1-2. Kai si beda arah Raja Ahap ras Raja Manase, ras penungkunen kai saja kari sibahas?

MARI sibahas kerna dua raja si nggeluh bas jaman si mbarenda. Sada raja merentah nandangi kerajan Israel si sepuluh suku. Sada nari merentah nandangi kerajan Juda si dua suku. Beda jaman kalak e, tapi lit si seri arah kalak e. Duana raja e mberontak nandangi Jahwe janah banna rakyatna erdosa man Jahwe. Duana kalak e nembah berhala ras pembunuh. Tapi, lit si beda arah dua raja e. Sada raja lalap ngelakoken kejahaten seh ngasa ia mate. Tapi si sada nari ertobat ia janah iampuni kesalahenna si serius e. Ise nge kalak e?

² Gelar kalak e eme Ahap raja Israel ras Manase raja Juda. Arah kalak e duana, banci kari sidat pelajaren si penting kerna pertobaten. (Perb. 17:30; Rom. 3:23) Kai kin ertina ertobat, ras kai buktina? Perlu siteh kerna si e perban ateta iampuni Jahwe min kita sanga siban kesalahen. Guna ndatken jawapen arah penungkunen e, sibahas kari kegeluhen dua raja e ras sinen kai si banci sipelajari arah kalak e. Kenca si e, sibahas kari kai si ajarken Jesus kerna pertobaten.

3. Kalak si uga nge Raja Ahap e?

³ Ahap eme raja si pepituken si merentah bas kerajan Israel si sepuluh suku. Empoina Isebel anak raja Sidon, bangsa si makmur i daerah utara. Perjabunna e banci saja erban bangsa Israel pe makmur. Tapi, perjabunna e erban bangsa Israel ngelakoken terbuen dosa man Jahwe. Isebel e nembah Baal janah ipengaruhina Ahap gelah ibanna reh buena kalak Israel si nembah Baal, ngelakoken perbahanen seks si salah, ras mpersembahken anak-anakna. Sanga Isebel si jadi ratu, kerina umat Jahwe lit bas bahaya janah enterem kel nabi si enggo ibunuhna. (1 Raj. 18:13) Ahap pe “ngelakoken kai si jahat iakap Jahwe, janah perbahanenna jahaten  asangken kerina kalak si lit sope ia.” (1 Raj. 16:30) Idah Jahwe kerina si ilakoken Ahap ras Isebel. Tapi, cidahken Jahwe perkuah ateNa. SuruhNa Nabi Elia guna nampati kalak e erban perubahen ras ngelayani Ia sanga banci denga. Amin pe bage, Ahap ras Isebel la nggit ngaloken penampat e.

4. Kai hukumen si bereken Jahwe ateNa man Ahap, ras uga tanggapen Ahap?

⁴ Dungna, enggo keri kesabaren Jahwe. Utus Jahwe Nabi Elia guna mpeseh man Ahap ras Isebel maka hukumNa ateNa kalak e. Kerina keluarga kalak e nandangi ibunuh. Kata-kata si ipeseh Elia e erban latih kel ukur Ahap. La isangka-sangka, dilaki si sombong e “mpeteruk dirina.”​—1 Raj. 21:19-29.

5-6. Arah ja siteh maka Ahap tuhu-tuhu la nggit ertobat?

⁵ Amin pe ipeteruk Ahap bana, kai si ilakokenna kenca si e mbuktiken maka labo ia tuhu-tuhu ertobat. Labo usahakenna mbersihken kerajanna arah kalak si nembah Baal. Labo ka iahkenna kalak gelah nembah Jahwe. Selain si e, lit ka bukti si deban maka labo ia tuhu-tuhu ertobat.

⁶ La ndekah kenca si e, pindo Ahap gelah Raja Josapat si merentah bas Juda ikut ras ia erperang ngelawan Siria. Raja Josapat e sekalak raja si mehuli, tek ia man Jahwe. Usulken Josapat gelah sungkuni kalak e lebe nabi Jahwe kerna kai si arus ilakoken kalak e sope lawes erperang. Tangtangna la nggit Ahap ngelakokenca, nina, “Lit sekalak nari si banci sipindo petunjuk Jahwe arah ia. Gelarna Mikaya anak Imla. Tapi segat teku ia, sebap la pernah ramalkenna si mehuli kerna aku, si la mehuli saja ngenca si katakenna.” Amin pe bage, tetap icakapkenna kerna si e man Nabi Mikaya. Kai si kataken Ahap payo! Berita si la mehuli me si ikataken nabi e man Ahap. (1 Raj. 22:7-9, 23, 27) Tapi Ahap la robah ras la pindona pengampunen Jahwe, janah penjarakenna nabi e. Amin pe Mikaya enggo ipenjaraken, si ipesehna e la banci lang pasti terjadi. Mate me Ahap sanga ikut ia erperang.​—1 Raj. 22:34-38.

7. Kenca Ahap mate kai si ikataken Jahwe kerna ia?

⁷ Kenca Ahap mate, cidahken Jahwe uga perukurenNa kerna ia. Sanga Raja Josapat seh ku rumahna, iutus Jahwe Nabi Jehu guna ngataken maka perbahanenna e salah. Bagenda nina nabi Jahwe e, “Cocok kin sampatindu kalak si jahat? Cocok kin kelengindu kalak si segat atena Jahwe?” (2 Kro. 19:1, 2) Cuba siukuri: Adi memang kin Ahap tuhu-tuhu ertobat, labo mungkin kataken nabi e maka ia kalak jahat si segat atena Jahwe. Jelas me, amin pe ngaku salah Ahap kerna kesalahenna, tapi labo ia tuhu-tuhu ertobat.

8. Kai si banci sipelajari arah Ahap kerna ertina tuhu-tuhu ertobat?

⁸ Kai si banci sipelajari arah Ahap? Sanga ikataken Nabi Elia maka kerina kari keluarga Ahap nandangi ibunuh, tangtangna ipeteruk Ahap bana. Si ilakokenna e mehuli. Tapi, kai si ilakokenna kenca si e mbuktiken maka labo ia ertobat. Tuhu-tuhu ertobat ertina labo terjeng ngaku salah, tapi lit si deban si arus ilakoken. Mari sibahas contoh si deban si banci nampati kita ngangkai kai kin ertina tuhu-tuhu ertobat.

9. Kalak si uga nge Raja Manase e?

⁹ Kira-kira 200 tahun kenca si e, Manase me si jadi raja i Juda. Dosa-dosana banci saja ndauh belinen asangken dosa-dosa  Ahap! Bagenda nina Pustaka kerna ia, “Melala kel perbahanen jahat si lakokenna si erban Jahwe merawa man bana.” (2 Kro. 33:1-9) Iban Manase ingan nutung persembahen man berhala-berhala, janah itamana tiang si badia si banci saja bentukna bagi alat kelamin ku bas rumah pertoton Jahwe si badia! Ilakokenna ka ilmu sihir, ilmu ramal, ras ipilihna ka kalak si beluh ngelebuh begu kalak mate. Selain si e, “enterem kel kalak si la ersalah ibunuh Manase.” Janah “persembahkenna ka anak-anakna si dilaki jadi korban tutungen” man dibata-dibata palsu.​—2 Raj. 21:6, 7, 10, 11, 16.

10. Kai si ilakoken Jahwe guna ngajarken Raja Manase janah uga tanggapen raja e?

¹⁰ Bali bagi Ahap, la nggit Manase megiken nasehat Jahwe si ipesehNa arah nabi-nabiNa. Dungna, “Ban Jahwe peminpin-peminpin pasuken arah raja Assur ngelawan [Juda], tangkapna Manase alu pengkawit janah iketna alu dua rante tembaga, jenari babana ku Babilon.” Sanga Manase ipenjaraken i Babilon, banci saja mbages iukurina kerna kai si enggo ilakokenna. Emaka “terus peterukna ukurna i lebe-lebe Dibata nini bulangna.” Labo e saja si ilakokenna. ‘Pindona ka perkuah ate Jahwe Dibatana’ janah “lalap ia ertoto man Dibata.” Gundari, Manase si jahat e enggo ertobat. Mulai ianggapna Jahwe selaku “Dibatana,” janah sanga ia ertoto ndekah ia ngerana man Jahwe.​—2 Kro. 33:10-13.

11. Menurut 2 Kronika 33:15, 16, kai buktina maka Manase tuhu-tuhu ertobat?

¹¹ La ndekah kenca si e, ijawap Jahwe toto Manase. Arah toto Manase, idah Jahwe maka Manase tuhu-tuhu ertobat. Emaka begiken Jahwe totona, ampuniNa ia janah mulihi ia jadi raja. Ilakoken Manase si mehulina guna mbuktiken maka ia tuhu-tuhu ertobat. Manase la bagi Ahap. Nggit ia mperobahi lagu langkahna. Itentangna kalak si nembah berhala-berhala janah iahkenna kalak guna nembah Jahwe. (Baca 2 Kronika 33:15, 16.) Guna ngelakoken si e, Manase arus perpang ras erkiniteken, perban sope ia ertobat enggo berekenna pengaruh si la mehuli man keluargana, man pejabat-pejabatna, bage pe man kerina kalak. Tapi gundari, kenca ia metua, idungina piga-piga masalah si enggo pernah ibanna. Contohna, berekenna pengaruh si mehuli man kempuna Josia, si dungna jadi raja si seh kel ulina.​—2 Raj. 22:1, 2.

12. Kai si banci sipelajari kerna pertobaten arah contoh Manase?

¹² Kai si banci sipelajari arah pengalamen Manase? Ipeterukna bana janah labo e saja si ilakokenna. Ertoto ia mindo perkuah ate janah ertobat ia. Usahakenna kel ngatasi masalah si enggo ibanna, berekenna si mehulina bas nembah Jahwe, janah sampatina ka kalak si deban ngelakoken si e. Pengalamen Manase mereken  arapen man kalak si enggo ngelakoken kesalahen si serius. Arah pengalamenna e mbuktiken maka Dibata Jahwe ‘mehuli kap janah nggit ngampuni.’ (Ms. 86:5) Pasti ampuni Jahwe kalak situhu-tuhu ertobat.

13. Ceritaken sada perumpaman si nampati kita meteh kai si penting arah pertobaten.

¹³ Manase labo terjeng ngaku salah, tapi buktikenna arah perbahanenna. Enda ngajari kita kerna kai si penting arah pertobaten. Cuba ukuri perumpaman enda: Lawes atendu ku toko roti janah tukurndu atendu roti. Labo roti si bereken pelayan toko e, tapi berena man bandu sada telor. Puas nge kam? Pasti lang! Tersampati nge kam adi jelasken pelayan toko e man bandu maka telor eme salah sada bahan si penting bas erban kue? Pasti lang! Bage ka me sanga pindo Jahwe kalak si erdosa guna ertobat. Memang mehuli adi kalak si erdosa e ngaku salah janah e penting adi ertobat atena, tapi labo bias e saja. Kai deba nari si arus ilakokenna? Sipelajari kari terbuen kerna si e arah perumpaman Jesus.

14. Arah perumpaman Jesus e, kai bukti si pertama maka anak si bene e enggo ertobat?

¹⁴ Iceritaken Jesus sada perumpaman si mpepalem pusuh kerna anak si bene si itulis bas Lukas 15:11-32. Mberontak anak muda e man bapakna, tadingkenna rumahna, janah lawes ia “ku negri si ndauh.” I je lakokenna perbahanen seks si salah. Sanga susah geluhna, ukurina keputusenna si la mehuli si enggo banna. Sadar ia maka kepeken ndauh ulin geluhna sanga ia tading bas rumah bapakna. Emaka, kataken Jesus “motu kel perbahanen” anak muda e. Dungna, mulih ia ku rumahna janah mindo ia gelah ampuni bapakna ia. Memang penting ia sadar maka enggo melala banna keputusen si la mehuli. Tapi bias nge e saja? Lang. Si e arus teridah arah perbahanenna!

15. Kai si ilakoken anak si bene e guna mbuktiken maka tuhu-tuhu ia ertobat?

¹⁵ Banci siteh maka anak si bene e tuhu-tuhu ertobat arah perbahanenna. Arus ndauh kel ia erdalan guna mulih ku rumahna. Kenca si e, sanga jumpa ia ras bapakna, nina bagenda, “Enggo erdosa aku man Dibata bage pe man bandu. Lanai aku cocok igelari anakndu.” (Luk. 15:21) Anak muda e tuhu-tuhu ertobat. Buktikenna si e sanga nggit ia mpehuli hubungenna ras Jahwe. Isadarina ka maka perbahanenna e erban ceda ukur bapakna. Selain si e, nggit ia kerja keras gelah mulihi jadi ate bapakna ngidah ia, nggit ka ia ipeseri ras sierdahin bapakna! (Luk. 15:19) Perumpaman enda labo saja cerita si mpepalem pusuh. Tapi, cerita enda banci nampati pertua-pertua guna meteh sanga lit kalak si ngelakoken  kesalahen si serius tuhu-tuhu ia ertobat ntah lang.

16. Engkai maka mon-mon mesera akap pertua-pertua guna meteh sekalak jelma tuhu-tuhu ertobat?

¹⁶ Labo nukah akap pertua guna meteh maka kalak si ngelakoken kesalahen si serius tuhu-tuhu ertobat. Engkai? Perban la banci teh pertua-pertua isi pusuh kalak e. Emaka arus darami kalak e bukti-bukti si ncidahken maka kalak si ngelakoken kesalahen e tuhu-tuhu ertobat. Bas piga-piga situasi, perban belinna kesalahen si ilakoken sekalak jelma, banci saja e erban pertua-pertua la tek maka ia enggo tuhu-tuhu ertobat.

17. (a) Contoh kai si ncidahken maka kalak si ngaku salah banci saja labo tuhu-tuhu ertobat? (b) Bagi si ikataken bas 2 Korinti 7:11, kai si iarapken arah kalak situhu-tuhu ertobat?

¹⁷ Cuba ukuri kerna contoh enda. Sekalak turang senina enggo erlua-lua ertahun-tahun dekahna. La daramina penampat, tapi bunikenna perbahanenna e arah diberuna, teman-temanna, bage pe arah pertua. Dungna, tereteh me perbahanenna e. Enggo lit bukti arah pertua maka ia erlua-lua. Sanga ikataken pertua kerna si e man bana, akuina kesalahenna e janah teridah menyesal kel ia. Enggo nge bias e mbuktiken maka ia tuhu-tuhu ertobat? Lang. Arus darami pertua bukti-bukti si deban maka ia tuhu-tuhu ertobat. Engkai? Perban kesalahen e enggo mulih-ulih ilakokenna. Selain si e, labo ka ia si ngelapor man pertua, tapi kalak si metehsa si ngelaporkenca. Emaka, amin pe ia enggo menyesal, arus denga idarami pertua bukti-bukti maka ia tuhu-tuhu ertobat janah arus teridah arah perukurenna, perasanna, ras perbahanenna. (Baca 2 Korinti 7:11.) Banci saja perlu melala waktu man kalak si ngelakoken kesalahen si serius e guna mbuktiken maka ia tuhu-tuhu ertobat. Mbelin kemungkinenna, banci dungna ia ipedarat arah runggun piga-piga waktu dekahna.​—1 Kor. 5:11-13; 6:9, 10.

18. Kai saja si arus ilakoken kalak si enggo ipedarat arah runggun guna mbuktiken maka ia tuhu-tuhu ertobat, ras kai si banci inanamina?

¹⁸ Kalak si enggo ipedarat arah runggun arus ratur reh ku perpulungen, janah dalankenna nasehat arah pertua-pertua guna ratur ertoto ras mpelajari Pustaka. Arus ka ia erjuang mpedauh situasi si banci erban ia ngelakoken dosa. Adi erusaha ia mpehuli hubungenna ras Jahwe, la perlu ia ragu maka pasti ampuni Jahwe ia janah sampati pertua-pertua ia mulihken ku runggun. Memang payo, sanga iteh pertua-pertua atena sekalak jelma tuhu-tuhu ertobat ntah lang, teh kalak e maka tiap kasus la seri. Emaka, hati-hati kel kalak e mereksa  tiap kasus janah usahakenna erban keputusen si tepat.

19. Kai ertina tuhu-tuhu ertobat? (Esekiel 33:14-16)

¹⁹ Bagi si enggo sipelajari ndai, tuhu-tuhu ertobat ertina labo terjeng ngaku salah perban enggo ngelakoken kesalahen si serius. Tapi, arus ubahna carana rukur ras perasanna janah buktikenna arah perbahanenna maka ia enggo tuhu-tuhu ertobat. Arus ka pengadina perbahanenna si la mehuli e ras ikutkenna mulihi patoken-patoken Jahwe. (Baca Esekiel 33:14-16.) Si pentingna man kalak si enggo ertobat eme hubungenna ras Jahwe banci rembak mulihi.

20-21. Uga carata nampati kalak si enggo ngelakoken kesalahen si serius?

²⁰ Ijelasken Jesus salah sada bagin si penting bas pelayanenna sanga ikatakenna, “Aku reh . . . ndilo kalak perdosa gelah ertobat ia.” (Luk. 5:32) Arusna bagi Jesus ka min kita. Banci saja siteh maka teman kompakta enggo ngelakoken kesalahen si serius. Adi bage, kai si arus silakoken?

²¹ Adi sibuniken kesalahen si serius si iban temanta e, enda banci erban ia cilaka. Labo banci lalap sibuniken kesalahenna e perban Jahwe idahNa kerinana. (Kua. 5:21, 22; 28:13) Banci sampatindu temanndu e alu ngingetken ia maka ate pertua guna nampati ia. Adi la ia nggit ngakui salahna man pertua, kam si arus ngelaporkenca man pertua. Adi bage banndu, e buktina sampatindu atendu temanndu e. Perban adi la ia ertobat, hubungenna ras Jahwe banci ceda.

22. Kai kari sipelajari bas artikel seterusna?

²² Uga adi enggo ndekah ilakoken sekalak jelma kesalahen si serius, janah dungna ban pertua keputusen guna mpedarat ia arah runggun? La nge kalak e perkuah? Bas artikel seterusna, sipelajari kari uga Jahwe ncidahken sipat perkuah ate sanga berekenNa disiplin man kalak si ngelakoken kesalahen si serius janah sipelajari ka kari uga carata ngusih Ia.