1. Engkai maka enterem kalak bingung?

GUNDARI melala agama si ngaku Kristen janah katakenna maka cara kalak e nembah Dibata enggo benar. E me sebapna enterem kalak bingung. Tersungkun-sungkun kalak e, “Kerina kin agama erban meriah ukur Dibata? Ntah sada kin ngenca agama si benar?” Selaku Saksi-Saksi Jahwe, banci nge kita tuhu-tuhu tek maka enggo siajarken kebenaren ras carata nembah Jahwe enggo bagi sura-suraNa? Mari sibahas bukti-buktina.

2. Menurut 1 Tesalonika 1:5, engkai maka tek kel Rasul Paulus maka lit bas ia kebenaren?

² Tek kel Rasul Paulus maka lit kebenaren bas ia. (Baca 1 Tesalonika 1:5.) Engkai? Perban rajin ia mpelajari Kata Dibata, labo terjeng perasanna saja. Tek ia maka “kerina isi Kitap si Badia rehna arah Dibata nari.” (2 Tim. 3:16) Sanga pelajarina Pustaka, datna bukti-bukti si jelas maka Jesus eme Mesias si ijanjiken. Peminpin-peminpin agama Jahudi la nggit tek nandangi bukti-bukti e. Kalak si munapik e ngaku-ngaku jadi wakil Dibata, tapi perbahanenna ncidahken maka tulakna Dibata. (Tit. 1:16) Paulus la seri ras kalak e, la pilih-pilihna kai atena si itekina bas Pustaka. Nggit ia ndalanken ras ngajarken kerina Kata Dibata.​—Perb. 20:27.

3. Gelah banci kita tek maka si lit bas kita e kebenaren, arus kin siteh kerina jawapen arah penungkunenta? (Nen ka kotak “ La Terturiken Uga Buena Perbahanen Jahwe ras Uga Bagesna PerukurenNa.”)

³ Lit kalak si erpengakap maka agama si benar arusna banci njawap kerina penungkunen, termasuk penungkunen si la lit langsung jawapenna bas Pustaka. Tapi payo  nge bage? Cuba perdiateken contoh Paulus. Iahkenna teman-temanna sada kiniteken gelah ‘mastiken kerinana.’ (1 Tes. 5:21) Tapi akuina ka maka melala si lenga angkaina. Itulisna bagenda, ‘Pemetehta la lengkap.’ Janah nina ka, “Bayangen si la jelas ngenca si banci siidah bas cermin logam.” (1 Kor. 13:9, 12) La angkai Paulus kerinana, kita pe bage. Tapi iteh Paulus kebenaren dasar kerna Jahwe ras sura-suraNa. Kai si enggo tehna e, enggo bias erban ia tek maka si lit bas ia eme kebenaren!

4. Uga carana gelah reh tekna kita maka si lit bas kita e kebenaren, janah kai kari si ibahas bas artikel enda?

⁴ Salah sada carana gelah reh tekna kita maka si lit bas kita e kebenaren, eme alu mbandingken cara Jesus ras cara Saksi-Saksi Jahwe nembah Dibata. Bas artikel enda, sibahas kari uga kalak Kristen situhu-tuhu (1) la nggit nembah berhala, (2) ngergai gelar Jahwe, (3) engkelengi kebenaren, ras (4) tuhu-tuhu sikeleng-kelengen.

5. Arah contoh Jesus, kai si banci sipelajari kerna cara si benar bas nembah Dibata, janah uga carata ngikutken kai si ajarken Jesus e?

⁵ Perban keleng kel ate Jesus nandangi Jahwe, emaka Jahwe ngenca si isembahna, la soal sanga ia tading i surga ntah pe i doni. (Luk. 4:8) Ajarken Jesus man murid-muridna gelah ilakoken kalak e ka bage. Jesus ntah pe murid-muridna si setia la pernah make patung bas nembah Dibata. Perban Dibata la banci iidah, emaka labo banci iban jelma kai pe si mirip bagi Dibata! (Jes. 46:5) Tapi, uga kerna kebiasan erban patung santo-santo ras ertoto man patung-patung e? Bas  perentah si peduaken arah Sepuluh Perentah, bagenda nina Jahwe, ‘Ula ban kena patung ntah kai pe si bentukna mirip ras kai pe si lit i langit, ntah i doni. Ula kena sujud man bana.’ (Kel. 20:4, 5) Kalak si atena erban meriah ukur Dibata, tehna maka labo ate Dibata ipake kalak e patung sanga nembah Ia.

6. Cara ise si ikutken Saksi-Saksi Jahwe bas nembah Dibata?

⁶ Kalak si mpelajari sejarah ngataken maka Dibata ngenca si isembah kalak Kristen bas abad pertama. Contohna, buku “Sejarah Gereja Kristen” (History of the Christian Church) ngataken maka kalak Kristen bas abad pertama la nggit adi isuruh erban patung bas inganna nembah Dibata. Gundari pe, bage si ilakoken Saksi-Saksi Jahwe. La pernah kita ertoto man patung santo-santo ntah pe malekat, janah man Jesus pe la kita nggit ertoto. Selain si e, la pernah siangkat tanta guna hormat man bendera. Labo ka silakoken kai pe si banci ipeseri ras nembah pemerentah ntah pe negarata. Kai pe si terjadi, siusahaken gelah matuhi perentah Jesus enda: “Jahwe Dibatandu si arus isembahndu.”​—Mat. 4:10.

7. I bas kai saja Saksi-Saksi Jahwe beda kel ras agama-agama si deban?

⁷ Gundari, enterem kalak si meriah akapna megiken pendeta-pendeta si terkenal. Mon-mon, perban jadina ate kalak e nandangi pendeta-pendeta e, menam-menam sembah kalak e ia. Enterem si reh ku gereja pendeta-pendeta e, tukurna buku-bukuna, janah berekenna melala sen man kalak e ntah pe man organisasi si idukung kalak e. Lit ka si tek nandangi kerina si ikataken pendeta-pendeta e. Meriah kel akap kalak e jumpa ras pendeta-pendeta e, tempa-tempa enggo jumpa kalak e ras Jesus. Tapi, kalak si nembah Dibata Jahwe labo jelma si ikutkenna. Memang siergai kerina kalak si minpin bas organisasita, tapi siinget kai si iajarken Jesus, nina, “Kerina kena ersenina.” (Mat. 23:8-10) Labo jelma si man ikutenta, la soal ia peminpin agama ntah pe peminpin politik. La sidukung kalak e ntah pe organisasi si idukung kalak e. Tapi, tetap ateta netral janah la jadi bagin arah doni enda. I bas si e kerina, beda kel kita ras agama-agama si deban si ngaku-ngaku Kristen.​—Joh. 18:36.

8. Ja nari siteh maka ate Jahwe simuliaken min gelarNa janah siceritaken man kerina kalak?

⁸ I bas sada wari, ertoto Jesus, nina, “O Bapak, muliakenlah gelarNdu.” Ijawap Jahwe totona e alu sora si megang arah surga nari, janah erjanji Jahwe maka pasti imuliakenNa gelarNa. (Joh. 12:28) Sedekah pelayanen Jesus i doni, imuliakenna gelar Bapakna. (Joh. 17:26) Emaka, kalak Kristen situhu-tuhu pe pasti bangga nggunaken gelar Dibata, janah nceritakenca man kalak si deban.

9. Uga kalak Kristen bas abad pertama mbuktiken maka iergai kalak e gelar Dibata?

⁹ Bas abad pertama Masehi, la ndekah kenca runggun Kristen ibentuk, ‘iperdiateken Jahwe bangsa si deban guna milih arah kalak e sada umat man gelarNa.’ (Perb. 15:14) Kalak Kristen bas abad pertama bangga ia make gelar Dibata janah ceritakenna man kalak si deban. Ipake kalak e ka gelar Dibata sanga erberita bage pe sanga nulisken buku-buku bas Pustaka. Alu bage, buktiken kalak e maka  kalak e ngenca si mberitaken kerna gelar Dibata. *—Perb. 2:14, 21.

10. Ja nari siteh maka Saksi-Saksi Jahwe ngenca si mberitaken gelar Jahwe?

¹⁰ Tuhu nge Saksi-Saksi Jahwe ngenca si mberitaken kerna gelar Jahwe? Mari siperdiateken bukti-buktina. Gundari, enterem peminpin-peminpin agama erusaha kel gelah la teh kalak gelar Dibata. Ihapus kalak e gelar Dibata arah Pustaka si iterjemahkenna. Lit ka si ngelarang gelar Dibata ipake bas gerejana. * Jelas me maka Saksi-Saksi Jahwe ngenca si ngergai gelar Dibata. Enggo mbelang kel siberitaken kerna gelar Jahwe, la lit agama si deban si bage ilakokenna. Emaka, perban kita Saksi-Saksi Jahwe, siusahaken ngelakoken si mehulina bas geluhta. (Jes. 43:10-12) Enggo sicetak lebih 240 juta Pustaka si Badia Terjemahen Doni si Mbaru. I je enggo itamaken mulihi gelar Jahwe si sempat ihapus penerjemah-penerjemah Pustaka si deban. Enggo ka sicetak buku-buku si erpalasken Pustaka si nggunaken gelar Jahwe bas lebih 1.000 bahasa!

11. Uga cara kalak Kristen bas abad pertama mbuktiken kekelengenna man kebenaren?

¹¹ Keleng ate Jesus kebenaren kerna  Dibata ras sura-suraNa. Kegeluhen Jesus pe mbuktiken maka tehna kebenaren, janah ceritakenna kebenaren e man kalak si deban. (Joh. 18:37) Pengikut Jesus situhu-tuhu pe keleng atena kebenaren. (Joh. 4:23, 24) Buktina ipeseri Rasul Petrus kalak Kristen situhu-tuhu ras “dalan kebenaren.” (2 Pet. 2:2) Kalak Kristen bas abad pertama mbelin kel kekelengenna man kebenaren. Emaka, la kalak e nggit ngikutken ajaren agama, budaya, ras pendapat kalak si deban si la sesuai ras kebenaren. (Kol. 2:8) Bage ka me gundari, kalak Kristen situhu-tuhu erusaha gelah ‘terus ikutkenna dalan kebenaren.’ Ipastiken kalak e kerina kinitekenna ras dalan geluhna sesuai ras Kata Dibata.​—3 Joh. 3, 4.

12. Kai si ilakoken Badan Pinpinen sanga iteh kalak e perlu iban perubahen kerna pengangkanta, janah engkai maka iban kalak e perubahen e?

¹² Labo ikataken Saksi-Saksi Jahwe maka lalap iangkai kalak e kerina isi Pustaka. Mon-mon, iban kalak e ka nge kesalahen sanga njelasken ajaren Pustaka bage pe sanga ngaturken runggun Kristen. Enda labo erban kita sengget. Perban ikataken bas Pustaka maka pengangkan umat Dibata kerna kebenaren reh dekahna reh jelasna. (Kol. 1:9, 10) Alu manjar-anjar, pebetehken Jahwe kebenaren man umatNa, janah arus kita sabar nimai seh ngasa tuhu-tuhu siangkai kebenaren e. (Kua. 4:18) Sanga iteh Badan Pinpinen maka pengangkanta perlu isesuaiken, mis iban kalak e perubahen. Gundari, melala gereja-gereja iubahna pengajarenna gelah meriah ukur anggotana, ntah pe gelah jadi ate kalak bas doni enda. Tapi, organisasita erban perubahen gelah reh rembakna kita ras Dibata, janah sisembah ateta Dibata bagi cara si enggo ilakoken Jesus mbarenda. (Jak. 4:4) Emaka sanga siban perubahen, e labo perban siikutken ateta pendapat jelma si enterem, tapi perban enggo reh ulina pengangkanta nandangi Pustaka. Payo, keleng ateta kebenaren!​—1 Tes. 2:3, 4.

13. Kai sipat si pentingna si icidahken kalak Kristen situhu-tuhu, janah uga sipat e teridah bas Saksi-Saksi Jahwe gundari?

¹³ Kalak Kristen bas abad pertama itandai perban melala sipat-sipatna si mehuli, tapi sipat si pentingna eme kekelengen. Nina Jesus, “Adi sikeleng-kelengen kena, kerina kalak meteh maka kena kap murid-muridku.” (Joh. 13:34, 35) Gundari, Saksi-Saksi Jahwe si lit i sebelang doni sikeleng-kelengen ras ersada. Amin pe kita rehna arah erbage-bage suku, bangsa, ras budaya tapi kita bali bagi sada keluarga, la bagi agama-agama si deban. Banci siidah si enda sanga kita ikut bas perpulungen, bas pertemuan wilayah, ras pertemuan regional. Enda jadi bukti maka enggo sisembah Dibata Jahwe bagi sura-suraNa.

14. Menurut Kolose 3:12-14, kai salah sada carata ncidahken kekelengen man kalak si deban?

¹⁴ Bas Pustaka iiahken kita gelah ‘sikeleng-kelengen alu tutus.’ (1 Pet. 4:8) Salah sada carana engkelengi kalak si deban eme nggit kita ngampuni, janah sabar kita amin pe lit siidah kelemahen kalak e. Nggit ka kita mere janah sialo-alo kerina kalak si reh ku runggun, amin pe banci saja lit si erban kita sakit hati. (Baca Kolose 3:12-14.) Kekelengen si bage me si jadi tanda maka kita kalak Kristen situhu-tuhu.

15. Kai deba nari buktina maka enggo siikutken kalak Kristen abad pertama bas nembah Dibata?

¹⁵ Bas bagin-bagin si deban pe siikutken ka cara kalak Kristen abad pertama bas nembah Dibata. Salah sada contohna eme pengaturen bas organisasita. Bagi kalak Kristen mbarenda, gundari pe lit pertua keliling, pertua-pertua, ras sinampati runggun. (Pil. 1:1; Tit. 1:5) Bali bagi kalak Kristen bas abad pertama, siergai undang-undang Jahwe kerna seks ras perjabun, kerna nggunaken dareh, ras silindungi runggun arah kalak si lanai ngikutken undang-undang Dibata.​—Perb. 15:28, 29; 1 Kor. 5:11-13; 6:9, 10; Heb. 13:4.

16. Kai si banci sipelajari arah kata-kata bas Epesus 4:4-6?

¹⁶ Ikataken Jesus maka enterem pagi kalak si ngaku-ngaku jadi pengikutna, padahal situhuna labo. (Mat. 7:21-23) Bas Pustaka ikataken maka bas wari-wari pendungi enterem kalak si “tempa-tempa sembahna Dibata.” (2 Tim. 3:1, 5) Tapi, jelas ikataken bas Pustaka maka ‘sada ngenca kiniteken’ ntah pe agama si ialoken Dibata.​—Baca Epesus 4:4-6.

17. Ise nge gundari si ngikutken Jesus ras si ndalanken agama si benar?

¹⁷ Ise nge gundari si ndalanken agama si benar? Saksi-Saksi Jahwe ngenca. Arah bukti-bukti si enggo sibahas, banci siidah maka Saksi-Saksi Jahwe ngenca si ngikutken cara Jesus bage pe kalak Kristen abad pertama bas nembah Dibata. Sada kinihamaten si mbelin kel man banta banci jadi salah sada Saksi-Saksi Jahwe, janah meteh kebenaren kerna Jahwe ras sura-suraNa! Mbera-mbera tek kita lalap maka enggo lit bas kita kebenaren!