Gelah banci dalanken Ajar-Ajar Pustaka tugas kalak e, arus kalak e perpang. Engkai? Perban arus beritaken kalak e “berita si meriah” man kalak si meteruk ukur, termasuk ngumumken “wari pembalasen” Jahwe man kalak jahat.

Turang Senina J. H. Hoskin si tading i Kanada, pang kel erberita amin pe lit tentangen. Bas musim semi tahun 1921, jumpa ia ras sekalak pendeta Metodis. Nina Turang Senina Hoskin man bana, “Situhuna, banci kita ngerana-ngerana kerna Pustaka. Amin pe lit pendapatta si la seri, pasti banci sicakapken alu mehuli.” La kepe bage si terjadi. Nina Turang Senina Hoskin, “Piga-piga menit denga pe kami ngerana enggo merawa kel pendeta e. Empetna kel nutup pintuna. Paksa si e, kuakap pecah nge kari kaca pintuna e.”

Sergang pendeta e ia, nina, “Pangen kam lawes ku kalak si lenga Kristen ah!” Sinik saja Turang Senina Hoskin. Tapi, sanga tadingkenna rumah e, nina bas pusuhna, ‘Ia pe labo bagi kalak Kristen perbahanenna!’

Paginna, sanga khotbah pendeta e bas gerejana, katakenna si la tuhu kerna Turang Senina Hoskin. Nina Turang Senina Hoskin, “Ikataken pendeta e man anggota gerejana maka aku me penipu si berbahayana kel bas kota e janah arus aku itembak.” Tapi, Turang Senina Hoskin la nyerah. Enterem kalak si banci jumpaina sanga erberita bas daerah e, bagenda nina, “Meriah kel kuakap erberita bas daerah e. Lit ka kalak bas daerah e si ngataken man bangku, ‘Kuteh maka kam pelayan Dibata.’ Ibereken kalak e ka atena kai si kuperluken.”

Guna nampati kalak si nggit erlajar Pustaka maju secara rohani, Ajar-Ajar Pustaka erban program pelajaren Pustaka bas majalah The Golden Age. * Bas salah sada program e, lit penungkunen si banci ibahas orang tua ras anak-anakna. Isungkun orang tua anak-anakna alu penungkunen e, jenari sampatina kalak e ndatken jawapenna arah Pustaka. Piga-piga penungkunenna eme: “Piga nge buku-buku si lit bas Pustaka?” Si debanna, “Kerina nge pagi kalak Kristen ianiaya?” Penungkunen si bage banci nampati anak muda gelah pang erberita.

 Lit ka program man kalak si enggo meteh terbuen isi Pustaka. Ibereken man kalak e penungkunen si jawapenna lit bas buku Studies in the Scriptures jilid pertama. Lit ribun kalak si ndatken manpaat arah program-program pelajaren Pustaka e. Tapi bas majalah The Golden Age 21 Desember 1921, iumumken maka duana program e nandangi ipengadi. Engkai?

Iteh turang senina si minpin bas organisasi maka perlu reh raturna ipelajari kalak Pustaka. Emaka, bas bulan November 1921, irilis kalak e buku The Harp of God. Kalak si nggit ngaloken buku e pe banci ngikuti program pelajaren Pustaka si ilakokenna sisada, la perlu sampati kalak si deban. Program e banci nampati kalak meteh “sura-sura Dibata guna mereken kegeluhen si rasa lalap man jelma.” Uga pelajaren e ilakoken?

Sanga buku e ialoken sekalak jelma, lit ka datna sada kartu si isina njelasken bagin si apai saja si perlu bacana. Seminggu kenca si e, alokenna ka kartu si deban si isina kerna bahan si enggo bacana. Bas kartu e pe ijelasken ka bagin si apai si arus bacana guna ibahas bas minggu berikutna.

Sekalak si erlajar Pustaka ngaloken sada kartu arah runggun nari, janah kartu e alokenna tiap minggu sedekah 12 minggu. Biasana, si ngirimken kartu-kartu e eme perberita si la banci erberita arah rumah ku rumah perban ia enggo metua ntah pe perban si debanna. Contohna eme Anna K. Gardner, arah Millvale, Pennsylvania, Amerika Serikat nari. Bagenda nina, “Kakakku Thayle mesera kapna erdalan, emaka sanga buku The Harp of God irilis, banci ia ikut nampati ngirimken kartu-kartu e tiap minggu.” Adi si erlajar Pustaka enggo ndungi program e, lit sekalak turang senina arah runggun si reh ndahi ia guna nampati ia mpelajari terbuen kerna Pustaka.

Bas pendungi tahun e, Turang Senina J. F. Rutherford ngirimken sada surat man kerina runggun. Nina bas surat e, “Dahin erberita si meriah enggo reh belangna janah enggo nampati enterem kalak lebihen asangken tahun-tahun si enggo lewat.” Nina ka, “Melala denga dahin si arus silakoken. Sisemangatilah kalak si deban gelah ikut bas pendahin si luar biasa enda.” Ajar-Ajar Pustaka si Badia enggo terbukti ngikutken nasehat e. Bas tahun 1922, pang kalak e erberita kerna Kerajan Dibata janah terus reh semangatna.