Sedekah tahun e, iban organisasi piga-piga perubahen bas perpulungen, si erban reh paguhna persadan Ajar-Ajar Pustaka. Bas Watch Tower, mulai iban penjelasen kerna ayat si nandangi ibahas bas Perpulungen Toto, Pujin, ras Kesaksin si iban tiap minggu. Selain si e, icetak Ajar-Ajar Pustaka ka kalender si risi ayat man tiap minggu ras lagu si banci iendeken sanga pelajaren pribadi ras ibadah keluarga.

Bas perpulungen, Ajar-Ajar Pustaka banci mereken “kesaksin” alu nceritaken pengalamen kalak e sanga erberita, alasenna ngata bujur man Jahwe, ngendeken sada lagu, ntah pe ertoto. Eva Barney, si iperidiken tahun 1923 sanga umurna 15 tahun, ngataken, “Adi ceritakenndu atendu sada pengalamenndu, banci kam cinder, banci bagenda nindu, ‘Ngata bujur ateku perban kerina si mehuli si enggo ilakoken Dibata man bangku.’” Piga-piga turang senina meriah kel kapna mereken “kesaksin.” Nina Turang Senina Barney ka, “Turang Senina Godwin si enggo metua rusur cerita kerna kai saja si erban ia ngata bujur. Tapi, sanga idah diberuna si mandu lanai tenang, biasana kuitna jas dilakina e, emaka mulai me ia ngadi ngerana, jenari kundul ia.”

Sekali sebulan, tiap runggun erban Perpulungen Toto, Pujin, ras Kesaksin si acarana la bagi biasana. Kerna perpulungen e, ikataken Watch Tower 1 April 1923, “Setengah arah waktu acara e ipake guna kesaksin si lit hubungenna ras dahin erberita si banci mpegegehi sada ras si debanna. . . . Tek kami kegiaten si mpersada enda erban turang senina reh kompakna.”

Charles Martin, sekalak perberita si umurna 19 tahun arah Vancouver, Kanada, mbelin kel datna gunana arah perpulungen e. Bagenda nina, “I je me tangtangna kuteh kai si arus kukataken sanga erberita arah rumah ku rumah. Enterem turang senina si nceritaken pengalamenna sanga erberita arah rumah ku rumah. Si e nampati aku guna meteh kai si arus kukataken sanga erberita janah uga cara njawapsa adi lit kalak si la setuju.”

Reh paguhna ka persadan turang senina sanga iban kalak e “wari erberita.” Watch Tower  1 April 1923 ngumumken, “Kerina kita ipersada bas dahin si seri . . . , Selasa, 1 Mei 1923 itetapken jadi wari erberita. Bage ka pe, tiap wari Selasa pertama tiap bulanna . . . Tiap perberita bas tiap runggun perlu ikut bas dahin e.”

Ajar-Ajar Pustaka si nguda denga pe ikut bas pendahin e. Salah sadana eme Hazel Burford, si umurna 16 tahun denga paksa si e. Nina, “Bas Bulletin, lit contoh percakapen si banci ihapal. a Aku ras bulangku semangat bas pendahin e.” Tapi Turang Senina Burford dat tentangen si la isangka-sangkana. Bagenda nina, “Lit sekalak turang senina si enggo metua si sitik pe la setuju perban ikut aku erberita. Paksa si e, lit piga-piga si lenga angkaina maka kerina Ajar-Ajar Pustaka, termasuk ‘anak perana ras singuda-nguda’ arus muji Penciptata si Mulia.” (Ms. 148:​12, 13) Tapi Turang Senina Burford terus erberita. Bas pudi wari, iundang ia ikut bas kelas si peduaken arah Sekolah Gilead janah ngelayani ia jadi utusen injil bas Panama. Dungna, turang senina si la setuju ndai ngubah carana rukur kerna anak muda si ikut bas erberita.

Pertemuan regional pe mpersada turang senina. Bas melala pertemuan regional, lit sada wari si ikhususken jadi wari erberita. Contohna, bas pertemuan i Winnipeg, Kanada, kerina hadirin iundang guna ngikuti “Tujun Khusus i Winnipeg” tanggal 31 Maret. Enterem kalak si banci ijumpai bas wari erberita e janah hasilna pe mehuli. Tanggal 5 Agustus, iban ka pertemuan regional si deban i Winnipeg, hadirinna kira-kira 7.000 kalak. E me jumlah hadirin pertemuan regional si mbuena i Kanada paksa si e.

Pertemuan regional si pentingna si iban umat Jahwe eme bas tahun 1923 tanggal 18-26 Agustus i Los Angeles, Kalifornia, Amerika Serikat. Piga-piga minggu sope pertemuan regional e, enggo iban iklan bas koran-koran kerna acara e, janah lit lebih 500.000 undangen tercetak si ibagiken Ajar-Ajar Pustaka. Lit ka poster-poster kerna pertemuan regional e si ipasang bas transportasi umum ras motor-motor pribadi.

 Bas wari Sabtu, tanggal 25 Agustus, ipeseh Turang Senina Rutherford khotbah si erjudul “Biri-Biri ras Kambing.” Jelas kel iturikenna maka “biri-biri” maksudna eme kalak si pusuh ras perbahanenna ngaloken kebenaren, si nggeluh pagi bas pardis i doni. Ibacakenna ka resolusi si erjudul “Persinget.” Resolusi e mpersingeti gereja-gereja ras ngiahken kalak si meteruk ukur gelah ndarat arah “Babilon si Mbelin.” (Ket. 18:​2, 4) Bas pudi wari, Ajar-Ajar Pustaka si semangat i sebelang doni mbagiken jutan risalah si risi resolusi e.

Bas wari pendungi arah pertemuan regional e, lit lebih 30.000 kalak si reh guna megiken khotbah Turang Senina Rutherford si erjudul “Kerina Bangsa Sangana Erbaris Nuju Harmagedon, Tapi Jutan Kalak si Nggeluh Gundari Labo Pagi Banci Mate.” Perban enggo teh Ajar-Ajar Pustaka maka enterem kari kalak si reh, isewa kalak e stadion si mbaru ibangun eme Los Angeles Coliseum. Gelah banci ibegi kerina si reh khotbah e, igunaken turang senina speaker stadion e si nggunaken teknologi si terbaru paksa si e. Enterem ka si megiken acara e arah siaren radio.

Bas tahun 1923, melala perkembangen bas dahin erberita i Afrika, Eropa, India, bage pe Amerika Selatan. Bas India, sekalak turang senina si gelarna A. J. Joseph ikut nampati erban buku-buku bas bahasa Hindi, Tamil, Telugu, ras Urdu amin pe arus icukupina keperlun diberuna ras enem anakna.

Bas Sierra Leone, Turang Senina Alfred Joseph ras Leonard Blackman nulis surat guna mindo penampat ku kantor pusat i Brooklyn, New York. Tanggal 14 April 1923, ijawap me pemindon kalak e. Nina Alfred, “Bas tengah berngi wari Sabtu, la kusangka lit si nelpon aku.” Megang ia ngerana janah nungkun, “Kam nge si nulis surat ku Lembaga Menara Pengawal guna mindo perberita?” Nina Alfred ngaloi, “Ue, aku.” Kenca si e, nina dilaki e, “Aku si iutus kalak e.” Kepeken si ngerana e eme William R. Brown. Bas wari e, e denga ia seh arah Kepulauan Karibia radu ras diberuna Antonia bage pe dua anakna diberu eme Louise ras Lucy. Emaka banci kalak e mis jumpa.

Nina Alfred ka, “Paginna sanga erpagi-pagi, sanga aku ras Leonard mbahas Pustaka guna tiap minggu, rempet-rempet lit sekalak jelma si  galang dagingna cinder bas pintu. Ia eme Turang Senina Brown. Semangat kel ia, ban semangatna nggit ia mpeseh khotbah man jelma si enterem paginna.” La seh sebulan, enggo keri ibagiken Turang Senina Brown buku si ibabana. Mis ka alokenna lebih 5.000 buku janah la ndekah kenca si e, terbuen ka buku si iperlukenna. Tapi, Turang Senina Brown labo itandai selaku kalak perbinaga buku. Sedekah ngelakoken tugasna, semangat kel ia janah lalap gunakenna Pustaka bas khotbah-khotbahna. Emaka rusur igelari kalak ia Bible Brown (Pustaka Brown).

Bas Jerman, kantor cabang si lit i kota Barmen enggo kitiksa, janah kota e nandangi iserang pasuken Prancis. Idat Ajar-Ajar Pustaka sada komplek bangunen i Magdeburg si cocok jadi ingan percetaken. Tanggal 19 Juni, dung me isusun turang senina peralaten guna percetaken ras si debanna janah pindah ku Betel si mbaru i Magdeburg. Sada wari kenca enggo iteh kantor pusat maka perpindahen e enggo dung, iumumken me bas koran maka enggo irebut Prancis kota Barmen. Sadar me turang senina maka perpindahen e mbuktiken kalak e ipasu-pasu Jahwe ras ilindungiNa.

Bas Brasil, George Young, si enggo erberita ku erbage-bage ingan, mbangun kantor cabang si mbaru janah mulai me iterbitken Watch Tower bas bahasa Portugis. Bas piga-piga bulan saja, enggo ibagikenna lebih 7.000 bacan. Meriah ukur Sarah Ferguson sanga reh Turang Senina Young ndahi keluargana. Enggo bacana Watch Tower mulai tahun 1899, tapi lenga ia iperidiken. Piga-piga bulan kenca si e, Turang Senina Ferguson ras empat anakna dungna iperidiken.

Bas pendungi tahun e, Watch Tower 15 Desember 1923 nuriken uga perubahen bas perpulungen-perpulungen, dahin erberita, ras pertemuan-pertemuan mpersada kalak e. Ikataken i je, “Jelas kel teridah maka runggun-runggun . . . paguh kinitekenna . . . Mari sipake perlengkapen perangta secara rohani. Alu semangat ras bulat ukur, teruslah kita maju janah ermeriah ukur bas tahun si reh.”

Tahun 1924 pe menarik kel man Ajar-Ajar Pustaka. Turang senina i Betel enggo kerja keras piga-piga bulan dekahna ngelakoken pembangunen bas sada tapak taneh si lit i Staten Island. Ingan e ndeher ku kantor pusat kalak e i Brooklyn. Bangunen-bangunen si lit bas ingan si mbaru e, dung ibangun bas awal tahun 1924. Si e erban turang senina reh kompakna janah berita si meriah banci ipeseh man kalak si lenga pernah megi berita e.