1. Engkai maka mon-mon mesera siakap patuh?

 PERNAH nge mesera kapndu patuh? Raja Daud pernah bage. Emaka ertoto ia man Dibata, nina, “Ban min gelah meriah ukurku patuh man baNdu.” (Ms. 51:12) Amin pe keleng ate Daud Jahwe, mon-mon mesera kapna patuh. Kita pe bage. Engkai? Si pertama, perban kita manusia si erdosa, emaka nukahen siakap la patuh. Si peduaken, terus usahaken Setan erban kita mberontak bali bagi ia. (2 Kor. 11:3) Si peteluken, i sekelilingta, enterem kalak si la patuh ras nggit mberontak. (Ep. 2:2) Emaka perlu siusahaken kel ngelawan sura-sura guna mberontak si rehna arah dirita, arah Setan, ras arah doni enda. Alu bage, banci kita patuh man Jahwe ras kalak si ipilihNa.

2. Kai ertina “patuh”? (Jakup 3:17)

² Baca Jakup 3:17. Itulis Jakup maka kalak si pentar eme kalak si “patuh.” Ertina arus kita nggit ras siap guna matuhi kalak si ibere Jahwe wewenang. Tapi, labo arapken Jahwe kita patuh man kalak si mindo kita la ngikutken perentahNa.—Perb. 4:​18-20.

3. Engkai maka penting akap Jahwe sipatuhi kalak si lit wewenangna?

³ Banci saja nukahen siakap patuh man Jahwe asangken man jelma. Engkai? Perban petunjuk Jahwe lalap sempurna, la bagi jelma si lit wewenangna. (Ms. 19:7) Amin pe bage, enggo bereken Jahwe wewenang man orang tua, pemerentah, ras pertua-pertua. (Kua. 6:20; 1 Tes. 5:12; 1 Pet. 2:​13, 14) Adi patuh kita man kalak e,  enggo sipatuhi Jahwe. Mari sibahas uga carana gelah banci kita patuh man kalak e amin pe mon-mon mesera siakap ngaloken ras ngikuti petunjuk kalak e.

4. Engkai maka enterem anak muda la patuh man orang tuana?

⁴ Buen anak muda gundari “la patuh man orang tua.” (2 Tim. 3:​1, 2) Engkai? Perban piga-piga orang tua la lakokenna kai si katakenna man anakna. Emaka ianggap anakna kalak e la adil. Lit ka si erpengakap maka nasehat si ibereken orang tuana enggo ketadingen jaman, la masuk akal, ntah pe kakusa. Adi kam sekalak anak muda, pernah nge gejapkenndu bage? Memang, labo lalap nukah ndalanken perentah Jahwe enda: “Patuhlah man orang tua kena sesuai ras peraten Tuhan, sebap si e benar kap.” (Ep. 6:1) Adi bage, kai si banci nampati kam?

5. Engkai maka Jesus usihen si mehulina bas matuhi orang tua? (Lukas 2:​46-52)

⁵ Banci kita erlajar kerna sipat patuh arah contoh si mehulina eme Jesus. (1 Pet. 2:​21-24) Ia manusia si sempurna, tapi orang tuana la sempurna. Tapi, Jesus tetap mehamat man orang tuana, termasuk sanga iban kalak e kesalahen bage pe sanga salah paham kalak e man bana. (Kel. 20:12) Cuba ukuri kai si terjadi sanga umur Jesus 12 tahun. (Baca Lukas 2:​46-52.) Tadingken orang tuana ia i Jerusalem. Situhuna, tanggung jawap utama Jusup ras Maria eme guna mastiken kerina anak-anakna ikut mulih. Sanga jumpa kalak e ras Jesus, isalahken Maria Jesus perban enggo latih banna kalak e. Situhuna, banci nge ikataken Jesus maka si e la adil, tapi aloina orang tuana alu mehamat. Amin pe bage, ‘la angka Jusup ras Maria kai maksudna.’ Tapi Jesus “lalap patuh man kalak e.”

6-7. Kai si banci nampati anak muda patuh man orang tuana?

⁶ Anak muda, pernah nge mesera kapndu patuh man orang tuandu sanga iban kalak e kesalahen ntah pe salah paham kalak e man bandu? Kai si banci nampati kam? Si pertama, ukuri uga perasan Jahwe. Ikataken Pustaka maka meriah ukur Jahwe adi patuh kam man orang tuandu. (Kol. 3:20) Iteh Jahwe nge maka mon-mon la tuhu-tuhu angkai orang tuandu kam janah banna peraturen si tempa-tempa la adil. Tapi adi tetap kam patuh man kalak e, banndu meriah ukur Jahwe.

⁷ Si peduaken, ukuri uga perasan orang tuandu. Sanga patuh kam man orang tuandu, banndu kalak e ermeriah ukur ras reh tekna man bandu. (Kua. 23:​22-25) Banci ka kam reh deherna ras kalak e. Alexandre arah Belgia nari ngataken, “Sanga mulai kupatuhi orang tuaku, reh deherna aku ras kalak e janah reh riahna kap kami.” b Si peteluken, ingetlah, adi patuh kam gundari, si e erguna man masa depanndu. Paulo, si tading bas Brasil ngataken, “Perban patuh aku man orang tuaku, reh nukahna kuakap patuh man Jahwe ras man kalak si lit wewenangna.” Kata Dibata mereken alasen si mehuli engkai maka arus kam patuh man orang tuandu, eme  “gelah berhasil kam janah gedang umurndu i doni enda.”—Ep. 6:​2, 3.

8. Engkai maka enterem anak muda nggit patuh man orang tuana?

⁸ Enterem anak muda enggo gejapkenna kai gunana patuh man orang tuana. Luiza, arah Brasil nari ngataken maka tangtangna la angkaina engkai maka sempat la ipediat orang tuana ia er-HP. Padahal, teremen temanna si sebaya enggo er-HP. Tapi bas pudi wari, itehna maka guna ngelindungi ia nge ate orang tuana. Itehna maka sanga patuh ia man orang tuana, arusna labo akapna ia ibatasi perban nasehat orang tuana paksa si e tuhu-tuhu iperlukenna. Elizabeth, sekalak anak muda arah Amerika Serikat nari, mon-mon mesera kapna patuh man orang tuana. Nina, “Sanga la tuhu-tuhu kuangkai engkai maka iban orang tuaku sada aturen, kuinget mulihi uga aturen-aturen si iban kalak e enggo ngelindungi aku sedekah enda.” Monica, si tading bas Armenia, ngataken maka lalap ulin hasilna adi patuh ia man orang tuana asangken la patuh.

9. Uga pendapat enterem kalak kerna patuh man undang-undang?

⁹ Enterem kalak akuina maka perlu kita “pemerentah” janah perlu kita patuh man piga-piga undang-undang si berlaku. (Rom. 13:1) Tapi banci saja la kalak e nggit patuh man undang-undang si menurut kalak e la adil ntah pe meserasa ngikutisa. Contohna, undang-undang kerna nggalari pajak. Bas sada negara i Eropa, seperempat arah kalak si isurvei ngataken maka “la perlu galari kalak e pajak adi la kap kalak e adil.” E me sebapna penduduk bas negara e kira-kira dua pertelu arah pajak si iwajipken pemerentah ngenca galarina.

10. Engkai maka tetap kita patuh man undang-undang si banci saja mberatsa siakap ndalankenca?

¹⁰ Ikataken Pustaka maka pemerentah manusia memang banci erban kesusahen, ikuasai Setan, janah ntisik nari ikernepken. (Ms. 110:​5, 6; Peng. 8:9; Luk. 4:​5, 6) Tapi ikataken Pustaka ka “ise pe si ngelawan pemerentah, ngelawan peraturen Dibata.” Gundari, ipediat Jahwe pemerentah erkuasa guna njaga ketertipen ras keamanen janah ateNa patuh min kita man kalak e. Emaka perlu ‘sibereken kai si jadi hak kalak e, ’ termasuk siergai kalak e janah sipatuhi. (Rom. 13:​1-7) Banci saja lit undang-undang si la adil siakap, mberatsa, ntah pe ngerugiken kita. Tapi tetap kita nggit matuhisa perban pindo Jahwe kita ngelakokenca, asalken la ngelanggar perentahNa.—Perb. 5:29.

11-12. Uga Jusup ras Maria patuh man undang-undang pemerentah, ras kai hasilna? (Lukas 2:​1-6) (Nen ka gambar.)

 ¹¹ Banci kita erlajar arah Jusup ras Maria si nggit patuh man pemerentah amin pe mesera kel ngelakokenca. (Baca Lukas 2:​1-6.) Sipat kalak e si patuh iuji sanga Maria hamil siwah bulan. Paksa si e, iperentahken kaisar Roma si gelarna Agustus gelah iban sensus penduduk. Emaka Jusup ras Maria arus erdalan ku Betlehem si dauhna kira-kira 150 kilometer ngelewati dalan si erbukit-bukit. Perdalanen e pasti la menukah, terlebih man Maria. Banci saja kuatir kalak e nandangi keselamaten Maria ras bayi kalak e si lenga lahir. Uga adi Maria rempet melahirken bas perdalanen? Selain si e, bayi si lit bas beltek Maria eme Mesias si ijanjiken. Banci nge si e jadi alasen man kalak e guna la patuh man pemerentah?

¹² Amin pe si e erban Jusup ras Maria kuatir, tapi si e la erban kalak e la patuh man pemerentah. Hasilna, ipasu-pasu Jahwe kalak e perban patuh. Maria banci seh alu selamat i Betlehem, lahirkenna bayi si sehat, janah si e erban nubuat bas Pustaka terjadi!—Mi. 5:2.

13. Adi patuh kita, kai gunana man turang seninata?

¹³ Adi patuh kita man pemerentah, si e banci erguna man banta ras kalak si deban. Contohna, banci kita la kena hukumen. (Rom. 13:4) Selain si e, adi patuh kita, banci siban merim gelar Saksi-Saksi Jahwe i lebe-lebe pemerentah. Contohna, puluhen tahun si lewat i Nigeria, lit piga-piga tentera si masuk ku Bale Kerajan sanga perpulungen. Darami kalak e kalak si terlibat bas kerusuhen perban la nggit nggalari pajak. Tapi isuruh peminpin tentera e kalak e lawes janah nina, “Saksi Jahwe lalap nge nggalar pajak.” Payo, tiap patuhindu  undang-undang pemerentah, si e banci erban merim gelar Saksi-Saksi Jahwe janah si e banci saja ngelindungi turang seninandu bas pudi wari.—Mat. 5:16.

14. Kai si nampati turang seninata gelah banci “patuh” man pemerentah?

¹⁴ Memang mon-mon mesera siakap patuh man pemerentah. Joanna, sekalak turang senina si tading i Amerika Serikat ngataken, “Mesera kel kuakap patuh man pemerentah perban kalak e pernah la adil man piga-piga anggota keluargaku.” Tapi usahaken Joanna ngubah perukurenna. Si pertama, lanai bacana komentar-komentar negatip kerna pemerentah bas media sosial. (Kua. 20:3) Si peduaken, ertoto ia gelah banci andalkenna Jahwe janah labo arapkenna gelah berubah pemerentah. (Ms. 9:​9, 10) Si peteluken, ibacana artikel-artikel bas publikasita kerna tetap netral. (Joh. 17:16) Ikataken Joanna maka perban ergaina ras patuhina pemerentah, gundari igejapkenna “kedamen si la terturiken.”

15. Engkai maka mon-mon mesera siakap patuh man petunjuk organisasi Jahwe?

¹⁵ Ate Jahwe ‘patuh kita man kalak si minpin kita bas runggun.’ (Heb. 13:17) Peminpinta eme Jesus janah ia sempurna, tapi kalak si ipakena guna minpin kita i doni enda la sempurna. Mon-mon banci saja mesera siakap patuh man kalak e, terlebih adi ipindo kalak e silakoken kai si la bagi sura-surata. Rasul Petrus pe pernah mesera kapna patuh. Sanga isuruh sada malekat ia man binatang si pantang menurut Undang-Undang Musa, lit telu kali itulak Petrus. (Perb. 10:​9-16) Engkai? Perban petunjuk e la seri ras kai si ilakokenna sedekah enda janah la kapna masuk akal. Adi Petrus saja pe mesera kapna patuh man malekat si sempurna, apai ka kita si arus patuh man manusia si la sempurna.

16. Sanga dat Rasul Paulus petunjuk si tempa-tempa la masuk akal, kai si lakokenna? (Perbahanen Rasul-Rasul 21:​23, 24, 26)

¹⁶ Rasul Paulus pe pernah datna petunjuk si banci saja la kapna masuk akal, tapi tetap patuhina. Paksa si e, ibegi kalak Kristen Jahudi maka Paulus la ngergai Undang-Undang Musa janah ajarina kalak “murtad arah Undang-Undang Musa.” (Perb. 21:​21, cataten i teruh) Kenca si e, ipindo pertua-pertua i Jerusalem gelah ibaba Paulus empat kalak ku rumah pertoton janah ngelakoken acara mbersihken diri ras kalak e. Tujunna eme guna mbuktiken maka idalanken Paulus Undang-Undang Musa. Situhuna iteh Paulus maka kalak Kristen lanai perlu ndalanken Undang-Undang Musa, janah ia pe labo ersalah. Tapi Paulus tetap patuh, janah paginna mis dalankenna kai si ipindo e. (Baca Perbahanen Rasul-Rasul 21:​23, 24, 26.) Perban patuh Paulus, banci jagana runggun Kristen tetap ersada.—Rom. 14:​19, 21.

17. Kai si pelajarindu arah pengalamen Stephanie?

¹⁷ Sekalak turang senina si gelarna Stephanie pernah mesera kapna ngaloken keputusen si iban organisasi. Meriah kel ukurna ras perbulangenna ngelayani bas kelompok bahasa asing. Tapi iputusken kantor cabang guna nutup kelompok e janah itugasken kalak e mulihi ku runggun si make bahasa kalak e.  Bagenda nina Stephanie, “Nembeh kel ateku. Adi kuakap runggun si make bahasaku labo perlu penampat.” Tapi tetap idukungna pengaturen si mbaru e. Nina, “Dungna, kuangka maka keputusen e memang mehuli. Kami enggo bali bagi orang tua secara rohani man piga-piga turang senina si sisada ngenca ia bas kebenaren. Gundari, lit kusampati sekalak turang senina si mbaru-mbaru enda aktip mulihi guna erlajar Pustaka. Enggo reh buena ka waktuku guna pelajaren pribadi.” Nina ka, “Pusuh peratenku bersih perban enggo kuusahaken asa ngasupku guna patuh.”

18. Kai gunana adi kita patuh?

¹⁸ Banci kita erlajar guna patuh. Jesus ‘erlajar patuh,’ labo sanga mehuli situasina, tapi “arah kiniseran si nanamina.” (Heb. 5:8) Kita pe bage. Contohna, bas awal pandemi COVID-19, kita isuruh gelah la pulung i Bale Kerajan janah la erberita arah rumah ku rumah. Mesera nge kapndu patuh man petunjuk e? Amin pe si e la nukah, tapi perban patuh kam, si e ngelindungi kam, erban runggun tetap ersada, ras erban meriah ukur Jahwe. Selain si e, reh tetapna ka ukurta guna patuh man petunjuk kai pe bas kiniseran si mbelin pagi. Paksa si e, banci saja keselamatenta itentuken kepatuhenta.—Jop 36:11.

19. Engkai maka nggit kam patuh?

¹⁹ Enggo sibahas maka adi patuh kita mbue pasu-pasuna. Tapi alasenta si utama patuh man Jahwe eme perban keleng ateta Ia janah siban ateta meriah ukurNa. (1 Joh. 5:3) Labo ndigan pe banci sibalas kiniulin Jahwe. (Ms. 116:12) Tapi banci kita patuh man baNa bage pe man kalak si lit wewenangna. Adi patuh kita, sibuktiken maka kita pentar. Adi pentar kita, siban me meriah ukur Jahwe.—Kua. 27:11.