TIAP tahun, melala biri-biri Jahwe si meherga ialoken mulihi bas runggun. Cuba bayangken uga belinna “keriahen ukur i surga” sanga kalak e ialoken mulihi bas runggun! (Luk. 15:7, 10) Adi kam enggo ialoken mulihi, teklah kam maka meriah kel ukur Jesus, malekat-malekat, bage pe Jahwe perban kam enggo mulihi jadi bagin arah runggun. Gundari, kam sangana mpehuli hubungenndu ras Jahwe, tapi banci saja adapindu piga-piga tentangen. Kai saja tentangen e, janah kai si banci nampati kam ngadapisa?

Melala kalak si mulihken ku runggun kitik denga ukurna. Banci saja angkaindu kai si igejapken Raja Daud. Amin pe dosa-dosana enggo iampuni, bagenda nina, “Mberat kel kuakap kesalahen-kesalahenku.” (Ms. 40:12; 65:3) Kenca sekalak jelma mulihken ku Jahwe, banci saja salah denga kapna bana ntah pe mela denga kapna lalap. Isabel enggo pernah ipecat lebih 20 tahun dekahna. * Bagenda nina, “Mesera kel kuakap tek maka enggo iampuni Jahwe aku.” Adi kitik ukurndu, banci ka mulihi reh dauhna kam arah Jahwe. (Kua. 24:10) Emaka, usahakenlah gelah si e ula terjadi man bandu.

Lit ka si mbiar maka la ia ngasup mpehuli hubungenna ras Jahwe. Bagenda nina Antoni kenca ia ialoken mulihi, “Lanai kuinget kai si mbarenda kupelajari ras si kulakoken selaku Saksi Jahwe.” Perban perasan si bage, piga-piga turang senina lanai usahakenna mereken si mehulina man Jahwe.

Cuba ukuri perumpaman enda: Kalak si hancur rumahna perban kena badai, banci saja la kapna ia ngasup sanga bayangkenna kerina si arus ilakokenna guna mpehuli rumahna e. Bage ka me, adi enggo ceda hubungenndu ras Jahwe perban lakokenndu kesalahen si serius, banci saja mbiar kam sanga tehndu maka iperluken mbue waktu ras usaha guna mpehuli hubungenndu  ras Jahwe. Tapi, labo kam sisada ngelakokenca.

Iundang Jahwe kita, nina, “Mari sidungi masalahta.” (Jes. 1:18) Enggo erusaha kel kam ngelakoken si e. Ergai Jahwe kel si ilakokenndu e. Perban mulihken kam man Jahwe, banci pakeNa kam jadi contoh guna mbuktiken maka kerina tuduhen Setan e la tuhu!​—Kua. 27:11.

Adi mulih kam ku Jahwe, enda ertina enggo rembakkenndu bandu man Jahwe, janah Jahwe pe erjanji maka rembakkenNa diriNa man bandu. (Jak. 4:8) Gundari, enggo idah turang senina maka kam enggo mulihken ku runggun, janah si ilakokenndu e seh kel ulina. Tapi, lit denga si arus lakokenndu. Arus terus pebelinndu kekelengenndu man Jahwe eme Bapakndu ras Temanndu. Uga carana?

Cubakenlah erban tujun si banci ilakokenndu. Banci saja ingetndu denga sitik-sitik kai si pelajarindu mbarenda eme kerna Jahwe ras janji-janjiNa bas masa depan. Tapi gundari, arus usahakenndu mulihi ratur ngelakoken kegiaten rohani bagi erberita, pulung, bage pe ergaul ras turang senina. Enda me piga-piga si banci lakokenndu.

Rusurlah ertoto man Jahwe. Angkai Jahwe maka adi lalap kapndu salah bandu e banci erban kam mesera ertoto man baNa. (Rom. 8:26) Amin pe bage, perlu kam ‘ertoto man Jahwe la erngadi-ngadi.’ Kataken man baNa maka merhat kel kam mulihi jadi temanNa. (Rom. 12:12) Bagenda nina Andre, “Paksa si e salah kel kuakap bangku ras mela aku. Tapi adi ertoto kenca aku, reh tenangna ukurku. Dame pusuhku.” Adi la tehndu kai si man katanken sanga kam ertoto, bacalah contoh toto Raja Daud kenca ia ertobat, si itulis bas Masmur 51 ras 65.

Pelajarilah Pustaka alu ratur. Enda banci erban kinitekenndu reh paguhna janah banci reh belinna kekelengenndu man Jahwe. (Ms. 19:7-11) Bagenda nina Felip, “Mbarenda perban la aku ratur mbaca Pustaka ras mpelajarisa, dungna ndauh aku arah Jahwe janah kecewa kuban Ia. Lanai aku nggit erban Ia kecewa. Emaka gundari, enggo ratur aku erlajar pustaka.” Kam pe banci banndu bage. Adi la tehndu topik kai si banci ipelajarindu, pindolah penampat arah turang senina si paguh kinitekenna.

Ertemanlah ras turang senina. Piga-piga kalak si mulihken ku runggun mbiar ia negatip kari perukuren turang senina man bana. Nina Larissa, “Mela kel aku. Enggo ceda kuban ukur turang senina janah enggo kecewa kuban kalak e. Rusur bage perasanku janah mesera kuakap menekenca.” Adi bage perasanndu, teklah maka pertua-pertua ras turang senina nggit nampati kam mulihi erteman ras Jahwe. (Nen kotak “ Kai si Banci Ilakoken Pertua-Pertua?”) Meriah kel ukur kalak e perban enggo mulih kam ku runggun, janah ate kalak e meriah ka min ukurndu.​—Kua. 17:17.

Uga carana gelah banci kam rembak ras turang senina bas runggun? Rehlah kam ku kerina acara perpulungen janah erberitalah kam alu ratur ras turang senina. Kai gunana adi ilakokenndu si e? Bagenda nina Felix, “Tertima-tima kel turang senina gelah mulihken aku ku runggun. Kugejapken maka keleng kel ate kalak e aku. Isampati kalak e aku gelah banci kugejapken mulihi maka aku tuhu-tuhu jadi bagin arah runggun. Kerina kalak e nampati aku gelah tek maka enggo iampuni Jahwe aku janah banci terus kulayani Ia.”​—Nen kotak “ Kai si Banci Ilakokenndu?”

Pasti lalap iban Setan reh buena terjadi “badai” man bandu gelah ceda hubungenndu ras Jahwe. (Luk. 4:13) Gelah ngasup kam ngelawan serangen Setan, gundari nari perlu ipepaguhndu kinitekenndu man Jahwe.

Erjanji Jahwe, nina, “Si bene Kudarami, si papak Kubaba mulih, si luka Kubaluti, janah si lemah Kupegegehi.” (Esek. 34:16) Enggo enterem kalak si isampati Jahwe gelah mulihi erteman ras Ia. Emaka teklah kam maka pasti kam isampatiNa mpehuli hubungenndu ras Ia janah mpepaguhsa.