1. Bas jaman si mbarenda, uga Jahwe erban umatNa jadi megegeh?

 BAS Kata Dibata, kalak si setia rusur ikataken kalak si megegeh. Tapi kalak si megegehna pe, labo lalap megegeh kapna bana. Contohna, pernah iakap Raja Daud ia “bagi gunung gegehna,” tapi pernah ka ia “mbiar.” (Ms. 30:7) Selain si e, luar biasa kel gegeh Simson sanga erdahin kesah si badia bas ia. Tapi sadar ia maka adi la kin isampati kesah si badia, ‘lemah ia bagi kalak si deban.’ (Hak. 14:​5, 6; 16:17) Kalak si setia e banci megegeh perban gegeh arah Jahwe.

2. Engkai maka ikataken Rasul Paulus ia lemah, tapi megegeh ka? (2 Korinti 12:​9, 10)

² Iakui Rasul Paulus maka ia pe perlu gegeh arah Jahwe. (Baca 2 Korinti 12:​9, 10.) Bali bagi kita, Paulus pe lit masalah kesehatenna. (Gal. 4:​13, 14) Mon-mon, mesera kapna ngelakoken kai si benar. (Rom. 7:​18, 19) Mbiar ka ia janah kuatir nandangi kai si terjadi. (2 Kor. 1:​8, 9) Tapi, sanga Paulus lemah, ia jadi megegeh. Uga carana? Ibere Jahwe ia gegeh si iperlukenna.

3. Penungkunen kai saja kari sijawap bas artikel enda?

³ Jahwe pe erjanji guna mereken gegeh man banta. (1 Pet. 5:10) Amin pe bage, lit si arus silakoken gelah banci sidat gegeh e. Perumpamanna bagenda: Sada mesin banci erban motor erdalan, tapi arus perjak si maba motor e gasna gelah motor e erdalan. Bage ka pe, nggit Jahwe mere gegeh man banta, tapi arus lit usahata. Kai si enggo sikapken Jahwe guna erban kita megegeh?  Kai si perlu silakoken gelah banci kita megegeh? Sidat kari jawapenna alu mpelajari uga Jahwe mpegegehi Nabi Juna, Maria mamak Jesus, ras Rasul Paulus. Sibahas ka kari uga Jahwe terus mpegegehi umatNa gundari.

4. Uga carana gelah sidat gegeh arah Jahwe?

⁴ Salah sada cara gelah sidat gegeh arah Jahwe eme alu ertoto. Pasti jawap Jahwe totota janah bereNa ‘kengasupen si luar biasa.’ (2 Kor. 4:7) Banci ka kita ipegegehiNa sanga sibaca ras siukuri Pustaka si “dem alu kuasa.” (Heb. 4:12; Ms. 86:11) Sanga ertoto kita man Jahwe ras sibaca Pustaka, banci kita ndatken gegeh si iperluken gelah banci kita megenggeng, tetap ermeriah ukur, ras ngasup ndalanken tugas si mesera. Mari siperdiateken uga Jahwe mpegegehi Nabi Juna.

5. Engkai maka Nabi Juna perlu ipegegehi?

⁵ Sanga idat Juna tugas si mesera arah Jahwe, mbiar ia ndalankenca, emaka lawes ia erlayar ku ingan si deban. Akibatna, menam ia mate ras kalak si lit bas kapal e perban angin badai. Sanga ibenterken ia ku laut, ibendut ikan si galang ia. Gelap kel bas beltek ikan e janah ngeri. Menurutndu, uga nge perasan Juna paksa si e? Akapna nge ia mate? Ntah mbiar ia enggo itadingken Jahwe? Pasti kuatir kel Juna janah perlu ia ipegegehi.

6. Kai si mpegegehi Juna sanga ia bas beltek ikan? (Juna 2:​1, 2, 7)

⁶ Kai si ilakoken Juna guna ndatken gegeh sanga ia bas beltek ikan? Ertoto ia man Jahwe. (Baca Juna 2:​1, 2, 7.) Amin pe la ia patuh man Jahwe, tapi alu meteruk ukur ertobat ia janah tek ia pasti begiken Jahwe totona. Ukurina ka Kata Dibata. Ja nari siteh? Bas totona si icatat i Juna pasal 2, melala ipakena kata-kata si lit bas Masmur. (Contohna, bandingken Juna 2:​2, 5 ras Masmur 69:1; 86:7.) Si e mbuktiken maka mbue ayat-ayat si iteh Juna bas buku e. Alu ngukurisa, tek ia maka pasti isampati Jahwe ia. Dungna, iselamatken Jahwe ia janah enggo ersikap ia ndalanken tugas arah Jahwe.—Jun. 2:10–3:4.

7-8. Uga Zhiming ndatken gegeh sanga ngadapi masalah?

⁷ Usihen arah Juna banci nampati kita sanga ngadapi erbage-bage masalah. Contohna eme Zhiming, b arah Taiwan, si ngadapi masalah kesehaten si serius. Ianiaya keluargana ka ia perban tek man Jahwe. Idatna gegeh arah Jahwe alu ertoto ras pelajaren pribadi. Bagenda nina, “Mon-mon, sanga lit masalah, kuatir kel aku. Emaka lanai aku banci tenang guna ngelakoken pelajaren pribadi.” Tapi la ia nyerah. Nina, “Ertoto aku man Jahwe. Kenca si e, kupake headset guna megiken lagu Kerajan. Mon-mon, kuendeken ka lagu e alu sora si kitik seh ngasa aku tenang. Dung e, kubenaken erlajar.”

⁸ Pelajaren pribadi enggo mpegegehi Zhiming alu cara si la isangkana. Contohna, sanga ia pemulihen kenca operasi, sekalak perawat ngataken maka perlu ia itransfusi dareh perban sitik ngenca sel darah merahna. Bas berngi sope ia operasi, enggo bacana pengalamen turang senina si enggo pernah  operasi bagi ia. Sitik ngenca sel darah merah turang senina e, sitiken asangken Zhiming, tapi la ia nggit transfusi dareh janah banci ia sehat mulihi. Pengalamen e mpegegehi Zhiming gelah tetap setia.

9. Sanga lemah ras kuatir kam perban ngadapi masalah, kai si banci ilakokenndu? (Nen ka gambar.)

⁹ Sanga ngadapi masalah, pernah nge lanai terturikenndu perasanndu man Jahwe bas toto perban kuatirsa? Ntah pernah nge latihsa kapndu guna erlajar Pustaka? Ingetlah maka tuhu-tuhu iangkai Jahwe uga situasindu. Emaka, amin pe sederhana totondu, teklah kam pasti bere Jahwe gegeh si iperlukenndu. (Ep. 3:20) Adi lit masalah fisik ntah emosi si erban mesera kapndu erlajar, banci begikenndu rekamen audio Pustaka ntah publikasita. Banci ka putarndu lagu ntah pe video bas jw.org. Adi ertoto kam man Jahwe janah daramindu jawapen totondu e arah Pustaka ras bahan-bahan si enggo sikapkenNa, pasti ipegegehiNa kam.

10. Uga turang seninata banci mpegegehi kita?

¹⁰ Banci gunaken Jahwe turang seninata mpegegehi kita. Kalak e banci “mpegegehi” kita sanga ngadapi masalah ntah pe sanga sidat tugas si mesera. (Kol. 4:​10, 11) Perlu kita teman terlebih “sanga lit kesusahen.” (Kua. 17:17) Sanga lemah siakap banta, turang seninata banci mereken penampat, ngapuli kita, ras mpegegehi kita gelah tetap setia man Jahwe. Mari siperdiateken uga Jahwe mpegegehi Maria mamak Jesus.

11. Engkai maka Maria perlu gegeh arah Jahwe?

¹¹ Cuba ukuri perasan Maria sanga datna tugas si mberat kel arah malekat Gabriel. Paksa si e, Maria lenga erjabu, tapi ikataken man bana maka ia nandangi hamil. Lenga pernah ipebelinna anak, tapi arus ipebelinna sekalak anak dilaki si nandangi jadi Mesias. Selain  si e, uga nge nina njelasken kerina e man tunangenna, Jusup? Pasti kuatir kel Maria janah perlu ia gegeh arah Jahwe.—Luk. 1:​26-33.

12. Menurut Lukas 1:​39-45, uga Maria ndatken gegeh si iperlukenna?

¹² Uga Maria ndatken gegeh si iperlukenna guna ndalanken tugasna si istimewa e? Daramina penampat arah kalak si deban. Contohna, pindona gelah bereken Gabriel terbuen informasi kerna tugasna. (Luk. 1:34) La ndekah kenca si e, lawes ia ku “daerah pegunungen” si lit i Juda guna ndahi kade-kadena Elisabet. Kai hasilna? Ipuji Elisabet Maria janah alu penegu-negu Jahwe, ipesehna sada nubuat si mpegegehi kerna bayi si lit bas beltek Maria. (Baca Lukas 1:​39-45.) Ikataken Maria maka enggo ‘cidahken Jahwe kuasaNa alu tanNa.’ (Luk. 1:​46-51) Ipegegehi Jahwe Maria arah Gabriel ras Elisabet.

13. Kai hasilna perban pindo Dasuri penampat arah turang seninana?

¹³ Bagi Maria, kita pe banci sidat pergegeh arah turang seninata. Bage me si igejapken Dasuri, sekalak turang senina i Bolivia. Sanga bapakna kena penakit si la lit tambarna janah irawat i rumah sakit, nggit Dasuri nemanisa ras ngurussa. (1 Tim. 5:4) Tapi e labo lalap menukah. Nina, “Rusur kel lanai kuakap aku ngasup ngelakoken si e.” Daramina nge penampat? Tangtangna lang. Nina, “La ateku erban latih akap turang senina. Perban kuakap pasti nge kari sampati Jahwe aku. Tapi dungna sadar aku, adi la kupindo penampat turang senina, e ertina sisada aku ndungi masalahku.” (Kua. 18:1) Iputusken Dasuri nceritaken situasina man piga-piga temanna. Hasilna, bagenda nina, “Lanai terturiken aku uga belinna pergegeh si enggo bere turang senina man bangku. Ibaba kalak e pangan ku rumah sakit janah pegegehi kalak e aku arah ayat-ayat Pustaka. Meriah kel ukurku perban kuteh labo aku sisada. Kerina kita eme bagin arah keluarga Jahwe si mbelin. Lit turang seninata si nggit nampati kita, ngandung ras kita, janah erjuang ras kita.”

14. Engkai maka perlu sialoken penampat arah pertua-pertua?

¹⁴ Salah sada cara Jahwe mpegegehi kita eme arah pertua-pertua. IbereNa pertua-pertua guna mpegegehi kita ras erban kita semangat. (Jes. 32:​1, 2) Emaka sanga kuatir kita, ceritakenlah perasanta man pertua-pertua. Sanga tawarken kalak e penampat, ula kita ragu ngalokenca. Banci pegegehi Jahwe kita arah kalak e.

15. Kai nge arapen kerina kalak Kristen?

¹⁵ Arapenta si erpalasken Pustaka banci mpegegehi kita. (Rom. 4:​3, 18-20) Selaku kalak Kristen, lit arapenta si luar biasa guna nggeluh seh rasa lalap, la soal bas Pardis i doni ntah pe bas Kerajan surga. Arapenta banci mpegegehi kita gelah megenggeng ngadapi masalah, erberita si meriah, ras ndalanken erbage-bage tugas bas runggun. (1 Tes. 1:3) Arapen si seri pe mpegegehi Rasul Paulus.

16. Engkai maka Rasul Paulus perlu gegeh arah Jahwe?

¹⁶ Bas surat si itulisna man kalak  i Korinti, ipeserina bana ras kudin taneh si nukah pecah. Itulisna maka ia “itindih,” “bingung,” “isiksa,” ras “ipekpeki seh ngasa ndabuh.” Mon-mon, terancam geluhna. (2 Kor. 4:​8-10) Kata-kata e itulisna sanga perdalanenna si peteluken selaku utusen injil. Bas pudi wari, adapina ka terbuen situasi si mesera. Iserang jelma si enterem ia, itangkap, karam kapal si nangkihina, ras ipenjaraken. Paulus pasti perlu gegeh arah Jahwe guna ngadapi si e kerina.

17. Sesuai ras 2 Korinti 4:​16-18, kai si nampati Paulus megenggeng?

¹⁷ Paulus banci megenggeng perban lalap ukurina arapenna. (Baca 2 Korinti 4:​16-18.) Ikatakenna man kalak i Korinti maka amin pe dagingna “reh lemahna,” la ipediatna si e erban kitik ukurna. Lalap ukuri Paulus masa depanna. Arapenna guna nggeluh rasa lalap i surga eme “kemulian si terbelinen,” emaka nggit ia nggengken kesusahen kai pe. Perban terus ukuri Paulus arapenna e, gegehna “iban mbaru tiap wari.”

18. Uga arapen kekeken mpegegehi Tihomir ras keluargana?

¹⁸ Tihomir, sekalak turang senina arah Bulgaria, terpegegehi perban arapenna. Piga-piga tahun si lewat, adekna, Starko, mate perban kecelakan. Piga-piga waktu dekahna, ceda kel ukur Tihomir. Guna ngatasisa, ia, diberuna, ras anakna mbayangken arapen kekeken. Bagenda nina, “Ibahas kami i ja pagi kami jumpa, kai pangan si tangger kami man bana, ise saja pagi undang kami bas pesta pertama kenca ia ipekeke, ras kai saja pagi si turiken kami man bana kerna wari-wari pendungi.” Ikataken Tihomir maka ngukuri arapen kekeken mpegegehi keluargana gelah tetap megenggeng janah terus nimai paksana pagi ipekeke Jahwe seninana e.

19. Uga carana gelah reh tekna kam man arapenndu? (Nen ka gambar.)

 ¹⁹ Uga carana gelah reh tekna kam man arapenndu? Adi arapenndu nggeluh rasa lalap bas doni, bacalah keterangen kerna Pardis si lit bas Pustaka janah ukuri alu mbages. (Jes. 25:8; 32:​16-18) Bayangken uga pagi kegeluhenndu bas doni si mbaru. Ise saja nge si idahndu i je? Sora kai nge si ibegindu? Uga nge perasanndu? Guna nampati kam, nenlah gambar si lit bas publikasita ntah tonton video musik, bagi lagu Bas Doni si Mbaru, Enggo Seh Kel Deherna, ntah Bayangkan Saatnya. Adi ratur siukuri arapenta e, sadar me kita maka masalahta si gundari enda “menahang janah ntisik ngenca.” (2 Kor. 4:17) Arapen si bereken Jahwe man banta nampati kita megenggeng ngadapi masalahta.

20. Uga carata ndatken gegeh sanga lemah siakap banta?

²⁰ Sanga lemah siakap banta, ‘Dibata kap si mereken gegeh man banta.’ (Ms. 108:13) Enggo isikapken Jahwe kai si iperlukenndu gelah banci tetap megegeh. Emaka ertotolah man Jahwe arah ukurndu nari sanga perlu kam penampat guna ndalanken sada tugas, gelah megenggeng ngadapi masalah, ntah pe gelah tetap ermeriah ukur. Darami petunjukNa sanga kam pelajaren pribadi. Alokenlah pergegeh arah turang seninandu. Raturlah ukuri kerna arapen bas masa depan. Alu bage, ‘kuasaNa si mulia mereken gegeh si perlukenndu gelah banci kam ngasup ngadapi kerinana alu sabar ras ermeriah ukur.’—Kol. 1:11.