Nina bas ayat e, “Ola mamang atendu adi idahndu kalak musil itindih pemerentah dingen la bujur perbahanenna man bana. Tep-tep pegawai ikapiti atasenna nge ia, jenari si datasenna ka ngkawali pegawai si niteruhna ndai duana.”​—Peng. 5:8.

Sanga mbaca ayat enda, banci saja lit si erpengakap maka ayat enda ncakapken kerna pemerentahen manusia saja ngenca. Tapi situhuna ayat enda pe ngingetken kita kerna Jahwe. Adi siangkai kerna si e, banci kita terapuli ras terpegegehi.

Bas Pengerana 5:8 e ikataken maka kalak musil ntah pe kalak mesera itindih pemerentah janah la ka bujur perbahanenna man kalak e. Arus iinget pemerentah e maka ia iperdiateken pemerentah si ganjangen asangken ia ntah pe si buen kuasana asangken ia. Janah situhuna, lit denga pemerentah-pemerentah si deban si ganjangen jabatenna asangken ia. Tapi, banci saja kerina pemerentah e la merentah alu adil janah ibanna melala kalak jadi susah.

Tapi la soal uga pe beratna keadan doni enda, banci kita terapuli perban iperdiateken Jahwe kai si ilakoken pemerentah-pemerentah e. Selain si e, siteh maka iperdiateken Jahwe kita. (Msm. 55:23; Pil. 4:6, 7) Nina Pustaka, “Iperdiateken [Jahwe] kerina doni enda, gelah iberekenNa gegeh man kalak si setia man baNa.” (2 Kro. 16:9) Jelas me, banci sipindo penampat Jahwe janah situriken kebiarenta man baNa.

Jadi, Pengerana 5:8 ncidahken maka bas pemerentahen manusia lalap lit pemerentah si ganjangen jabatenna asangken pemerentah-pemerentah si debanna. Tapi si pentingna, ayat enda ncidahken maka Jahwe, Dibata si Madakuasa eme penguasa si meganjangna. IdahNa kerina si ilakoken tiap kalak, janah lalap adil i bas ndalanken kekuasanNa. Gundari, Jahwe merentah erkelangken anakNa Jesus Kristus, eme Raja i bas KerajanNa. Bali bagi Bapakna, Jesus pe adil i bas ndalanken kekuasanna.