1. Kai si banci saja siukuri sanga siinget kerna kalak si perkuah?

SANGA siukuri kerna kalak si perkuah, banci saja sibayangken kalakna mehuli, ermediate, ras nggit mere. Banci saja siinget ka cerita Jesus kerna kalak Samaria si mehuli. Amin pe ia arah bangsa si deban, ‘mekuah atena’ man kalak Jahudi si enggo ipekpeki ras irampok. Emaka aturkenna gelah irawat ia seh ngasa malem. (Luk. 10:29-37) Perumpaman enda ngajari kita kerna sipat Dibata si luar biasa eme perkuah ate. Dibata e perkuah perban keleng ateNa kita. Tiap wari, melala cara iban Dibata ncidahken sipat perkuah ateNa man banta.

2. Kai cara si deban guna ncidahken sipat perkuah?

² Lit cara si deban guna ncidahken sipat perkuah. Kalak si perkuah banci saja la ihukumna kalak si enggo patut ihukum. Jahwe pe bage, mbelin kel perkuah ateNa man banta. Nina pemasmur, “La hukumNa kita menurut dosa-dosata.” (Ms. 103:10) Tapi bas situasi si deban banci saja bereken Jahwe disiplin si tegas man kalak si ngelakoken dosa.

3. Penungkunen kai saja kari sibahas?

³ Bas artikel enda, sibahas kari telu penungkunen enda: Engkai maka cidahken Jahwe sipat perkuah? Lit kin hubungenna pengaturen kerna kalak si ipedarat arah runggun ras perkuah ate? Kai si banci nampati kita ncidahken sipat perkuah? Mari sibahas jawapenna arah Pustaka.

4. Engkai maka Jahwe perkuah?

⁴ Jahwe perkuah perban kekelengen. Itulis Rasul Paulus maka Dibata e ‘mbelin kel perkuah ateNa.’ Engkai maka bas ayat e ikataken Paulus Dibata e perkuah? Perban enggo berekenNa arapen guna nggeluh i surga man kalak si la sempurna  si ipilihNa. (Ep. 2:4-7) Labo man kalak e saja ngenca icidahken Jahwe perkuah ateNa. Bagenda itulis Pemasmur Daud, “Mehuli kap Jahwe man kerina si nggeluh, janah mekuah ateNa kerina si ciptakenNa.” (Ms. 145:9) Perban keleng ate Jahwe man kerina jelma, katawari pe cidahkenNa perkuah ateNa adi memang iperluken.

5. Kai saja si enggo ipelajari Jesus kerna perkuah ate Jahwe?

⁵ Iteh Jesus kel kerna perkuah ate Jahwe, lebihen asangken ise pe. Sope lenga Jesus ku doni, enggo ndekah kel ia ras Jahwe i surga. (Kua. 8:30, 31) Rusur ka idah Jesus uga Bapakna e ncidahken perkuah ate man kalak si erdosa. (Ms. 78:37-42) Sanga Jesus ngajar pe rusur icakapkenna kerna sipat Bapakna si luar biasa e.

6. Kai si lakoken Jesus guna nampati kita meteh perkuah ate Bapakna?

⁶ Bagi si enggo sibahas bas artikel sebelumna, ipake Jesus perumpaman kerna anak si bene gelah siangka uga belinna perkuah ate Jahwe. Itadingken anak e rumahna janah ‘sia-siakenna kerina ertana alu ndalani kegeluhen si la mehuli.’ (Luk. 15:13) Dungna, ertobat ia, ipeterukna bana, janah mulihken ia ku rumahna. Uga nge tanggapen bapakna? Banci mis teh anakna e. Bagenda nina Jesus, “Sanga [anak e] ndauh denga, idah bapakna ia janah mekuah atena. Emaka kiam bapakna e ngayakisa jenari dakepna anakna e janah emana alu lembut.” Labo ipermelaken bapakna e anakna. Tapi mekuah atena ras ampunina ia janah alo-alona mulihken ku keluargana. Situhuna, mbelin kel dosa anak si bene e. Tapi perban tuhu-tuhu ia ertobat, iampuni bapakna ia. Bapak si perkuah bas perumpaman e ncidahken perkuah ate Jahwe. Arah perumpaman e, icidahken Jesus man banta maka nggit Jahwe ngampuni kalak situhu-tuhu ertobat.​—Luk. 15:17-24.

7. Engkai maka perkuah ate Jahwe mbuktiken maka Ia seh kel pentarna?

⁷ Jahwe perkuah perban Ia seh kel pentarna. Kerina keputusen si iban Jahwe guna kiniulin ciptanNa. Ikataken bas Pustaka maka “kepentaren si rehna surga nari” eme “dem perkuah ate janah ngelakoken si mehuli.” (Jak. 3:17) Bali bagi orang tua si perkeleng, teh Jahwe maka perkuah ateNa erguna man umatNa. (Ms. 103:13; Jes. 49:15) Perban icidahken Jahwe perkuah ate man umatNa, banci lit arapen kalak e bas masa depan amin pe kalak e la sempurna. Emaka, perban Jahwe seh kel pentarna lalap icidahkenNa perkuah ateNa sanga  iperluken. Perban Jahwe pentar, la ndigan pe icidahkenNa perkuah ate adi e erban Ia tempa-tempa setuju nandangi perbahanen si salah.

8. Mon-mon kai si arus silakoken, janah engkai?

⁸ Katakenlah lit sekalak umat Dibata si ngelakoken perbahanen seks si salah. Kai nge si arus silakoken? Nina Paulus bas suratna gelah ‘lanai erteman’ ras kalak si bage. (1 Kor. 5:11) Kalak si ersalah si la nggit ertobat arus ipedarat arah runggun. Keputusen e iban guna ngelindungi turang senina si setia ras ncidahken dalan-dalan Jahwe si badia. Sanga lit kalak si ipedarat arah runggun, banci saja lit piga-piga kalak si erpengakap maka Dibata e la perkuah. Payo nge bage? Mari sibahas.

9-10. Bagi si ikataken bas Heber 12:5, 6, engkai maka pengaturen kerna kalak si ipedarat arah runggun bukti perkuah ate? Ban perumpamanna.

⁹ Sanga sibegi pengumumen bas runggun si ngataken maka kalak si keleng ateta lanai Saksi Jahwe, pasti sedih kel siakap. Banci saja rukur kita engkai maka ia ipedarat arah runggun. Payo nge pengaturen kerna kalak si ipedarat arah runggun bukti perkuah ate? Ue, payo. Adi kalak si perlu idisiplin la idisiplin, e labo perbahanen si pentar, perkuah, ntah pe perkeleng. (Kua. 13:24, ctt.) Banci nge pengaturen e nampati kalak erban perubahen ras ertobat? Ue, banci. Enterem turang seninata si mbarenda ngelakoken kesalahen si serius ngataken maka pengaturen e enggo nampati kalak e meteh uga belinna dosana. Pengaturen e pe nampati kalak e ertobat, erban perubahen, ras mulihken ku Jahwe.​—Baca Heber 12:5, 6.

¹⁰ Cuba ukuri perumpaman enda: Iperdiateken sekalak permakan maka lit sada biri-birina si sakit. Tehna maka guna nambari biri-biri si sakit e arus ipisahkenna ia arah rarasen nari. Situhuna, biri-biri la banci nggeluh sisada. Biri-biri biasana ras rarasen atena janah la ia tenang adi pisahken arah rarasenna. Payo nge kejam perbahanen permakan e sanga ipisahkenna biri-biri e arah rarasenna? Tentu lang. Teh permakan e maka adi pediatna biri-biri si sakit e tetap ras rarasen, banci kari langket penakitna e ku biri-biri si deban. Adi ipisahkenna biri-biri si sakit ndai, lindungina me kerina rarasen biri-biri e.​—Bandingken Imamat 13:3, 4.

11. (a) Bas kai saja kalak si ipedarat arah runggun bali bagi biri-biri si sakit? (b) Kai si banci ilakoken kalak si ipedarat arah runggun, ras penampat kai si banci ialokenna?

¹¹ Banci sikataken kalak si ipedarat arah runggun bali bagi biri-biri si sakit. Ia sangana sakit secara rohani. (Jak. 5:14) Sakit secara rohani mirip ras sakit secara jasmani, penakit e banci langket. Emaka bas piga-piga kasus, kalak si sakit secara rohani perlu ipisahken arah runggun. Pengaturen e ncidahken kekelengen Jahwe man rarasenNa si setia, janah enda pe banci ka ngiahken kalak si ersalah e gelah ertobat. Amin pe ia enggo ipedarat arah runggun, banci denga ia reh ku perpulungen janah ndatken pangan rohani. Banci ka alokenna buku-buku si erpalasken Pustaka bage pe nonton acara JW Broadcasting^®. Selain si e, sanga idah pertua-pertua enggo ibanna perubahen, banci saja ibereken kalak e nasehat arah waktu ku waktu guna nampati si ersalah e mpehuli hubungenna ras Jahwe. Dungna, banci ia ialoken mulihi jadi sekalak Saksi Jahwe. *

12. Keputusen kai si arus iban pertua-pertua man kalak si la nggit ertobat, janah engkai maka e perkeleng ras perkuah?

 ¹² Perlu siinget maka kalak si la nggit ertobat ngenca si ipedarat arah runggun. Iteh pertua-pertua maka erban keputusen e serius kel, janah sope lenga iban kalak e keputusen iukuri kalak e lebe manjar-anjar. Iteh kalak e maka pengaturen kerna kalak si ipedarat arah runggun eme disiplin “si cocok” arah Jahwe nari. (Jer. 30:11) Situhuna, keleng ate pertua-pertua turang senina, janah labo ate kalak e ngelakoken kai pe si banci ncedai hubungen turang seninana ras Jahwe. Emaka sanga kalak si ngelakoken kesalahen ipedarat arah runggun, enda sada keputusen si perkeleng ras perkuah.

13. Engkai maka lit kalak Kristen i Korinti perlu ipedarat arah runggun?

¹³ Cuba ukuri kai si ilakoken Rasul Paulus man kalak si la nggit ertobat bas abad pertama. Lit sekalak turang senina bas Korinti si ngelakoken perbahanen seks si salah ras diberu bapakna. Enda tuhu-tuhu perbahanen si erban ciga ate! Mbarenda pernah ikataken Jahwe man kalak Israel, “Kalak si erhubungen seks ras diberu bapakna enggo mpermelaken bapakna sendiri. Kalak e duana arus ibunuh.” (Im. 20:11) Memang labo isuruh Paulus gelah kalak si ngelakoken perbahanen si salah ndai ibunuh. Tapi perentahkenna gelah kalak si ngelakoken kesalahen si serius e ipedarat arah runggun. Sebap, perbahanen si bage banci mpengaruhi turang senina si lit bas runggun. Piga-piga arah kalak e la ka tehna mela ngelakoken perbahanen si bage!​—1 Kor. 5:1, 2, 13.

14. Kai buktina Paulus perkuah ate man kalak si ipedarat arah runggun i Korinti, janah engkai? (2 Korinti 2:5-8, 11)

¹⁴ Piga-piga waktu kenca si e, ibegi Paulus maka kalak si ngelakoken kesalahen ndai enggo erban perubahen si mbelin. Tuhu-tuhu ia enggo ertobat. Amin pe enggo mela ibanna runggun, la nggit Paulus kejamsa ngukum ia. Ikatakenna man pertua-pertua gelah “alu mehuli ampuni ia janah apuli.” Engkai maka ikataken Paulus bage? “Gelah ula ia nyerah perban sedihsa kapna.” Mekuah ate Paulus ngidah kalak si ertobat e. La ate Paulus erban ia nyerah perban sedihsa kapna, perban e banci erban ia ngadi ndarami pengampunen.​—Baca 2 Korinti 2:5-8, 11.

15. Uga carana gelah pertua-pertua tetap tegas tapi perkuah?

¹⁵ Perban pertua-pertua ngusih Jahwe, kalak e pe ncidahken sipat perkuah.  Ibereken kalak e disiplin si tegas adi memang iperluken. Tapi icidahken kalak e sipat perkuah ate adi lit alasen si tepat guna ngelakokenca. Adi la bereken kalak e disiplin man kalak si ersalah, e ertina kalak e la perkuah, sebap setuju kalak e nandangi perbahanen si salah. Adi bage, pertua-pertua saja kin si perlu ncidahken sipat perkuah?

16. Menurut Kuan-kuanen 21:13, kai si ilakoken Jahwe man kalak si la perkuah?

¹⁶ Kerina kita siusahaken ateta jadi kalak si perkuah bali bagi Jahwe. Engkai? Salah sada alasenna perban labo ibegiken Jahwe totota adi la mekuah ateta kalak si deban. (Baca Kuan-kuanen 21:13.) Pasti la kita nggit adi totota la ibegiken Jahwe. Emaka siusahaken jadi kalak si perkuah. Nggit kita megiken turang seninata si sangana susah, janah lalap kita ersikap guna megiken “pemindon kalak mesera.” Silakoken ka ateta si mehulina janah sidalanken pelajaren arah ayat si ngataken, “Kalak si la rate mekuah, ihakimi pagi janah la datna perkuah ate.” (Jak. 2:13) Adi meteruk ukur kita ras siinget maka perlu kel kita perkuah ate, reh nggitna me kita ncidahken perkuah ate. Terlebih sicidahken ateta perkuah ate man kalak si ertobat si mulihken ku runggun.

17. Kai buktina Raja Daud kalak si perkuah?

¹⁷ Contoh-contoh si lit bas Pustaka banci nampati kita ncidahken sipat si perkuah janah mpedauh sipat si kejam. Contohna eme Raja Daud. Rusur cidahkenna perkuah ate man kalak si deban. Amin pe ibunuh Saul atena ia, icidahken Daud perkuah ate man raja si enggo ipilih Dibata e. La pernah usahakenna ncilakai Saul ntah pe balas dendam man bana.​—1 Sam. 24:9-12, 18, 19.

18-19. Bas dua situasi kai Daud la ncidahken perkuah ate?

¹⁸ Tapi labo lalap cidahken Daud perkuah ate. Contohna, lit sekalak dilaki si gelarna Nabal si kasar kalakna. Ihinana Daud ras la ia nggit mereken pangan man Daud bage pe man anak buahna. Enda erban merawa kel Daud janah ibunuhna atena Nabal ras dilaki-dilaki si lit bas keluargana. Tapi, Abigail diberu Nabal, mehuli kalakna ras sabar, mis berekenna pangan man Daud. Emaka, la surung ibunuh Daud Nabal ras dilaki-dilaki si lit bas keluargana.​—1 Sam. 25:9-22, 32-35.

¹⁹ Bas situasi si deban, iceritaken Nabi Natan man Daud kerna dilaki si bayak si nangko biri-biri tetanggana si mesera pergeluhna. Megi cerita e, merawa kel Daud, janah nina, “Ersumpah aku i lebe-lebe Jahwe si nggeluh, dilaki si bayak e patut mate!” (2 Sam. 12:1-6) Iteh Daud maka menurut Undang-Undang Musa, kalak si nangko sada biri-biri arus berena ganti rugi jadi empat biri-biri. (Kel. 22:1) Emaka, adi kalak si nangko ndai arus ihukum mate, la kin kejamsa hukumenna e? Situhuna, iceritaken Nabi Natan perumpaman e man Daud guna nampati Daud gelah tehna maka kesalahen si ibanna ndauh jahaten asangken pinangko ndai. Amin pe bage, ndauh belinen perkuah  ate Jahwe man Daud asangken perkuah ate Daud man dilaki si nangko ndai si lit bas cerita Nabi Natan!​—2 Sam. 12:7-13.

20. Kai si banci sipelajari arah contoh Daud?

²⁰ Sanga merawa kel Daud, ibunuhna atena Nabal ras dilaki-dilaki si lit bas keluargana. Bas pudi wari, ikataken Daud ka maka dilaki si bayak si lit bas cerita Natan arus ibunuh. Situhuna, Daud e kalakna mehuli, tapi engkai maka kejam kel carana ngakimi dilaki si nangko e? Cuba siukuri uga perasan Daud paksa si e. Paksa si e, pusuh peraten Daud sangana terganggu. Kalak si kejam carana ngakimi kalak si deban, mbuktiken maka hubungenna ras Jahwe sangana la mehuli. Emaka, ibereken Jesus sada persinget si tegas man murid-muridna, nina, “Ula nai kena ngakimi gelah kena pe la ihakimi, perban ihakimi pagi kena menurut cara kena ngakimi.” (Mat. 7:1, 2) Emaka, arus siusahaken asa ngasupta mpedauh sipat si kejam janah terus siusih Dibatata si ‘mbelin kel perkuah ateNa.’

21-22. Kai saja si banci silakoken guna ncidahken perkuah ate?

²¹ Perkuah ate labo terjeng perasan saja, tapi arus teridah arah perbahanen. Kerina kita banci ncidahken perkuah ate man kalak si merluken, misalna bas keluargata, runggunta, ras lingkungenta. Pasti melala kel kesempaten guna ncidahken sipat perkuah ate. Banci nge apulindu kalak si sangana kitik ukurna? Banci nge sampatindu kalak si deban alu mereken pangan ntah pe ngelakoken si debanna? Adi lit turang senina si mbaru denga ialoken bas runggun, banci nge pegegehindu ia ras nggit kam jadi temanna? Banci nge cakapkenndu kerna kai si mehuli man kalak si deban? Enda me piga-piga cara si mehulina si banci silakoken guna ncidahken perkuah ate man kalak si jumpa ras kita.​—Jop 29:12, 13; Rom. 10:14, 15; Jak. 1:27.

²² Adi megermet kita ndarami kalak si merluken penampat, banci siidah maka i sekelilingta mbue kesempaten guna ncidahken perkuah ate. Adi sicidahken perkuah ate, pasti meriah kel siban ukur Bapakta si i surga eme Dibata si ‘mbelin kel perkuah ateNa!’