1. Kai si ikataken 2 Korinti 3:1-3 si banci nampati kita ngangkai maka sada hak istimewa kel banci ngajari kalak kerna Jahwe janah dungna iperidiken? (Nen gambar bas sampul majalah enda.)

UGA nge perasanndu sanga idahndu kalak si erlajar Pustaka bas runggunndu iperidiken? Pasti meriah kel akapndu. (Mat. 28:19) Adi si iperidiken e kalak si isampatindu erlajar Pustaka, pasti la tanggung kapndu riahna! (1 Tes. 2:19, 20) Kalak si erlajar Pustaka banci maju janah iperidiken perban enggo iusahakenndu ras turang senina nampati ia. Emaka kalak si erlajar si enggo iperidiken banci ikataken “surat pujin” man kalak si ngajari ia bage pe man kerina kalak si lit bas runggun.​—Baca 2 Korinti 3:1-3.

2. (a) Penungkunen penting kai si perlu siukuri, janah engkai? (b) Kai pelajaren Pustaka e? (Nen cataten i teruh.)

² Bas empat tahun terakhir enda, lit kira-kira 10.000.000 pelajaren Pustaka * i belang-belang doni si ilaporken tiap bulanna. Luar biasa kel enda! Janah, bas empat tahun e, tiap tahunna lit kira-kira 280.000 kalak si iperidiken. Uga kita banci nampati kalak si erlajar Pustaka si debanna gelah banci iperidiken? Ibereken Jahwe denga kesempaten man kerina kalak gelah banci jadi SaksiNa. Emaka, sisampati ateta kalak si erlajar Pustaka asa ngasupta gelah meter maju janah iperidiken. Kentisik nari ngenca waktuna!​—1 Kor. 7:29a; 1 Pet. 4:7.

3. Kai si man bahasenta bas artikel enda?

 ³ Isadari Badan Pinpinen maka pendahin erban murid enda enggo ngasak kel. Emaka, isungkuni kalak e kantor-kantor cabang gelah iteh kalak e uga carana nampati kalak si erlajar Pustaka ngasa iperidiken. Bas artikel enda bage pe artikel seterusna, sibahas kari kai saja si banci sipelajari arah perintis-perintis, utusen injil, bage pe pertua keliling bas erbage-bage negeri. * (Kua. 11:14; 15:22) Ijelasken perberita-perberita si erpengalamen e kai saja si perlu ilakoken kalak si ngajari Pustaka bage pe kalak si erlajar Pustaka gelah berhasil. Bas artikel enda, sibahas kari kai saja si perlu ilakoken kalak si erlajar Pustaka gelah banci ia terus maju janah iperidiken.

4. Banci nge berhasil adi la ndekah-ndekah ngajari kalak kerna Pustaka?

⁴ Enterem turang seninata la ndekah-ndekah ngajari kalak erlajar Pustaka, janah mon-mon ibanna i lebe-lebe pintu. Amin pe e cara si mehuli nampati kalak si erlajar gelah merhat meteh terbuen kerna Pustaka, tapi biasana pelajaren si bage labo ilakoken tiap minggu. Gelah banci reh belinna sura-sura kalak si erlajar meteh terbuen kerna Pustaka, lit perberita si mindo nomor teleponna. Alu bage, banci ibagikenna topik-topik si mejile arah Pustaka. Banci saja terus ilakoken kalak e pembahasen si bage erbulan-bulan dekahna. Tapi, adi sitik ngenca waktu si igunaken kalak si erlajar guna mpelajari Pustaka, mbelin kemungkinenna la ia banci maju janah iperidiken.

5. Uga kata-kata Jesus bas Lukas 14:27-33, banci nampati kita erban murid?

⁵ Pernah ijelasken Jesus kai saja si arus ilakoken kalak gelah banci jadi pengikutna. Iban Jesus perumpaman kerna kalak si atena mbangun menara bage pe kerna sekalak raja si atena erperang. Bas perumpaman e, kalak si atena mbangun menara arus “kundul ia lebe janah ikirana biayana” gelah banci idungina menara e. Raja e pe arus ‘kundul lebe janah ipindona pedah’ guna meteh banci ntah lang pasukenna menang. (Baca Lukas 14:27-33.) Jelas me, iteh Jesus maka ope denga jadi muridna arus tuhu-tuhu iangkai kalak kai saja si perlu ilakoken adi enggo jadi murid Jesus. Emaka, gelah iangkai kalak si erlajar kerna si e, arus ia  erlajar tiap minggu. Kai si banci silakoken guna nampati ia?

6. Kai saja si arus silakoken gelah kalak si erlajar Pustaka banci maju secara rohani?

⁶ Tangtangna, siusahaken lebe erlajar Pustaka terdekahen ras ia. Banci bahasndu sada topik tambahen tiap dahindu ia mulihi. Adi meriah iakapna terdekahen erlajar, banci sungkunindu ia nggit ntah lang ia mereken terbuen waktuna erlajar Pustaka. Adi sedekah enda i lebe-lebe pintu ngenca kena erlajar Pustaka, banci sungkunindu ia nggit ntah lang ia gelah pelajaren e iterusken bas rumah ntah pe kundul i teras. Arah jawapenna banci siteh tuhu-tuhu nge atena erlajar Pustaka ntah lang. Adi ia nggit, banci sungkunindu nggit nge ia erlajar Pustaka dua kali seminggu gelah banci meter maju secara rohani. Tapi, selain erlajar Pustaka sekali ntah pe dua kali seminggu lit denga si perlu silakoken.

7. Sope isampatindu kalak erlajar Pustaka, uga carandu erban persikapen si mehuli?

⁷ Selaku guru, banlah persikapen sope ngajari kalak kerna Pustaka. Bacalah lebe bahan ras ayat si nandangi ibahas. Angkaindulah lebe kerina pokok pentingna. Ukuri kerna judul pasal si ibahas, subjudulna, penungkunen paragrapna, ayat si perlu ibaca, gambar-gambar si lit i je, bage pe video-video si banci saja lit hubungenna ras pelajaren e. Kenca si e, ukuri ka uga carana njelasken pelajaren e alu sederhana ras jelas man kalak si erlajar gelah banci iangkaina janah idalankenna kai si ipelajarina.​—Neh. 8:8; Kua. 15:28a.

8. Menurut Kolose 1:9, 10, engkai maka perlu sitotoken kalak si erlajar ras kita?

⁸ Sope kam erban persikapen, ertotolah man Jahwe. Totokenlah kalak si erlajar ras kai si iperlukenna. Pindolah man Jahwe gelah kai si iajarkenndu banci kari kena ku pusuhna. (Baca Kolose 1:9, 10.) Cuba ukuri bagin kai saja si mesera iakapna ngangkaisa ntah pe si mesera iakapna ngalokenca. Ingetlah maka tujunndu nampati ia maju secara rohani janah iperidiken.

9. Uga carana nampati kalak si erlajar Pustaka erban persikapen?

⁹ Siarapken gelah kalak si enggo ratur erlajar Pustaka ngergai kai si enggo ilakoken Jahwe ras Jesus, janah merhat ka ia erlajar terbuen. (Mat. 5:3, 6)  Gelah tuhu-tuhu pelajaren e erguna man kalak si erlajar, arus bulat ukurna sanga erlajar ras kita. Emaka, jelasken man bana maka perlu ia erban persikapen ope denga erlajar alu mbaca bahan pelajarenna ras ngukuri kai hubungen pelajaren e ras kegeluhenna. Uga kam banci nampati ia? Ras-raslah kena erban persikapen gelah itehna uga carana. * Ajari ia ndarami jawapen langsung arah penungkunen tercetak. Cidahken man bana maka piga-piga kata ngenca si perlu igarisina guna nginget jawapenna. Kenca si e, suruh ia njawap nggunaken kata-katana sendiri. Sanga ibegindu jawapenna banci itehndu tuhu-tuhu iangkaina nge pelajaren e ntah lang. Tapi, selain nampati kalak si erlajar Pustaka erban persikapen, lit denga ka si perlu ilakokenndu.

10. Engkai maka kalak si erlajar Pustaka perlu mbaca Pustaka tiap wari? Janah uga gelah tuhu-tuhu erguna pembacan e man bana?

¹⁰ Selain erlajar Pustaka ras kam tiap minggu, lit denga ka si perlu ilakoken kalak si erlajar tiap wari. Perlu ibegikenna Jahwe janah ngerana ka man Jahwe. Banci ibegikenna Jahwe alu mbaca Pustaka tiap wari. (Jos. 1:8; Msm. 1:1-3) Jelasken man bana uga cara nggunaken “Jadwal Pembacan Pustaka si Badia” si lit bas jw.org. * Gelah banci tuhu-tuhu erguna pembacan Pustaka e man bana, iahken ia ngukuri kai si banci ipelajarina kerna Jahwe bage pe carana ndalanken kai si ipelajarina.​—Perb. 17:11; Jak. 1:25.

11. (a) Kai si banci nampati kalak si erlajar ertoto alu cara si benar? (b) Engkai maka kalak si erlajar perlu rusur ertoto man Jahwe?

¹¹ Iahken kalak si erlajar gelah ngerana man Jahwe alu ertoto tiap wari. Sope ras kenca erlajar Pustaka, ertotolah kam alu bulat ukur ras kalak si erlajar, belaskenlah gelarna sanga ertoto. Sanga ibegina totondu, itehna me uga carana ertoto alu bulat ukur. Selain si e, itehna maka toto e arus ipeseh man Jahwe janah erkelangken Jesus Kristus. (Mat. 6:9; Joh. 15:16) Cuba bayangkenndu, adi kalak si erlajar mbaca Pustaka (mbegiken Jahwe) bage pe ertoto (ngerana man Jahwe) tiap wari, pasti reh rembakna ia ras Jahwe! (Jak. 4:8) Adi bage banna tiap wari pasti maju ia secara rohani janah dungna iperidiken.  Selain si e, kai deba nari si banci nampati ia?

12. Uga carata nampati kalak si erlajar gelah rembak ras Jahwe?

¹² Kalak si erlajar Pustaka la bias ngangkai kai si ipelajarina, tapi arus ka min kena ku pusuhna. Engkai? Perban adi enggo kena ku pusuhna, tersuruh me ukurna ndalanken kai si ipelajarina. Sanga Jesus ngajar, isampatina kalak ngangkai kai si iajarkenna. Tapi, tersuruh ukur kalak ngikutken Jesus perban kai si iajarkenna e kena ku pusuh kalak e. (Luk. 24:15, 27, 32) Perlu ka iteh kalak si erlajar maka banci ia rembak ras Jahwe, janah ianggapna Jahwe e jadi Bapakna, Dibatana, ras Temanna. (Msm. 25:4, 5) Sanga erlajar kena, rusurlah turiken kerna sipat-sipat Jahwe. (Kel. 34:5, 6; 1 Pet. 5:6, 7) La soal topik kai pe si ipelajari kena, rusurlah turiken kerna Jahwe. Sampatilah kalak si erlajar ngergai kekelengen Jahwe, kiniulinNa, bage pe perkuah ateNa. Ikataken Jesus maka “perentah si mbelinna ras si pentingna” eme ‘arus kelengindu Jahwe Dibatandu.’ (Mat. 22:37, 38) Emaka usahakenlah nampati kalak si erlajar Pustaka gelah tuhu-tuhu keleng atena Jahwe.

13. Bereken contoh kerna uga carana nampati kalak si erlajar gelah itehna sipat-sipat Jahwe.

¹³ Sanga kam ngerana-ngerana ras kalak si erlajar, ceritaken man bana kai saja si erban keleng atendu Jahwe. Enda banci saja erban ia sadar maka ia pe perlu erusaha gelah banci rembak ras Jahwe janah engkelengi Ia. (Msm. 73:28) Misalna, bas paragrap ntah pe ayat tertentu lit nge sada kalimat si kena ku pusuhndu si ncidahken kerna kekelengen, kepentaren, keadilen, ras kuasa Jahwe? Sanga bahasndu paragrap ntah pe ayat e, ceritakenlah kerna si e man kalak si erlajar. Kataken man bana maka enda salah sada alasenna keleng atendu Bapakta si i surga. Kai ka si perlu ilakoken kalak si erlajar Pustaka gelah banci ia maju secara rohani janah iperidiken?

14. Menurut Heber 10:24, 25, engkai perpulungen banci nampati kalak si erlajar gelah reh terna maju secara rohani?

¹⁴ Kerina kita ersura-sura gelah kalak si erlajar Pustaka banci maju secara rohani janah iperidiken. Emaka, penting kel siiahken ia gelah reh ku perpulungen. Kalak si enggo erpengalamen ngajar Pustaka  ngataken maka kalak si erlajar banci meter maju adi mis ia reh ku perpulungen. (Msm. 111:1) Ijelasken piga-piga kalak si ngajar Pustaka man kalak si iajarina maka banci idatna terbuen pemeteh adi reh ia ku perpulungen. Baca Heber 10:24, 25 man kalak si erlajar Pustaka, janah jelasken kai saja manpaat si banci idatna adi reh ia ku perpulungen. Putarken video Kai si Ilakoken i Bale Kerajan? * Sampati kalak si erlajar Pustaka gelah penting iakapna ratur reh ku perpulungen.

15. Kai si banci silakoken gelah kalak si erlajar Pustaka banci teriahken ratur reh ku perpulungen?

¹⁵ Kai si banci ilakokenndu adi kalak si erlajar Pustaka lenga reh ku perpulungen ntah pe lenga ratur reh ku perpulungen? Ceritakenlah alu semangat kai si mbaru-mbaru enda ipelajarindu bas perpulungen. Banci saja e erbanca ia nggit reh ku perpulungen. Berekenlah man bana Sora Ermomo bage pe Agenda Perpulungen Pelayanen ras Kegeluhen Kristen​ si ibahas bas minggu e. Cidahken man bana kai saja si ibahas bas perpulungen e, janah sungkuni bagin si apai si akapna si menarikna. Sanga tangtangna ia reh ku perpulungen pasti kena kel ku pusuhna kai si idahna janah si ibegina i je. Kai si idahna janah si ibegina i je pasti ndauh ulin asangken perpulungen agama-agama si deban. (1 Kor. 14:24, 25) Pasti jumpa ia ras kalak si banci jadi usihen man bana ras banci nampati ia maju secara rohani janah iperidiken.

16. Kai saja si perlu silakoken gelah kalak si erlajar Pustaka banci maju secara rohani janah iperidiken? Janah kai si man bahasenta bas artikel seterusna?

¹⁶ Jadi, kai saja si banci silakoken gelah kalak si erlajar Pustaka ras kita banci maju secara rohani janah iperidiken? Iahkenlah ia erlajar tiap minggu janah erban persikapen sope erlajar. Alu bage, penting iakapna erlajar Pustaka. Siiahken ka ia gelah mbaca Pustaka bage pe ertoto tiap wari gelah iusahakenna rembak ras Jahwe. Selain si e, siban ateta gelah tersuruh ukurna reh ku perpulungen (Nen kotak, “ Si Perlu Ilakoken Kalak si Erlajar Pustaka gelah Banci Maju Secara Rohani janah Iperidiken.”) Bas artikel seterusna, sibahas kari kai deba nari si perlu silakoken gelah kalak si erlajar Pustaka ras kita banci maju secara rohani janah iperidiken.