1. Kerja keras kai si ilakoken diberu-diberu, janah tentangen kai si iadapi kalak e? (Nen gambar bas sampul majalah enda.)

BAS runggun, melala kel diberu-diberu si kerja keras. Contohna, mere komentar kalak e bas perpulungen, ikut erberita ras ngajar, janah ikut ngurus Bale Kerajan. Ermediate ka kalak e man turang senina. Pasti ngata bujur kel kita. Tapi, lit piga-piga tentangen si iadapi kalak e. Kai saja e? Lit si arus ngurus orang tuana si enggo metua. Si debanna ka ngadapi tentangen arah anggota keluarga. Lit ka sisada mpebelin anakna janah arus ia kerja keras guna ncukupi keperlunna.

2. Engkai maka arus sipegegehi diberu-diberu?

² Bas doni enda enterem kalak si la ngergai diberu, padahal perlu kel kalak e iergai. Emaka, perlu kel sipegegehi diberu-diberu bas runggun. Selain si e, perlu sipegegehi kalak e perban isuruh Pustaka kita ngelakokenca. Contohna, ikataken Paulus man runggun i Roma gelah ialo-alo kalak e Pebe janah ‘ibereken kalak e man bana kai pe si iperlukenna.’ (Rom. 16:1, 2) Mbarenda Paulus kalak Parisi janah kalak Parisi sepele kel man diberu. Tapi, kenca ia jadi kalak Kristen iusihna Jesus, iergaina diberu-diberu janah mehuli ia man kalak e.​—1 Kor. 11:1.

3. Uga perbahanen Jesus man diberu, janah uga perbahanenna man diberu si ngelakoken peraten Dibata?

³ Iergai Jesus kerina diberu. (Joh. 4:27) La seri cara Jesus rukur ras cara rukur peminpin-peminpin agama Jahudi bas jamanna kerna diberu. Menurut sada referensi Pustaka, “La pernah sekali pe kata-kata Jesus si ncidahken la ngergai diberu.” Khususna, iergai Jesus kel diberu si ngelakoken peraten Bapakna. Ianggapna kalak e turangna janah bagin arah keluargana.​—Mat. 12:50.

4. Kai kari sibahas bas artikel enda?

 ⁴ Lalap isampati Jesus diberu si ngelayani Dibata. Ianggapna kalak e penting janah ibelana ka. Mari sibahas uga kita banci ngusih Jesus bas mperdiateken diberu-diberu bas runggun.

5. Engkai maka banci saja mesera iakap piga-piga diberu ndatken teman si mehuli?

⁵ Kerina kita, la soal dilaki ntah pe diberu, perlu teman si mehuli. Tapi, mon-mon banci saja mesera iakap diberu-diberu ndatken teman si mehuli. Engkai? Cuba perdiateken contoh-contoh enda. Sekalak turang senina si gelarna Julia * ngataken, “Perban aku lenga erjabu, kurang kuakap aku pentingna bas runggun.” Sekalak perintis si gelarna Kristin si pindah ku daerah si deban guna ngelakoken terbuen bas pelayanen ngataken, “Sanga tangtangna kita pindah ku runggun si mbaru, banci saja melungen siakap.” Selain si e, kalak si tading ras keluargana si la sada kiniteken banci jadi mesera iakapna rembak ras keluargana, janah bas runggun pe la lit iakapna temanna. Piga-piga diberu banci saja melungen iakapna perban kalak e sakit janah la banci ndarat rumah nari ntah pe perban ngurus anggota keluargana si sakit. Nina turang seninata si gelarna Anette, “La aku banci ikut pulung-pulung ras turang senina perban arus aku ngurus mamakku.”

6. Menurut Lukas 10:38-42, uga Jesus nampati Marta ras Maria?

⁶ Nggit Jesus nggunaken waktuna ras diberu janah ibanna kalak e jadi temanna. Cuba ukuri uga rembakna Jesus ras Maria bage pe Marta, banci saja duana diberu e lenga erjabu. (Baca Lukas 10:38-42.) Pasti meriah iakap kalak e erteman ras Jesus perban mehuli perbahanen ras ranan Jesus man kalak e. Contohna, la mbiar-mbiar Maria kundul i deher nahe Jesus. * Sanga kecewa pe Marta perban la isampati Maria nikapken pangan, mis iturikenna isi pusuhna man Jesus. Bas kesempaten e, isampati Jesus kalak e duana ndatken pelajaren si meherga. Bukti si deban Jesus ermediate man kalak e bage pe man turangna Lasarus eme alu ndahi kalak e bas kesempaten si deban. (Joh. 12:1-3) Emaka, la ateta mamang sanga mis ipindo Maria ras Marta penampat Jesus paksa mekelek kel penakit Lasarus.​—Joh. 11:3, 5.

7. Kai salah sada carana mpegegehi diberu-diberu bas runggun?

⁷ Man piga-piga diberu, perpulungen e jadi kesempaten guna jumpa ras turang senina. Emaka, sigunakenlah kesempaten e guna ngalo-ngalo kalak e, ngerana ras kalak e, ras ermediate man kalak e. Julia si iceritaken ndai ngataken, “Terpegegehi kel aku sanga ipuji turang senina komentarku, sanga nggit kalak e erberita ras aku, bage pe ermediate man bangku.” Emaka sibuktikenlah maka penting kel siakap kalak e. Nina Kia, “Adi la aku reh ku perpulungen, pasti mis lit si nungkun beritaku. Kugejapken maka ermediate kel kalak e man bangku.”

8. Alu cara kai saja banci siusih Jesus?

⁸ Bagi Jesus, sibanlah rusur waktuta ngerana ras diberu-diberu bas runggun. Banci ka siundang ia man ku rumahta ntah pe siajak gawah-gawah, janah sicakapkenlah kai si banci mpegegehi kalak e. (Rom. 1:11, 12) Cara rukur pertua arus seri ras cara rukur Jesus. Iteh Jesus  maka kalak si lenga erjabu pasti ngadapi piga-piga tentangen. Tapi, jelas iban Jesus maka si erbanca kita banci terus ermeriah ukur labo perban enggo erjabu ntah pe enggo lit anakta. (Luk. 11:27, 28) Si erbanca kita terus ermeriah ukur eme adi sipelebe Jahwe bas kegeluhenta.​—Mat. 19:12.

9. Kai si banci ilakoken pertua guna nampati diberu-diberu bas runggun?

⁹ Pertua-pertua khususna perlu mehuli man diberu-diberu, anggapnalah kalak e bagi turangna ntah pe mamakna. (1 Tim. 5:1, 2) Perlu iban pertua-pertua waktuna ngerana ras kalak e ope ntah pe kenca dung perpulungen. Nina Kristin, si enggo iceritaken ndai, “Iperdiateken sekalak pertua maka sibuk kel aku erdahin ras merintis, emaka itehna atena uga aku ngatur jadwalku. Ngata bujur kel aku perban ermediate kel pertua e man bangku.” Adi ratur iban pertua waktuna ngerana ras diberu-diberu bas runggun, ibuktikenna maka ermediate ia man kalak e. * Anette, si enggo iceritaken ndai nuriken manpaat si enggo idatna perban rusur ngerana ras pertua-pertua, nina, “Dungna kutandai kalak e terdeheren janah kalak e pe tandaina aku terdeheren. Emaka, sanga kuadapi masalah si mberat, la  aku mbiar-mbiar mindo penampat man kalak e.”

10. Kai si banci erban diberu-diberu reh semangatna?

¹⁰ Kerina kita, la soal dilaki ntah pe diberu, iergai kalak min ateta kai si enggo silakoken. Tapi, adi la iergai kalak kengasupenta ntah pe kerja kerasta, e banci erban kitik ukurta. Lit sekalak perintis si gelarna Abigail, ia lenga erjabu. Mon-mon la iakapna ia iperdiateken. Pernah bagenda nina, “Kurang aku itandai turang senina, si iteh kalak e aku anak si anu ntah pe adek si anu ngenca. Mon-mon kurang kuakap aku pentingna bas runggun.” Cuba perdiateken pengalamen Pam. Ia lenga erjabu janah pernah jadi utusen injil ertahun-tahun dekahna. Bas pudi wari, mulihken ia ku kutana guna ngurus orang tuana. Gundari umurna kira-kira 70 tahun tapi merintis denga ia lalap. Nina Pam, “Sanga iergai kalak kai si enggo kulakoken, e me si erbanca aku semangat.”

11. Kai buktina iergai Jesus diberu-diberu si setia si ngelayani ia?

¹¹ Iergai Jesus kel penampat si ialokenna arah diberu-diberu si nggunaken “erta-ertana” guna ngelayani ia. (Luk. 8:1-3) Labo ngenca iberekenna hak istimewa man kalak e guna ngelayani ia, tapi iajarkenna ka kebenaren si penting kerna peraten Dibata. Contohna, ikatakenna man kalak e kerna kematenna ras kekekenna. (Luk. 24:5-8) Isikapkenna kalak e ngadapi tentangen si nandangi terjadi, bagi si enggo ilakokenna man rasul-rasul. (Mrk. 9:30-32; 10:32-34) Bas pudi wari sanga Jesus itangkap, kiam rasul-rasul. Tapi, piga-piga arah diberu si enggo ndukung ia sedekah enda terus nemani ia sanga nandangi mate i tiang siksan.​—Mat. 26:56; Mrk. 15:40, 41.

12. Dahin si penting kai si ibereken Jesus man diberu-diberu?

¹² Ibereken Jesus pendahin si penting guna ilakoken diberu-diberu. Contohna, diberu-diberu si setia jadi saksi si pertama arah kekeken Jesus. Paksa si e, isuruhna diberu-diberu e ngataken man rasul-rasul adi ia enggo ipekeke. (Mat. 28:5, 9, 10) Bas Pentakosta 33 Masehi, banci saja diberu-diberu e pe ikut ras murid-murid ngaloken kesah si badia. Emaka, banci saja kalak e pe beluh ngerana bas erbage-bage bahasa ras mpebetehken man kalak si deban kerna “perbahanen Dibata si luar biasa.”​—Perb. 1:14; 2:2-4, 11.

13. Kai saja si ilakoken diberu-diberu bas runggun gundari? Janah menurutndu, uga carana ngergai kalak e?

¹³ Perlu kel sipuji diberu-diberu si ngelakoken kai pe guna ngelayani Jahwe. Lit si mbangun janah ngurus Bale Kerajan, lit si nampati bas kelompok bahasa asing, janah lit ka si ngelayani bas Betel. Selain si e, lit ka si nampati sanga lit bencana, nampati nerjemahken publikasita, janah ngelayani jadi perintis ras utusen injil. Bagi dilaki, diberu pe banci ikut sekolah perintis, Sekolah man Perberita Kerajan, ras Sekolah Gilead. Selain si e, ndehara-ndehara ikut nampati perbulangenna gelah banci ngelakoken kerina tanggung jawapna bas runggun bage pe bas organisasi. Dilaki-dilaki enda “pemere” bas Dibata nari. Melala si arus ilakoken kalak e guna nampati kalak si deban. Tapi, mesera iakapna ngelakoken tugasna e adi la kin isampati ndeharana. (Ep. 4:8) Banci nge ukurindu cara-cara kai si banci ilakokenndu guna nampati diberu-diberu enda ngelakoken dahinna?

14. Kai si ikataken Masmur 68:11 kerna diberu-diberu, janah kai si ilakoken pertua-pertua si pentar?

¹⁴ Isadari pertua-pertua maka diberu-diberu e “pasuken si mbelin” bas mberitaken  berita si meriah. Semangat kel kalak e janah biasana beluh kel erberita. (Baca Masmur 68:11, NW) Emaka iusahaken pertua-pertua erlajar arah kalak e. Abigail si enggo iceritaken ndai ngataken maka terpegegehi kel ia sanga isungkun pertua ia uga carana mbenaken percakapen alu mehuli sanga erberita. Nina, “Enda erbanca sadar aku maka ibereken Jahwe man bangku pendahin si penting bas organisasiNa.” Selain si e, iakui pertua-pertua maka diberu-diberu si paguh kinitekenna banci mereken penampat si erguna man diberu-diberu si nguda denga sanga ngadapi masalah. (Tit. 2:3-5) Pasti diberu-diberu si bage patut kel ikelengi janah iergai!

15. Bas situasi kai saja diberu-diberu perlu isampati janah ibela?

¹⁵ Mon-mon sanga ngadapi masalah banci saja diberu-diberu e perlu teman guna nampati ntah pe mbela ia. (Jes. 1:17) Contohna, sekalak janda ntah pe diberu si enggo cerai banci saja perlu penampat guna ngurus kai si mbarenda perbulangenna si ngurussa. Banci saja sekalak diberu si enggo metua perlu itemani ngerana man dokter. Ntah, lit sekalak perintis si nampati bas pendahin organisasi banci saja perlu ibela adi lit si mandangi ia perban la banci ia rusur erberita bagi perintis si debanna. Uga kita banci nampati diberu-diberu si ngadapi masalah si bage? Mari kita erlajar mulihi arah contoh Jesus.

16. Menurut Markus 14:3-9, kai si ilakoken Jesus guna mbela Maria?

¹⁶ Sanga lit si salah paham man diberu-diberu, mis ibela Jesus. Contohna, sanga ipandangi Marta Maria mis ibela Jesus Maria. (Luk. 10:38-42) Janah bas kesempaten si deban, sanga lit si merawa man Maria perban iakap kalak e ibanna keputusen si salah, mis ka ibela Jesus. (Baca Markus 14:3-9.) Iteh Jesus isi pusuh Maria emaka ipujina ia, “Si mehuli kap ibanna bangku. . . . Ilakokenna kai si banci ilakokenna.” Janah inubuatken Jesus ka maka perbahanen si mehuli si ilakoken Maria iceritaken “i japa pe berita si meriah iberitaken i belang-belang doni.” Luar biasa kel enda! Perbahanen Maria si mehuli memang iceritaken i belang-belang doni bagi si ilakoken bas artikel enda. Sanga ibegi Maria kata-kata Jesus e pasti terapuli kel ia.

17. Bereken sada contoh si erbanca perlu sibela diberu-diberu bas runggun.

¹⁷ Adi lit idahndu diberu-diberu bas runggun perlu ibela, mis nge ibelandu kalak e? Cuba perdiateken contoh enda. Iperdiateken piga-piga perberita maka lit sekalak turang senina si la saksi perbulangenna rusur kel terlambat reh ku perpulungen janah mis mulih kenca dung perpulungen. Jarang ka babana anakna. Emaka ipandangi turang senina ia perban iakap kalak e arusna ipindona man perbulangenna gelah banci ibabana anakna ku perpulungen. Situhuna, enggo iusahaken turang seninata e asa ngasupna. Tapi, mon-mon lit si la iarapna si perlu iurusna. Selain si e, arus iergaina keputusen perbulangenna kerna anak-anakna. Kai nge si ilakokenndu guna mbela turang seninata e? Adi ipujindu turang seninata e janah ikatakenndu maka enggo ilakokenna asa ngasupna, banci saja lanai ia ipandangi.

18. Alu cara kai ka banci sisampati diberu-diberu bas runggun?

¹⁸ Sibuktiken ermediate kel kita man diberu-diberu bas runggun alu mereken penampat si iperlukenna. (1 Joh. 3:18) Annette, si arus ngurus orang tuana si sakit,  ngataken, “Piga-piga turang senina reh ku rumahku guna ngurus mamakku, alu bage banci kulakoken dahin si deban. Si debanna ka lit si maba pangan. Meherga janah ikelengi kuakap aku.” Julia pe ngaloken penampat si bage. Sekalak turang senina nampati ia ngurus motorna. Nina Julia, “Meriah kel ukurku perban ermediate turang seninaku nandangi keselamatenku.”

19. Penampat si deban kai si banci ibereken pertua-pertua man diberu-diberu bas runggun?

¹⁹ Pertua-pertua pe iusahakenna ermediate man keperlun diberu. Iteh kalak e maka ate Jahwe mehuli perbahanen kalak e man diberu. (Jak. 1:27) Emaka, iusahaken pertua-pertua masuk akal bagi Jesus. Adi cocok, padin iakapna mehuli janah erpengangka man diberu asangken erban peraturen si kaku. (Mat. 15:22-28) Sanga iusahaken pertua nampati diberu-diberu, igejapken diberu e maka keleng kel ate Jahwe ras organisasiNa kalak e. Sanga iteh pengawas kelompok Kia pindah rumah, mis iaturkenna gelah lit si nampati Kia. Nina Kia, “Lanai kuakap latihsa kel. Ibereken kalak e aku kata pergegeh janah penampat si kuperluken. Enda erbanca aku tek maka meherga aku bas runggun. Labo aku sisada sanga lit masalah.”

20-21. Uga carana mbuktiken maka keleng ateta diberu-diberu bas runggun?

²⁰ Bas runggun enterem kel diberu-diberu si kerja keras man Jahwe janah perlu kel kalak e sisampati. Pasti terus ateta siusih Jesus. Emaka, sibanlah waktuta ras kalak e janah sitandailah kalak e terdeheren. Siergailah kai si enggo ilakokenna bas ngelayani Jahwe. Sibela janah sisampatilah kalak e sanga perlu kalak e ibela ntah pe isampati.

²¹ Bas pendungi surat Rasul Paulus man kalak Roma, lit siwah gelar diberu si ituliskenna. (Rom. 16:1, 3, 6, 12, 13, 15) Pasti terpegegehi kel kalak e sanga ibegina ipeseh Paulus salamna man kalak e bage pe sanga ipujina kalak e. Kita pe arus sisampati kerina diberu-diberu bas runggun. Adi bage siban, sibuktiken maka keleng ateta kalak e janah sianggap ia bagin arah keluargata.