1-2. Kai nge hubungen Pengerana 11:6 ras dahinta erberita?

BAS piga-piga negeri, semangat kel kalak megi berita si meriah perban enggo ndekah itimai kalak e berita si bage. Tapi, bas negeri si deban la kalak merhat megi berita kerna Dibata bage pe kerna Pustaka. Adi bas daerahndu, uga nge tanggapen kalak? La soal uga pe tanggapen kalak, ate Jahwe terus min kita erberita ngasa enggo dung kari nina Jahwe.

² Enggo itentuken Jahwe ndigan kari dung pendahin erberita e. Kenca si e, “reh me kedungen e.” (Mat. 24:14, 36) Janahta nimai kedungen e, kai nge si banci silakoken gelah terus erberita?​—Baca Pengerana 11:6, NW.

3. Kai si man bahasenta bas artikel enda?

³ Bas artikel sebelumna enggo sibahas empat cara si perlu silakoken gelah kita banci jadi ‘penjala manusia’ si mehuli. (Mat. 4:19) Bas artikel enda, sibahas kari telu cara uga kita banci tetap semangat erberita la soal uga pe keadanta. Sipelajari kari engkai maka (1) pendahin e jadi si pentingna bas geluhta, (2) tetap sabar, bage pe (3) tetap paguh kinitekenta.

4. Engkai maka pendahin si ibereken Jahwe e arus jadi si pentingna bas geluhta?

⁴ Ikataken Jesus maka situasi bas wari-wari pendungi mirip ras jaman Nuah. Bas jaman Nuah melala si erbanca maka la iperdiateken kalak persinget si ibereken Nuah. Iteh Jesus maka bas jamanta pe melala si banci erban kita lanai njadiken pendahin erberita e jadi si pentingna bas geluhta. Emaka ipersingeti Jesus murid-muridna gelah ‘terus erjaga-jaga.’ (Mat. 24:37-39, 42; 2 Pet. 2:5) Perlu siikutken persinget e janah siusahaken erban pendahin si enggo ibereken Jahwe e jadi si pentingna bas geluhta.

5. Kai si ikataken Perbahanen Rasul-Rasul 1:6-8 kerna pendahin erberita?

 ⁵ Gundari arus tuhu-tuhu siban pendahin erberita jadi si pentingna bas geluhta. Inubuatken Jesus maka pendahin enda terus kari ilakoken kenca kematenna. Janah ndauh kari buen si ilakoken murid-muridna asangken si ilakokenna. (Joh. 14:12) Tapi kenca Jesus mate, mulihi ka murid-muridna jadi nelayan. Kenca Jesus ipekeke, ibanna mukjizat gelah banci itangkap murid-muridna melala ikan. Igunaken Jesus kesempaten e guna erban murid-muridna tek maka ndauh pentingen pendahin erban murid asangken pendahin kai pe. (Joh. 21:15-17) La ndekah sope Jesus nangkih ku surga, ikatakenna man murid-muridna maka pendahin erberita e labo saja pagi iberitaken bas Israel. (Baca Perbahanen Rasul-Rasul 1:6-8.) Ertahun-tahun kenca si e, ibereken Jesus pengenehenen man Rasul Johanes guna ncidahken kai kari si terjadi i bas “wari Tuan.” * Arah pengenehenen e idah Johanes kejadin si luar biasa. Idahna malekat si mberitaken ‘berita si meriah si la ermasap-masap man tiap bangsa, suku, bahasa, ras umat.’ (Ket. 1:10; 14:6) Jelas me, ikut ate Jahwe kita bas pendahin erberita si ilakoken i belang-belang doni seh ngasa enggo dung nina Jahwe.

6. Uga carana gelah banci terus siutamaken dahin erberita bas geluhta?

⁶ Banci terus siutamaken pendahin erberita e adi siukuri uga Jahwe enggo nampati kita i bas ngelakokenca. Contohna, iberekenNa melala kel pangan rohani i bas bentuk tercetak bage pe i bas bentuk elektronik, rekamen audio, video, bage pe JW Broadcasting. Cuba ukuri kerna situs resmita si enggo lit bas  lebih 1.000 bahasa. (Mat. 24:45-47) Kalak bas doni enda la ersada perban lit perbedan politik, agama, lit si bayak, janah lit ka si mesera. Tapi lebih waluh juta umat Dibata tetap ersada i belang-belang doni. Contohna, bas wari Jumat tanggal 19 April 2019, Saksi-Saksi Jahwe i belang-belang doni ras-ras nonton video si mbahas kerna ayat harian janah bas karabenna lit 20.919.041 kalak pulung guna mperingeti kematen Jesus. Sanga siukuri uga belinna hak istimewa banci ngenen janah ikut i bas pendahin si luar biasa enda, tersuruh ukurta terus ngutamaken pendahin erberita.

7. Uga usihen si ibereken Jesus banci nampati kita gelah tetap siutamaken pendahin erberita?

⁷ Cara si deban gelah banci terus siutamaken pendahin erberita eme alu ngusih Jesus. La ipediatna kai pe si erbanca lanai bulat ukurna erberita. (Joh. 18:37) Misalna, la ia tertarik sanga itawarken Setan man bana “kerina kerajan doni enda ras kemulianna.” (Mat. 4:8, 9) Jesus pe labo ka tergoda sanga iban kalak atena ia jadi raja. (Joh. 6:15) La ia nggit jadi bayak ntah pe la ia mbiar sanga ngadapi tentangen. (Luk. 9:58; Joh. 8:59) Inasehati Rasul Paulus kalak Kristen guna ngusih Jesus gelah ‘ula latih ukur kalak e ntah pe la putus asa.’ (Heb. 12:3) Adi siinget nasehat Rasul Paulus enda, banci kita terus erberita aminna pe iuji kinitekenta.

8. Uga nge kalak si sabar, janah engkai maka kesabaren e penting gundari?

⁸ Kalak si sabar eme kalak si tenang nimai situasi berubah. Lit piga-piga situasi si erbanca kita arus sabar. Contohna, mis min ateta berubah keadanta adi la bagi ukurta, ntah banci saja sangana sitimai kai si enggo ndekah siarapken. Ngarap kel Nabi Habakuk gelah ikernepken kejahaten i Juda. (Haba. 1:2) Murid-murid Jesus pe iarapkenna kel gelah “mis reh” Kerajan Dibata janah mbebasken kalak e arah perbudaken Roma. (Luk. 19:11) Siarapken kel gelah ikernepken Kerajan Dibata kejahaten bas doni enda, gelah kalak si patuh man Dibata saja ngenca si tading bas doni enda. (2 Pet. 3:13) Tapi, arus kita sabar janah sitimai waktu si enggo itetapken Jahwe. Gundari mari sibahas cara kai saja si igunaken Jahwe guna ngajar kita gelah tetap sabar.

9. Kai saja buktina maka Jahwe e sabar?

⁹ Salah sada cara Jahwe ngajar kita gelah sabar eme alu mereken usihen si sempurna. IberekenNa waktu man Nuah guna mbangun bahtera ras mpersingeti kalak. (2 Pet. 2:5; 1 Pet. 3:20) Sabar ka Jahwe megiken Abraham sanga mulih-ulih isungkunna kerna keputusen si iban Jahwe guna engkernepken kalak jahat si tading i bas kota Sodom ras Gomora. (Kej. 18:20-33) Selain si e, ratusen tahun dekahna sabar kel Jahwe man kalak Israel si la setia. (Neh. 9:30, 31) Gundari banci siidah bukti kesabaren Jahwe arah kesempaten si iberekenNa man kerina kalak ‘gelah ertobat.’ (2 Pet. 3:9; Joh. 6:44; 1 Tim. 2:3, 4) Ibereken Jahwe usihen si mehuli kerna kesabaren. Janah usihen e me si erbanca kita sabar gelah terus erberita janah ngajar. IajariNa ka kita kerna kesabaren arah perumpaman si lit bas Pustaka.

10. Pelajaren kai si banci sidat arah usihen perjuma-juma si icatat bas Jakup 5:7, 8?

¹⁰ Baca Jakup 5:7, 8. Banci kita erlajar sabar arah perumpaman kerna sekalak  perjuma-juma si nimai turah sinuan-sinuanna. Memang lit piga-piga sinuan-sinuan meter perturahna. Tapi buen sinuan-sinuan khususna si erbuah, ndekah maka banci iperani. Bas Israel sinuan-sinuan banci iperani kira-kira kenca enem bulan. Biasana perjuma-juma mulai nuan kenca reh udan janah rani kenca lanai lit udan. (Mrk. 4:28) Mbera-mbera banci siusih kesabaren perjuma-juma e aminna pe la menukah.

11. Kai manpaatna adi kita sabar bas pelayanen?

¹¹ Biasana manusia si la sempurna mis atena idahna hasil kerja kerasna. Tapi adi rasil ateta jumata, arus sikap siban ngurussa. Tangtangna, sikurak lebe taneh, kenca si e sisuan benih, adi lit dukutna sicameti, janah ratur ka sisiram. Kita pe adi siban ateta kalak jadi murid Jesus arus ka kita kerja keras. Perlu waktu nampati kalak si erlajar gelah jadi kalak si perkeleng janah la mbeda-mbedaken kalak. Adi sabar kita, la kitik ukurta aminna pe la nggit kalak megiken beritata. Adi nggit denga kalak erlajar, tetap denga kita perlu sabar. La banci sipaksa kalak si erlajar gelah maju secara rohani. Mon-mon murid-murid Jesus pe la mis iangkaina kai si iajarken Jesus. (Joh. 14:9) Ingetlah, kita nuan ras niram ngenca tapi Dibata si erbanca turah.​—1 Kor. 3:6.

12. Uga carana gelah banci kita sabar sanga erberita man anggota keluargata si la saksi?

¹² Sanga erberita man keluargata si la saksi banci saja mesera siakap sabar. Nasehat si lit i bas Pengerana 3:1, 7 banci nampati kita, nina ayat e, ‘Lit paksa sinik bage pe paksa ngerana.’ Mon-mon aminna pe la kita ngerana, perbahanenta si mehuli banci erban kalak e tertarik man berita si meriah. Emaka, katawari pe arus sidarami kesempaten guna mberitaken kerna Jahwe man bana. (1 Pet. 3:1, 2)  Arus kita sabar man kerina kalak, termasuk man anggota keluargata janah arus terus kita semangat erberita ras ngajar.

13-14. Ise saja si banci siusih kerna kesabaren? Jelasken.

¹³ Banci kita erlajar sabar arah usihen kalak si setia si lit i bas Pustaka bage pe bas jaman gundari. Salah sadana eme Habakuk. Merhat ia gelah kalak jahat ikernepken. Tapi terus ia sabar janah nina, “Tetap aku tedis bas inganku erjaga.” (Haba. 2:1, NW) Contoh si debanna eme Paulus. Pernah ikatakenna maka merhat ia ‘ndungi’ pelayanenna i doni. Aminna pe bage tetap ia sabar “mberitaken berita si meriah.”​—Perb. 20:24.

¹⁴ Cuba perdiateken pengalamen sepasang perbulangen ras ndehara si tamat arah Sekolah Gilead nari. Itugasken kalak e ku sada negeri si sitik kel ngenca Saksi Jahwe i je janah teremen kalak si i je la eragama Kristen. Sitik kel ngenca kalak si nggit erlajar Pustaka. Sebalikna, teman-teman sekelasna bas Sekolah Gilead mbarenda si ngelayani bas negeri-negeri si deban rusur cerita maka melala kalak si erlajar ras iperidiken bas daerahna. Tapi pasangen e ndai terus sabar erberita aminna pe teremen kalak la nggit megiken. Kenca waluh tahun erberita i bas negeri e, dungna lit salah sada arah kalak si erlajar Pustaka iperidiken. Enda erbanca meriah kel ukur kalak e. Kai si banci sipelajari arah usihen-usihen si edenga sibahas? Kalak si setia enda ndai terus semangat erberita. Emaka ipasu-pasu Jahwe me kesabarenna. Mbera-mbera ‘siusih kalak si ndatken warisen si ijanjiken Dibata, perban kalak e erkiniteken janah sabar.’​—Heb. 6:10-12.

15. Kai salah sada buktina kiniteken banci mpepaguh tekadta guna erberita?

¹⁵ Kiniteken banci mpepaguh tekadta gelah terus erberita. Kai buktina? Perban erkiniteken kita man beritata, semangat kita nceritakenca man kerina kalak. Tek kita man janji si lit i bas Pustaka si Badia. (Msm. 119:42; Jes. 40:8) Enggo ka siidah melala nubuat si igenapi bas jamanta. Siidah ka uga Pustaka enggo ngubah kegeluhen kalak. Bukti-bukti enda erban kita reh tekna maka berita si meriah kerna Kerajan eme berita si perlu ibegiken kerina kalak.

16. Menurut Masmur 46:2-4, uga kiniteken man Jahwe bage pe man Jesus banci mpegegehi tekadta guna terus erberita?

¹⁶ Kita pe erkiniteken ka man Jahwe, sumber berita si meriah, janah erkiniteken ka kita man Jesus si enggo ilantik Jahwe jadi Raja bas KerajanNa. (Joh. 14:1) La soal kai pe si terjadi man banta, lalap kita ijaga Jahwe janah ipegegehiNa. (Baca Masmur 46:2-4.) Selain si e, tek kita maka terus isampati Jesus pendahin erberita arah surga nari. Igunakenna gegeh ras kuasa si enggo ibereken Jahwe man bana.​—Mat. 28:18-20.

17. Ceritaken sada contoh si mbuktiken maka perlu kita terus erberita.

¹⁷ Kiniteken erban kita tek maka pasti ipasu-pasu Jahwe usahata guna terus erberita janah e mon-mon alu cara si la sisangka-sangka. (Peng. 11:6, NW) Tiap wari lit ribun kalak si lewat arah gerai si iban Saksi-Saksi Jahwe. Berhasil nge erberita alu cara si bage? Ue, berhasil. Bas Pelayanan Kerajaan Kita bulan November tahun 2014 lit pengalamen kerna sekalak anak kuliah si atena erban tulisen kerna Saksi Jahwe. La itehna i ja lit  Bale Kerajan, tapi kepeken bas kampusna lit gerai janah bas gerai e idatna me bahan-bahan si iperlukenna guna erban tulisen kerna Saksi Jahwe. Dungna iperidiken me ia jadi Saksi Jahwe janah gundari ia sekalak perintis biasa. Arah pengalamen e terbukti maka lit denga kalak si nggit megiken berita si meriah.

18. Engkai maka kita banci tek maka pendahin erberita e pasti dung i bas waktu si enggo itentuken Jahwe?

¹⁸ Banci kita tek maka pendahin erberita e pasti dung i bas waktu si enggo itetapken. Cuba ukurindu kai si terjadi bas jaman Nuah. Kira-kira 120 tahun ope terjadi Banjir si Mbelin, enggo itetapken Jahwe ndigan terjadi banjir e. Ertahun-tahun kenca si e, isuruh Jahwe Nuah mbangun bahtera. Kira-kira 40 ntah pe 50 tahun ope terjadi banjir, terus Nuah kerja keras ndahiken dahinna. Aminna pe la lit kalak si megiken Nuah, terus ipersingetina kalak e. Terus ilakoken Nuah dahin e seh ngasa isuruh Jahwe ibabana binatang-binatang masuk ku bas bahtera. Kenca si e, i bas waktu si enggo itentuken “ipintu [Jahwe] pintun kapal ndai.” (Kej. 6:3; 7:1, 2, 16) Arah kejadin e terbukti maka ikutken Jahwe lalap jadwal si enggo itentukenNa.

19. Kai si nandangi ilakoken Jahwe?

¹⁹ Kentisik nari ipebetehken Jahwe man banta maka dung me pendahin erberita enda. Kenca si e, ikernepkenNa me doni Setan si jahat enda. Jenari ibanNa doni enda jadi mbaru janah kalak si patuh ngenca man Dibata si tading i je. Janahta nimai, mbera-mbera terus denga siusih Nuah, Habakuk, ras kalak si debanna si tetap semangat erberita. Mbera-mbera terus kita semangat erberita, sabar, janah tetap sipegegehi kinitekenta man Jahwe bage pe man janjiNa.