1. Undangen kai si ibereken Jesus man empat nelayan janah uga tanggapen kalak e?

DAHIN Petrus, Andreas, Jakup, ras Johanes eme nelayan. Bayangken uga senggetna kalak e sanga bagenda nina Jesus man bana, “Mari ikutken aku, kuban kena kari jadi si njala manusia.” * Uga tanggapen kalak e? Nina Pustaka, “Mis itadingken kalak e jalana janah ikutkenna ia.” (Mat. 4:18-22) Keputusen si iban kalak e ngubah kegeluhenna kari seh rasa lalap. Lanai kalak e jadi penjala ikan tapi jadi “penjala manusia.” (Luk. 5:10) Gundari, ibereken Jesus undangen si seri man kalak si bujur si keleng atena kebenaren. (Mat. 28:19, 20) Enggo nge ialokenndu undangen Jesus guna jadi penjala manusia?

2. Sope ibanndu keputusen jadi penjala manusia, kai si arus ilakokenndu, janah engkai?

² Banci saja enggo ndekah kam erlajar Pustaka janah enggo melala ipelajarindu kerna Jahwe ras Jesus. Enggo ka ibanndu perubahen janah terus kam maju secara rohani. Gundari perlu iputuskenndu nggit nge kam jadi perberita ntah lang. Adi sangsi kam ngaloken undangen Jesus e, ula kitik ukurndu. E buktina penting kel iakapndu keputusen e. Emaka, ope ibanndu keputusen, ukuri lebe mbages-mbages. Memang, ikataken Pustaka maka “mis” itadingken Petrus ras teman-temanna dahinna njala ikan. Tapi situhuna, labo kalak e merudu-rudu erban keputusen e. Enggo lebih enem bulan sebelumna itandai kalak e Jesus janah tek kalak e maka ia Mesias. (Joh. 1:35-42) Kai  si nampati Petrus, Andreas, ras si debanna erban keputusen e?

3. Sipat-sipat kai si banci mpebelin sura-surandu guna ngaloken undangen Jesus?

³ Sanga murid-murid Jesus jadi nelayan, semangat kel kalak e erdahin, beluh kel kalak e i bas ndahiken dahinna, perpang, janah disiplin. Sipat-sipat enda pasti nampati kalak e guna ngelakoken tugasna jadi perberita si mehuli. Bas artikel enda, sibahas kari uga carana mpebelin sipat-sipat e. Alu bage banci kam dungna erberita janah beluh ngajar.

4. Engkai maka Petrus jadi penjala ikan?

⁴ Petrus jadi penjala ikan guna ncukupi keperlun keluargana. Tapi, man Petrus enda labo sada pendahin saja ngenca. Memang meriah kin iakapna nangkap ikan. (Joh. 21:3, 9-15) Bas pudi wari, meriah ka iakapna jadi penjala manusia. Alu penampat Jahwe banci ia berhasil ndahiken dahinna e.​—Perb. 2:14, 41.

5. Menurut Lukas 5:8-11, engkai maka Petrus mbiar, janah kai si banci nampati kita ngatasi perasan si bage?

⁵ Banci tersuruh ukurta erberita perban keleng ateta Jahwe. Kekelengen e me si erbanca maka nggit kita ngerana kerna Jahwe aminna pe banci saja kurang siakap beluhna ngerana. Sanga iundang Jesus Petrus jadi penjala manusia, bagenda nina, “Ula nari kam mbiar.” (Baca Lukas 5:8-11.) Petrus labo mbiar man kai si banci saja kari terjadi adi ia jadi murid Jesus. Edenga idahna iban Jesus mukjizat guna nampati ia ras teman-temanna nangkap ikan si seh kel buena. Enda  erbanca la iakapna metunggung ia erdahin ras Jesus. Banci saja, perasanndu pe seri ras Petrus kenca itehndu kai saja si arus ilakokenndu adi jadi murid Kristus. Adi bage, pebelinlah kekelengenndu man Jahwe, Jesus, bage pe man kalak si deban. Alu bage, tersuruh me ukurndu ngalo-ngalo undangen Jesus guna jadi penjala manusia.​—Mat. 22:37, 39; Joh. 14:15.

6. Kai alasen si deban si erban tersuruh ukurta erberita?

⁶ Lit ka piga-piga alasen si deban si erbanca tersuruh ukurta erberita. Kai e? Sipatuhi ateta perentah Jesus enda, “Laweslah . . . banlah kalak jadi murid-muridku.” (Mat. 28:19, 20) Selain si e, sisampati ka ateta kalak si “itindas janah la iperdiateken.” (Mat. 9:36) Perlu kel iteh kalak e kebenaren kerna Kerajan Dibata. Ate Jahwe gelah kerina kalak meteh kebenaren si tepat janah iselamatken.​—1 Tim. 2:4.

7. Menurut Roma 10:13-15, engkai maka penting kel pendahin erberita e?

⁷ Adi siukuri uga belinna manpaat pendahin erberita enda man kegeluhen kalak, pasti tersuruh ukurta erberita. Biasana ikan si ijala nelayan idayakenna ntah pe ipanna. Tapi, dahin jadi penjala manusia enda nelamatken kegeluhen.​—Baca Roma 10:13-15; 1 Tim. 4:16.

8-9. Kai si arus iteh nelayan, janah engkai?

⁸ Bas jaman Jesus, arus iteh nelayan Israel jenis ikan si apai si banci itangkapna. (Im. 11:9-12) Arus ka itehna ingan-ingan si apai si melala ikanna. Biasana ikan lit bas ingan si melala pangan i je janah cocok ka keadan launa man ikan e. Waktu guna ndarami ikan pe perlu ka nge iperdiateken nelayan. Kerna pentingna waktu nangkap ikan, cuba perdiateken pengalamen sekalak turang seninata si tading bas Kepulauan Pasifik. Iajakna sekalak utusen injil lawes mancing. Nina utusen injil e, “Jumpa jam siwah pagi kita ya.” Ngaloi turang senina e, “La banci, Senina. Ula kita mancing bas waktu si cocok siakap, tapi bas waktu si cocok guna nangkap ikan.”

⁹ Murid-murid Jesus si jadi penjala manusia pe lawes ku ingan si enterem jelma. Idaramina ka waktu si cocok gelah banci jumpa ras kalak. Contohna, murid-murid Jesus erberita bas rumah pertoton, bas ingan pulung kalak Jahudi, arah rumah ku rumah, bage pe bas ingan si enterem jelma. (Perb. 5:42; 17:17; 18:4) Kita pe arus ka siteh kebiasan kalak si lit bas daerahta. Gelah banci enterem jelma sijumpai, arus sisesuaiken waktu ras inganta erberita.​—1 Kor. 9:19-23.

10. Alat-alat kai si ibereken organisasi Jahwe man banta?

¹⁰ Sekalak nelayan perlu alat si tepat janah arus ka itehna uga cara nggunakenca. Kita pe perlu ka lit alat si tepat guna erberita. Janah, arus ka siteh uga cara nggunakenca. Ibereken Jesus petunjuk si jelas man murid-muridna kerna uga carana erberita. Ikatakenna man kalak e kai si arus ibaba, ku ja arus erberita, janah kai si man katanken. (Mat. 10:5-7; Luk. 10:1-11) Gundari, ibereken organisasi Jahwe melala video ras publikasi si erguna i bas erberita ras ngajar, janah e lit bas Alat-Alat Pengajarenta. * Selain si e, iajari ka  kita uga carana nggunaken alat-alat e. E nampati kita gelah pang erberita janah jadi guru si mehuli.​—2 Tim. 2:15.

11. Engkai penjala manusia arus perpang?

¹¹ Rusur kel nelayan erdahin bas berngi wari. La ka banci iperkiraken kalak e uga keadan cuaca bas laut. Banci rempet reh badai sanga kalak e erdahin. Emaka, sekalak nelayan arus perpang. Penjala manusia pe arus perpang. Sanga mulai kita erberita janah sipetandaken dirita sekalak Saksi Jahwe, banci saja itentang keluargata kita, itokoh-tokohi temanta kita, janah itulak kalak beritata. Tapi, labo ateta mamang perban enggo ipersingeti Jesus murid-muridna maka pasti lit pagi tentangen sanga erberita.​—Mat. 10:16.

12. Menurut Josua 1:7-9, kai si banci nampati kita gelah pang?

¹² Kai si arus ilakokenndu gelah kam jadi kalak si perpang? Pertama, arus kam tek maka terus nge isampati Jesus pendahin erberita e surga nari. (Joh. 16:33; Ket. 14:14-16) Si peduaken, teklah kam maka pasti nge ijaga Jahwe kam. (Mat. 6:32-34) Adi reh paguhna kinitekenndu, reh pangna kam. Sanga itadingken Petrus ras teman-temanna dahinna selaku nelayan, teridah maka mbelin kel kiniteken kalak e. Kam pe, adi pang kam ngataken man teman-temanndu bage pe man keluargandu maka kam enggo  erlajar ras Saksi-Saksi Jahwe janah enggo ka reh ku perpulungen, e buktina paguh kinitekenndu! Pasti enggo melala banndu perubahen gelah banci ngikutken patoken Jahwe. Kiniteken ras sipat si perpang me si banci erban kam ngelakoken enda kerina. Adi terus iusahakenndu gelah jadi kalak si perpang, banci kam tek maka “[Jahwe] Dibatandu, tetap ras kam ku japa pe kam lawes.”​—Baca Josua 1:7-9.

13. Kai deba nari si banci nampati kam jadi kalak si perpang?

¹³ Kai saja si banci ilakokenndu gelah jadi kalak si perpang? Ertotolah mindo sipat si perpang man Jahwe. (Perb. 4:29, 31) Pasti ijawap Jahwe totondu. Labo kam pernah itadingkenNa janah lalap nge kam isampatina. Selain si e, banci ka iukurindu uga Jahwe enggo nelamatken umatNa mbarenda. Misalna, isampatiNa umatNa bas Laut Merah. (Kel. 14:13) Adi mbarenda pe isampatiNa umatNa, kam pe pasti isampatiNa. Selain si e, ukuri uga Jahwe enggo nampati kam sanga lit masalahndu janah uga Ia enggo mereken gegeh man bandu gelah banci ibanndu perubahen bas geluhndu. Perlu kam erkiniteken man Jahwe bali bagi si nulisken Masmur, nina, ‘Jahwe kap ras aku, emaka la mbiar aku pe, kai kin banci ibahan kalak man bangku?’​—Msm. 118:6.

14. Kai si banci ipelajarindu arah pengalamen Masae ras Tomoyo?

¹⁴ Cara si debanna ka gelah kam banci jadi kalak si perpang eme alu ngukuri uga Jahwe enggo nampati kalak si permela janah dungna banci jadi kalak si perpang. Cuba perdiateken pengalamen turang seninata si gelarna Masae. Ia permela kel, janah iakapna labo banci ia pernah pang erberita man kalak si la itandaina. Mesera kel iakapna ngelakokenca janah la kapna mungkin. E bali kapna bagi nangkih tembok si meganjang. Kai si ilakokenna? Iusahakenna kel mpebelin kekelengenna man Jahwe bage pe man kalak si deban. Iukurina alu mbages maka penting kel pendahin erberita e gundari janah ertoto ia mindo gegeh man Jahwe gelah lit sura-surana erberita. Dungna lanai ia mbiar erberita janah jadi perintis biasa. Jahwe pe banci ka nampati perberita si mbaru gelah la mbiar. Cuba perdiateken pengalamen sekalak turang seninata si gelarna Tomoyo. Sanga mulai ia erberita arah rumah ku rumah, bas rumah pertama isergang ia, “Kena Saksi Jahwe, me? La aku nggit ngerana ras kena!” Kenca si e, ientamkenna pintuna. Tomoyo la mbiar janah nina man temanna erberita, “Me begindu kai nina ndai? Kai pe lenga ningku mis itandaina kita Saksi Jahwe. Meriah kel ukurku!” Gundari, Tomoyo ngelayani jadi perintis biasa.

15. Kai ertina sidisiplin dirita, janah engkai maka e penting?

¹⁵ Sekalak nelayan banci berhasil adi idisiplinna dirina. Arus iusahakenna asa ngasupna ngelakoken kai si arus ilakokenna. Misalna, arus ia lampas medak, idahikenna dahinna ngayak dung, janah aminna pe cuaca kurang jilena arus ia tetap erdahin. Kita pe ngasup ndungi dahinta adi sidisiplin dirita.​—Mat. 10:22.

16. Gelah banci sidisiplin dirita kai si banci nampati kita?

¹⁶ Situhuna mesera iakap kerina manusia ndisiplin dirina. Biasana, riahen siakap ngelakoken kai si menukah siakap  ngelakokenca. Emaka, gelah banci sidisiplin dirita arus siusahaken ngkuasai dirita. Perlu silatih dirita ngelakoken kai si mesera siakap ngelakokenca. Gelah banci berhasil, perlu kita penampat. Ibereken Jahwe kita penampat arah kesahNa si badia.​—Gal. 5:22, 23.

17. Bas 1 Korinti 9:25-27, kai si ikataken Paulus kerna usaha si enggo ilakokenna gelah banci idisiplinna dirina?

¹⁷ Banci idisiplin Paulus dirina. Tapi, iakuina maka arus ‘ipekpekina’ dirina gelah banci ngelakoken kai si benar. (Baca 1 Korinti 9:25-27.) Iiahkenna kalak si deban gelah idisiplin kalak e dirina janah ngelakoken kerina “alu cara si benar ras teratur.” (1 Kor. 14:40) Arus sidisiplin dirita gelah banci kita ratur erberita bage pe ngajarken kebenaren.​—Perb. 2:46.

18. Kai si arus silakoken gelah ianggap Jahwe kita berhasil?

¹⁸ Sekalak nelayan ikataken berhasil adi melala itangkapna ikan. Tapi, pendahin erberita labo bage. Berhasil ntah lang kita erberita labo inen arah teremna kalak si isampati jadi Saksi Jahwe. (Luk. 8:11-15) Adi terus kita erberita ras ngajar, enggo ianggap Jahwe kita berhasil. Engkai? Perban enggo patuh kita man baNa bage pe man anakNa.​—Mrk. 13:10; Perb. 5:28, 29.

19-20. Kai khususna si erbanca maka arus kita erberita gundari?

¹⁹ I bas piga-piga negeri bas bulan-bulan tertentu ngenca ibereken ijin nangkap ikan. Emaka, iusahaken nelayan kel asa ngasupna ndarami ikan khususna adi enggo keri atena waktuna. Selaku penjala manusia, kita pe bage ka. Kedungen doni enda enggo seh kel deherna. Sitik nari kel ngenca waktuta ngelakoken pendahin si banci nelamatken kegeluhen enda. Enggo ngasak kel pendahin enda. Emaka, ula kam tertaren-taren ntah pe ula timaindu waktu si cocok iakapndu guna erberita.​—Peng. 11:4.

²⁰ Gundari nari pebelinlah sura-surandu erberita, terus pelajari Kata Dibata, jadilah kalak si perpang, janah disiplinlah dirindu. Ikutlah kam erberita ras lebih waluh juta kalak i belang-belang doni janah pasti ibereken Jahwe keriahen ukur man bandu. (Neh. 8:10) Erberitalah asa ngasupndu seh ngasa enggo dung nina Jahwe. Bas artikel seterusna sibahas kari telu cara si banci mpebelin tekadta gelah terus mberitaken berita Kerajan.