1-2. Uga nge carana gelah banci tuhu-tuhu siangkai isi Pustaka? Ban perumpamanna.

 BAYANGKEN adi nukur rumah atendu. Mis nge tukurndu kenca idahndu foto bagin depan rumah e? Pasti lang. Pasti nenndu atendu langsung rumah e. Banci saja kelilingindu rumah e, masuk kam ku tiap ruangenna, janah pereksandu tiap bagin rumah e. Selain si e, banci saja nenndu gambar rancangen rumah e. Pasti megermet kam mperdiateken kerina bagin rumah si atendu itukurndu.

² Banci ka bage siban sanga mbaca ras mpelajari Pustaka. Sekalak ahli mpeseri isi Pustaka ras “sada bangunen si galang ras meganjang kel janah mbages pondasina.” Adi meter-meter kita mbaca Pustaka, “ajaren dasar si lit bas kata-kata si badia arah Dibata” ngenca siangkai. (Heb. 5:12) Emaka, uga carata ngangkai kerina isi Pustaka? Bali bagi perumpaman kerna rumah ndai, perlu kita “masuk” guna meteh kerina isina. Pelajarilah uga bagin-bagin bas Pustaka lit hubungenna sada ras si debanna. Usahakenlah ngangkai kai si itekindu ras engkai maka kam tek.

3. Nasehat kai si ibereken Rasul Paulus man turang seninana, janah kai tujunna? (Epesus 3:​14-19)

³ Guna ngangkai kerina bagin Kata Dibata, arus sipelajari kebenaren Pustaka si mbages. Inasehati Rasul Paulus turang seninana gelah rajin mpelajari Kata Dibata gelah banci ‘tuhu-tuhu angkai kalak e uga belangna, gedangna, ganjangna, ras bagesna kebenaren e.’ Alu bage, banci kalak e “rurat janah ibangun” bas kinitekenna. (Baca Epesus 3:​14-19.) Kita pe perlu ngikutken nasehat e. Mari  sibahas uga carata mpelajari Kata Dibata alu megermet janah ngangkai terdauhen ertina si mbages.

4. Kai si banci silakoken gelah reh rembakna kita ras Jahwe? Ban contohna.

⁴ Selaku kalak Kristen, perlu siangkai ajaren dasar Pustaka. Tapi, la kita puas meteh si e saja. Merhat kita meteh “kepentaren Dibata si seh kel bagesna” alu penampat kesah si badiaNa. (1 Kor. 2:​9, 10) Risetlah kai si banci erban kam reh rembakna ras Jahwe. Contohna, banci pelajarindu terbagesen uga Jahwe ncidahken kekelengenNa man umatNa mbarenda, janah uga e mbuktiken maka keleng ka ateNa kam. Banci ka pelajarindu uga pengaturen Jahwe bas nembah Ia bas jaman Israel mbarenda, janah bandingken ras pengaturen runggun Kristen si lit gundari. Ntah banci ka risetndu nubuat-nubuat kerna Mesias, si terjadi bas kegeluhen ras pelayanen Jesus i doni.

5. Topik kai nge atendu irisetndu?

⁵ Piga-piga turang senina si rajin erlajar Pustaka pernah isungkun topik kai nge bas Pustaka si pelajarina atena terbagesen. Banci nenndu piga-piga jawapen kalak e bas kotak “ Topik-Topik si Banci Iriset.” Risetlah kam kerna si e janah nggunaken Indeks Publikasi Menara Pengawal ntah pe Panduan Riset untuk Saksi-Saksi Yehuwa. Adi pelajarindu Pustaka terbagesen, e banci mpepaguh kinitekenndu janah nampati kam ‘ndatken pemeteh kerna Dibata.’ (Kua. 2:​4, 5) Mari sibahas piga-piga kebenaren Pustaka si mbages.

6. (a) Kai bedana rencana ras peraten? (b) Engkai maka banci sikataken peraten Dibata “tahan rasa lalap”?

⁶ Cuba ukuri kai nina Pustaka kerna peraten Dibata. Tangtangna, perlu siteh kai bedana rencana ras peraten. Rencana banci ipeseri ras dalan gelah seh kita ku sada tujun. Rencana e banci gagal adi lit  si ngambati bas dalan e. Tapi, peraten banci ipeseri ras ingan si apai ateta sidahi. Lit piga-piga dalan gelah banci seh ku je. Adi lit si ngambati bas sada dalan, banci sipilih dalan si deban. Bas Pustaka, ipebetehken Jahwe “peratenNa si tahan rasa lalap” alu manjar-anjar. (Ep. 3:11) Peraten Jahwe pasti lalap berhasil amin pe lit si ngambatisa, perban banci lalap gunakenNa dalan si deban. Banci ‘banNa kerina erdalan sue ras peratenNa.’ (Kua. 16:4) Hasil arah kai si ilakoken Jahwe e tahan rasa lalap. Kai kin peraten Jahwe, janah kai saja si lakokenNa gelah terjadi peratenNa?

7. Kenca Adam ras Hawa mberontak, kai si lakoken Jahwe gelah terjadi peratenNa? (Matius 25:34)

⁷ Ikataken Dibata man manusia pertama kai tujunNa nciptaken kalak e. IperentahkenNa man kalak e gelah ‘ertambah-tambah janah reh teremna, demilah doni ras kuasailah kerina binatang si nggeluh’ i doni. (Kej. 1:28) Sanga Adam ras Hawa mberontak, kalak e ras keturunenna jadi erdosa. Tapi banci denga ilakoken Jahwe peratenNa alu cara-cara si deban. Mis ipajekkenNa sada Kerajan i surga si banci erban peratenNa nandangi manusia ras doni terjadi. (Baca Matius 25:34.) Bas waktu si itetapken Jahwe, iutusNa AnakNa sintua ku doni guna ngajari manusia kerna Kerajan e ras mereken geluhna jadi tebusen si mbebasken kita arah dosa ras kematen. Kenca si e, Jesus ipekeke ku surga guna merentah jadi Raja bas Kerajan Dibata. Tapi, lit denga si perlu sipelajari kerna peraten Dibata.

8. (a) Kai nge tema utama Pustaka? (b) Bagi si ijelasken bas Epesus 1:​8-11, kai ka si termasuk peraten Jahwe? (Nen gambar sampul.)

⁸ Tema utama Pustaka eme gelar Jahwe ipebadia sanga ibanNa peratenNa terjadi bas doni arah KerajanNa si ipinpin Kristus. Peraten Jahwe la mungkin berubah. Enggo ijaminNa maka peratenNa pasti terjadi. (Jes. 46:​10, 11; Heb. 6:​17, 18) Bas waktuna pagi, iubah me doni enda jadi Pardis. Si tading i je eme keturunen Adam ras Hawa si enggo jadi sempurna janah kalak e ‘nggeluh pagi seh rasa lalap’ alu ermeriah ukur. (Ms. 22:26) Tapi peraten Jahwe labo e ngenca. IpersadaNa ateNa kerina ciptanNa si lit i surga ras i doni. Kenca si e, kerina kalak e patuh man Jahwe selaku Penguasana janah setia kalak e ngelayani Ia. (Baca Epesus 1:​8-11.) Pasti luar biasa kel siakap ngidah cara Jahwe erban peratenNa terjadi.

9. Alu mbaca Pustaka, seh ja banci sibayangken masa depanta?

⁹ Perdiateken nubuat si ikataken Jahwe bas Taman Eden, si icatat bas Kejadin 3:15. b InubuatkenNa erbage-bage kejadin si erban peraten Dibata terjadi. Tapi, si e kerina terjadi ribun tahun kenca si e. Kejadin kai saja kin e? Tangtangna, salah sada keturunen Abraham jadi Mesias ntah pe Kristus. (Kej. 22:​15-18) Kenca si e bas tahun 33 M, itagut me tumit Jesus bagi si inubuatken. (Perb. 3:​13-15) Si terakhir, iperperken pagi takal Setan. Si e terjadi lebih 1.000 tahun nari. (Ket. 20:​7-10) Ikataken Pustaka ka piga-piga kejadin si terjadi sope dung permusuhen antara pemerentahen Setan ras organisasi Jahwe.

10. (a) Kejadin-kejadin kai si kentisik nari terjadi? (b) Uga carata nikapken pusuh ras perukurenta gundari? (Nen cataten i teruh.)

 ¹⁰ Cuba ukuri kejadin-kejadin si luar biasa si enggo inubuatken Pustaka. Si pertama, iumumken bangsa-bangsa pagi “dame ras aman!” (1 Tes. 5:​2, 3) Kenca si e, “bas waktu si ntisik” mulai me terjadi kiniseran si mbelin sanga iserang bangsa-bangsa pagi kerina agama palsu. (Ket. 17:16) Dung e, banci saja siidah pagi tanda-tanda si luar biasa sanga “Anak manusia reh i datas embun i langit, alu kuasa ras kemulian si mbelin.” (Mat. 24:30) Ihakimi Jesus pagi manusia janah ipisahkenna biri-biri arah kambing nari. (Mat. 25:​31-33, 46) Setan pe terus ngelawan Dibata. Perban segat kel atena umat Dibata, iiahkenna gabungen bangsa-bangsa si igelari Pustaka Gog arah taneh Magog nyerang umat Jahwe. (Esek. 38:​2, 10, 11) Bas kiniseran si mbelin, kalak si ipilih ku surga si tading denga i doni ipepulung pagi ku surga. Ersada me kalak e ras Kristus bage pe pasukenna si lit i surga guna erperang bas Harmagedon, si terjadi bas pendungi kiniseran si mbelin. c (Mat. 24:31; Ket. 16:​14, 16) Kenca si e, mulai me Kristus merentah i doni enda 1.000 tahun dekahna.—Ket. 20:6.

11. Uga nge pagi kegeluhenndu adi enggo nggeluh kam rasa lalap? (Nen ka gambar.)

¹¹ Gundari cuba ukuri terdauhen kerna masa depanndu. Ikataken Pustaka maka ‘enggo ban Penciptata bas pusuhta sura-sura guna nggeluh rasa lalap.’ (Peng. 3:11) Bayangken uga pagi kegeluhenndu bage pe hubungenndu ras Jahwe sanga kam enggo nggeluh rasa lalap. Bas buku Mendekatlah kepada Yehuwa, halamen 319, lit kata-kata si menarik, bagenda nina, “Kenca nggeluh kita ratusen, ribun, jutan, seh ku miliaren tahun, pemetehta kerna Dibata Jahwe pasti pagi ndauh buen asangken si gundari. Tapi, sigejapken me pagi maka la terkira  buena si perlu denga sipelajari kerna kai si luar biasa. . . . La terbayangken kita uga jilena ras uga luar biasana kegeluhen bas Pardis pagi. Tapi si pentingna eme lalap pagi kita reh rembakna ras Jahwe.” Emaka gundari, kai deba nari si banci siriset sanga sipelajari Pustaka?

12. Uga carata ndatken gambaren kerna surga? Ban contohna.

¹² Arah Pustaka, banci sidat sitik gambaren kerna kemulian Jahwe “bas ingan si meganjang.” (Jes. 33:5) Lit ikataken bas Pustaka piga-piga si luar biasa kerna Jahwe ras bagin organisasiNa si lit i surga. (Jes. 6:​1-4; Dan. 7:​9, 10; Ket. 4:​1-6) Contohna, banci sibaca kerna kai si luar biasa si idah Esekiel sanga ‘terbuka langit janah datna pengenehenen arah Dibata.’—Esek. 1:1.

13. Uga nge perasanndu kenca ukurindu tugas Jesus i surga? (Heber 4:​14-16)

¹³ Cuba ka ukuri kerna tugas Jesus i surga. Ia me Raja si erkuasa ras Imam si Mbelin si ngangkai kelemahenta. Erkelangken Jesus banci kita bebas ertoto, tempa-tempa sideheri “tahta Dibata si mereken kiniulin si luar biasa.” Banci ka kita ertoto gelah sidat perkuah ate Jahwe ras penampatNa “bas waktu si tepat.” (Baca Heber 4:​14-16.) Mbera-mbera, tiap wari siukuri kai si enggo lakoken Jahwe ras Jesus bage pe si sangana lakokenna man banta arah surga nari. Alu bage, kekelengen Jahwe ras Jesus ngiahken kita reh semangatna bas ngelayani Jahwe.—2 Kor. 5:​14, 15.

14. Kai salah sada cara si mehulina guna ncidahken maka siergai Jahwe ras Jesus? (Nen ka gambar.)

¹⁴ Salah sada cara si mehulina guna  ncidahken pengerganta man Dibata ras AnakNa eme alu rusaha nampati kalak si deban jadi Saksi Jahwe ras jadi pengikut Jesus. (Mat. 28:​19, 20) Bage me si ilakoken Rasul Paulus perban ergaina kel kai si ilakoken Dibata ras Kristus. Itehna maka ate Jahwe “erbage-bage kalak iselamatken janah ndatken pemeteh si tepat kerna kebenaren.” (1 Tim. 2:​3, 4) Emaka, kerja keras kel ia bas pelayanen guna nampati enterem kalak asa bancina ‘gelah alu cara kai pe banci selamatkenna kalak e.’—1 Kor. 9:​22, 23.

15. Menurut Masmur 1:​2, kai si banci erban kita ermeriah ukur?

¹⁵ Ikataken penulis masmur maka kalak si ermeriah ukur ras si berhasil eme kalak si “ngena kel atena undang-undang Jahwe” janah ‘ukurina undang-undang e suari ras berngi.’ (Ms. 1:​1-3) Sekalak penerjemah Pustaka si gelarna Joseph Rotherham erban komentar kerna ayat e bas bukuna si erjudul Studies in the Psalms. Ikatakenna maka sekalak jelma arus “ngena kel atena petunjuk Dibata janah e erban nggit ia ndaramisa, mpelajarisa, janah mereken mbue waktu guna ngukurisa.” Ikatakenna ka maka adi sekalak jelma “la mbaca Pustaka bas sada wari, sia-sia me sada wari e.” Payo, banci gejapkenndu keriahen ukur bas mpelajari Pustaka alu mpelajari terbagesen tiap baginna janah tehndu maka kerina bagin e lit hubungenna.

16. Kai kari sibahas bas artikel seterusna?

¹⁶ Kebenaren si meherga si ajarken Jahwe arah Pustaka, situhuna banci nge siangkai. Bas artikel seterusna, sibahas kari salah sada kebenaren si mbages eme rumah pertoton rohani Jahwe si mulia si ituriken Paulus bas suratna man kalak Kristen Heber. Mbera-mbera, meriah kapndu mpelajarisa.