1-2. (a) Engkai maka Harmagedon e berita si mehuli man banta? (b) Penungkunen kai saja si man bahasenta bas artikel enda?

ENTEREM kalak tek maka kernep nge pagi doni enda perban perang nuklir ntah pe bencana alam si seh kel parahna. Tapi labo bage si iajarken Pustaka. Menurut Pustaka, kentisik nari terjadi me perang si erguna kel banta. Perang e igelari Harmagedon, janah perang e sada berita si mehuli si banci erban kita ermeriah ukur. (Ket. 1:3) Perang e labo ngkernepken tapi nelamatken manusia! Uga carana?

² Menurut Pustaka perang Harmagedon nelamatken manusia perban perang e: (1) ngkernepken pemerentahen manusia, (2) ngkernepken kalak jahat janah nelamatken kalak si mehuli, janah (3) ngkernepken kalak si ncedai doni. (Ket. 11:18) Gelah reh nukahna siakap ngangkai kai si ikataken Pustaka kerna si e, sibahas kari empat penungkunen: Kai kin Harmagedon e? Kai saja si terjadi pagi sope Harmagedon? Uga carana gelah banci kita selamat sanga reh pagi Harmagedon? Kai si perlu silakoken gundari gelah tetap kita setia sebap nggo reh deherna Harmagedon?

3. (a) Kai ertina kata “Harmagedon”? (b) Menurut Ketangkasen 16:14, 16, ngkai maka banci sikataken Harmagedon e labo gelar sada ingan?

³ Baca Ketangkasen 16:14, 16. Kata “Harmagedon” sekali ngenca icatat bas Pustaka, janah bas bahasa Heber kata e ertina “Deleng Megido.” (Ket. 16:16; cataten i teruh) Megido e gelar sada kota i Israel mbarenda. (Jos. 17:11) Tapi labo maksudna Harmagedon e gelar sada ingan si tuhu-tuhu lit i doni. Situhuna, sanga “raja-raja si lit i doni” ersada guna ngelawan Jahwe, e me Harmagedon. (Ket. 16:14) Selain si e, “Harmagedon” pe banci ngertiken perang si terjadi la ndekah kenca raja-raja ndai ersada. Ja nari banci siteh Harmagedon  e labo gelar sada ingan? Si pertama, la lit deleng i Megido. Si peduaken, daerah Megido e la mbelang, emaka labo siat adi pulung i je “raja-raja si lit i doni” bage pe pasukenna ras mesin-mesin perangna. Si peteluken, bagi si nandangi sibahas bas artikel enda, perang Harmagedon imulai sanga iserang “raja-raja” i doni pagi umat Dibata si lit i belang-belang doni.

4. Engkai maka ihubungken Jahwe perang si mbelin e ras Megido?

⁴ Engkai maka ihubungken Jahwe perang si mbelin e ras Megido? Bas jaman Pustaka, melala perang si terjadi i Megido bage pe i lembah Jisreel si la ndauh arah Megido. Lit piga-piga kali isampati Jahwe umatNa gelah menang bas perang e. Misalna, “deherken lau i Megido,” isampati Jahwe Hakim Barak arah Israel naluken pasuken Kanaan si ipinpin Sisera. Ngata bujur kel Barak ras Nabiah Debora kerna mukjizat Jahwe si erban kalak e menang. Rende kalak e, nina, ‘Bintang-bintang pe ikut erperang i langit nari ngelawan Sisera. Lau Kison ergalun ngombakken kalak e.’​—Hak. 5:19-21.

5. Kai bedana perang Harmagedon ras perang bas jaman Barak?

⁵ Ikataken Barak ras Debora bas pendungi laguna, ‘Mbera kerina musuhNdu bage permatena O, Jahwe, tapi teman-temanNdu ersinalsal bagi matawari si sangana nangkih!’ (Hak. 5:31) Bas Harmagedon pagi, kerina musuh Dibata ikernepken tapi kalak si ngkelengi Dibata iselamatken. Ndauh kel bedana perang Harmagedon e ras perang bas jaman Barak mbarenda. Bas Harmagedon, umat Dibata la ikut perang, senjatana pe labo lit! Amin gia bage, tetap kalak e paguh janah tenang sebap tek kalak e man Jahwe bage pe man pasuken Jahwe si lit i surga.​—Jes. 30:15; Ket. 19:11-15.

6. Kai saja si banci ilakoken Dibata guna naluken musuh-musuhNa bas Harmagedon?

⁶ Kai si ilakoken Dibata bas naluken musuh-musuhNa sanga Harmagedon? Melala cara si banci igunaken Jahwe. Misalna, banci ibanNa gempa, udan baho, ras kilap. (Jop 38:22, 23; Esek. 38:19-22) Banci ka ibanNa musuh-musuhNa sibunuhen. (2 Kro. 20:17, 22, 23) Banci ka isuruhNa malekat munuh kalak jahat. (Jes. 37:36) La soal ugapa pe banNa carana, pasti nge Ia menang. Kerina musuhNa kernep, tapi kerina kalak si benar pasti selamat.​—Kua. 3:25, 26.

7-8. (a) Menurut 1 Tesalonika 5:1-6, kai si imomoken peminpin-peminpin doni si la nggo pernah terjadi? (b) Engkai maka momo e banci ikataken bual si seh kel bahayana?

⁷ Pengumumen kerna “dame ras aman” sope reh “wari Jahwe.” (Baca 1 Tesalonika 5:1-6.) Bas 1 Tesalonika 5:2, “wari Jahwe” maksudna “kiniseran si mbelin.” (Ket. 7:14) Ja nari banci siteh ndigan kiniseran si mbelin e imulai? Ikataken Pustaka maka lit pagi momo ntah pe pengumumen si la nggo pernah terjadi. Pengumumen e me si jadi tanda maka kiniseran si mbelin nandangi imulai.

⁸ Pengumumen kerna “dame ras aman” nggo inubuatken ntah pe nggo ndekah itulis bas Pustaka. Engkai maka imomoken peminpin-peminpin doni kerna si e? Ikut nge peminpin-peminpin agama i je? Banci saja. Sanga imomoken peminpin-peminpin doni kerna “dame ras aman,” situhuna bual arah malekat-malekat jahat nge e kerina. Janah seh kel bahayana bual e. Engkai maka bage? Sebap iakap kalak aman nge kari kerina, kepeken nandangi reh kiniseran si seh kel belinna si la nggo pernah terjadi. Payo, ‘rempet kalak e ikernepken i bas  waktu si kentisik, bali bagi suina iakap diberu si nandangi melahirken.’ Kai si terjadi nandangi umat Jahwe si setia? Banci saja sengget kalak e perban la tehna ndigan tepatna kiniseran si mbelin e imulai, tapi nggom kalak e siap ngadapisa.

9. Sekaligus nge ikernepken Jahwe kerina doni Setan enda? Jelasken.

⁹ Labo sekaligus ikernepken Jahwe kerina doni Setan enda, bagi si ilakokenNa bas jaman Nuah mbarenda. Tapi dua tahap kari ibanNa. Si pertama, ikernepkenNa Babilon si Mbelin, eme kerina agama palsu i doni enda. Si peduaken, bas Harmagedon, ikernepkenNa bagin si deban bas doni Setan, eme sistem politik, militer, bage pe perdagangen. Mari sibahas peristiwa e duana.

10. Menurut Ketangkasen 17:1, 6 ras 18:24, ngkai maka ikernepken Jahwe pagi Babilon si Mbelin?

¹⁰ “Ukumen nandangi pelacur si mbelin.” (Baca Ketangkasen 17:1, 6; 18:24.) Enggo iban Babilon si Mbelin nterem kalak la ngergai Dibata. Melala iajarkenna si la tuhu kerna Dibata. Bali bagi perlua-lua ntah pe pelacur, agama palsu la setia man Jahwe perban idukungna pemerentahen manusia. Itindas agama palsu anggotana janah ipindoina lalap senna. Janah melala ka kalak ibunuhna, termasuk umat Dibata. (Ket. 19:2) Kai nge si ilakoken Jahwe guna ngkernepken Babilon si Mbelin e?

11. Kai nge maksudna ‘binatang si seh kel rawana si megara bagi api’? Janah kai si ilakoken Jahwe gelah ikernepken binatang e pagi Babilon si Mbelin?

¹¹ Igunaken Jahwe pagi ‘binatang si seh kel rawana si megara bagi api’ bage pe “sepuluh tandukna” ngkernepken “pelacur si mbelin.” Binatang si seh kel rawana e maksudna Perserikatan Bangsa-Bangsa. Sepuluh tanduk maksudna kerina pemerentahen si ndukung organisasi e. Bas waktu si nggo itentuken Dibata, iserang Perserikatan Bangsa-Bangsa ras pemerentahen e me pagi Babilon si Mbelin. ‘Irampasna kerina si lit i bas Babilon si Mbelin e janah itilanjangina ia,’ icidahkenna man kerina kalak maka seh kel jahatna Babilon si Mbelin e. (Ket. 17:3, 16) Rempet kel e pagi terjadi, tempa-tempa i bas sada wari, emaka  seh kel senggetna kerina si ndukung Babilon si Mbelin e. Labo mungkin iakap kalak e terjadi kerina e perban sombong kel Babilon si Mbelin e janah rusur ikatakenna, “Aku enda ratu, janah labo aku mbalu, ndigan pe labo kuidah kiniseran.”​—Ket. 18:7, 8.

12. Kai si la ipediat Jahwe ilakoken bangsa-bangsa? Janah ngkai?

¹² Labo ipediat Dibata ikernepken bangsa-bangsa pagi umatNa. Megah kel iakap kalak e jadi umat Jahwe janah nggo ipatuhi kalak e perentah Dibata guna ndarat arah Babilon si Mbelin. (Perb. 15:16, 17; Ket. 18:4) Kalak e pe nggom iusahakenna kel nampati kalak si deban gelah ndarat arah Babilon si Mbelin. Emaka labo ‘ialoken umat Jahwe bencana-bencana’ si reh pagi man Babilon si Mbelin. Tapi, arus tetap paguh kiniteken kalak e gelah banci iadapina kai si terjadi seterusna.

13. (a) Ise kin Gog e? (b) Menurut Esekiel 38:2, 8, 9, ndigan nge perang Harmagedon imulai?

¹³ Serangen Gog. (Baca Esekiel 38:2, 8, 9.) Kenca ikernepken Jahwe kerina agama palsu, sada nari ngenca agama bas doni enda. Umat Jahwe ngenca si tading. Ngidah si e merawa kel Setan. Emaka igunakenna kata-kata si najis, eme keterangen si la tuhu arah malekat-malekat jahat, janah dungna ersada me bangsa-bangsa nyerang umat Jahwe. (Ket. 16:13, 14) Bangsa-bangsa si ersada ndai igelari ‘Gog arah taneh Magog.’ Sanga iserang bangsa-bangsa e pagi umat Jahwe, imulai me perang Harmagedon.​—Ket. 16:16.

14. Kai si isadari Gog pagi?

¹⁴ Si iandalken Gog “gegeh manusia,” eme pasuken militerna. (2 Kro. 32:8) Tapi kita tek man Dibata Jahwe. Motu kel kita iakap bangsa-bangsa. Engkai? Sanga iserang “binatang si seh kel rawana” bage pe ‘sepuluh tandukna’ Babilon si Mbelin, la ngasup dibata-dibata Babilon si Mbelin e nelamatken ia. Padahal paguh kel ia iakap kalak! (Ket. 17:16) Emaka menukah kel iakap Gog ngkernepken kita. Iserangna pagi umat Jahwe bagi “embun si ngeligeni [nutupi] taneh.” (Esek. 38:16, Padan si Ndekah, si Nipegendek [1953]) Tapi la ndekah kenca si e, isadari Gog maka ia nggo terjebak. Bali bagi  Paro bas Lawit Merah, iteh Gog pagi maka Jahwe nge situhuna si ilawanna.​—Kel. 14:1-4; Esek. 38:3, 4, 18, 21-23.

15. Kai nge si ilakoken Jesus pagi bas perang Harmagedon?

¹⁵ Reh me Kristus ras pasukenna surga nari guna nelamatken umat Dibata janah ngkernepken bangsa-bangsa bage pe pasuken kalak e. (Ket. 19:11, 14, 15) Tapi kai si terjadi man Setan, musuh Jahwe si utama, si nipu bangsa-bangsa gelah iserang kalak e umat Jahwe bas perang Harmagedon? Ibenterken Jesus me Setan ras malekat-malekat jahat si debanna ku lubang si seh kel bagesna, janah itahan ia kerina i je seribu tahun dekahna.​—Ket. 20:1-3.

16. (a) Kai buktina ‘sitandai Dibata’? (b) Sanga reh pagi Harmagedon, kai si terjadi man kalak si nandai Dibata?

¹⁶ La soal nggo ndekah kita jadi umat Jahwe ntah pe mbaru denga, arus sibuktiken maka ‘sitandai Dibata’ janah ‘sipatuhi berita si meriah kerna Tuanta Jesus’ gelah banci kita selamat sanga reh Harmagedon. (2 Tes. 1:7-9) ‘Sitandai Dibata’ adi siteh kai si ngena ateNa, kai si segat ateNa, bage pe kerina patokenNa. Selain si e, bukti sitandai Dibata adi keleng ateta Ia, patuh kita man baNa, janah Ia saja ngenca sisembah. (1 Joh. 2:3-5; 5:3) Adi sibuktiken maka sitandai Dibata, kita pe banci “itandai Dibata.” Enda pasti sada kehamaten man banta. (1 Kor. 8:3) Adi “itandai Dibata” kita, e ertina ngena ate Dibata kita. Hasilna, banci kita selamat sanga reh pagi Harmagedon.

17. Kai buktina ‘patuh kita man berita si meriah kerna Tuanta Jesus’?

¹⁷ Si termasuk “berita si meriah kerna Tuanta Jesus” eme kerina si iajarken Jesus si lit bas Kata Dibata. Sipatuhi berita si meriah e adi sidalanken bas geluhta. Siban ka pelayanenta man Jahwe jadi si pentingna bas geluhta, sidalanken patoken-patokenNa si benar, janah siberitaken Kerajan Dibata. (Mat. 6:33; 24:14) Selain si e, arus ka sidukung senina-senina Kristus si ipilih ku surga bas ndalanken tugasna si penting.​—Mat. 25:31-40.

18. Kai si ilakoken kalak si nggo ipilih ku surga guna mbalas kerina perbahanen si mehuli si nggo ilakoken man kalak e?

 ¹⁸ Kentisik nari, banci ibalas kalak si nggo ipilih ku surga kerina perbahanen si mehuli si nggo ilakoken ‘biri-biri si deban’ man kalak e. (Joh. 10:16) Kai maksudna? Sope perang Harmagedon imulai, kerina kalak si termasuk i bas 144.000 nggo iangkat pagi ku surga janah kalak e la banci mate. Kalak e ikut bas pasuken Jesus i surga si ngkernepken Gog janah ilindungina “kelompok jelma si nterem” umat Jahwe. (Ket. 2:26, 27; 7:9, 10) Sanga si e pagi, pasti meriah kel ukur kelompok jelma si nterem e perban nggo idukungna kalak Kristen si ipilih ku surga sanga kalak e lit denga i doni!

19-20. La soal kai pe masalahta, uga carana gelah banci tetap kita setia sanga reh deherna Harmagedon?

¹⁹ I bas wari-wari pendungi si mesera enda, nterem umat Jahwe si ngadapi masalah. Amin gia bage, banci kita megenggeng janah tetap ermeriah ukur. (Jak. 1:2-4) Salah sada si penting si banci silakoken eme terus ertoto. (Luk. 21:36) Selain si e, perlu ka tiap wari sipelajari janah siukuri Kata Dibata alu mbages, termasuk nubuat-nubuat si luar biasa si nandangi terjadi. (Msm. 77:13) Adi terus silakoken si e kerina janah terus kita semangat erberita, banci tetap paguh kinitekenta janah terus siinget arapenta!

²⁰ Cuba bayangken uga perasanndu sanga nggo ikernepken pagi Babilon si Mbelin janah Harmagedon pe nggo dung. Pasti la tanggung kapndu riahna! Janah bayangken ka uga riahna akapndu sanga kerina kalak ngergai gelar Dibata janah kerina si nggeluh ngakui maka lit hak Dibata merentah! (Esek. 38:23) Jelas me, Harmagedon e berita si mehuli man kerina kalak si nandai Dibata, si patuh man AnakNa, bage pe man kalak si megenggeng seh ku kedungenna.​—Mat. 24:13.