1. Katawari nge mesera siakap ngelayani Jahwe?

KATAWARI nge kapndu seh kel serana ngelayani Jahwe? Sangana melala masalahndu ntah sangana la lit masalahndu? Sanga lit masalah biasana mis sipindo penampat Jahwe. Tapi uga adi la lit masalahta, bulat denga nge ukurta ngelayani Jahwe? Ikataken Jahwe man kalak Israel maka e banci saja terjadi.​—Ul. 6:10-12.

2. Usihen kai si ibereken Raja Asa?

² Raja Asa eme contoh si mehuli. Ia sekalak si pentar perban tuhu-tuhu iandalkenna Jahwe. Ilayanina Jahwe labo ngenca sanga lit masalah, tapi sanga la lit masalah pe terus ilayanina Jahwe. Tangtangna nari pe “ia tetap erkemalangen man [Jahwe] i bas gedang-gedang geluhna.” (1 Raj. 15:14) Bas Juda, ikernepkenna kerina kai pe si lit hubungenna ras berhala-berhala. Bas Pustaka ikataken, “Iaguina batar-batar bangsa si deban ras ingan-ingan ersembah kalak perbegu, ibulakkenna tugu batu si isembah kalak perbegu, janah itabanna gana-gana Dewi Asera.” (2 Kro. 14:3, 5) Ninina si gelarna Maaka pe ipecatna, padahal ia me diberu si erkuasana bas Kerajan e. Engkai? Perban ia si erbanca maka kalak nembah berhala.​—1 Raj. 15:11-13.

3. Kai saja kari sibahas bas artikel enda?

³ Asa labo saja ngenca engkernepken berhala-berhala, isampatina ka kalak Juda gelah mulihi ngelayani Jahwe.  Ipasu-pasu Jahwe Asa ras bangsa Israel. Iban Jahwe dame negeri kalak e. * Sanga merentah Asa, lit sepuluh tahun dekahna ‘dame negeri e.’ (2 Kro. 14:1, 4, 6) Bas artikel enda sibahas kari kai saja si ilakoken Asa bas masa dame e. Kenca si e, sibahas kari uga kalak Kristen bas abad pertama nggunaken masa dame. Jenari, sibahas ka kari penungkunen enda: Adi bas negerindu Saksi Jahwe la ilarang, uga carandu nggunaken situasi e alu pentar?

4. Menurut 2 Kronika 14:2, 6, 7, kai saja si ilakoken Asa bas masa dame?

⁴ Baca 2 Kronika 14:2, 6, 7. Ikataken Asa man rakyatna maka Jahwe si mereken kedamen man kalak e. Tapi, labo iakap Asa maka masa dame e waktuna guna santai-santai. Sebalikna, igunakenna masa dame e guna mbangun kota, tembok, menara, ras gerbang. Nina Asa man kalak Juda, “Negeri enda banci sikuasai.” Kai maksudna? Banci kalak e bebas ku japa pe bas negeri si ibereken Jahwe man kalak e, janah bebas kalak e mbangun perban lanai lit musuh. Emaka iiahkenna rakyatna gelah nggunaken masa dame e alu mehuli.

5. Engkai maka ipegegehi Asa pasuken militerna?

⁵ Igunaken Asa ka masa dame e guna mpegegehi pasuken militerna. (2 Kro. 14:8) La nge tek Asa man Jahwe maka bage ibanna? Labo. Tapi iteh Asa tugasna selaku raja, eme nikapken rakyatna guna ngadapi kiniseran si banci saja terjadi bas wari si pepagi. Iteh Asa maka masa dame e banci saja labo pagi lalap lit, janah e me si terjadi.

6. Kai si ilakoken kalak Kristen bas abad pertama sanga masa dame?

⁶ Amin pe rusur kalak Kristen abad pertama ianiaya, tapi pernah kang inanami kalak e masa dame. Kai nge si ilakoken kalak e paksa si e? Terus kalak e semangat erberita janah tutus kel ngelayani Jahwe. Asilna jumlah kalak e pe “terus reh teremna.” Ipasu-pasu Jahwe kalak e perban semangat kel erberita bas masa dame.​—Perb. 9:26-31.

7-8. Kai si ilakoken Paulus ras kalak si deban sanga lit kesempaten guna erberita? Jelasken.

⁷ Igunaken kalak Kristen abad pertama tiap kesempaten guna mberitaken berita si meriah. Contohna, tading Paulus i Epesus gelah banci erberita man enterem jelma i je.​—1 Kor. 16:8, 9.

⁸ Lit ka kesempaten man Paulus ras kalak Kristen guna erberita man enterem jelma bas tahun 49 Masehi. Paksa si e, enggo idungi rasul-rasul ras pertua-pertua i Jerusalem masalah kerna sunat. (Perb. 15:23-29) Kenca ipebetehken Paulus ras kalak si debanna keputusen kerna sunat man runggun, reh semangatna kerina kalak Kristen mberitaken “berita si meriah kerna kata Jahwe.” (Perb. 15:30-35) Kai asilna? Nina Pustaka, “Reh paguhna kiniteken runggun-runggun janah tiap wari jumlah kalak e reh teremna.”​—Perb. 16:4, 5.

9. Gundari uga situasi bas melala negeri, janah penungkunen kai si banci sisungkun man dirita?

⁹ Gundari, bas melala negeri banci turang seninata bebas erberita. I bas negeri si bage nge kam tading? Adi ue, cuba ukuri penungkunen enda, ‘Uga nge aku nggunaken kebebasen e?’ Bas wari-wari pendungi enda meriah kel iakap umat Jahwe perban banci sibuk erberita ras ngajar. Enda pendahin si mbelinna si ilakoken i belang-belang doni. (Mrk. 13:10) Melala si banci silakoken bas pendahin e.

10. Menurut 2 Timotius 4:2, kai nge si perlu silakoken?

¹⁰ Uga nge carandu nggunaken masa dame e alu mehuli? (Baca 2 Timotius 4:2.) Cuba ukuri uga situasindu gundari, banci nge kam ntah pe anggota keluargandu mereken terbuen bas pendahin erberita ntah pe jadi perintis? Gundari labo waktuna guna mpepulung erta ntah pe sen perban kerina e labo banci nelamatken kita bas kiniseran si mbelin.​—Kua. 11:4; Mat. 6:31-33; 1 Joh. 2:15-17.

11. Kai saja si enggo ilakoken gelah reh teremna kalak megiken berita si meriah?

¹¹ Enterem perberita mpelajari bahasa si mbaru gelah banci reh teremna isampatina kalak nandai Jahwe. Isediaken organisasi Jahwe melala baca-bacan, video, ntah pe audio guna nampati kalak e gelah banci erberita man reh teremna kalak bas erbage-bage bahasa. Contohna, i bas tahun 2010 publikasita enggo lit i bas lebih 500 bahasa. Tapi gundari enggo lit lebih 1.000 bahasa!

12. Kai nge manpaatna adi ibegiken kalak berita si meriah i bas bahasa si biasa igunakenna? Bereken contohna.

¹² Uga nge perasan kalak sanga ibegina kerna Kata Dibata i bas bahasana sendiri? Cuba ukuri kai manpaat si idat sekalak turang seninata sanga reh ia ku kebaktin regional i Amerika Serikat. Kebaktin e lit bas bahasa si biasa igunakenna kitik-kitikna nari eme bahasa  Kinyarwanda. Bahasa e melala ipake i Rwanda, Kongo (Kinshasa), ras Uganda. Kenca dung kebaktin, nina, “Enda me tangtangna banci tuhu-tuhu kuangkai acara kebaktin mulai kin aku pindah ku Amerika Serikat 17 tahun si lewat.” Jelas me, kena kel ku pusuh turang seninata e sanga ibegina kebaktin i bas bahasana. Adi cocok situasindu, banci nge pelajarindu bahasa si deban gelah isampatindu kalak bas daerahndu? Lit nge kalak bas daerahndu si riahen iakapna megi berita si meriah i bas bahasa si biasa igunakenna? Teklah kam maka kerja kerasndu labo sia-sia.

13. Kai nge si ilakoken turang seninata bas Rusia sanga bebas kalak e ngelayani Jahwe?

¹³ Labo kerina turang seninata banci bebas erberita. I bas piga-piga negeri, la banci bebas turang seninata erberita perban ilarang pemerentah. Contohna, cuba ukurindu kerna turang seninata i Rusia. Kenca ertahun-tahun ianiaya, bas bulan Maret 1991 ibere pemerentah me kebebasen man kalak e. Paksa si e, jumlah perberita kira-kira 16.000 ngenca bas Rusia. Tapi 20 tahun kenca si e, jumlahna jadi 160.000. Jelas me, igunaken turang seninata kebebasen e jadi kesempaten guna erberita. Memang labo terus inanami kalak e kebebasen. Dungna, berubah situasi bas negeri e, tapi terus kalak e semangat ngelayani Jahwe. Terus ilakoken kalak e kai pe gelah banci ngelayani Jahwe.

14-15. Uga Jahwe nampati Asa?

¹⁴ I bas jaman Raja Asa labo terus lit masa dame. Sada pasuken militer si mbelin si jumlahna lebih sada juta kalak reh arah Etiopia nari guna nyerang  Juda. Peminpinna eme Sera, tek kel Sera maka ia ras pasukenna banci naluken Juda. Uga tanggapen Raja Asa? Tek kel ia man Jahwe janah ertoto ia, “Sampatilah kami genduari, O [Jahwe] Dibata kami, sebap Kam kap penalemen kami, dingen i bas gelarNdu kami ndarat erperang ngelawan tentera si nterem enda.”​—2 Kro. 14:11.

¹⁵ Aminna pe jumlah pasuken kalak Etiopia menam dua kali lipat buen asangken pasuken Asa, tapi iteh Asa maka Jahwe me si megegehna janah banci isampatiNa umatNa. La ikecewaken Jahwe ia. Isampati Jahwe umatNa janah kalah me pasuken Etiopia ndai.​—2 Kro. 14:8-13.

16. Ja nari banci siteh maka masa dame e labo kari terus lit?

¹⁶ Aminna pe la siteh kai kari si terjadi man banta, siteh maka masa dame si banci saja lit gundari labo kari lit seterusna. Ingetlah, enggo inubuatken Jesus maka “segat ate kerina bangsa” man murid-muridna. (Mat. 24:9) Rasul Paulus pe ikatakenna ka maka “kerina kalak si atena nggeluh sue ras peraten Dibata i bas persadan ras Kristus Jesus, pasti ka nge isiksa.” (2 Tim. 3:12) Gundari, Setan ‘seh kel rawana’ janah la banci kita lepas arah rawana e.​—Ket. 12:12.

17. Banci saja, uga kari kinitekenta iuji?

¹⁷ Kentisik nari, kerina kita pasti ngadapi ujin kiniteken. Terjadi pagi “kiniseran si mbelin si lenga pernah terjadi mulai kin doni lit seh asa gundari.” (Mat. 24:21) Paksa si e, banci saja itentang anggota keluargata kita janah pendahinta pe ilarang. (Mat. 10:35, 36) Bagi Asa, tek nge kita man Jahwe maka pasti kita isampatiNa ras ijagaNa?

18. Menurut Heber 10:38, 39, kai si arus silakoken gelah banci ngadapi kai si terjadi bas wari si pepagi?

¹⁸ Enggo isampati Jahwe kita gelah tetap paguh kinitekenta. Arah “budak si setia janah pentar,” ibereken Jahwe ‘pangan rohani i bas waktu si tepat’ janah kerinana e banci nampati kita tetap paguh. (Mat. 24:45) Tapi kerina kita sekalak-sekalak  arus erusaha gelah tetap paguh kinitekenta man Jahwe.​—Baca Heber 10:38, 39.

19-20. Kenca sibaca 1 Kronika 28:9, penungkunen kai saja si arus siukuri man dirita janah engkai?

¹⁹ Bagi Raja Asa, perlu ‘sidarami Jahwe.’ (2 Kro. 14:4; 15:1, 2) Mulai sidarami Jahwe sanga sipelajari kerna Ia janah iperidiken. Kenca si e, silakoken kai pe si banci mpebelin kekelengenta man Jahwe. Gelah siteh enggo nge silakoken e ntah lang, perlu sisungkuni banta, ‘Ratur nge aku reh ku perpulungen?’ Adi terus kita reh ku perpulungen, banci kita terus semangat ngelayani Jahwe janah sidat ka pergegeh arah turang seninata. (Mat. 11:28) Selain si e, banci ka sisungkuni banta bagenda, ‘Ratur nge aku mpelajari Pustaka? Adi tading aku ras keluargaku, iban kami nge ibadah keluarga tiap minggu? Adi sisada aku tading, kuban nge waktuku pelajaren pribadi? Kulakoken nge asa ngasupku erberita ras ngajari kalak si deban?’

²⁰ Engkai maka arus siukuri penungkunen-penungkunen e? Nina Pustaka, ipereksa Jahwe pusuh ras perukurenta. Emaka perlu sipastiken gelah pusuh ras perukurenta erban meriah ukur Jahwe. (Baca 1 Kronika 28:9.) Adi perlu siakap erban perubahen bas cita-citata, perbahanenta, bage pe carata rukur, sipindolah penampat man Jahwe gelah ngasup kita ngelakokenca. Gundari me waktuna nikapken dirita guna ngadapi kai si nandangi terjadi. Ula sipediat kai pe si banci erban kita lanai nggunaken masa dame e alu pentar!