri arah gereja ntah pe arah organisasi agama si pernah iikutina, janah arus tuhu-tuhu ipastikenna maka lanai ikutina si e kerina. *

17. Pendahin kai si la banci ilakoken kalak Kristen? Janah ngkai?

¹⁷ Arus ipastiken kalak Kristen situhu-tuhu maka sitik pe la lit hubungen pendahinna ras Babilon si Mbelin. (2 Kor. 6:14-17) Contohna, pasti la kita nggit jadi karyawan gereja. Selain si e, adi erdahin kita man kalak, arus kita hati-hati gelah ula sialoken dahin si banci ndukung agama palsu bagi ngerawat gereja. Adi lit bisnista sendiri, la ateta siayaki ntah pe sialoken dahin si lit hubungenna ras Babilon si Mbelin. Engkai maka arus kita tegas bas si e? Sebap la ateta sidukung Babilon si Mbelin. Ciga kel ate Dibata ngidah Babilon si Mbelin perban iajarkenna ajaren palsu janah la ikutkenna perentah Dibata.​—Jes. 52:11. *

18. Kai buktina idalanken sekalak turang seninanta kai nina Pustaka kerna pendahin?

¹⁸ Lit sekalak pertua si usahana eme tukang kayu. Piga-piga tahun si nggo lewat, ipindo sekalak pemborong ia ndahiken  sada dahin bas gereja deher inganna tading. Sitik kel bo ngenca dahin e. Iteh pemborong e maka labo pernah nggit turang seninanta e ndahiken dahin man gereja. Tapi sekali enda, lanai teh pemborong e man ise nari ia mindo penampat. Amin gia bage, tetap iikutken pertua e kai nina Pustaka janah la ialokenna dahin e. Seminggu kenca si e, lit foto sekalak tukang kayu bas koran, tukang kayu e sangana masang salib bas gereja e. Bicara ialoken pertua ndai dahin bas gereja e, fotona me si lit bas koran. Adi sempat e terjadi, pasti nggo mejin kel iakap turang senina bas runggun gelar pertua e! Janah pasti ceda kel ukur Jahwe ngidahsa.

19-20. (a) Kai saja si nggo sipelajari ndai? (b) Kai ka si perlu sipelajari?

¹⁹ Bagi si nggo ikataken bas Pustaka, lanai ndekah terjadi me sada peristiwa si penting. Iumumken peminpin-peminpin doni enda pagi “dame ras aman.” Perban nggo iajari Jahwe kita, siteh maka labo banci tuhu-tuhu dame iban bangsa-bangsa doni enda. Kai si arus silakoken sope iumumken peminpin-peminpin doni enda “dame ras aman” bage pe sope imulai “kiniseran si mbelin”? Ate Jahwe terus min kita semangat mberitaken berita si meriah kerna Kerajan Dibata janah terus siusahaken ngajari kalak gelah jadi murid Kristus. La ka ateta sitik pe ikut bas agama palsu. E ertina la kita nggit jadi anggota agama palsu ntah pe la kita nggit ngaloken dahin si lit hubungenna ras Babilon si Mbelin.

²⁰ Lit ka peristiwa si deban si terjadi pagi bas bagin pendungi “wari-wari pendungi.” Kai saja e? Janah kai ka ate Jahwe silakoken? Kai nge si arus silakoken gelah siap kita ngadapi kerina si lanai ndekah terjadi? Sijawap kari e kerina bas artikel seterusna.