ARTIKEL PELAJAREN 38
“Marilah, . . . gelah Kupegegehi Kena”
“Marilah, kena kerina si latih janah beraten, gelah kupegegehi kena.”—MAT. 11:28.
LAGU 17 ‘Nggit Aku’
SI IBAHAS *
1. Kai janji Jesus bas Matius 11:28-30?
PERNAH Jesus erjanji man nterem kalak si mbegiken ia, janah janjina e luar biasa. Nina, “Marilah, . . . gelah kupegegehi kena.” (Baca Matius 11:28-30.) Enda labo terjeng janji saja. Banci siidah buktina arah perbahanen Jesus man sekalak diberu si mekelek pinakitna.
2. Kai si ilakoken Jesus man sekalak diberu si sangana sakit?
2 Perlu kel diberu e penampat. Enggo melala idahina dokter. Tapi nggo pe 12 tahun ia ertambar, lalap la malem-malem. Menurut Undang-Undang Musa, ia najis. (Im. 15:25) Kenca si e, ibegina maka banci ipepalem Jesus kalak sakit, emaka idaramina Jesus. Sanga idahna Jesus, idadapna ujung uisna si arah darat, janah minter ia malem! Labo ipepalem Jesus saja diberu e, tapi ibuktikenna ka keleng atena ia janah meherga iakapna ia. Contohna, sanga ngerana Jesus man diberu e, ikatakenna, “O Nakku.” Pasti malem kel iakap diberu e janah terpegegehi kel ia!—Luk. 8:43-48.
3. Penungkunen kai saja si man bahasenta?
3 Siidah ndai i je, diberu e nge si reh ndahi Jesus. Kita pe arus bage, arus kita si reh ndahi Jesus. Memang gundari, labo iban Jesus mukjizat guna mpepalem kalak si reh ku ia. Tapi tetap kita iundang Jesus reh ku ia gelah ipegegehina. Bas artikel enda, sibahas kari lima penungkunen: Uga carana gelah banci kita reh ku Jesus? Kai maksud Jesus sanga ikatakenna, “Tamakenlah pasangenku ku kuduk kena”? Kai si banci sipelajari arah Jesus? Engkai maka tugas si ibereken Jesus banci mpegegehi kita? Janah, uga carana gelah banci kita terus terpegegehi perban ngikutken Jesus?
“MARILAH”
4-5. Kai saja carana gelah banci kita reh ku Jesus?
4 Salah sada cara reh ku Jesus eme terus mpelajari kai si ikatakenna ras si ilakokenna. (Luk. 1:1-4) Arus kita sendiri si ngelakokenca, labo banci kalak si deban si nggantikenca. Cara si deban reh ku Jesus adi nggit kita iperidiken janah jadi muridna.
5 Selain si e, reh kita ku Jesus adi sipindo penampat pertua sanga lit masalahta. Pertua e “pemere” Jahwe, janah igunaken Jesus kalak e ngurus biri-birina. (Ep. 4:7, 8, 11; Joh. 21:16; 1 Pet. 5:1-3) Kita nge si arus mindo penampat man pertua. La banci siarapken iteh kalak e kai si sangana siukuri bage pe kai masalahta. Perdiateken kai si ikataken sekalak turang seninanta si gelarna Julian. Nina, “Arus kutadingken Betel perban sakit aku. Isuruh temanku aku gelah kupindo idahi pertua aku gelah ipegegehina. Tangtangna la kuakap aku perlu. Tapi dungna kupindoken gelah idahi pertua aku. Kepeken, kerehen kalak e sada hadiah si mehulina kel man bangku.” Kerina pertua si setia, bali bagi dua pertua si reh ndahi Julian ndai, banci isampatina kita gelah siteh uga “perukuren Kristus,” maksudna siangkai janah siusih cara Jesus rukur bage pe perbahanenna. (1 Kor. 2:16; 1 Pet. 2:21) Penampat kalak e tuhu-tuhu sada hadiah si mehulina kel si banci iberekenna banta.
“TAMAKENLAH PASANGENKU KU KUDUK KENA”
6. Kai maksud Jesus sanga ikatakenna, “Tamakenlah pasangenku ku kuduk kena”?
6 Kai maksud Jesus sanga ikatakenna, “Tamakenlah pasangenku ku kuduk kena”? Banci saja maksud Jesus arus kita patuh man bana janah silakoken kai si ikatakenna. Ntah pe banci saja maksud Jesus radu kita ras ia maba pasangen * e, janah erdahin kita ras ia guna Jahwe. Kai pe maksud Jesus, arah kata-katana e banci siteh maka lit dahin si arus silakoken.
7. Menurut Matius 28:18-20, kai tugasta? Janah, banci kita tek kerna kai?
7 Bukti nggit kita iundang Jesus adi sibereken geluhta man Jahwe janah iperidiken. Iundang Jesus kerina kalak, janah ialokenna kerina si tutus atena ngelayani Dibata. (Joh. 6:37, 38) Kerina pengikut Kristus banci ikut ngelakoken pendahin si itugasken Jahwe man Jesus. Istimewa kel siakap tugasta e. Tek kita maka pasti nge lalap Jesus ras kita janah isampatina kita ngelakoken tugas e.—Baca Matius 28:18-20.
“ERLAJARLAH I BAS AKU NARI”
Pegegehilah kalak si deban, bali bagi Jesus (Nen paragrap 8-11) *
8-9. Engkai maka kalak si meteruk ukur meriah akapna ndeher ras Jesus? Penungkunen kai saja si perlu siukuri?
8 Kalak si meteruk ukur meriah akapna ndeher ras Jesus. (Mat. 19:13, 14; Luk. 7:37, 38) Engkai maka bage? Coba siukuri kai bedana Jesus ras kalak Parisi. Peminpin-peminpin agama e sombong janah la perkeleng. (Mat. 12:9-14) Tapi Jesus meteruk ukur janah perkeleng. Kalak Parisi e lalap atena jadi kalak si terkenal ras kalak si penting, tapi ikataken Jesus man murid-muridna gelah ula ia bage. Iajari Jesus murid-muridna gelah meteruk ukur janah nggit ngelayani kalak si deban. (Mat. 23:2, 6-11) Enterem kalak patuh man kalak Parisi perban mbiar ia iukum. (Joh. 9:13, 22) Tapi, kalak si ndeher ras Jesus terpegegehi kel perban Jesus e perkeleng ras mehuli, janah enda teridah arah perbahanen bage pe rananna.
9 Enggo nge iusihndu Jesus? Cuba ukuri enda: ‘Lembut janah meteruk ukur nge aku iakap kalak? Nggit nge aku ngelakoken dahin si rendah iakap kalak gelah banci ngelayani kalak si deban? Mehuli nge aku man kalak si deban?’
10. Uga nge perasan kalak si erdahin ras Jesus?
10 Sanga Jesus ras murid-muridna, iusahakenna gelah meriah janah tenang iakap kalak e, janah meriah ka iakap Jesus mereken pelatihen man kalak e. (Luk. 10:1, 19-21) Emaka la mbiar murid-muridna nungkun man bana, janah Jesus pe nggit megiken pendapat kalak e. (Mat. 16:13-16) Murid-murid Jesus bali bagi sinuan-sinuan si la kurang lau emaka mejile perturahna. Tutus kel ate kalak e mbegiken kai si iajarken Jesus janah teridah buahna eme perbahanen si mehuli.
Mbacarlah kam gelah meriah kap kalak ras kam
Semangatlah kam
Meteruklah kam rukur janah rajinlah *
11. Penungkunen kai saja si perlu siukuri?
11 Lit nge tanggung jawap si ibereken bandu? Adi bage, cuba sungkuni bandu, ‘Uga nge perbahanenku man kalak bas inganku erdahin ntah pe i rumah? Meriah janah tenang nge iakap kalak e ras aku? Mbiar nge kalak nungkun man bangku? Nggit nge aku megiken pendapat kalak e?’ Ula min kita bagi kalak Parisi. Segat atena kalak si sangsi man bana, janah isiksana kalak si la seri pendapatna ras ia.—Mrk. 3:1-6; Joh. 9:29-34.
‘TERPEGEGEHI KENA MULIHI’
12-14. Engkai maka terpegegehi kel kita adi silakoken dahin si itugasken Jesus?
12 Engkai maka terpegegehi kel kita adi silakoken dahin si itugasken Jesus? Melala alasenna, mari sibahas piga-piga.
13 Lit pengawasta si seh kel ulina. Jahwe la kejam aminna pe Ia Pengawas si Meganjangna. IergaiNa kel pendahinta janah ipasu-pasuNa kita. (Heb. 6:10) IberekenNa ka gegeh gelah banci sidalanken tugasta. (2 Kor. 4:7; Gal. 6:5) Jesus, Rajanta, jadi contoh si mehulina kel kerna uga arusna perbahanenta man kalak si deban. (Joh. 13:15) Janah, pertua-pertua si mperdiateken kita iusahakenna ngusih Jesus, “permakan si mulia.” (Heb. 13:20; 1 Pet. 5:2) Iusahaken pertua kel gelah mehuli janah pang sanga ngajari, mpegegehi, bage pe ngepkep ras njagai kita.
14 Lit teman-temanta si seh kel ulina. Kerina teman-temanta perkeleng janah dahinta pe seh kel pentingna. Bas kita ngenca lit si bage. Cuba ukurindu: Banci kita erdahin ras kalak si mehuli perbahanenna, tapi labo ulin iakapna ia asangken kalak si deban. Beluh pe ia, la ia sombong, janah beluhen iakapna kalak si deban asangken ia. Labo teman erdahinna saja kita ibanna tapi ibanna ka kita jadi sahabatna. Janah perban keleng kel atena kita, mate pe labo kapna dalih guna kita!
15. Uga arusna perasanta sanga silakoken tugas si ibereken Jesus?
15 Seh kel pentingna pendahinta. Siajari kalak kai si benar kerna Jahwe janah situriken ka bukti-bukti maka Setan e perbual. (Joh. 8:44) Enggo nterem kalak itipu Setan, dungna latih kel iakap kalak e janah la lit arapenna. Misalna, iban Setan gelah tek kalak maka labo pernah iampuni Dibata dosana janah iban Setan ka gelah la meherga iakap kalak bana. Seh kel kejamna perbahanen Setan e! Adi reh kita ku Jesus, pasti iampuni dosa-dosanta. Janah, iajarken Pustaka maka keleng kel ate Jahwe kita kerina. (Rom. 8:32, 38, 39) Meriah kel ukurta perban banci sisampati kalak gelah tek man Jahwe. Janah puas ka siakap sanga siidah reh ulina kegeluhen kalak e kenca erlajar Pustaka.
TERUS IPEGEGEHI PERBAN NGIKUTKEN JESUS
16. Kai bedana tanggung jawap si ibereken Jesus banta ras tanggung jawapta si deban?
16 Tanggung jawap si ibereken Jesus banta la seri ras tanggung jawapta si deban. Contohna, nterem kalak mulih erdahin latih kel kapna janah la kapna lit gunana si ilakokenna e. Tapi adi kita, nggo pe sada warin ngelayani Jahwe ras Jesus meriah janah puas kel siakap. Memang latih siakap sada warin erdahin janah arus ka lawes ku perpulungen. Tapi biasana, dung kenca perpulungen terpegegehi kita janah reh semangatna. Bage kang perasanta sanga siusahaken lawes erberita ras erban pelajaren pribadi. Ndauh kel belinen pasu-pasu sidat kita asangken pengorbanenta!
17. Kai si arus lalap siinget? Kai si arus manjar-anjar siukuri?
17 Arus lalap siinget maka terbatas gegehta. Emaka siukurilah manjar-anjar ku ja siban gegehta e. Adi la kita hati-hati, banci dungna sia-sia gegehta e guna ngayaki erta. Lit sekalak anak perana si bayak si nungkun man Jesus, nina, “Kai nge si arus kulakoken gelah kudat kegeluhen si rasa lalap?” Enggom idalanken anak perana e Undang-Undang Musa. Pasti mehuli ia kalakna, perban ikataken bas buku Markus ‘keleng ate Jesus ia.’ Ikataken Jesus bana, “Laweslah, dayaken ertandu . . . Kenca si e, mari jadilah pengikutku.” Nggit nge situhuna anak perana e jadi pengikut Jesus, tapi la tertadingkenna “ertana” si seh kel buena. (Mrk. 10:17-22) Dungna, la ia nggit namaken pasangen Jesus ku kudukna janah ipilihna terus jadi ‘budak Kebayaken.’ (Mat. 6:24) Kai si ipilihndu bicara kam jadi anak perana e?
18. Kai nge si perlu terus silakoken, janah ngkai?
18 Perlu terus siperiksa kai si pentingna siakap bas geluhta. Engkai maka bage? Gelah banci sipastiken maka sipake gegehta guna kai si pentingna. Mari siperdiateken kai si ikataken sekalak anak perana si gelarna Mark. Nina, “Enggo sederhana kuakap geluhku sedekah enda. Merintis nge aku, tapi sen lalap si kuukuri janah kuukuri ka uga carana gelah reh sikapna geluhku. Tapi mamang ateku ngkai maka latih kel kuakap. Sadar dungna aku, kepeken sura-suraku ngenca si kuukuri. Kubereken memang waktu ras gegehku man Jahwe, tapi iba-ibana saja ngenca.” Iperobahi Mark dungna carana rukur bage pe kebiasanna gelah banci iberekenna si mehulina man Jahwe. Ikatakenna ka, “Mon-mon mbiar denga nge aku uga kari adi lanai bias senku. Tapi banci aku terus ngelayani perban isampati Jahwe ras Jesus aku.”
19. Engkai maka penting kel gelah benar caranta rukur?
19 Lit telu si arus silakoken gelah banci kita terus ipegegehi sanga sitamaken pasangen Jesus ku kudukta. Kai saja e? Si pertama, benar min caranta rukur. Dahinta e pendahin Jahwe, emaka silakokenlah alu cara si ibereken Jahwe. Kita si erdahin Jahwe ngenca, Ia Majikenta. (Luk. 17:10) Adi caranta saja siban ngelakokenca janah la siikutken cara Jahwe, pasti mesera kel siakap. Lembu si megegehna kel pe pasti suin janah latih kapna adi la ikutkenna dalan si isuruh tuanna, sebap lit pasangen si iban bas kudukna. Tapi adi siikutken kai si ikataken Jahwe, banci sidalani uga pe beratna masalahta janah banci silakoken kai pe si la ngasup siakap kita ngelakokenca. Ingetlah, kai pe sura-sura Jahwe pasti terjadi, la lit ise pe si banci ngambatisa!—Rom. 8:31; 1 Joh. 4:4.
20. Kai alasen si benar sitamaken pasangen Jesus ku kudukta?
20 Si peduaken, arus min benar alasenta sanga sitamaken pasangen Jesus ku kudukta. Alasenta eme simuliaken ateta Jahwe, Bapakta si perkeleng. Bas abad si pertama, lit kalak si ngikutken Jesus perban merangap janah gelah dat untung saja atena. Tapi labo meriah iakap kalak e, dungna itadingkenna Jesus. (Joh. 6:25-27, 51, 60, 66; Pil. 3:18, 19) Tapi lit kang si tutus atena ngikutken Jesus perban keleng kel atena Dibata bage pe kalak si deban. Dungna, ngasup kalak e terus ngikutken Jesus sanga nggeluh kalak e i doni, janah lit arapen kalak e ngelayani ras Kristus i surga. Bali bagi kalak e, banci tetap kita ermeriah ukur adi benar alasenta ngikutken Jesus.
21. Menurut Matius 6:31-33, kai nge si pasti ilakoken Jahwe?
21 Si peteluken, teklah maka pasti isampati Jahwe kita. Sanga sipilih ngikutken Jesus, siteh maka arus kita kerja keras janah siban pengorbanen. Ipersingeti Jesus ka kita maka pasti kita ianiaya. Tapi tek kita pasti nge ibereken Jahwe gegeh gelah ngasup kita ngadapi kerina tentangen. Adi terus kita megenggeng, pasti kita reh paguhna. (Jak. 1:2-4) Tek ka kita maka pasti ibereken Jahwe kerina si iperluken kita, pasti kita itegu-tegu Jesus, janah pasti kita ipegegehi turang seninanta. (Baca Matius 6:31-33; Joh. 10:14; 1 Tes. 5:11) Kai nari kapndu si kurang?
22. Kai nge si erbanca meriah kel ukurta?
22 Sanga ipepalem Jesus diberu si mekelek pinakitna ndai, terpegegehi kel ia janah malem kel iakapna. Tapi, banci rasa lalap ia terpegegehi adi jadi murid Jesus ia janah terus setia. Menurutndu, jadi murid Jesus nge ia? Adi jadi murid Jesus ia, mbelin kel upahna, banci ia ras Jesus ngelayani i surga! Labo lit kadena pe pengorbanen si nggo ibanna guna ngikutken Kristus adi ibandingken ras upahna. La soal i ja arapenta, nggeluh rasa lalap si surga ntah pe i doni, pasti meriah kel ukurta perban nggit kita reh ku Jesus.
LAGU 13 Usihlah Jesus
^ par. 5 Iundang Jesus kita gelah reh ku ia. Emaka kai si arus silakoken? Sibahas kari bas artikel enda. Sibahas ka kari ngkai maka banci kita terpegegehi adi erdahin kita ras Kristus.
^ par. 6 PENJELASEN: Pasangen maksudna sada kayu si itama kalak i das barana guna maba baban, ntah pe sada alat si biasa itama ku kerahung dua binatang guna maba baban.
