Penungkunen Si Mbaca
Selain manna ras perik leto, lit nge pangan si deban si banci ipan kalak Israel bas taneh mesawang?
Manna me pangan si utama man kalak Israel sanga kalak e bas taneh mesawang 40 tahun dekahna. (Kel. 16:35) Pernah ka dua kali bereken Jahwe perik leto man kalak e. (Kel. 16:12, 13; Bil. 11:31) Tapi lit ka nge pangan si deban si banci ipan kalak Israel amin pe la mbue.
Mon-mon, ibaba Jahwe umatNa ku “ingan ngadi” janah i je banci dat kalak e lau inemen ras pangan. (Bil. 10:33) Salah sada ingan e eme mata lau i Elim. I je “lit 12 mata lau ras 70 batang kurma.” (Kel. 15:27) Buku Plants of the Bible ngataken maka batang kurma e “banci turah i bas erbage-bage ingan, . . . janah si rusurna igunaken jadi sumber pangan i taneh mesawang. Batang kurma e banci mereken pangan, minak, ras ingan tading man jutan kalak.”
Banci saja kalak Israel pe pernah ngadi i mata lau si galang si gundari igelari Feiran, ingan si lit i Lembah Feiran. a Menurut buku Discovering the World of the Bible, lembah e “gedangna [130 km] janah lembah eme salah sada si gedangna, si mejilena, ras si terkenalna i Sinai.” Ikataken ka bas buku e, “Bas lembah e, kira-kira [45 km] arah uluna, lit Mata Lau Feiran si mejile janah mbue batang kurma i je. Gedang mata lau e [4,8 km], janah inganna kira-kira [610 m] i datas permukaan laut. Banci ikataken mata lau e bagi Taman Eden i Sinai. Mulai mbarenda nari, enterem kalak si tertarik reh ku je perban lit i je ribun batang kurma.”
Batang kurma i Mata Lau Feiran
Sanga ndarat arah Mesir, baba kalak Israel adonen roti, mangkok adonen, janah banci saja babana ka biji-bijin ras minak. Tapi, persedian e pasti la ndekah tahan. Ibaba kalak e ka “melala kambing, biri-biri, ras lembu.” (Kel. 12:34-39) Mbelin kemungkinenna mbue arah binatang-binatang e mate perban susah kegeluhen i taneh mesawang. Banci saja lit iban kalak Israel jadi pangan, ntah pe persembahkenna jadi korban man Jahwe, bage pe man dibata-dibata palsu. b (Perb. 7:39-43) Tapi sanga kalak e i taneh mesawang, tetap lit asuh-asuhen kalak e. Si e teridah arah kata-kata Jahwe sanga kalak e la patuh man baNa, nina, “Jadi permakan pagi anak-anak kena 40 tahun dekahna i taneh mesawang.” (Bil. 14:33) Emaka banci saja inem kalak e susu ras pan kalak e daging arah asuh-asuhen e. Tapi si e pasti la bias guna ncukupi keperlun kira-kira telu juta kalak sedekah 40 tahun. c
Uga binatang-binatang e ndatken pangan ras lau inemen? d Mbarenda, banci saja rusur udan i taneh mesawang, emaka mbue turah sinuan-sinuan i je. Bas buku Pemahaman Alkitab, Jilid 1, i teruh judul, “Arab,” ikataken maka 3.500 tahun si lewat, “banci saja persedian lau bas negri Arab buen asangken si lit gundari. I je mbue kel lembah si kerah si mbages, si mbarenda ipaleri lau, janah e mbuktiken maka mbarenda rusur udan i daerah e.” Amin pe bage, taneh mesawang tetap nge jadi ingan si gersang ras ngeri. (Ul. 8:14-16) Adi la kin bere Jahwe lau alu cara mukjizat, kalak Israel ras asuh-asuhenna pasti enggo mate.—Kel. 15:22-25; 17:1-6; Bil. 20:2, 11.
Ikataken Musa man kalak Israel maka ibere Jahwe kalak e manna gelah ‘sadar kalak e maka manusia nggeluh labo arah roti saja tapi arah tiap kata si kataken Jahwe.’—Ul. 8:3.
a Nen Menara Pengawal 1 Mei 1992, hal. 24-25.
b Ikataken bas Pustaka maka lit dua kali ipersembahken kalak Israel korban binatang man Jahwe i taneh mesawang. Si pertama, sanga imam-imam ilantik. Si peduaken, sanga wari Paskah. Duana e terjadi bas tahun 1512 SM eme tahun si peduaken kalak Israel ndarat arah Mesir.—Im. 8:14–9:24; Bil. 9:1-5.
c Kenca hampir 40 tahun kalak Israel i taneh mesawang, lit ratusen ribu binatang si ijarah kalak e arah musuh si italukenna. (Bil. 31:32-34) Tapi, terus denga pan kalak e manna seh ngasa masuk kalak e ku Negri Perjanjin.—Jos. 5:10-12.
d Banci sisimpulken maka binatang la panna manna, perban manna si banci ipepulung kalak Israel eme si bias guna ipan tiap kalak.—Kel. 16:15, 16.
