1-2. Menurut 1 Timotius 6:20, kai si arus ilakoken Timotius?

RUSUR sisuruh kalak si deban njaga barangta si meherga. Sibereken barangta e perban tek kita banci ijagana alu mehuli. Misalna, sisusun senta bas bank gelah banci aman ntah pe la bene.

² Baca 1 Timotius 6:20. Iingetken Rasul Paulus Timotius maka enggo ialokenna kai si meherga, eme pemeteh si tepat kerna tujun Dibata man manusia. Selain si e, enggo ka ialoken Timotius hak istimewa guna ‘mberitaken berita si meriah ras ngelakoken tugas selaku perberita.’ (2 Tim. 4:2, 5) Inasehati Paulus Timotius gelah ijagana kai si enggo ibereken man bana. Bagi Timotius, enggo ka ibereken man banta kai si meherga. Kai saja e? Janah engkai maka arus sijaga ntah pe terus siergai pemere Jahwe e?

3-4. Engkai maka meherga kel kebenaren si lit bas Pustaka e?

³ Enggo ibereken Jahwe man banta pemeteh si benar kerna kebenaren si meherga si lit bas Pustaka. Kebenaren e ikataken meherga perban enggo nampati kita rembak ras Dibata Jahwe janah nggeluh ermeriah ukur. Adi sialoken kebenaren e janah sidalanken, bebas me kita arah ajaren si salah ras perbahanen si la mehuli.​—1 Kor. 6:9-11.

⁴ Kebenaren e ikataken ka meherga perban e ibereken Jahwe man kalak si meteruk ukur ngenca, “si pusuh ras perbahenna ngaloken kebenaren.” (Perb. 13:48) Kalak si meteruk ukur tek maka gundari igunaken Jahwe budak si setia janah pentar guna ngajari kita kerna kebenaren si lit bas Pustaka. (Mat. 11:25; 24:45) Kebenaren e la banci siangkai  adi sipelajari sisada janah kebenaren e me si mehergana bas geluhta.​—Kua. 3:13, 15.

5. Kai ka si ibereken Jahwe man banta?

⁵ Enggo ibereken Jahwe man banta hak istimewa guna ngajari kalak kebenaren kerna Ia bage pe kerna sura-suraNa. (Mat. 24:14) Kebenaren enda seh kel ergana perban banci nampati kalak jadi bagin keluarga Jahwe janah mere kesempaten nggeluh si rasa lalap. (1 Tim. 4:16) La soal melala ntah pe sitik si enggo silakoken bas erberita, kerina kita ikut ndukung pendahin si seh kel pentingna enda si sangana ilakoken gundari. (1 Tim. 2:3, 4) Tuhu-tuhu sada kehamaten kel banci jadi teman erdahin Jahwe!​—1 Kor. 3:9.

6. Kai si terjadi man piga-piga kalak bas jaman Timotius?

⁶ Piga-piga kalak Kristen bas jaman Timotius lanai ngergai hak istimewa jadi teman erdahin Jahwe. Contohna Demas. Perban keleng atena doni enda, lanai ia ikut ngelayani ras Paulus. (2 Tim. 4:10) Pigelus ras Hormogenes pe nadingken pelayanenna perban mbiar ianiaya bagi Paulus. (2 Tim. 1:15) Selain si e, Himeneus, Aleksander, ras Piletus pe nadingken kebenaren perban terpengaruh man ajaren kalak murtad. (1 Tim. 1:19, 20; 2 Tim. 2:16-18) Mbarenda, kerina kalak e engkelengi Jahwe, tapi dungna lanai iergai kalak e kai si enggo ibereken Jahwe.

7. Kai saja si ilakoken Setan gelah lanai siakap meherga kai si enggo ibereken Jahwe man banta?

⁷ Kai saja si ilakoken Setan gelah lanai siakap meherga kai si enggo ibereken Jahwe man banta? Perdiateken piga-piga cara si iban Setan. Igunakenna TV, film, Internet, koran, bage pe buku-buku guna ncedai perukuren ras perbahanenta gelah lanai keleng ateta Jahwe janah lanai patuh man baNa. Selain si e, ipebiar-biarna kita arah tekanen temanta ntah pe arah penganiayan gelah ngadi kita erberita. Janah iusahakenna ka erban kita tertarik man “pemeteh” si iajarken kalak murtad, si dungna banci erban kita nadingken kebenaren.​—1 Tim. 6:20, 21.

8. Pelajaren kai si idatndu arah Turang Senina Daniel?

⁸ Adi la kita hati-hati, banci kita mulai lupa maka meherga kel kebenaren e. Cuba perdiateken pengalamen Daniel. * Meriah kel iakapna main game.  Nina, “Aku mulai main game sanga umurku kira-kira sepuluh tahun. Tangtangna labo bahaya game si kumainken. Tapi reh dekahna mulai kumainken game kekerasen ras game si lit hubungenna ras begu-begu. Janah dungna, lit kira-kira 15 jam aku main game sada wari. Situhuna sadar nge aku maka game si kumainken e bage pe buena waktu si kupake erban aku ndauh arah Jahwe. Tapi pusuhku lanai erpenggejapen. Kuakap nasehat-nasehat si lit bas Pustaka e labo man bangku.” Adi la kita hati-hati, hiburen banci erban kita lanai njaga kebenaren. Adi e si terjadi, dungna lanai siakap meherga kai si enggo ibereken Jahwe man banta.

9. Menurut 1 Timotius 1:18, 19, ras ise ipeseri Paulus Timotius?

⁹ Baca 1 Timotius 1:18, 19. Ipeseri Paulus Timotius bagi sekalak prajurit janah iiahkenna ia gelah ‘terus erjuang guna tujun si mehuli.’ Si imaksud Paulus eme perjuangen i bas perang rohani. Engkai kalak Kristen ipeseri ras prajurit si erperang? Sipat-sipat kai si perlu sipebelin selaku prajurit Kristus? Mari sibahas lima pelajaren si banci sidat arah perumpaman Paulus kerna prajurit. Pelajaren e banci nampati kita gelah terus ngergai kebenaren.

10. Kai ertina setia man Dibata, janah engkai?

¹⁰ Teruslah setia man Dibata. Prajurit si mehuli eme prajurit si setia. Prajurit si setia iusahakenna asa ngasupna ngelindungi kalak si ikelengina ntah kai pe si meherga iakapna. Inasehati Rasul Paulus Timotius gelah terus setia man Dibata. (1 Tim. 4:7) Adi reh belinna kekelengenta ras kesetianta man Dibata, reh belinna ka me sura-surata gelah terus ngergai kebenaren.​—1 Tim. 4:8-10; 6:6.

11. Engkai maka arus sidisiplin dirita?

¹¹ Disiplinlah dirindu. Arus idisiplin prajurit dirina gelah banci ia terus sehat janah banci ngelakoken tugasna. Perban idalanken Timotius nasehat Paulus, banci ia terus sehat secara rohani. Nasehat kai e? Arus ilawanna sura-surana si salah, ipebelinna sipat-sipat si mehuli, janah arus terus ijagana hubungenna tetap rembak ras turang senina. (2 Tim. 2:22) Gelah banci idalanken Timotius nasehat enda, arus idisiplinna dirina. Kita pe arus sidisiplin dirita gelah banci kita menang ngelawan sura-sura si salah. (Rom. 7:21-25) Selain si e, gelah banci sitangtangi sipat-sipat si ndekah janah sipakeken sipat-sipat si mbaru, arus ka sidisiplin dirita. (Ep. 4:22, 24) Janah, sanga enggo latih siakap erdahin sada warin, banci saja perlu sipaksa dirita gelah reh ku perpulungen.​—Heb. 10:24, 25.

12. Kai saja si perlu silakoken gelah beluh kita nggunaken Kata Dibata?

¹² Gelah beluh sekalak prajurit nggunaken senjata-senjatana, arus ia ratur latihen nggunaken senjata-senjata e. Selaku murid Kristus kita pe arus beluh nggunaken Kata Dibata. (2 Tim. 2:15) Bas perpulungen, iajari kita gelah beluh nggunaken Kata Dibata. Tapi, adi sisampati ateta kalak si deban gelah tek ia maka kebenaren si lit bas Pustaka e tuhu-tuhu meherga, arus kita rajin mpelajari Pustaka guna mpegegehi kinitekenta sendiri. Emaka, mbaca Pustaka saja la bias, arus ka siukuri janah siban riset arah publikasita. Alu bage banci tuhu-tuhu siangkai  janah sijelasken alu tepat. (1 Tim. 4:13-15) Adi silakoken kerina e, banci sisampati kalak si deban ngangkai Kata Dibata. Sanga ngajar, labo ngenca sibacaken ayat man si erlajar. Tapi sisampati ateta ia ngangkai ayat-ayat Pustaka ras ndalankenca. Adi ratur kita pelajaren pribadi, banci reh beluhna kita ngajari kalak si deban kerna Kata Dibata.​—2 Tim. 3:16, 17.

13. Menurut Heber 5:14, engkai maka arus kita pentar?

¹³ Pentarlah. Sekalak prajurit arus itehna lit bahaya ntah lang janah banci ka ielakkenna bahaya e. Kita pe arus siteh situasi kai saja si banci mbahayaken kita janah banci ka sielakken bahaya e. (Kua. 22:3; baca Heber 5:14.) Contohna, arus kita pentar milih rekreasi ras hiburen. Melala acara TV ras hiburen si isina kerna perbahanen seks si salah. Sitik pe la ngena ate Dibata perbahanen si bage janah banci ka mbahayaken kita. Adi la sipedauh hiburen si bage, dungna lanai keleng ateta Dibata.​—Ep. 5:5, 6.

14. Engkai maka Daniel dungna robah?

¹⁴ Daniel si enggo ituriken ndai, dungna sadar maka game si imainkenna sedekah enda berbahaya. Gelah banci ia robah, riset ia arah Watchtower Library. Asilna, lanai ia nggit main game si bage janah lanai ka ia nggit langganen game online, iputuskenna ka hubungenna ras pemain game si deban. Nina Daniel, “Gundari, asangken main game, padin kuakap nggunaken waktuku ras teman-teman si lit bas runggun.” Gundari, Daniel enggo jadi pertua ras perintis biasa.

15. Engkai maka bahaya kel kai si ipeseh kalak murtad?

¹⁵ Bagi Timotius, arus kita sadar maka bahaya kel kai pe si ipeseh kalak murtad. (1 Tim. 4:1, 7; 2 Tim. 2:16) Contohna, iceritaken kalak e kai si la tuhu kerna turang seninata. Ntah pe, ibanna kita ragu man organisasi Jahwe. Kai si ipesehna e banci ncedai kinitekenta. Emaka, ula sempat kita terpengaruh man kai pe si ikataken kalak murtad. Engkai? Perban kalak e enggo “ceda perukurenna”  janah tujunna gelah banci sijawapen ras kita. (1 Tim. 6:4, 5) Atena tek min kita man pitnah si ipesehna janah curiga kita man turang seninata.

16. Kai si erbanca kita lanai fokus?

¹⁶ Teruslah fokus. “Selaku prajurit Kristus si mehuli,” arus terus Timotius fokus man pelayanenna. La iayakina kai si lit bas doni enda ntah pe ngayaki erta. (2 Tim. 2:3, 4) Bagi Timotius, ula min siusahaken jadi kalak bayak. Ula kita nggit “itipu kebayaken” si erbanca lanai keleng ateta Jahwe, lanai meherga siakap Kata Dibata, janah lanai kita semangat erberita. (Mat. 13:22) Emaka, sijagalah gelah tetap sederhana kegeluhenta janah sigunaken waktu ras gegehta ‘mpelebe Kerajan Dibata.’​—Mat. 6:22-25, 33.

17-18. Kai si arus silakoken gelah kita tetap aman secara rohani?

¹⁷ Ersikaplah gelah banci mis erban tindaken sanga lit bahaya. Sekalak prajurit arus erban persikapen gelah itehna kai si arus ilakokenna sanga lit kari bahaya. Adi sijaga ateta kai si enggo ibereken Jahwe man banta, kita pe arus siban persikapen gelah banci mis siban tindaken paksa lit bahaya.

¹⁸ Enda banci iumpamaken sanga kita reh ku sada acara. Biasana ope denga acara imulai, arus iteh hadirin i ja dalan ndarat si deherna. Engkai? Gelah sanga rempet kari lit situasi darurat, banci mis kita ndarat. Kita pe perlu sisikapken dirita kerna kai si arus silakoken sanga la sengaja siidah adegan si lit hubungenna ras perbahanen seks si salah, adegan kekerasen, ras ajaren kalak murtad paksa sigunaken Internet ntah pe paksa sitonton film bage pe TV. Adi siban persikapen banci mis siban tindaken. Alu bage, tetap kita aman secara rohani janah tetap kita bersih i lebe-lebe Jahwe.​—Msm. 101:3; 1 Tim. 4:12.

19. Kai manpaatna adi sijaga kai si meherga si enggo ibereken Jahwe man banta?

¹⁹ Teruslah sijaga kai si meherga si enggo ibereken Jahwe man banta, eme kebenaren si lit bas Pustaka bage pe hak istimewa guna ngajari kalak si deban. Adi bage siban, bersih me pusuh peratenta, ermeriah ukur kita, janah semangat kita nampati kalak si deban nandai Jahwe. Alu penampat Jahwe, banci sijaga kai si enggo iberekenNa man banta.​—1 Tim. 6:12, 19.